Saray Reperensya Parad Workbook ed Aral
ABRIL 1-7
KAYAMANAN ED SALITA NA DIOS | 1 CORINTO 7-9
“Pagmaliw ya Anggapoy Asawa—Sakey ya Regalo”
(1 Corinto 7:32) On, labay ko ya anggapo so kapagaan yo. Say lakin anggapoy asawa et mapaga ed saray bengatlan nipaakar ed Katawan, no panon ton napaliket so Katawan.
Anamot Moy Pagmaliw ya Andiay Asawa
3 Say sakey a walad kasuloan et mas dakel so panaon tan kawayangan ton gawaen so labay to, nen say walay asawa. (1 Cor. 7:32-35) Baleg irayan bentaha pian napalaknab toy ministeryo to, ninatnat to ni panangaro to’d arum, tan lalon onapit ed si Jehova. Kanian, dakel a Kristiano so angapresya ed gunggona na walad kasuloan tan nandesidin “mangawat ed saya” diad loob na pigaran panaon. Saray arum et nayarin agda implano nen inmuna so pagmaliw ya andiay asawa, balet sanen anguman so sirkumstansya ra, sipipikasi ran inusisay situasyon da tan amoria ran diad tulong nen Jehova et ‘desidido la ed puso ra.’ Kanian, inawat day anguman a sirkumstansya ra tan say pagmaliw ya andiay asawa.—1 Cor. 7:37, 38.
(1 Corinto 7:33, 34) Balet say lakin walaay asawa et mapaga ed saray bengatlan nipaakar ed mundo, no panon ton napaliket so asawa to, 34 tan sikatoy naapag. Niarum ni, say biin anggapoy asawa odino say birhen et mapaga ed saray bengatlan nipaakar ed Katawan, pian sikatoy magmaliw a masanto nipaakar ed laman to tan ed espiritu to. Balet, say biin walaay asawa et mapaga ed saray bengatlan nipaakar ed mundo, no panon ton napaliket so asawa to.
Saray Pabitar ed Saray Libro a Corinto
7:33, 34—Anto so tutukoyen na balikas a “saray kayarian na mundo” a pampagaan na saray walaan na asawa? Tutukoyen nen Pablo iray bengatla a diad inagew-agew a bilay et nepeg a pampagaan na saray Kristianon walaay asawa. Kabiangan ed saraya so tagano, kawesen, tan panayaman, balet agkabiangan iray mauges a bengatla na sayan mundo ya ipupulisay na saray Kristiano.—1 Juan 2:15-17.
(1 Corinto 7:37, 38) Balet, no say siopaman et determinado ed puso to tan agto nalilikna iyan pankaukolan, noagta walaan na kontrol ed no antoy labay to tan desidido a mansiansian anggapoy asawa, makagunggona itan ed sikato. 38 No ontan sirin, siopaman a mangasawa et nagunggonaan, balet samay agmangasawa et mas nagunggonaan.
Kasuloan—Puerta ed Agnagirogiron Kimey
14 Say walad kasuloan a Kristiano ya uusaren toy kipapasen ton anggapoy asawa a gegemtanen iray sinisiblet a kalat et aliwan “magmaong” so gagawaen to nen say walay asawan Kristianos. Sikato so mansiasiansian walad kasuloan, aliwan “nisengeg ed panarian na tawen,” noagta lapud personal iran rason. (Mateo 19:12) Kaukolan a “panpagaan [na anggapoy asawan laki odino bii] so kayarian na Katawan,” a panpapagaan “no panon kasi pamalike’to ed Katawan,” tan magmaliw a lawas ‘panlingkoran so Katawan ed agnagirogiro.’ Kabaliksan na saya so pangitalaga na agnaapag ya imano ed panlingkor ed si Jehova tan ed Kristo Jesus. Diad panggawa labat na ontan a “magmaong” so nagagawaan na saray andiay asawan Kristianon lalaki tan bibii nen say walaay asawan Kristianos.
Pankotkot na Espiritual a Kayamanan
(1 Corinto 7:11) Balet no misian, sikatoy mansiansian anggapoy asawa odino mipawilan ed asawa to; tan say asawan laki et nepeg ya agto taynanan so asawa to.
Kaaruman ya Impormasyon
Wala ray situasyon ya nandesisyon a misian so arum ya Kristiano anggano agnanggawa na imoralidad so asawa ra. (1 Corinto 7:11) Diad sarayay ontumbok ya situasyon, ompan mandesisyon so sakey a Kristiano ya misian.
• Ginagalan agpanlegpet ed pamilya: Aglabay ya itarya na asawan laki so materyal ya pankaukolan na pamilya to ya anggad anggapo lay kuarta odino naakan da.—1 Timoteo 5:8.
• Graben panagmaltrato: Alabas ya panagmaltrato ya anggad napepeligro lay bunigas tan bilay na sakey ya asawa.—Galacia 5:19-21.
• Talagan napepeligro lay relasyon na sakey ed si Jehova: Lapud gagawaen na asawan laki o bii et imposible lan makapanlingkor ed si Jehova so asawa to.—Gawa 5:29.
(1 Corinto 7:36) Balet, no iisipen na siopaman ya agla manepeg so ikikiwas to diad pansiasiansia ton anggapoy asawa, tan no linmampas lad taon na kalangweran to, nepeg ya oniay nagawa: Abuloyan yon gawaen toy labay to; sikatoy agmankasalanan. Abuloyan yo ran mangasawa.
Makapansiansia Kan Malinis ed Sayan Imoral a Mundo
Kanian kaukolan a saray kalangweran so ag-apuradon onloob ed panamaley sano nalikna da lay isigbo na pampilalek ed sekso. Kakaukolanen na panangasawa so pipaknaan, tan say pambilay unong ed satan a responsabilidad so mankakaukolay inkatatken. (Genesis 2:24) Marakep no alagarey ilabas ni na “bolaklak na taon”—say panaon a kapetang-petangan na saray liknaan ed pisekso tan mamikewet itan ed pandesisyon na sakey. (1 Corinto 7:36) Tan agaylan makulangkulang tan makasalanan so sakey a wala la’d edad a manpipilalek a mangasawa a manggaway imoral a relasyon lapu labat ta anggapoy naasawa to!
