Saray Reperensya Parad Workbook ed Aral
MAYO 6-12
KAYAMANAN ED SALITA NA DIOS | 2 CORINTO 4-6
“Ag-itayo Onsusuko”
(2 Corinto 4:16) Kanian ag-itayo onsusuko, noagta anggano onkakapuy so laman tayo, seguradon napapasimbalo ya inagew-agew so walad dalem ya inkatoo tayo.
Naksawan Balet ta Ag-ontatayer
16 Siempre, say pangasikaso ed espiritual a bunigas so importantin tuloy. Sano walaan itayo na maapit a relasyon ed si Jehova a Dios, nayarin nakesawan itayo ed pisikal, balet ag-itayon balot ontayer a mandayew ed sikato. Si Jehova so “mangiter na pakayari ed makapuy; et saman so andian na pakapanyari sikato so parakelan to na biskeg.” (Isaias 40:28, 29) Si apostol Pablo, a personal ya akaeksperiensya ed katuaan na sarayan salita, so angisulat: “Agkami onkapuy; et anggan say too mi ed paway onderal, say too mi ed loob ombalo ya inagew-agew.”—2 Corinto 4:16.
17 Imanoen so balikas ya “inagew-agew.” Kabaliksan na saya a minabang itayo ed saray probisyon nen Jehova ed inagew-agew. Sakey a misionaryo a matoor a nanlingkor ed loob na 43 a taon, so nipaarap ed panapanaon a pisikal ya inkakesaw tan inkadismaya. Balet sikato so agtinmayer. Inkuanto: “Impasal ko so ombangon a masakbay kanian antis ak ya onggapo ed antokaman a kimey ko, walay panaon kon manpikasi ed si Jehova tan manbasa na Salita to. Sayan inagew-agew a rotina so akatulong ed siak a mansungdo anggad natan.” Talagan makapan-ilalo tayo ed manamabiskeg a pakayari nen Jehova no maparanay itayo, on, no “inagew-agew” itayon manpikasi ed sikato tan mandalepdep ed matalonggaring iran kalidad tan sipasipan to.
(2 Corinto 4:17) Ta anggano say irap et magano tan anlemew, mamapawala itan ed sikatayo na gloria a manbaleg lan manbaleg tan agmangangga;
it-1 724-725
Panagsungdo
Importante met ya agtayon balot aabuloyan ya nabalang so pokus tayo ed ilalo tayo ran Kristiano, say bilay ya andi-angga ya anggapoy kasalanan. Anggan pateyen itayo ni na saray mamapasegsegang, agbalot naandi itan ya ilalo. (Rom 5:4, 5; 1Te 1:3; Apo 2:10) Saray paniirap tayo ed kaplesan et melmelag no ikomparad kasumpalan na satan ya marakdakep ya ilalo. (Rom 8:18-25) No nodnonoten tayo so pambilay na andi-anggaan, anggano grabe ni so paniirap tayo, magmaliw itan ya “magano tan anlemew.” (2Co 4:16-18) No tandaan na sakey ya temporaryo labat iray subok tan no manpokus ed ilalo to, sikatoy ag-onsuko tan mansiansian matoor ed si Jehova a Dios.
(2 Corinto 4:18) legan tayon iteteen so kamataan tayo ed saray bengatlan agnanengneng, aliwan diad saray bengatlan nanengneng. Ta saray bengatlan nanengneng et temporaryo, balet saray bengatlan agnanengneng et andi-anggaan.
Pankotkot na Espiritual a Kayamanan
(2 Corinto 4:7) Anggaman ontan, walaan kami na sayan kayamanan ed saray pananginan a gawad pitek, pian napatnagan a say pakayari mi a mas mabiskeg nen say pakayari na too et manlalapud Dios, aliwan diad sikami.
“Paimisen si Jehova”
Inusisa nen David Splane na Mananguley ya Ulop itan ya tema ya base ed Biblia. (2 Corinto 4:7) Anto itan ya kayamanan? Kasin say kakabatan odino karunongan? “Andi,” so kuan to. “Say kayamanan ya tutukoyen nen apostol Pablo et ‘sayan ministeryo’ ya ‘pangiparungtal ed katuaan.’” (2 Corinto 4:1, 2, 5) Impanonot nen Brother Splane ed saray estudyante ya say limaran bulan ya impanaral da et preparasyon parad espisyal ya asainmin da diad ministeryo. Nepeg dan pablien itan ya asainmin.
