Imanoen so Propesiya nen Daniel!

Kapitulo Dies

Siopay Makaalagey a Sumpa ed Prinsipe na Saray Prinsipe?

1, 2. Akin ya importanti ed sikatayo so pasingawey ed si Daniel dia ed komatlon taon na uley nen Belsasar?

PITOMPLO tan pitoy taon lay linmabas nanlapula’d inkaderal na templo nen Jehova diad Jerusalem. Si Belsasar tan say ama to, si Nabonidus, so saniban manuuley ed Empiryo na Babilonia, say komatlon sankamundoan a pakayari unong ed propesiya na Biblia.a Nibantak ed Babilonia so propeta na Dios a si Daniel. Tan dia “ed komatlo a taon na impanari nen ari Belsasar,” inikdan nen Jehova si Daniel na sakey a pasingawey a mangiparungtal ed pigaran detalyi na kipawil na tuan panagdayew.​—Daniel 8:1.

² Say mapropetikon pasingawey ya anengneng nen Daniel et baleg so epekto na satan ed sikato tan makapainteres a maong itan ed sikatayoran manbibilay ed “panaon na anggaan.” Inkuan nen anghel Gabriel ed si Daniel: “Wadia ak a mangipaamta ed sika no antoy nagawa ed kaunoran a kabiangan na sanok, lapud satan so parad aturon panaon na anggaan.” (Daniel 8:16, 17, 19, 27, NW) Sirin, lapud pirmin makapainteres, konsideraen tayo so anengneng nen Daniel tan say kabaliksan na satan parad sikatayo natan.

Kalakian a Karneron Walaay Duaran Saklor

3, 4. Anton ayep so anengneng nen Daniel ya akaalagey ed arap na aagusan na danum, tan antoy isisimbolo na satan?

³ “Anengneng ko so pasingawey,” so insulat nen Daniel, “natan agawa a sanen anengneng ko, wala ak ed Susan a palasyo, a wala ed luyag na Elam; et anengneng ko dia ed pasingawey, tan wala ak nensaman ed abay na ilog ya Ulai.” (Daniel 8:2) Agnibaga no kasin aktual a wadman si Daniel ed Susan​—say kabisera na Elam, a nipasen ed 350 a kilometro ed bukig na Babilonia​—odino akaonla diman panamegley labat na pasingawey.

⁴ Intuloy nen Daniel: “Saman la intangay ko so saray matak, et anengneng ko, et, nia, sakey a karnero a kalakian a nanalagey ed arap na ilog, a walaan na duaran saklor.” (Daniel 8:3a) Agnansiansian misteryo ed si Daniel no anto so kalakian a karnero. Insalaysay ed saginonor nen anghel Gabriel: “Saman so karnero a kalakian ya anengneng mo a walaan nensaman na duara a saklor, sikara so saray arari na Media tan Persia.” (Daniel 8:20) Saray Medo so nanlapud mapalandey a patar ed bukig na Asirya, tan datin alis-alis iray Persiano diad rehyon ya amianen na Gulpo na Persia. Balet, diad imbaleg na Empiryo na Medo-Persia, nagmaliw a pirmin maluho iray ombaley ditan.

5. Panon a say saklor a “tinmubo a naunor” so nagmaliw ya atagtagey?

⁵ “Saray duaran saklor to atagey ira,” so imbalita nen Daniel, “balet say sakey so atagtagey nen say sakey, et saman so atagtagey tinmubo a naunor.” (Daniel 8:3b) Say atagtagey a saklor a tinmubo ed saginonor so mangilitrato ed saray Persiano, bangbalet say sananey a saklor so mangirepresenta ed saray Medo. Diad inmuna, matalona iray Medo. Balet nen 550 K.K.P., main-inomay a tinalo nen Ciro say manuley na Persia si Arin Astyages na Media. Pinanlaok nen Ciro iray kustombre tan ganggan na duaran totoo, ya impankasakey to iray panarian da, tan pinaawang da so sakop da. Nanlapula’d saman, nagmaliw lan mankaiba so pakayari na empiryo.

Linmastog a Maong so Kalakian a Karnero

6, 7. Panon ya ‘anggapoy atap ya ayayep ya akaalagey ed arap’ na kalakian a karnero?

⁶ Intuloy toy impaneskribe ed kalakian a karnero, inkuan nen Daniel: “Anengneng ko so karnero a mamobono a mamasagur, tan mamaamianen, tan mamaabalaten; et anggapo so anto ya ayep ya akaalagey ed arap to, tan anggapo met so anggan siopa a makaukpos ed lima to; noag ingen ginawa to so unong ed labay to, tan intandoro to so inkasikato.”​—Daniel 8:4.