Panagbasa ed Biblia
(1 Corinto 8:1-13) Natan nipaakar ed kakanen ya inyapay ed saray idolo: Amta tayo a walay kakabatan tayon amin. Say kakabatan et pansengegan na panagpaatagey, balet say aro et makapabiskeg. 2 No iisipen na siopaman a walay amta to nipaakar ed sakey a bengatla, agto ni amtan amin so nepeg ton amtaen nipaakar ed satan. 3 Balet no say sakey et aaroen toy Dios, sayan too et kabat to. 4 Natan nipaakar ed pangan na kakanen ya inyapay ed saray idolo, amta tayon anggapoy kakanaan na sakey ya idolo diad mundo tan saksakey labat so Dios. 5 Ta anggano wala ray tatawagen a dirios, balanglan diad tawen odino diad dalin, no panon a dakel so “dirios” tan dakel so “katawan,” 6 diad tua et saksakey so Dios tayo, say Ama, a nanlapuan na amin a bengatla tan manbibilay itayo parad sikato; tan saksakey so Katawan, si Jesu-Kristo, a diad panamegley to et niwala so amin a bengatla tan manbibilay itayo diad panamegley to. 7 Balet aliwan amin et walaan na onian kakabatan. Ingen say arum, lapud mandadayew irad idolo nensaman, sano mamangan ira tan iisipen dan say kakanen da et imbagat ed idolo, say makapuy a konsiensia ra et nadudutakan. 8 Balet aliwan say kakanen so mangiyapit ed sikatayo ed Dios; no ag-itayo mangan, aliwa tayon mas mauges, tan no mangan itayo, aliwa tayon mas maong. 9 Balet alwaran yo a say kanepegan yon manpili et agpakagapolan na saramay makapuy. 10 Ta no sika a walaay kakabatan et mangakan kad templo na idolo tan nanengneng ka na samay makapuy, agkasi naapektoan so konsiensia to a nitepel to lay mangan na kakanen ya inyapay ed saray idolo? 11 No ontan, say kakabatan mo so pakakaderalan na samay makapuy, say agim, a nisengeg ed sikato et inatey si Kristo. 12 Sano mankasalanan kayod saray agagi yo ed onian paraan tan nasugatan yoy makapuy a konsiensia ra, mankakasalanan kayod si Kristo. 13 Kanian no say kakanen et pakagapolan na agik, agak lan balot mangan lamet na karne, pian agnagapol ed siak so agik.
ABRIL 8-14
KAYAMANAN ED SALITA NA DIOS | 1 CORINTO 10-13
“Matoor si Jehova”
(1 Corinto 10:13) Anggapoy tukso a sinmabid sikayo ya agni asali na arum a totoo. Balet matoor so Dios, tan agto abuloyan a nipaarap kayod tukso ya agyo nayarian, balet sano onsabi so tukso et sikatoy manggawa met na dalan a pawayan pian nasungdoan yo itan.
Tepetepet na Saray Manbabasa
Insulat nen apostol Pablo ya si Jehova et “agto abuloyan a nipaarap kayod tukso ya agyo nayarian.” (1 Cor. 10:13) Kasin labay ya ibaga na saya ya aamtaen la nen Jehova no anto ray nasarag tayo insan manpili na saray subok ya arapen tayo?
▪ No tua itan, isip mo pay epekto na satan. Oniay intepet na sakey a brother ya nambikkel so anak to: ‘Kasin inamta la nen Jehova ya nasarag min sanasawa so pambikkel na anak mi? Kasin agawa itan ta inisip na Dios ya nasarag mi?’ Kasin walay makatunongan ya rason pian panisiaan tayon imamaneobra nen Jehova iray nagagawad bilay tayo?
No aralen tayon maong so imbaga nen Pablo ed 1 Corinto 10:13, oniay magmaliw ya konklusyon tayo: Anggapoy Makasulatan a basiyan ya aamtaen la nen Jehova no anto ray nasarag tayo insan manpili na saray subok ya arapen tayo. Pantongtongan tayoy apatiran rason no akin ya ontan so konklusyon tayo.
Unona, inikdan nen Jehova iray totoo na kawayangan a mandesisyon. Labay ton sikatayoy manpili no antoy gawaen tayod bilay tayo. (Deu. 30:19, 20; Jos. 24:15) No dugay pilien tayo, nailaloan tayoy panangigiya to. (Pro. 16:9) Balet no aliway pilien tayo, anien tayoy resulta na ginawa tayo. (Gal. 6:7) No si Jehova so manpipili ed saray subok ya arapen tayo, agta singa to lanlamang isisiblet so kawayangan tayon mandesisyon?
Komadua, ag-itayo ipapaliis nen Jehova ed “saray ag-iilaloan a nagawa.” (Ecl. 9:11) Nagagawa iray graben aksidente tan ompan mabayag ni ingen so epekto na satan, lapud nibanan wadman itayo. Walay imbaga nen Jesus ya trahedyan 18 so inatey ta atapilan iray tori, tan impaimano ton aglabay na Dios itan ya agawa. (Luc. 13:1-5) No ontan sirin, agta aliwan makatunongan ya isipen ya dedesisyonan la na Dios no siopa ray nabilay tan ompatey lapud saray ag-iilaloan ya nagawa?
Komatlo, kada sakey ed sikatayo et nalalanor ed isyu na katooran. Tandaan ya kinuestion nen Satanas so katooran na amin ya manlilingkor ed si Jehova, tan ibabaga ton ag-itayo mansiansian matoor ed si Jehova no wala ray subok. (Job 1:9-11; 2:4; Apo. 12:10) No ipaliis itayo nen Jehova ed saray subok lapud inamta to la ya agtayo nasarag iratan, agta napruebaan laingen ya dugay akusasyon nen Satanas ya manlilingkor tayod Dios lapud walay napipinabangan tayo?