Impaliwawa to ya “saray pananginan a gawad pitek” et ontutukoy ed pisikal ya laman da. Imbaga to so pandumaan na pananginan a gawad pitek tan pananginan a gawa ed balitok. Agnaynay ya nauusar iray pananginan a gawad balitok. Balet saray pananginan a gawad pitek et naynay ya nauusar. No mangikarga tayoy kayamanan ed pananginan a gawad balitok, ompan mas naimano tayo may pananginan imbes ya samay kayamanan ya karga to. “Sikayo ran estudyante et agyo labay ya onlad sikayoy atension,” so kuan nen Brother Splane. “Bilang misionero, labay yon igiya iray totoo ed si Jehova. Mapaabeba kayo ya pananginan a gawad pitek.”
(2 Corinto 6:13) Kanian ontan met komon so gawaen yod sikami—mansasalita ak a singa ta kayo ananak—ilukas yo met a maong so puso yo.
Paeleten so Panangaro Yo ed Agagi
7 Diad panaon tayo, panon tayo met a ‘ninatnat so panangaro’ ed saray agagi? Natural labat a mainomay a magmaliw a sankaaro iray mankaedaran odino saramay pareho so binalegan dan lugar. Ontan met, say mabetbet a sankaulop et saramay pareho so labay dan panagligliwaan. Balet no saratan so rason ya agtayo la napipiulopan so arum ya agagi, kaukolan tayon ‘inatnat so panangaro tayo.’ Maabig no tepetan tayoy inkasikatayo: ‘Mataltalag ak kasin mimiulop ed saramay agko maapit a kaaro diad panagpulong tan diad saray panliliket? Diad Kingdom Hall, kasin agak tanto mimiulop ed saramay balobalo ni ed kongregasyon lapud iisipen kon kaukolan a sikaray unonan mikaaro ed siak? Kasin ibabanok iray maedad la tan saray kalangweran diad kongregasyon?’
Panagbasa ed Biblia
(2 Corinto 4:1-15) Kanian lapud sayan ministeryo ya impabtang ed sikami unong ed panangasi ya impanengneng ed sikami, agkami onsusuko. 2 Balet impulisay mi la ray makapabaing tan iyaamot a kagagawa, agkami mamapalikdo odino agmi met lalaokan so salita na Dios; ingen ta diad pangipaparungtal mi ed katuaan, irerekomenda mi inkasikami ed balang konsiensia na too diad arapan na Dios. 3 No talagan asakbongan so maong a balitan iyaabawag mi, asakbongan itan diad saramay nadederal la, 4 a diad limog da et binulag na dios na sayan sistema na mundo so kanonotan na saray agmananisia, pian ag-onsinag ed sikara so liwawa na maglorian maong a balita nipaakar ed Kristo, a kaulibay na Dios. 5 Ta say ipupulong mi et aliwan nipaakar ed sikami, noagta nipaakar ed si Jesu-Kristo bilang Katawan tan sikami bilang ariripen yo nisengeg ed si Jesus. 6 Ta say Dios so angibaga: “Onsinag komon so liwawa manlapud kabilungetan,” tan sikatoy sinminag ed kapusoan mi pian naliwawaan iraya na maglorian kakabatan nipaakar ed Dios diad panamegley na lupa nen Kristo. 7 Anggaman ontan, walaan kami na sayan kayamanan ed saray pananginan a gawad pitek, pian napatnagan a say pakayari mi a mas mabiskeg nen say pakayari na too et manlalapud Dios, aliwan diad sikami. 8 Nadedetdetan kami ed amin a paraan, balet aliwan diad paraan ya agkami la makagalaw; nawewetwet kami, balet wala nin siansiay napawayan mi; 9 napapasegsegang kami, balet agkami tataynanan; itutumba kami, balet agkami nadederal. 10 Naynay min susungdoan so makapatey a panagtrato a singa asagmak nen Jesus, pian say bilay nen Jesus et napatnagan met ed sikami. 11 Ta sikamin mabilay et naynay a nipapaarap ed ipapatey nisengeg ed si Jesus, pian say bilay nen Jesus et napatnagan met ed ompatey a laman mi. 12 Kanian anggaman kaukolan min arapen so ipapatey, manresulta iya ed bilay parad sikayo. 13 Oniay nisulat: “Impatnag koy pananisia, kanian nansalita ak.” Ipapatnag mi met so ontan a pananisia kanian mansasalita kami, 14 ya amta mi a samay amaoli ed si Jesus et paolien to kami met a singa ed si Jesus tan iyarap to kami a kaiba yo. 15 Ta amin irayan bengatla et nisengeg ed sikayo, pian say daakan ya agnaparaan a kaabigan et lalo nin naaruman lapud ondarakel ni so misasalamat parad kigloriaan na Dios.
