Kasin Uusaren Yon Maong?
1 “Labay ko la iyan iyopresin tampol ed panagpulong!” Ontan so insulat na sakey ya agin bii kayari ton binasa so Say Panag-Bantayan na Enero 1, 2008. Kasin inumameng yo la so pigara ed saray regular ya artikulo na publikon edisyon, tan wala ta ray nalmoan yon paraan ed pangiyopresi ed saratan diad ministeryo yo?
2 “No Anto so Naaralan ed si Jesus”: Nayarin apaneknekan yo la a sayan artikulo et makatulong ed pangigapo na saray panangiyaral na Biblia. No andi ni, salien ya ibasa so titulo na artikulo ed unabung insan ipaimano so imbaga nen Jesus nipaakar ed satan, unong ya insalaysay na unonan parapo. No interesado so unabung, panggunaetan ya ituloy ya isingbat diad pangusar ed saray subtitulo, a denisinyo a tepet pian nasagyat so interes na totoo. Tepetan so unabung no antoy nikomento to ed tepet. Ipaliwawan magano so mitukoyan iran litrato, tan ituloy ed ontumbok a parapo. Nayarin nakobrian yo so unonan kapaldua na artikulo ed primeron idalaw insan isingbat so nakekeraan ni sano ompawil kayo. Manparaan parad pangituloy ed panagaral ed libron Ibabangat na Biblia.
3 “No Panon a Magmaliw a Maliket so Pamilya”: Sayan serye, ya ompapaway kada taloy bulan, so inggagala pian tulongan iray kaasawaan a lalaki tan bibii, ontan met ed atateng pian natalosan da no panon ya iyaplika iray prinsipyo na Biblia sano aarapen iray probleman mamubuyak ed kareenan na pamilya. Nayari yo met ya usaren irayan artikulo pian tulongan iray aliwan Tasi a natebek so kakabatan a naromog ed Biblia.—2 Tim. 3:16, 17.
4 Saray Artikulon Parad Saray Kalangweran: Saray seryen “Parad Saray Kalangweran” et pannonoten to iray manbasa, tan nausar diad pamalaknab ed espisipikon salaysay na Biblia. Nayari yon usaren irayan artikulo a panulong ed saray kalangweran a nakatongtong yo ed ministeryo pian natalosan da so praktikal a kablian na panaral ed Salitay Dios. (Sal. 119:9, 105) Sano mitotongtong ed atateng, nayari yon ipabitar so serye ya “Ibangat Iray Anak Yo,” ya ompapaway kada ontumbok a bulan. Sarayan artikulo so makatulong ed saray ugugaw nin anak pian makaaral na importante iran leksion ed saray karakter na Biblia. Kasin inanamot yo la so pankanawnawan ibasa irayan artikulo ed ananak yo?
5 Arum ni ran Artikulo: Kada bulan, say artikulon “Tepet na Saray Manbabasa” so manisingbat ed nayarin itepet na saray aliwan Tasi. Nayari yon ipabitar iyan artikulo sano iyoopresi yo iray magasin ed kabkaabungan. Say artikulo a “Sulat a Nanlapud . . .” so nayarin report a mismo na saray misionaryo tan arum ni ra, a mangipapanengneng ed saray problema odino kairapan ya aarapen da diad panusumpal da ed ministeryo ra. Sarayan artikulo so makatulong ed saray interesado pian natebek da a say maong a balita so nipupulong la ed interon dalin, bilang kasumpalan na tanda na kiwawala nen Kristo.—Mat. 24:3, 14.
6 Say binulan ya artikulo ya “Onapit ed Dios,” a nibase ed panagbasa na Biblia ed Teokratikon Eskuelaan Parad Ministeryo, so nayarin mamakiwas ed saray talagan malabay a makaaral ni na dakel nipaakar ed si Jehova. Saray seryen “Alig Yoy Pananisia Ra,” ya ompapaway a mamipat ed sakey taon, so adesinyo pian tulongan iray manbabasa a nilitrato ra ed nonot da iray salaysay na Biblia, tan pian magmaliw a mabilabilay iray karakter na Biblia, salanti, saray desisyon da, saray problema odino irap a dinalan da, tan say pananisia ra.
7 Agaylan makapaliket so pakaawat na isyu na Say Panag-Bantayan tan Watchtower kada bulan ya adesinyon usaren ed lawak! Kanian, komon ta ikabisado tayo iray lugan na satan tan sigpot ya usaren ed ministeryo.