Komapat, agkaukolan nen Jehova ya amtaen so amin ya nagawad sikatayo. No aamtaen la nen Jehova iray subok ya arapen tayo, di singa ompapaway ya amta to lay amin ya nagawad sikatayo. Balet aliwa itan ya base ed Kasulatan. Tua, sarag na Dios ya amtaen so nagawad arapen. (Isa. 46:10) Balet ibabaga na Biblia ya pipilien to labat iray aamtaen ton nagawa. (Gen. 18:20, 21; 22:12) Babalansien to sirin so pakayari ton amtaey arapen tan say panrerespeto tod kawayangan tayon mandesisyon. Agta ontan so iilaloan tayod Dios ya mamapabli ed kawayangan tayo tan naynay ya balanse so panguusar tod amin ya kualidad to?—Deu. 32:4; 2 Cor. 3:17.
Anto sirin so labay ya ibaga na sayan imbaga nen Pablo: “Matoor so Dios, tan agto abuloyan a nipaarap kayod tukso ya agyo nayarian”? Say tutukoyen nen Pablo et no antoy gagawaen nen Jehova legan ya nasusubok itayo, aliwan antis. Ipapaseguro nen apostol Pablo ya anggan anton subok so arapen tayo, tulongan itayo nen Jehova no manmatalek tayod sikato. (Sal. 55:22) Sayan makaligliwan imbaga nen Pablo et nibase ed duaran importantin katuaan.
Unona, saray subok ya aarapen tayo et “asali na arum a totoo.” No ontan sirin, naeeksperiensya met na arum iray subok ya aarapen tayo. Saratan ya subok et nasarag tayo no manmatalek tayod Dios. (1 Ped. 5:8, 9) Diad konteksto na 1 Corinto 10:13, binitla nen Pablo iray subok ya naeksperiensya na saray Israelita diad kalawakan. (1 Cor. 10:6-11) Anggapod saraman ya subok so ag-asarag odino agnaanosan na saray matoor ya Israelita. Amipat ya imbaga nen Pablo ya agtinmulok so “arum ed sikara.” Makapaermen ta wala ray Israelitan nampatalo ed saray mauges ya pilalek lapud ag-ira nanmatalek ed Dios.
Komadua, “matoor so Dios.” Ipapatnag na impantrato na Dios ed totoo to ya matoor so panangaro tod “saramay mangaaro ed sikato tan manusumpal ed saray ganggan to.” (Deu. 7:9) Papaneknekan met na saray salaysay ed Biblia ya naynay a totooren na Dios iray promisa to. (Jos. 23:14) Lapud saray prueba ya talagan matoor so Dios, makapanmatalek iramay mangaaro tan manguunor ed sikato ya tooren to iyan duaran promisa to no wala ray subok: (1) Agto abuloyan ya onloor so subok ya anggad imposible lan naanosan itan, tan (2) ‘sikatoy manggawa na dalan a pawayan pian nasungdoan da itan.’
Panon ya manggagawa si Jehova na dalan a pawayan na saray manmamatalek ed sikato sano nasusubok? Siempre no labayen to, sarag ton ekalen so subok. Balet tandaan tayo imay imbaga nen Pablo: “Sikatoy [si Jehova] manggawa met na dalan a pawayan pian nasungdoan yo itan.” Kanian diad dakel ya situasyon, sikatoy manggagawa na “dalan a pawayan” diad pangiter toy nakaukolan tayo pian naanosan tayo ray subok. Imanoen no panon ya gagawaen nen Jehova itan:
▪ Sikato so “manliligliwa ed sikatayo diad amin a subok a dadalanen tayo.” (2 Cor. 1:3, 4) Sarag nen Jehova ya pakalmaen so nonot, puso, tan emosyon tayo panamegley na Salita to, say masanton espiritu to, tan say espiritual a naakan ya itatarya na matoor ya aripen.—Mat. 24:45; Juan 14:16, paimanod leksab; Roma 15:4.
▪ Nayarin igiya to itayo panamegley na masanton espiritu. (Juan 14:26) No wala ray subok, nayarin ipanonot na espiritu iray salaysay tan prinsipyod Biblia pian natebek tayo ray makabat ya gawaen.
▪ Sarag ton ibaki iray anghel ya ontulong ed sikatayo.—Heb. 1:14.
▪ Sarag ton usaren iray kaagian tayo ya mangibaga o manggawa na ‘mamabiskeg ed sikatayo.’—Col. 4:11, paimanod leksab.
Anto sirin so konklusyon tayod kabaliksan na imbaga nen Pablo ed 1 Corinto 10:13? Agmanpipili si Jehova na saray subok ya arapen tayo. Balet no wala ray subok, aya so segurado: No sigpot itayon manmatalek ed si Jehova, agto abuloyan ya onloor iray subok ya anggad agtayo la nasarag; sikatoy ‘manggawa na dalan’ pian naanosan tayo iratan. Talagan makaligliwa itan!
(1 Corinto 10:13) Anggapoy tukso a sinmabid sikayo ya agni asali na arum a totoo. Balet matoor so Dios, tan agto abuloyan a nipaarap kayod tukso ya agyo nayarian, balet sano onsabi so tukso et sikatoy manggawa met na dalan a pawayan pian nasungdoan yo itan.
(1 Corinto 10:13) Anggapoy tukso a sinmabid sikayo ya agni asali na arum a totoo. Balet matoor so Dios, tan agto abuloyan a nipaarap kayod tukso ya agyo nayarian, balet sano onsabi so tukso et sikatoy manggawa met na dalan a pawayan pian nasungdoan yo itan.