MAYO 13-19
KAYAMANAN ED SALITA NA DIOS | 2 CORINTO 7-10
“Kaibad Ministeryo Tayo so Itulong ed Saray Adalan na Kalamidad”
(2 Corinto 8:1-3) Natan, agagi, labay min naamtaan yo so nipaakar ed agnaparaan a kaabigan na Dios a niiter ed saray kongregasyon ed Macedonia. 2 Maniirap ira lapud baleg a subok, ingen ta say agnaaandin liket da tan pinasyan irap na bilay da so mas lalon nampayaman ed inkamabunlok da. 3 Ta ginawa da itan unong ed pakasarag da, on, papaneknekan ko a lampas ni ingen ed pakasarag da,
“Say Dios Aroen To so Sililiket a Mangiter”
Unona, sinaglawi nen Pablo ed saray taga-Corinto iray taga-Macedonia, a say kiwas da ed pananulong so napanuliranan. “Dia ed dakel a pakanengneng na ermen,” insulat nen Pablo, “say kadaakan na liket da tan say aralem ya inkaduruka ra dinmaak ed saray kayamanan na kaabigan na linawa ra.” Saray taga-Macedonia so agla kinaukolan a dagdagen pian mangiter. Diad kasunian, inkuan nen Pablo ya “impikasi ra ya inulit-ulit so saraya a grasya.” Say masayaksak ya inkabunlok na saray taga-Macedonia so mas sankaimano ed amin sano ikonsidera tayo a sikaran mismo so wala ed ‘aralem ya inkaduka.’—2 Corinto 8:2-4.
Niglogloria si Jehova Diad Panangiter na Relief
MANGA 46 C.E. ed saman, tan gawat ed Judea. Dagdaiset so naakan tan agmakasaliw iray Judion disipulo nen Jesus ta agaylay bili sasaliwen. Naeerasan ira tan makapkapuy la ra. Balet, magano da lan naliknay proteksion nen Jehova ya agnin balot naeksperiensya na arum ya disipulo nen Jesus nensaman. Antoy agawa?
(2 Corinto 8:4) ta sikaran mismo so inmasingger pian maminpigan mikasi ed sikami a nawalaan iray pribilehyon mangiter na donasyon tan ontulong ed saray masanto.
Niglogloria si Jehova Diad Panangiter na Relief
4 Diad komaduan sulat nen Pablo ed saray taga Corinto, impaliwawa ton duaray kabiangan na ministeryo na saray Kristiano. Anggaman parad saray alanaan a Kristiano so sulat to, onaplika met natan ed ‘arum a karnero’ na Kristo so imbaga to. (Juan 10:16) Say unonan kabiangan na ministeryo tayo et say “ministeryo nipaakar ed pikakareenan,” salanti, say kimey tayon panagpulong tan panagbangat. (2 Cor. 5:18-20; 1 Tim. 2:3-6) Say sakey nin kabiangan et say panagministeryon gagawaen tayo parad saray kaagian. Tinawag iya nen Pablo a “panaglingkor ed saray masanto.” (2 Cor. 8:4) Say salitan “ministeryo” tan “panaglingkor” et impatalos manlapud saksakey a salitan Griego ya di·a·ko·niʹa. Akin et makabaliksan itan?
5 Lapud saksakey a Griegon salita so inusar nen Pablo ed nandumaan ya kimey, impasen ton kaibay pangiter na relief ed arum nin panagministeryo ya gagawaen na kongregasyon. Oniay akaunan imbaga to: “Walaray nanduruman ministeryo, ingen ta walay saksakey a Katawan; tan walaray nanduruman kimey . . . Balet amin irayan kimkimey et gagawaen na saksakey ya espiritu.” (1 Cor. 12:4-6, 11) Diad tua, tinukoy nen Pablo ya “sagradon panaglingkor” iray nanduruman kimey odino panagministeryo ed kongregasyon. (Roma 12:1, 6-8) Kanian agpankelawan ya impasen ton kaukolan ya ipanaon so “manlingkor ed saray masanto”!—Roma 15:25, 26.
