Imanoen so Propesiya nen Daniel!

Katuloyan na Kapitulo Nuebe

Siopa so Manuley ed Mundo?

Mangukom so Kadaanan na Ag-agew

33. (a) Siopa so Kadaanan na Ag-agew? (b) Anto iramay ‘abuskag iran libro’ diad mangatatawen a Panangukoman?

³³ Kayarin imparungtal so apatiran ayayep, inyarap nen Daniel so imano to manlapud komapat ya ayep dia ed say eksena ed tawen. Anengneng ton akayurong so Kadaanan na Ag-agew ed say masnag a trono to bilang Ukom. Say Kadaanan na Ag-agew et anggapoy arum noagta si Jehova a Dios. (Salmo 90:2) Diad igapo na mangatatawen a Panangukoman, anengneng nen Daniel so ‘abuskag iran libro.’ (Daniel 7:9, 10) Lapud say kiwawala nen Jehova et onnatnat diad andi-geter ya apalabas, amta ton amin so awaran na too a singano nisulat itan ed libro. Naimatonan ton amin so apatiran simbolikon ayayep tan nayarian toran ukomen unong ed personal a pikakabat to.

34, 35. Antoy nagawa ed “melag” a saklor tan arum niran inaayep a pakayari?

³⁴ Intuloy nen Daniel: “Ninengneng ko ed satan a panaon lapu ed bosis na saray angkabaleg a salita a sinalita na saklor; ninengneng ko angga lanlamang ed impatey na ayep, et say laman to alinglingkay, tan niyawat pian napoolan ed apoy. Et no nipaakar ed arum ed saray ayep, say panuley da nakal; anggan ontan saray bilay da apalobaan ed say a nigeter a panaon tan sakey a panaon.” (Daniel 7:11, 12) Inkuan na anghel ed si Daniel: “Say pangukom [“Panangukoman,” NW] nigeter naani, et ekalen da naani so panuley to, pian sikato so upoten tan bagbagen angga ed anggaan.”​—Daniel 7:26.

³⁵ Diad ganggan na Baleg ya Ukom, si Jehova a Dios, say saklor ya angayew ed Dios tan nansesga ed “saray sasanto” et sagmaken to met so singa sinagmak na Empiryo na Roma, ya amasegsegang ed inmuunan Kristiano. Agmansiansia so pananguley to. Ontan met ed say abebbeban singa saklor ya “arari” a nanlapu ed Empiryo na Roma. Komusta balet so nipaakar ed saray pananguley a nanlapud datin inaayep iran pakayari? Singa nipasakbay, aparukey so bilay da “ed panaon tan sakey a panaon.” Saray sakop da so nantultuloy a walaray manaayam. Alimbawa, inokupaan na Iraq so teritorya na kadaanan a Babilonia. Wala nin siansia so Persia (Iran) tan Gresya. Saray nakekeraan ed sarayan sankamundoan a pakayari so kabiangan na Nasyones Unidas. Natawtaw met irayan panarian sano napalanit so unor a sankamundoan a pakayari. Amin a gobierno na too so nagalpong diad “bakal na baleg ya agew na Dios, a Makapanyarin amin.” (Apocalipsis 16:14, 16) Balet, siopa sirin so manuley ed mundo?

Asingger Lay Magnayon a Pananguley!

36, 37. (a) Siopay atukoy a “singa sakey ya anak na too,” insan kapigan tan anto so gagala na inyapireng to diad mangatatawen a Panangukoman? (b) Antoy niletneg nen 1914 K.P?

³⁶ “Anengneng ko ed saray pasingawey ed labi, et, nia!” inkelyaw nen Daniel. “Linma ed saray lurem na tawen so sakey a singa sakey ya anak na too, tan sinmabi so inkadaan na saray agagew [“Kadaanan na Ag-agew,” NW], et sikato so insingger da ed arap to.” (Daniel 7:13) Sanen wadiad dalin, tinawag nen Jesu-Kristo so inkasikato ya “Anak na too,” a mangipatnag ed relasyon to ed katooan. (Mateo 16:13; 25:31) Inkuan nen Jesus ed Sanhedrin, odino atagey a korte na Judio: “Nanengneng yo naani so Anak na too a manyudyurong ed nikawanan a lima na pakayari, tan onla dia ed tapew na saray lurem na tawen.” (Mateo 26:64) Kanian diad pasingawey nen Daniel, say sakey ya onsabi et agnanengneng na saray mata na too, tan onasingger ed si Jehova a Dios et say apaoli tan nigloria a Jesu-Kristo. Kapigan iya agawa?