Pankotkot na Espiritual a Kayamanan
(1 Corinto 10:8) Agtayo met komon manggagaway seksual ya imoralidad, a singa say arum ed sikara a nanggaway seksual ya imoralidad, kanian inatey so 23,000 ed sikara diad sakey agew.
Tepetepet Manlapud Saray Managbasa
Akin a sinalambit na 1 Corinto 10:8 a 23,000 ya Israelita so atigway ed sakey agew lapud impilawanan, bangta 24,000 so bilang a sinalambit na Numeros 25:9?
Wala so pigaran makapangipaliwawa ed pandumaan na saray bilang ya asalambit ed sayan duaran teksto. Say sankasimplian et nayarin say aktual a bilang so walad pamegleyan na 23,000 tan 24,000, a diad ontan et naabuloyan itan ya umanen pian magmaliw a tibukel a bilang balanglan memelag odino babaleg.
Konsideraen so sananey nin posibilidad. Insulat nen apostol Pablo so salaysay nipaakar ed saray Israelita diad Setim pian panmadmaran na saray Kristiano ed kadaanan a Corinto, sakey a syudad a kabkabat lapud imoral a panagbilay ditan. Oniay inkuan to: “Tan ag-itayo met manlawan, a singa arum ed sikara a manggawa ra, tan naplag ed sikara ed sanagew so duamplo tan talon libo.” Diad impangibiig to ed saraman so pinatey nen Jehova lapud impilawanan da, inter nen Pablo so bilang a 23,000.—1 Corinto 10:8.
Balet, ibabaga ed sikatayo na Numeros kapitulo 25 a “say Israel tinmipon ed Baal-peor: et say sanok nen Jehova ed Israel adangatan.” Insan, ingganggan nen Jehova si Moises a pateyen so “amin a manunaan na katooan.” Kayari na satan et imbilin nen Moises ed saray ukom a sumpalen da itan a ganggan. Diad kaunoran, sanen kinmiwas a tampol si Phinehas pian pateyen so Israelita ya angiloob na Midianita ed kampamento, ‘tinmunda so salot.’ Oniay impanampot na salaysay: “Saray inatey ed salot duamplo tan apat a libo ra.”—Numeros 25:1-9.
Mapatnag a say bilang a niiter diad Numeros et kabiangan iray “manunaan na katooan” a pinatey na saray ukom tan saramay direktan pinatey nen Jehova. Posiblin wala so sanlibo ed saraman a manunaan a pinatey na saray ukom, kanian niwala so dagup a bilang a 24,000. Balanglan saraya a manunaan, odino manangigaulo, so akilawanan, akibiang ed saray piesta, odino angonsenti ed saramay nanggawa ed satan, sikara so nankasalanan diad ‘impitipon da ed Baal-peor.’
Nipaakar ed salitan “tinmipon,” impaliwawa na sakey a reperensya na Biblia a nayarin mankabaliksan itan na “pisiglaot na sakey a too ed sananey.” Saray Israelita et totoon nidedika ed si Jehova, balet sanen ‘akitipon ira ed Baal-peor,’ pinakset da so dedikadon pisisiglaotan da ed Dios. Kayari na manga 700 a taon, oniay inkuan nen Jehova nipaakar ed saray Israelita diad panamegley nen propetan Oseas: “Linma ra ed Baal-peor, tan inkonsagra ra so inkasikara lanlamang ed kababaingan, et nagmaliw ira a kadimlaan a singa satan so inaro ra.” (Oseas 9:10) Amin iramay nanggawa ed satan so makanepegan na pirmin panangukom na Dios. Kanian, oniay impanonot nen Moises ed saray anak na Israel: “Saray mata yo anengneng da so ginawa nen Jehova nisengeg ed kinen Baal-peor; ta amin a lalaki a tinmumbok ed kinen Baal-peor, dineral ira nen Jehova a Dios yo ya inekal ed pegley mo.”—Deuteronomio 4:3.
(1 Corinto 11:5, 6) balet balang bii a manpipikasi odino manpropropesiya ya ag-akapandong et mamapabanday ed ulo to, ta sikatoy mipadpara ed sakey a bii ya akiskisan so ulo to. 6 Ta no agmanpapandong so sakey a bii, nepeg a putoten so buek to; balet no mabanday parad sakey a bii a putoten so buek to odino kiskisan so ulo to, sikatoy nepeg a manpandong.
(1 Corinto 11:10) Satan so rason a say bii et nepeg a nawalaan na tanda na autoridad diad ulo to, lapud saray anghel.
Tepetepet na Saray Manbabasa
Kasin kaukolan ya manpandong so sister ya mangikokonduktay panangiyaral na Biblia no walay kaiba ton brother?
▪ Diad “Questions From Readers” ya walad The Watchtower ya Hulyo 15, 2002, nabasan nepeg ya manpandong so sister ya mangikokonduktay panangiyaral na Biblia no walay kaiba ton brother, bautismado man odino andi. Lapud impanaral nin maong ed sayan bengatla, anengneng ya matukoy ya umanen iyan instruksion.
No bautismado so brother ya kaiba na sister a mangikokonduktay regular ya panangiyaral na Biblia, nepeg ya manpandong so sister. No ontan, ipapanengneng toy respeto ed uksoyan nen Jehova ed inkaulo diad Kristianon kongregasyon lapud satan ya betang et kaslakan ya responsabilidad na saray brother. (1 Cor. 11:5, 6, 10) No kualipikado imay brother tan iyabuloy na kipapasen to, nayarin kerewen na sister ya sikato lay mangiyaral.
Balet no say kaiba na sister ed regular ya iyaaralan toy Biblia et agbautismado ya brother ya agto asawa, sikatoy agla kaukolan ya manpandong. Anggaman ontan, ompan wala ray sister ya pakiwasen na konsiensia ra ya manpandong nin siansia ed ontan iran situasyon.