6 Tinulongan nen Pablo iray taga Corinto ya natalosan no akin ya kabiangan na ministeryo tan panagdayew ed si Jehova so pangiter na relief. Imanoen ya impaliwawa ton mangiiter na relief iray Kristiano lapud ‘manpapasakop irad maong a balita nipaakar ed Kristo.’ (2 Cor. 9:13) Kanian, lapud labay dan iyaplika iray bangat na Kristo, tutulongan da ray kaagian da. Imbaga nen Pablo a say kaabigan ya impanengneng na saray kaagian da et paneknek na “agnaparaan a kaabigan na Dios.” (2 Cor. 9:14; 1 Ped. 4:10) Kanian oniay inkuan na The Watchtower, Disyembre 1, 1975, nipaakar ed panangiter na relief ed saray agagin mankaukolan: “Agtayon balot komon panduaruwaan ya importantid si Jehova a Dios tan ed Anak ton Jesu-Kristo so onian klase na panaglingkor.” On, say panangiter na relief et importantin kabiangan na sagradon panaglingkor.—Roma 12:1, 7; 2 Cor. 8:7; Heb. 13:16.
(2 Corinto 9:7) Gawaen komon na kada sakey so unong ed denesidi to ed puso to, ya aliwan ambelat ed liknaan to odino napapasootan, ta aaroen na Dios so maliket a mangiiter.
No Panon ya Gagastosan Iray Kimey ed Panarian
10 Unona, boluntaryo itayon mandodonasyon ta inaro tayo si Jehova tan labay tayon gawaen so “makapaliket ed imaton to.” (1 Juan 3:22) Naliliketan si Jehova ed lingkor ton mabulos ya mangiiter, manlapud puso. Imanoen tayoy imbaga nen apostol Pablo nipaakar ed panangiter na saray Kristiano. (Basaen so 2 Corinto 9:7.) Say tuan Kristiano et mabulos, aliwan napipilitan ya mangiter. Sikatoy mangiiter ta “ginetma to ed puso to.” Labay ton ibaga, gawaen to itan kayari ton inaral no antoy kaukolan tan no panon to itan ya iter. Papablien nen Jehova so ontan ya lingkor to, lapud “aaroen na Dios so maliket a mangiiter.” Oniay nabasa tayod sananey ya patalos: “Inad-aro na Dios iray totoon labalabay day mangiter.”
Pankotkot na Espiritual a Kayamanan
(2 Corinto 9:15) Salamat ed Dios lapud regalo to ya agbalot nadeskribe ed karakep.
Kasin Napapakiwas Ka Lapud “Alay Abig a Regalo” na Dios?
2 Amta nen Pablo ya amin ya alay abig a sipan na Dios et magmaliw a posible lapud perpekton bagat nen Kristo. (Basaen so 2 Corinto 1:20.) Kanian kaibad satan ya “alay abig a regalo” so amin ya kaabigan tan matoor a panangaro ya ipapatnag nen Jehova ed sikatayo panamegley nen Jesus. Makapadinayew itan a regalo kanian mairap ya ideskribe ed paraan a talagan natalosan na too. Antoy nepeg ya epekto ed sikatayo na satan ya alay abig a regalo? Tan diad anto ran praktikal a paraan a napapakiwas itayo ed satan a regalo ya manparaan parad Memoryal na impatey nen Kristo no Mierkoles, Marso 23, 2016?
(2 Corinto 10:17) “Balet samay manpapasirayew et ipasirayew to komon si Jehova.”
g99 7/8 20-21
Mauges Kasi so Manpasirayew?
Diad Kristianon Griegon Kasulatan, say verb ya kaukhaomai, ya impatalos a “manpaatagey, manlastog, manpasirayew” et inusar ed negatibo tan positibon paraan. Singa bilang, inrekomenda nen Pablo: “Samay manpapasirayew et ipasirayew to komon si Jehova.” (2 Corinto 10:17) Labay ton ibaga, napapakiwas itayon ipasirayew si Jehova bilang Dios tayo lapud maong ya ngaran tan reputasyon to.