³⁷ Akisipanan so Dios ed si Jesu-Kristo nipaakar ed Panarian, a singa ginawa to ed si Arin David. (2 Samuel 7:11-16; Lucas 22:28-30) Sanen “say aturon panaon na saray nasyon” so angangga nen 1914 K.P., si Jesu-Kristo, bilang maarin tomatawir nen David, so makanepegan a mangawat na pananguley ed Panarian. Oniay nabasa ed mapropetikon rekord nen Daniel: “Sikato so naikdan na panuley, tan gayaga, tan sakey a panarian, ya amin so saray baley, saray nasyon, tan pansasalita, manlingkor ira komon ed sikato. Say panuley to sikato so lawas a panuley, a sikato so agnaani onlalabas, tan say panarian to ed satan sikato so agnabagbag.” (Daniel 7:14) Lapud satan et niletneg so Mesianikon Panarian diman ed tawen nen 1914. Balet, niiter met so pananguley ed arum.

38, 39. Siopa so makaawat na andi-anggaan a pananguley dia ed mundo?

³⁸ “Saray sasanto na Sankatagyan awaten da naani so panarian,” inkuan na anghel. (Daniel 7:18, 22, 27) Si Jesu-Kristo so manunaan a santo. (Gawa 3:14; 4:27, 30) Saray arum a ‘sasanto’ a miuley et say 144,000 a matoor ya alanaan na espiritu iran Kristiano, a tomatawir na Panarian a kaiba nen Kristo. (Roma 1:7; 8:17; 2 Tesalonica 1:5; 1 Pedro 2:9) Sikaray apaoli bilang imortal ya espiritu a manuley a kaiba nen Kristo diad mangatatawen a Palandey Sion. (Apocalipsis 2:10; 14:1; 20:6) Kanian, si Kristo Jesus tan saray apaolin alanaan a Kristiano so manuley ed mundo na katooan.

³⁹ Nipaakar ed pananguley na Anak na too tan arum nin apaolin ‘sasanto,’ inkuan na anghel na Dios: “Say panarian tan panuley, tan say kabaleg na saray panarian ed lepsag na amin a tawen niiter naani ed saray baley na saray sasanto na Sankatagyan. Say panarian [da] sikato so panarian lawas, tan amin a panuley manlingkor tan onunor ira naani ed [sikara].” (Daniel 7:27) Agaylan bendision so nagamoran na matulok a katooan ed silong na satan a Panarian!

40. Panon itayon nagunggunaan diad pangimano tayo ed kugkugip tan saray pasingawey nen Daniel?

⁴⁰ Agkabat nen Daniel so amin a makapakelaw a kasumpalan na saray pasingawey ya inter na Dios. Inkuan to: “Dia so anggaan na bengatla. No nipaakar ed siak, si Daniel, saray kanonotan ko ginonigon da ak a tuloy, tan say lupak nauman; balet inyatol ko so bengatla ed pusok.” (Daniel 7:28) Anggaman ontan, sikatayo so manbibilay ed panaon a natalosan tayo so kasumpalay anengneng nen Daniel. Say pangimano ed sayan propesiya so mamabiskeg na pananisia tayo tan mamaelet na kombiksion tayo a say Mesianikon Ari a tinuro nen Jehova so manuley ed mundo.

Anto so Atebek Yo?

• Anto so isisimbolo na balang sakey ed ‘apatiran angkabaleg ya ayayep a pinmaway ed dayat’?

• Antoy tugyopen na “melag” a saklor?

• Panon a “saray sasanto” so sinesga na simbolikon melag a saklor legan na Guerra Mundial I?

• Antoy nagawa ed simbolikon melag a saklor tan say arum ya inaayep iran pakayari?

• Panon kayon nagunggunaan diad pangimano ed kugkugip tan saray pasingawey nen Daniel nipaakar ed “apatiran angkabaleg ya ayayep”?

[Tsart ed pahina 20]

SARAY SANKAMUNDOAN A PAKAYARI ED PROPESIYA NEN DANIEL

Balitok BABILONIA Nampayak

ya ulo manlapud 607 K.K.P. a leon

Saray pagew tan MEDO-PERSIA Oso

taklay a pilak manlapud 539 K.K.P.

Eges tan saray GRESYA Nampayak

ulpo a gansa manlapud 331 K.K.P. a leopardo

alaokan dia ed

na langa panaon na anggaan

Paimano: Parad ilustrasyon, ipangasin nengnengen so libron Pay Attention to Daniel’s Prophecy!, pahina 139.