Panagbasa ed Biblia
(1 Corinto 10:1-17) Natan labay kon naamtaan yo, agagi, a saray inmuunan atateng tayo et wala ran amin ed silong na lurem 2 tan amin da et binmeltang ed dayat tan amin da et abautismoan ed si Moises diad panamegley na lurem tan dayat, 3 tan amin da et angan na parehon espiritual a kakanen 4 tan amin da et inminum na parehon espiritual ya iinumen. Ta oniinum ira nensaman manlapud espiritual a bato a tinmumbok ed sikara, tan saman a bato et mangililitrato ed Kristo. 5 Anggaman ontan, ag-aliketan so Dios ed maslak ed sikara, ta pinapatey ira diad kalawakan. 6 Sarayan bengatla et pakaaralan tayo, pian agtayo pilaleken iray makaderal a bengatla, a singa ginawa ra. 7 Agtayo met komon mandadayew ed idolo, a singa ginawa na arum ed sikara; ta unong a nisulat: “Yinmurong iray totoo pian mangan tan oninum. Insan inmalagey ira pian manliliket.” 8 Agtayo met komon manggagaway seksual ya imoralidad, a singa say arum ed sikara a nanggaway seksual ya imoralidad, kanian inatey so 23,000 ed sikara diad sakey agew. 9 Agtayo met komon susuboken si Jehova, a singa say arum ed sikara ya anubok ed sikato, kanian inatey ira diad panamegley na saray uleg. 10 Agtayo met komon magmamaliw a meremere, a singa say arum ed sikara a nanmeremere, kanian inatey ira diad panamegley na samay managderal. 11 Natan et agawa irayan bengatla ed sikara pian pakaaralan, tan nisulat iraya bilang pasakbay ed sikatayo ran asabian na anggaan na saray sistema na mundo. 12 Kanian samay maniisip a sikatoy akaalagey et manalwar komon ya agnatumba. 13 Anggapoy tukso a sinmabid sikayo ya agni asali na arum a totoo. Balet matoor so Dios, tan agto abuloyan a nipaarap kayod tukso ya agyo nayarian, balet sano onsabi so tukso et sikatoy manggawa met na dalan a pawayan pian nasungdoan yo itan. 14 Kanian, inad-arok ya agagi, ibatikan yo so idolatriya. 15 Mitotongtong ak ed sikayo bilang totoon makatebek; sikayon mismo so mandesidi no duga odino aliwa so ibabagak. 16 Nipaakar ed kopa na panamendisyon ya ipipikasi tayo, agta pinanabang itan ed dala na Kristo? Nipaakar ed tinapay a pipisagen tayo, agta pinanabang itan ed laman na Kristo? 17 Saksakey so tinapay, kanian anggano dakel itayo, saksakey itayon laman, ta mamangan itayon amin ed satan a tinapay.
ABRIL 22-28
KAYAMANAN ED SALITA NA DIOS | 1 CORINTO 14-16
“Say Dios so Magmaliw ya Alenleneg a Manuley na Amin”
(1 Corinto 15:24, 25) Insan, say sampot, sano iyawat to lay Panarian ed Dios tan Ama to, sano apaandi to lay amin a gobierno tan amin ya autoridad tan pakayari. 25 Ta sikatoy nepeg a manuley bilang ari anggad niiyan la na Dios so amin a kakabusol diad salian to.
‘Naekal la Naani so Patey’
10 Say “kasampotan” et say anggaan na Sanlibon Taon ya Uley nen Kristo, sano sipapaabeba tan sitotoor lan ipalima nen Jesus so Panarian ed Dios tan Ama to. (Apocalipsis 20:4) Say gagala na Dios a “panagtipon ed saray amin a bengatla ed Kristo” et asumpal la’d satan. (Efeso 1:9, 10) Balet, antis ni, deralen la’d satan nen Kristo so “ami panagari, tan ami pananguley tan pakayari” a sumpad Soberanon linawa na Dios. Mas ni lalanoren na saya nen say kaderal a nagawa ed Armagedon. (Apocalipsis 16:16; 19:11-21) Kuan nen Pablo: “[Si Kristo] so nakaukolan a manari, angga ed pakapangiyan to’d saray kabusol to ed silong na saray sali to. Say kaunoran a kabusol a naekal naani say patey.” (1 Corinto 15:25, 26) On, amin a pakasuysuyan na Adamikon kasalanan tan ipapatey so nakal la’d satan. Kapilitan, sirin, ya ekalan na Dios ‘[“iray pakanodnonotan a,” NW] lubok’ diad pangipawil ed bilay na saray inaatey.—Juan 5:28.
(1 Corinto 15:26) Tan say unor a kabusol, say patey, et paandien.
Susumpalen na Panarian so Linawa na Dios Diad Dalin
21 Antoy nagawad patey, say agnapaliisan ya resultay kasalanan? Satan ya “unor a kabusol” tayo et agnalabanan na amin ya aliwan perpekton too. (1 Cor. 15:26) Balet, kasin parad si Jehova et makapataktakot itan a kalaban? Imanoey impasakbay nen Isaias: “Inakmon to so patey ed ando lan ando; et say Katawan a Jehova punasen to naani so saray lua ya unagus ed saray amin a lupa.” (Isa. 25:8) Kasin naiimadyin mo itan? Anggapo lay punerarya, sementeryo, odino lua lapud ermen! Say onsalat et lua na liket lapud panusumpal nen Jehova ed sipan to ya bilayen lamet iray inaatey! (Basaen so Isaias 26:19.) Naandi lad satan so ermen ya resultay patey.
(1 Corinto 15:27, 28) Ta “impasakop na Dios ed salian to so amin a bengatla.” Balet sanen ibabaga ton ‘impasakop la so amin a bengatla,’ malinew ya agkaiba so Dios ya angipasakop na amin a bengatla ed sikato. 28 Balet sano nipasakop la ed Anak so amin a bengatla, sikaton mismo et manpasakop met la ed Dios ya angipasakop na amin a bengatla ed sikato, pian say Dios so magmaliw ya alenleneg a Manuley na amin.