Panagbasa ed Biblia
(2 Corinto 7:1-12) “Kanian, inad-arok ya agagi, lapud walad sikatayo irayan sipan, linisan tayoy sarili tayo ed amin a karutakan na laman tan espiritu pian magmaliw itayon lalon masanto legan tayon tatakotan so Dios. 2 Ilugaran yo kami ed kapusoan yo. Anggapoy siopaman a nanggawaan mi mauges, anggapoy siopaman a dineral mi, anggapoy siopaman ya inanamot mi. 3 Agko ibabaga iya pian kondenaen kayo. Ta imbagak la nensaman a wala kayod kapusoan mi pian sankakaiba tayon ompatey tan manbilay. 4 Bulobulos ak a mansalita ed sikayo. Ipapasirayew ta kayon maong. Naliligliwa ak a maong; tan pinasyay liket ko diad amin a paniirap mi. 5 Diad tua, sanen sinmabi kami ed Macedonia, agkami nainawaan noag ingen nantultuloy kamin nanirap ed amin a paraan—wala ray panlalaban ed paway, wala ray pakakatakotan ed loob. 6 Balet say Dios, a manliligliwa ed saramay naaandiay ilalo, et niligliwa to kami diad imbisita nen Tito; 7 tan aliwa labat a diad imbisita to, noagta diad panamegley met na ligliwan naawat to lapud sikayo, sanen imbalita tod sikami so pakakailiw yod siak, say pinasyan paneermen yo, tan say masimoon a panangiyansakit yo ed siak; kanian lalon aliketan ak. 8 Ta anggano apaermen ta kayo ed sulat ko, agko itan pagbabawian. Anggano diad unona et nagbabawian ko itan (lapud apaermen ta kayo ed sulat ko, balet ta agano labat), 9 natan et naliliketan ak, aliwan lapud nanermen kayo, noagta lapud say impanermen yo so amakiwas ed sikayon magbabawi. Ta say impanermen yo et unong ed linawa na Dios, kanian agkayo apasakitan lapud sikami. 10 Ta say panermen unong ed linawa na Dios et manresultad pagbabawi, a mangitonton ed kililiktar, a saya et agpagbabawian; balet say panermen unong ed mundo et manresultad ipapatey. 11 Ta nengneng yoy alay abig a resulta ed sikayo na impanermen yo unong ed linawa na Dios: say pinasyan inkagunaet yo, say panlilinis yod sarili yo, say isasanok yod gawan mauges, say takot yod Dios, say masimoon a pampipirawat yo, say inkaseseg yo, say pangipepetek yod gawan mauges. Diad sarayan amin a bengatla et impatnag yon malinis kayo. 12 Anggaman sinulatan ta kayo, agko itan ginawa parad samay nanggawa na mauges odino parad samay nanggawaan na mauges, noagta pian say inkagunaet yon ondengel ed sikami et napatnagan ed sikayo tan diad arapan na Dios.
MAYO 20-26
KAYAMANAN ED SALITA NA DIOS | 2 CORINTO 11-13
“Say ‘Sabit ed Laman’ nen Pablo”
(2 Corinto 12:7) lapu labat ta akaawat ak na saray makapakelaw a panangiparungtal. Pian agak magmaliw a mapaatagey, niiter ed siak so sakey a sabit ed laman, sakey ya anghel nen Satanas, a naynay a manatampal ed siak, pian agak magmaliw a mapaatagey.
Mabiskeg Anggaman Walaray Kakapuyan
Wala ni sakey a matoor a lingkor nen Jehova a kinmerew ed sikaton ekalen To komon so problema ton agnaan-andi, ya indeskribe ton “sakey a sabit ed laman.” Saya et si apostol Pablo, tan sikatoy amitlon akikasi ed Dios a naandi la komon iya. Ag-abitla no anto kasi itan a problema, balet ta nikuan a singa iman makapaingongot a sabit a nayarin mangeekal la’d liket nen Pablo diad panlilingkor to’d si Jehova. Imbaga ton sikatoy singa naynay a tatampalen lapud satan. Onia balet so ebat nen Jehova ed kerew to: “Say grasyak [“agnaparaan a kaabigan,” NW] so masarag ed sika; ta say pakayarik agawan ayadyari ed kakapuyan.” Agsirin inekal nen Jehova itan a sabit ed laman. Kanian kaukolan itan a sungdoan nen Pablo, balet ta oniay inkuanto: “Sano siak so makapuy, dia ed satan mabiskeg ak.” (2 Cor. 12:7-10) Anto so labay ya ibaga nen Pablo?
(2 Corinto 12:8, 9) Amitlo ak ya akikasi ed Katawan a naekal komon itan ed siak. 9 Balet imbaga tod siak: “Duga lad sika so agnaparaan a kaabigan ko, ta no kapigan makapuy ka, diman mabisbiskeg so pakayarik.” Diad ontan et malikeliket ak a mangipasirayew ed saray kakapuyan ko, ta say pakayari na Kristo et singa tolda a naynay ya akatarong ed siak.
Ipagamor nen Jehova so ‘Masanton Espiritu To ed Saramay Onkekerew ed Sikato’
17 Bilang ebat ed saray pikakasi nen Pablo, oniay imbaga ed sikato na Dios: “Say grasyak so masarag ed sika; ta say pakayarik agawan ayadyari ed kakapuyan.” Imbaga nen Pablo: “Sankabalgan so liket a labalabay ko so manpasirayew ed saray kakapuyan ko, pian say pakayari nen Kristo manayam ed siak [“singa toldan akatarong ed siak,” NW].” (2 Corinto 12:9; Salmo 147:5) Diad panamegley nen Kristo, naeksperiensya sirin nen Pablo so makapanyarin pananalimbeng na Dios a singa tolda ya akatarong ed sikato. Natan et eebatan nen Jehova iray pikakasi tayo ed ontan met a paraan. Proproteksionan to iray lingkor to a singa to ra tatarongan.