⁷ Diad akaunan pasingawey a niiter ed si Daniel, say Babilonia so inlitrato na atap ya ayep a pinmaway ed dayat tan satan et singa sakey a leon a nampayak na agila. (Daniel 7:4, 17) Satan a simbolikon ayep so talagan ag-akaalagey ed arap na ‘kalakian a karnero’ diad sayan balon pasingawey. Say Babilonia so kinobkob nen Ciro a Baleg nen 539 K.K.P. Ngalngali 50 taon kayari na satan, ‘anggapoy atap ya ayayep,’ odino mapolitika iran gobierno ya akaalagey a sumpa ed Empiryo na Medo-Persia​—say komapat a sankamundoan a pakayari unong ed propesiya na Biblia.

8, 9. (a) Panon a say ‘kalakian a karnero’ so “mamobono a mamasagur, tan mamaamianen, tan mamaabalaten”? (b) Antoy inkuan na libro na Ester nipaakar ed sinmalat ed Persiano ya Arin Dario I?

⁸ Nanlapu ed ‘bubutayan na agew’​—ed bukig​—ginawa na Sankamundoan a Pakayari a Medo-Persia so panliketan to, a “mamobono a mamasagur, tan mamaamianen, tan mamaabalaten.” (Isaias 46:11) Si Arin Cambyses II, a sinmalat ed si Ciro a Baleg, so angobkob ed Ehipto. Say sinmalat ed sikato et say Persiano ya Arin Dario I, ya amasagur a binmeltang ed saray mainget a dalan na danum na Bosporus nen 513 K.K.P. insan linmusob ed teritorya na Europa a Thrace, say kabisera to so Byzantium (Istanbul natan). Nen taon 508 K.K.P., dineral to so Thrace, tan kinobkob to so Macedonia nen 496 K.K.P. Kanian, diad panaon nen Dario, say ‘kalakian a karnero’ a Medo-Persia so anamsam ed teritorya diad taloran manunaan a direksion: amaamianen dia ed Babilonia tan Asirya, amasagur dia ed Asia Minor, tan amaabalaten dia ed Ehipto.

⁹ Diad pamaneknek ed kabaleg na Empiryo na Medo-Persia, sinaglawi na Biblia so sinmalat ed si Dario, si Xerxes I, bilang “si Asuero a nanari a nanlapu ed India angga ni ed Etiopia, ed sanlasus tan duamplo tan pito a luyag.” (Ester 1:1) Balet sayan baleg ya empiryo so sinmuko ed sananey, tan lapud saya, imparungtal na pasingawey nen Daniel so pigaran makapasagyat a detalyi a mamabiskeg ed pananisia tayo diad mapropetikon salitay Dios.

Kinabil na Kalakian a Kanding so Kalakian a Karnero

10. Diad pasingawey ed si Daniel, anton ayep so angabil ed ‘kalakian a karnero’?

¹⁰ Isipen so impakabigla nen Daniel ed anengneng to natan. Inkuan na salaysay: “Sanen nodnonoten ko, nia, sakey a kanding a kalakian so sinmabi a nanlapu ed sagur ed tagey na tapew na amin a dalin, tan agto diniwit so dalin et say kanding wala nensaman so saklor to a napatnagan ed nanleetan na saray mata to. Et sikato so dinmago ed karnero a kalakian a walaan nensaman na duara a saklor, a sikato so anengneng ko a manalalagey ed arap na ilog, et binmatik ya inmarap ed sikato ed petang na pakapanyari to. Et sikato so anengneng ko a sinmingger ed karnero a kalakian, et sikato so atenyeg ed sanok ya onsumpa ed sikato, et kinabil to so karnero a kalakian, et pinuter to so duara a saklor to; et anggapo so pakayari ed karnero a kalakian ya onalagey ed arap to; balet imbalsak to ed dalin, tan inggatin-gatin to; et anggapo so akayari ya angilaban ed karnero a kalakian ed lima to.” (Daniel 8:5-7) Antoy kabaliksan na sayan amin?

11. (a) Panoy impangipaliwawa nen anghel Gabriel ed “say kabagobago a kanding a kalakian” tan say “baleg a saklor” to? (b) Siopay inlitrato na sankaimanon saklor?

¹¹ Agnapadesiran nen Daniel anggan sikatayo so kabaliksan na sayan pasingawey. “Say kabagobago a kanding a kalakian sikato so ari na Gresya; et say baleg a saklor a wala ed nanleetan na saray mata to sikato so unona ya ari,” so impakabat nen anghel Gabriel ed si Daniel. (Daniel 8:21) Nen 336 K.K.P., akoronaan si Dario III (Codommanus), say unor ya ari na Empiryo na Persia. Diad satan met a taon, si Alejandro so nagmaliw ya ari ed Macedonia. Impanengneng na awaran a si Alejandro a Baleg so nipasakbay ya unonan “ari na Gresya.” Ginmapo ‘ed seselekan na agew,’ odino ed sagur, nen taon 334 K.K.P., mapmaples a kinmiwas si Alejandro. Singano ‘ag-ondadapo ed dalin,’ kinobkob toray teritorya tan kinabil to so ‘kalakian a karnero.’ Angangga so ngalngali duaran siglo a pananguley na Medo-Persia, a nagmaliw sirin so Gresya a komaliman sankamundoan a pakayari a walaay kabaliksan ed Biblia. Agaylan makatantandan kasumpalan na madibinon propesiya!