Kareenan ed Sanlibon Taon tan ed Andi-Angga!
17 Anggapo lay mas marakep a paneskribe ed kipapasen na bilay sano manampot lay sanlibon taon noag “say Dios et magmaliw ya alenleneg a Manuley na amin.” Balet antoy labay ya ibaga na satan? Nonoten pa imay panaon diad Eden sanen say perpekton toon si Adan tan Eva et kabiangan ni na mareen tan nankakasakey a pamilya nen Jehova. Si Jehova, say Soberano ed Uniberso so direktan anguley ed amin a pinalsa to diad tawen tan dalin. Sarag day mitongtong, mandayew, tan onkerew na panamendisyon ed si Jehova. Sikatoy nagmaliw ya “alenleneg a Manuley ed amin.”
Pankotkot na Espiritual a Kayamanan
(1 Corinto 14:34, 35) komon ta saray bibii et agmansalita diad saray kongregasyon, ta agniyabuloy itan ed sikara. Imbes, manpasakop ira komon, unong ya ibabaga na Ganggan. 35 No walay labay dan naaralan, tepetan day kaasawaan da diad abung, ta mabanday ed sakey a bii so mansalita diad kongregasyon.
w12 9/1 9, kahon
Kasin Sinebelan nen Apostol Pablo Iray Bibii ya Mansalita?
“Komon ta saray bibii et agmansalita diad saray kongregasyon,” so insulat nen apostol Pablo. (1 Corinto 14:34) Antoy labay ton ibaga? Kasin memelmelagen toy karunongan na bibii? Andi. Diad tua, mabetbet ton tukoyen so balibalin panagbangat na saray bibii. (2 Timoteo 1:5; Tito 2:3-5) Diad sulat nen Pablo ed saray taga Corinto, aliwan saray bibii labat so binagaan to ya “agmansalita” no walay arum ya mananisia ya mansasalita, noagta pati saray agagin makapansalita na sananey a lenguahe tan makapanpropesiya. (1 Corinto 14:26-30, 33) Lapud liket na pigaran Kristianon bibii ed nalmo ran balon pananisia, nayarin iisturboen day manpapaliwawa tan mantetepet ira, ta ontan so apasalan ed satan ya lugar. Pian magmaliw ya mauksoy, pinaseseg ira nen Pablo ya “tepetan day kaasawaan da diad abung.”—1 Corinto 14:35.
(1 Corinto 15:53) Ta saya a nabulok et nepeg a mangisulong na agkabubulok, tan saya ya ompatey et nepeg a mangisulong na imortalidad.
it-1 1197-1198
Agkabubulok
Lapud say kioli na saray kaiba nen Jesus ya tomatawir et mipara ed sikato, aliwa labat itan ya kioli ed andi-anggaan ya bilay bilang espiritun pinalsa noagta kioli bilang imortal tan agnabulok. Sikaray nambilay ya matoor tan inatey ya abulok so laman da, balet mangawat ira na agnabulok ya espiritun laman, ya singa ipapalinew nen Pablo diad 1 Corinto 15:42-54. Kanian mapatnag ya say tutukoyen na imortalidad et say kualidad na bilay ya walad sikara, say agpangangga tan agpakaderal na satan. Balet say agkabubulok et ontutukoy ed organismo odino espiritun laman ya inter na Dios ed sikara a nisipor ya agnabulok odino agnaderal. Kanian mapatnag ya inikdan ira na Dios na pakayarin sustunien so sarili da tan agla ra manilalo ed arum ya lapuan na enerhiya, aliwan singa saray arum ya pinalsa, balanglan laman odino espiritu. Makapadinayew iyan ebidensya na talek na Dios ed sikara. Balet anggano agla ra manilalo ed arum tan ag-ira naderal, agto labay ya ibagan anggapo lay kontrol na Dios sikara; tan singa say Ulo da ya si Kristo Jesus, mantultuloy iran manpasakop ed linawa tan panangigiya na Ama ra.—1Co 15:23-28.
Panagbasa ed Biblia
(1 Corinto 14:20-40) Agagi, agkayo komon magmaliw ya ugugaw diad pakatalos yo, noagta magmaliw kayon ugugaw nipaakar ed kaugsan; tan magmaliw kayon matatken diad pakatalos yo. 21 Diad Ganggan et nisulat: “ ‘Mitongtong ak ed sarayan totoo diad panamegley na dila na saray dayo tan diad panamegley na bibil na saray agkabat a totoo, balet agni ran siansia ondengel ed siak,’ kuan nen Jehova.” 22 Kanian, say pansalita na nanduruman lenguahe et aliwan sakey a tanda parad saray mananisia noagta parad saray agmananisia, balet say panagpropesiya et aliwan parad saray agmananisia noagta parad saray mananisia. 23 Kanian no mantitipon so interon kongregasyon diad sakey a pasen tan amin da et mansasalitay nanduruman lenguahe, insan onloob iray ordinaryon totoo odino agmananisia, agda kasi ibagan natatapis kayo? 24 Balet no amin yo et manpropropesiya tan walay onloob ya agmananisia odino ordinaryon too, saray salita yo so mangipetek tan mamakiwas ed sikato ya usisaen a maong so sarili to. 25 Diad satan et napatnagan iray akaamot ed puso to, kanian sikatoy ondakmomo tan mandayew ed Dios, ya iyabawag ton: “Say Dios so peteg a walad limog yo.” 26 Anto sirin so nepeg a gawaen, agagi? Sano mantitipon kayo, say sakey et mangansion na salmo, samay sakey et manbangat, samay sakey et walay iparungtal to, samay sakey et mansalita na sananey a lenguahe, tan samay sakey ni et manpatalos. Gawa yo so amin a bengatla pian pabiskegen so balang sakey. 