18 Siempre, agnaamper na sakey a tolda so ipelag na uran odino isiplog na dagem, balet wala so proteksion a niiter na satan. Ontan met, say proteksion ya itatarya na “pakayari nen Kristo” so agmangamper ed saray subok odino ed saray paniirapan tayo. Ingen, itatarya na satan so espiritual a proteksion sumpad makaderal iran impluensya na sayan mundo tan ed saray panangataki na manuley ed satan, si Satanas. (Apocalipsis 7:9, 15, 16) Sirin, anggaman manasagmak kayo na sakey a subok ya ‘agnaekal ed sikayo,’ makaseguro kayo a nanenengneng nen Jehova so pipupuligesgesan yo tan sikato so onkiwas ed ‘boses na panatawag yo.’ (Isaias 30:19; 2 Corinto 1:3, 4) Oniay insulat nen Pablo: “Say Dios matoor, ta agto kayo paulyan a natukso na onlabas ed nayarian yo; noag ingen pati tukso, [sikato so] manggawa met na dalan a paliisan, ta pian nayarian yo ya itepel.”—1 Corinto 10:13; Filipos 4:6, 7.
(2 Corinto 12:10) Kanian manliliket ak diad saray kakapuyan, diad saray panag-insulto, diad saray pankaukolan, diad saray panamasegsegang tan kairapan, parad Kristo. Ta no kapigan a makapuy ak, diman ak mabiskeg.
“Iikdan Toy Pakayari Iray Naksawan”
8 Basaen so Isaias 40:30. Anggano marundunong tayo, limitado nin siansia so nagawaan tayo diad sarili tayon biskeg. Atan so nepeg tayon tandaan. Singa si apostol Pablo, anggano dakel so amta ton gawaen, wala met iray limitasyon to kanian agto nagawaan so amin ya labay to. Nen imbalikas tod Dios so nalilikna to, oniay imbaga ed sikato: “No kapigan makapuy ka, diman mabisbiskeg so pakayarik.” Atalosan itan nen Pablo. Kanian inkuan to: “No kapigan a makapuy ak, diman ak mabiskeg.” (2 Cor. 12:7-10) Antoy labay ton ibaga?
9 Binidbir nen Pablo ya daiset labat so nagawaan to no anggapoy tulong na Dios. Sarag ya iter na masanton espiritu na Dios so biskeg ya kaukolan nen Pablo. Akatulong met itan pian nagawaan to iray kimey ya agto sarag ya sumpalen ed sarili ton biskeg. Ontan tayo met. No say biskeg tayo et manlalapud si Jehova, seguradon mabisbiskeg tayo!
Pankotkot na Espiritual a Kayamanan
(2 Corinto 11:2) Ta maniimon ak nipaakar ed sikayo a singa paniimon na Dios, ta siak a mismo so angisipan ed sikayon mikasal ed sakey ya asawan laki, say Kristo, pian niyarap ta kayo ed sikato bilang malinis a birhen.
it-1 1259-1260
Maniimon, Paniimon
Kanian maabig ya ipatnag na saray Kristiano so “singa paniimon na Dios” ed saray kapara dan Kristiano. Labay ton ibaga, pipilaleken dan tulongan ed anggaay nayarian da so sakey tan sakey pian napansiansia day interon puson panaglingkor ed Dios tan katutulok ed Kristo. Inkompara nen apostol Pablo iray espiritual ya agagi to ed sakey a birhen ya akisipanan a mikasal ed Kristo. Sikatoy maniimon ya manproprotekta ed sikara pian mansiansia ran malinis parad Kristo. (2Co 11:2; ikompara so Apo 19:7, 8.) Diad samay imbaga tod saray sulat tod kongregasyon na Corinto tan ed arum, napatnagan so seseg to parad sikara. Tan say paniimon na Kristo parad “nobya” to (Apo 21:9) et napatnagan ed saray mapuersan imbaga tod saray kongregasyon a singa nabasad Apocalipsis, kapitulo 1 anggad 3.