12. Panon ya “aputer” so “baleg a saklor” na simbolikon kanding, tan antoran apatiran saklor so sinmalat ed pasen to?

¹² Balet aganggano so pakayari nen Alejandro. Intuloy ya imparungtal na pasingawey: “Et saman a kanding a kalakian intandoro to so laman to lanlamang ed mapalalo; et sanen sikato so mabiskeg, saman so baleg a saklor to aputer; et dia ed pasen to tinmubo so apatira a napatnagan a saklor ya arap ed apatira a dagem na tawen.” (Daniel 8:8) Bilang pangipaliwawa ed propesiya, inkuan nen Gabriel: “No nipaakar ed saman so aputer a dia ed pasen to inmalagey so apatira, apatira a panarian so onalagey naani ed nasyon, balet aliwa a pati pakapanyari to.” (Daniel 8:22) Singa nipasakbay, diad kapantokan na impanbiktorya to, “aputer” odino inatey si Alejandro, nen mantaon labat na 32. Tan agnambayag et say baleg ya empiryo to so naapag-apag ed apatiran heneral to.

Misteryoson Melag a Saklor

13. Antoy tinmubo’d sakey ed saray apatiran saklor, tan panoy inkiwas na satan?

¹³ Saknapen na ontumbok a kabiangan na pasingawey so masulok a 2,200 a taon, a say kasumpalan na satan so onsabi angga ed modernon panaon. Insulat nen Daniel: “Nanlapu ed sikara [apatiran saklor] pinmaway so sakey a saklor a melag, a sikato so binmaleg a tuloy, ya arap ed abalaten, tan arap ed bukig, tan arap ed magayaga a dalin. Et sikato so binmaleg a tuloy angga met lanlamang ed inayuraan na tawen, et say arum ed saray inayuraan tan ed saray bitewen impelag to ed dalin, tan inggatin-gatin to ra. On, intandoro to so inkasikato lanlamang, angga lanlamang ed manunaan na inayuraan; et inala to ed sikato so naynay a bagat a napoolan, tan say pasen na santuaryo to naplag ed dalin. Et say inayuraan niyawat ed sikato a niulop ed naynay a bagat a napoolan lapu ed impakasumlang; et impelag to ed dalin so katuaan tan ginawa to so nankaliktan to et inmaligwas.”​—Daniel 8:9-12.

14. Antoy inkuan nen anghel Gabriel nipaakar ed saray gawa na simbolikon melag a saklor, tan antoy nagawa ed satan a saklor?

¹⁴ Pian natalosan tayoy kabaliksan na saray salitan inaon, nepeg tayon imanoen so anghel na Dios. Kayari impanaglawi ed onsasabin pakayari na apatiran panarian manlapud empiryo nen Alejandro, inkuan nen Gabriel: “Sano kaunoran a panaon na panarian da, sano saray masumpa nasumpal ira, sakey ya ari a masebeg ya impanlupa, tan makatalos na saray ambilunget a kanonotan so onalagey naani. Et say pakapanyari to mabiskeg naani, balet ta agnisengeg ed dili a biskeg to; et bagbagen to naani a makapakelkelaw a tuloy; et onaligwas naani, tan gawaen to naani so kaliktan to: bagbagen to naani so saray mabiskeg tan saray masanto a totoo. Ed panamegley na kasiliban to paaligwasen to naani ed lima to so panamalingo et itandoro to naani so inkasikato ed puso to, tan dia ed katalkan to bagbagen to naani so dakel; onalagey met naani ya onsumpa ed Prinsipe na saray prinsipe; balet sikato so naderal naani ya andi lima.”​—Daniel 8:23-25.

15. Antoy inkuan na anghel a gawaen nen Daniel nipaakar ed say pasingawey?

¹⁵ “Balet iyatol mo so pasingawey,” so inkuan na anghel ed si Daniel, “ta nipaakar ed saray dakel ya agew ya onsabi naani.” (Daniel 8:26) Say kasumpalan na sayan kabiangan na pasingawey et agnagawa ed “dakel ya agew,” tan kaukolan ya ‘iyatol [nen Daniel] so pasingawey.’ Mapatnag a say kabaliksan na satan so misteryo ni ed si Daniel. Balet natan, seguradon angangga la iratan a “dakel ya agew.” Kanian itepet tayo: ‘Antoy imparungtal na awaran na mundo nipaakar ed kasumpalan na sayan mapropetikon pasingawey?’

(Ituloy ed ontumbok a paway.)

[Saray paimano ed leksab]