27 Tan no walay mansasalita na sananey a lenguahe, gawaen itan na duara odino talora labat, tan mansusublayan ira, tan walay nepeg a mangipatalos. 28 Balet no anggapoy managpatalos, sikatoy agnepeg a mansalita ed kongregasyon noagta dia labat ed sarili to tan diad Dios. 29 Duara odino taloran propeta labat so nepeg a mansalita, tan saray arum et nepeg dan talosan so kabaliksan na saratan. 30 Balet no walay sakey ya akaawat na panangiparungtal legan ya akayurong ditan, nepeg ya agmansalita imay akauna. 31 Ta amin yo et nayarian yoy manpropesiya a sansakey, pian say amin et makaaral tan napaseseg. 32 Tan nepeg ya asikasoen na saray propeta so pangusar da ed regalo na espiritu. 33 Ta say Dios et Dios na kareenan, aliwan gulo. Singa ed amin a kongregasyon na saray masanto, 34 komon ta saray bibii et agmansalita diad saray kongregasyon, ta agniyabuloy itan ed sikara. Imbes, manpasakop ira komon, unong ya ibabaga na Ganggan. 35 No walay labay dan naaralan, tepetan day kaasawaan da diad abung, ta mabanday ed sakey a bii so mansalita diad kongregasyon. 36 Kasin sikayo so nanlapuan na salita na Dios, odino impasabi labat itan ed sikayo? 37 No walay maniisip a sikatoy sakey a propeta odino akaawat na regalo na espiritu, nepeg ton bidbiren a saray bengatlan insulat kod sikayo et ganggan na Katawan. 38 Balet no ibaliwala iya na siopaman, sikatoy ibaliwala met. 39 Kanian, agagik, itultuloy yon seetan so manpropesiya, ingen ta agyo isesebel so pansalita na nanduruman lenguahe. 40 Balet amin a bengatla et nagawa komon a masimpit tan mauksoy.
ABRIL 29–MAYO 5
KAYAMANAN ED SALITA NA DIOS | 2 CORINTO 1-3
“Jehova—‘Say Dios na Amin a Ligliwa’ ”
(2 Corinto 1:3) Narayew komon so Dios tan Ama na Katawan tayon Jesu-Kristo, say Ama na maaron panangasi tan say Dios na amin a ligliwa,
“Miakis Kayo ed Saramay Onaakis”
4 Say Dios tayo, ya Ama na maaron panangasi, et naeksperiensya ton mismo so naandian na inad-aro—si Abraham, Isaac, Jacob, Moises, tan Arin David. (Num. 12:6-8; Mat. 22:31, 32; Gawa 13:22) Ipapaseguro ed sikatayo na Salita na Dios ya talagan tatalaranan tan pipirawaten nen Jehova so panaon ya bilayen to lamet ira. (Job 14:14, 15) Diad satan ya panaon et magmaliw iran maliket tan maksil so laman da. Nonoten tayo met ya say inad-aron Anak na Dios—samay “nagkalalon panliliketan to”—et pinairap ya maong anggad inatey. (Pro. 8:22, 30) Seguradon ansakisakit itan ed si Jehova.—Juan 5:20; 10:17.
(2 Corinto 1:4) a manliligliwa ed sikatayo diad amin a subok a dadalanen tayo, pian naligliwa tayo iramay makakaeksperiensya na antokaman a klase na subok diad panamegley na ligliwa a naaawat tayod Dios.
“Miakis Kayo ed Saramay Onaakis”
14 No maminsan, agtayo amta no antoy ibaga tayo ed sakey ya maneermen. Balet ibabaga na Biblia ya “say dila na marunong et mamaabig.” (Pro. 12:18) Akatulong ed dakel iray aromog dan makapabiskeg iran salita diad brosyur ya Sano Naandi’d-bilay so Pinabli Yo pian ligliwaen so arum. Balet, mabetbet ya say talagan makatulong a nagawaan tayo et ‘miakis ed saramay onaakis.’ (Roma 12:15) Si Gaby ya inatey so mister to et imbaga ton say paraan labat pian nibalikas toy walad puso to et diad iyakis to. Imbaga to ni: “Kanian naliligliwa ak no miaakis ed siak iray kakaarok. Naliliknak ya agko bukbukor ed paneermen ko.
Pankotkot na Espiritual a Kayamanan
(2 Corinto 1:22) Inyan to met ed sikatayo so tatak to tan inyan tod kapusoan tayo so garantiya nipaakar ed samay onsabi, salanti, say espiritu.
Tepetepet na Saray Manbabasa
Antoy tutukoyen nen Pablo sanen inkuan ton makaawat so kada alanaan a Kristiano na “pakaseguroan” o garantiya tan “tatak” manlapud Dios?—2 Cor. 1:21, 22.
▪ Pakaseguroan o garantiya: Unong ed sakey a reperensya, say Griegon salita ya impatalos a “pakaseguroan” diad 2 Corinto 1:22 et “sakey a termino ya uusaren ed ley tan komersyo a mankabaliksay “paunan bayar, deposito, odino garantiya, ya ibayar pian paunaan so saliwen, tan satan so mangipaseguro a kayarian to la imay sasaliwen, odino pagmaliwen ton legal so kontrata.” No nipaakar ed saray alanaan, makaawat iray pakaseguroan, balet say interon bayar odino tumang ya adeskribe ed 2 Corinto 5:1-5 et tutukoyen toy pangisulong na agkabubulok. Kaiba met ed tumang so pakaawat na imortalidad.—1 Cor. 15:48-54.
Diad modernon Griego, mipadparan balikas so inusar parad singsing na saray nansipanan. Matukoy iyan ilustrasyon parad saramay magmaliw a kaiba ed simbolikon asawa na Kristo.—2 Cor. 11:2; Apo. 21:2, 9.