(2 Corinto 12:2-4) Walay kabat kon too a disipulo nen Kristo, a 14 taon lay apalabas et sikatoy biglan niyakar ed komatlon tawen—agko amta no kasin sikatoy walad pisikal a laman to odino anggapod pisikal a laman to; balet amta na Dios. 3 On, kabat ko itan a too—agko amta no kasin sikatoy walad pisikal a laman to odino anggapod pisikal a laman to; balet amta na Dios— 4 a sikatoy biglan niyakar ed paraiso tan akarengel na saray salitan agsarag ya ibaga tan agnayarin salitaen na sakey a too.
Tepetepet na Saray Manbabasa
Say “komatlon tawen” ya abitla ed 2 Corinto 12:2 et mapatnag ya ontutukoy ed Mesianikon Panarian diad uley nen Jesu-Kristo tan saray 144,000, salanti, say “balon tawen.”—2 Ped. 3:13.
Tinukoy itan ya “komatlon tawen” lapud say Panarian et superyor, niyatagey a klase na pananguley.
Say “paraiso” ya ditan “biglan niyakar” si Pablo panamegley na pasingawey et mapatnag ya ontutukoy ed (1) literal ya Paraiso ed dalin diad arapen, (2) espiritual ya paraiso ya naeksperiensya tayo diman, ya mas malaknab nen say espiritual ya paraiso a naeeksperiensya tayo natan, tan (3) say “paraiso na Dios” diad tawen a niwala met ed balon mundo.
Panagbasa ed Biblia
(2 Corinto 11:1-15) Komon ta anosan yo ak, anggano singa agak makatunongan no maminsan. Balet diad tua et aanosan yo ak la! 2 Ta maniimon ak nipaakar ed sikayo a singa paniimon na Dios, ta siak a mismo so angisipan ed sikayon mikasal ed sakey ya asawan laki, say Kristo, pian niyarap ta kayo ed sikato bilang malinis a birhen. 3 Balet, no panon a masilib ya atukso na uleg si Eva, natatakot ak ompan saray kanonotan yo et naderal tan naandi so inkasimoon tan kalinisan yo a manepeg ed Kristo. 4 Ta no ontan, no walay siopaman ya onsabi tan mangipulong na sakey a Jesus nilikud ed samay impulong mi, odino mangawat kayoy sakey ya espiritu nilikud ed samay naawat yo la, odino maong a balita nilikud ed samay inawat yo la, main-inomay yon panisiaan so ibabaga to. 5 Ta ipapasen ko a diad antokaman a bengatla et aliwa ak ya abeba nen “saray sankamaongan ya apostol” yo. 6 Balet anggano makapuy ak ed panagsalita, seguradon aliwa ak ya ontan no nipaakar ed kakabatan; diad tua et impatnag mi la itan ed sikayo diad amin a paraan tan diad amin a bengatla. 7 Odino kasin nankasalanan ak diad impangiyabebak ed sarilik pian nipaatagey kayo, lapud maliket kon inyabawag ed sikayo so maong a balita na Dios ya anggapoy bayar? 8 Singak inalaan so arum a kongregasyon diad impangawat koy tulong da pian makapanlingkor ak ed sikayo. 9 Ingen ta sanen wadtan ak ed sikayo tan mankaukolan ak, agak nagmaliw a pabelat ed anggan siopa, ta saray agagin nanlapud Macedonia et angitaryay dakel a nakaukolan ko. On, diad amin a paraan et agak nagmaliw a pabelat ed sikayo tan mantultuloy ak ya ontan. 10 Unong a walad siak so katuaan nen Kristo, agko itunda iyan pampapasirayew ko diad saray rehyon na Acaya. 11 Antoy rason? Lapud agta kayo inaro? Amta na Dios ya inaro ta kayo. 12 Balet itultuloy ko so gagawaen ko, pian naandi so rason na saramay manaanap na basiyan a sikaray mipara ed sikami diad saray bengatla ya ipapasirayew da. 13 Ta sarayan lalaki et palson apostol, managpalikdon komikimey, a mankunkunwari ran apostol nen Kristo. 14 Tan agla iya pankelawan, ta si Satanas a mismo et mankunkunwarin sakey ya anghel na liwawa. 15 Agmet sirin pankelawan no saray ministro to et mankunkunwarin ministro na inkatunong. Balet say pansumpalan da et unong ed saray gawa ra.