▪ Tatak: Nensaman, say tatak et uusaren a singa pirma pian ipanengneng no siopay akankayarian, aliwan peke so sakey a bengatla, odino walay paknaan. No nipaakar ed saray alanaan, sikaray “atatakan” odino simbolikon minarkaan na masanton espiritu bilang kayarian na Dios. (Efe. 1:13, 14) Balet, magmaliw labat a permanente itan ya tatak antis ya say sakey ya alanaan et ompatey ya matoor odino antis ya onggapoy baleg ya kairapan.—Efe. 4:30; Apo. 7:2-4.
(2 Corinto 2:14-16) Balet salamat ed Dios, a naynay a mangiwawanwan ed sikatayo diad sakey a parada na pananalo a kaiba na Kristo tan diad panamegley tayo et ikakayat to ed amin a pasen so balingit na kakabatan nipaakar ed sikato! 15 Ta sikatayoy ambalbalingit ed Dios legan tayon iyaabawag si Kristo diad saray nililiktar tan diad saray nadederal; 16 diad saramay unor ya abitla et sakey itan ya angob a mangitonton ed ipapatey, balet diad saramay unonan abitla et sakey itan ya ambalingit ya angob a mangitonton ed bilay. Tan siopay kualipikado parad sarayan bengatla?
Kasin Antam?
Antoy nayarin tutukoyen nen apostol Pablo sanen binitla toy “parada na pananalo”?
▪ Insulat nen Pablo: “[Say] Dios . . . a mangiwawanwan ed sikatayo diad sakey a parada na pananalo a kaiba na Kristo tan diad panamegley tayo et ikakayat to ed amin a pasen so balingit na kakabatan nipaakar ed sikato! Ta sikatayoy ambalbalingit ed Dios legan tayon iyaabawag si Kristo diad saray nililiktar tan diad saray nadederal; diad saramay unor ya abitla et sakey itan ya angob a mangitonton ed ipapatey, balet diad saramay unonan abitla et sakey itan ya ambalingit ya angob a mangitonton ed bilay.”—2 Corinto 2:14-16.
Say tutukoyen na apostol et say apasalan na saray Romano ya manggaway parada pian pagalangan so sakey ya heneral lapud impanalo to ed saray kabusol na Estado. Diad saratan ya okasyon, saray samsam tan narel ed guerra et iparada tan saray kalakian a baka et ibagat legan ya papagalangan so heneral tan say armada to. Kasumpal na parada, ibagat iray baka tan pateyen so karaklan ya narel.
Saray salitan “sikatayoy ambalbalingit . . . legan tayon iyaabawag si Kristo” ya mangisisimbolo na bilay parad arum tan patey parad arum et “nayarin inalig ed kustombre na saray Romano ya popoolan day insenso legan na parada,” so imbaga na The International Standard Bible Encyclopedia. “Say balingit ya mangisisimbolo ed pananalo et mangipanonot ed saray narel ya nayarin asingger la ran pateyen.”
Panagbasa ed Biblia
(2 Corinto 3:1-18) Kasin irekomenda mi lamet so sarili mi? Odino kasin singa arum a totoo et nakaukolan mi ni iray sulat na rekomendasyon ya iter ed sikayo odino manlapud sikayo? 2 Sikayon mismo so sulat mi, ya inyukit ed kapusoan mi tan kabkabat tan babasaen na amin a katooan. 3 Ta mapatnag a sikayoy sulat nen Kristo ya insulat mi bilang ministro, aliwan diad panamegley na tinta noagta diad panamegley na espiritu na mabilay a Dios, aliwan diad saray tapyas na bato noagta diad kapusoan. 4 Walaan kami na onian panagmatalek ed Dios diad panamegley na Kristo. 5 Agmi ibabaga a nagmaliw kamin kualipikado lapud dilin sagpot mi, noagta say impagmaliw min kualipikado et manlalapud Dios, 6 a diad tua et sikato so nanggawa ed sikamin kualipikado bilang ministro na balon sipanan, aliwan ministro na nisulat a totontonen, noagta ministro na espiritu; ta say nisulat a totontonen et mangokondena parad ipapatey, balet say espiritu et mangiiter na bilay. 7 Natan, no say totontonen a manreresulta ed ipapatey tan niyukit ed saray bato et inter a walaan na ontan lan gloria kanian agmakanengneng iray ananak na Israel ed lupa nen Moises lapud glorian masmasnag ed lupa to, sakey a gloria a paandien lanlamang, 8 agta nepeg a walaan na mas baleg a gloria so kimey a nagagawaan na espiritu? 9 Ta no magloria so totontonen a mangokondena, mas lalon magloria so kimey a mangitonton ed inkatunong! 10 Diad tua, anggan samay ginawan magloria nensaman et inekalan lay gloria lapud gloria a mas baleg nen say satan. 11 Ta no samay bengatlan paandien et inter a walaan na gloria, nagkalalo la a mas baleg so gloria na samay mansiansia! 12 Lapud ontan ya ilalo tayo, bulobulos itayon makapansalita, 13 tan agtayo gagawaen imay ginawa nen Moises sanen sinakbongan toy lupa to pian saray ananak na Israel et ag-onnengneng ed pansumpalan na samay paandien. 14 Balet naepel so kanonotan da. Ta anggad sayan kaplesan ya agew et agni nakal itan a sakbong sano babasaen so daan a sipanan, lapud naekal labat itan diad panamegley nen Kristo. 15 Diad tua, anggad sayan agew, sano babasaen iray sulat nen Moises et walay akasakbong ed kapusoan da. 16 Balet sano say sakey et manguman pian mandayew ed si Jehova, naekal so sakbong to. 17 Si Jehova et Espiritu, tan no iner so kawalaay espiritu nen Jehova, wadman so kawayangan. 18 Tan amin tayo ya ag-asakbongan so lupa, legan tayon iyaaninag a singa espiho so gloria nen Jehova, et napapasimbalo pian magmaliw a kaulibay to, tan diad satan et mas manbaleg lan manbaleg so gloria ya iyaaninag tayo, unong ed pamapasimbalo ed sikatayo nen Jehova, say Espiritu.