MAYO 27–HUNYO 2
KAYAMANAN ED SALITA NA DIOS | GALACIA 1-3
“Sikatoy Arap-arapan a Binanok”
(Galacia 2:11-13) Balet sanen linma ed Antioquia si Cefas, sikatoy arap-arapan a binanok ta talagan aliway ginawa to. 12 Ta antis ya onsabi so pigaran lalaki ya imbaki nen Santiago, sikatoy midudungo ed saray totoo na saray nasyon; balet sanen sinmabi la ra, agla akidungo ed sikara tan inarawian to ra, lapud takot to ed saramay kabiangan na saray asegat. 13 Sikatoy inalig met na arum nin Judio ed sayan pankunkunwari, kanian pati si Bernabe et naimpluensyaan da ed pankunkunwari da.
Kasin Miparad si Jehova so Panmoriam ed Inkahustisya?
16 Basaen so Galacia 2:11-14. Nampatalo si Pedro ed takot ed too. (Pro. 29:25) Anggano amta toy panmoria nen Jehova, siansian tinakotan toy opinyon na saray asegat ya Judio ya membro na kongregasyon ed Jerusalem. Si apostol Pablo ya inmatendi met ed samay pantitipon ed Jerusalem nen 49 C.E. et kinompronta toy Pedro diad Antioquia tan impaamta toy pansimpisimpitan to. (Gawa 15:12; Gal. 2:13, paimanod leksab) Antoy reaksion na saray Kristianon Gentil ed ag-inkahustisyan agawaan nen Pedro? Kasin agapol ira? Kasin nakal iray pribilehyo nen Pedro lapud sayan lingo to?
(Galacia 2:14) Balet sanen anengneng ko ya aliwan unong ed katuaan na maong a balita so gagawaen da, imbagak ed si Cefas diad arap dan amin: “No sika, anta sakey kan Judio, et manbibilay ka a singa saray totoo na saray nasyon tan aliwan singa saray Judio, panon a kokombinsien mo ray totoo na saray nasyon a manbilay iran singa saray Judio?”
‘Anggapo so Kigapolan’ Parad Saramay Mangaaro ed si Jehova
12 Tinmakot ed too si Pedro kanian aminpigan nigapol, balet nansiansian matoor ed si Jehova tan Jesus. Alimbawa, imburi toy Katawan to, aliwa labat ya aminsan noagta amitlo. (Luc. 22:54-62) Insan nen kien, aliway impantrato tod saray agagin Gentil lapud impasen to ran mas abeba nen saray asegat ya Judion Kristiano. Balet dumay panmoria nen Pablo—nepeg ya anggapoy panangidumaduma ed kongregasyon. Sakbay ya naimpluensyaan nen Pedro iray agagi, arap-arapan ya sinimbawa nen Pablo si Pedro. (Gal. 2:11-14) Kasin asakitan si Pedro tan tinmunda la? Andi. Inawat toy simbawa nen Pablo, inyaplika to, tan nansiansia ed lumba parad bilay.
Pankotkot na Espiritual a Kayamanan
(Galacia 2:20) Nipasak ak ed poste a kaiba nen Kristo. Aliwa lan siak so mabilay, noagta si Kristo so mabilay tan nikasakey ed siak. On, bilang too et manbibilay ak natan unong ed pananisia ed Anak na Dios, ya angaro ed siak tan inter toy sarili to parad siak.
Matoor ya Manlingkor ed Dios Anggano ‘Dakel so irap’
20 Panon to balet iray maamot ya taktika nen Satanas? Singa bilang, panon tayon nalabanan so ikapuy na liknaan? Say sakey ed saray epektibon paraan et say pandalepdep ed dondon. Ontan so ginawa nen apostol Pablo. No maminsan et pakaskasi so pakanengneng tod sarili to. Balet amta to ya inatey so Kristo aliwan parad saray perpekto, noagta parad saray makasalanan ya singa sikato. Diad tua, insulat to: “Say bilay a walad siak natan et lapud pananisia ed Anak na Dios, ya angaro ed siak tan inter toy inkasikato parad siak.” (Gal. 2:20) On, inawat nen Pablo so dondon tan binidbir to ya sikatoy personal ya agunggonaan ed satan.
21 Makatulong met no isipen mon say dondon et personal ya regalo nen Jehova ed sika. Balet agto labay ya ibagan naekal ya tampol so ikakapuy na liknaan mo. Diad tua, say arum ed sikatayo et kaukolan dan tuloytuloy ya labanan iyan maamot ya taktika nen Satanas anggad isabi anggaan. Balet tandaan: Say makaawat labat na premyo et saray ag-onsuko. Asingsingger la so maglorian agew ya ipawil na Panarian na Dios so deen tan magmaliw lan perpekto so amin a matoor. Gawam so anggaay nayarian mon onloob ed satan a Panarian—anggano dakel nin irap so dalanen mo.
(Galacia 3:1) O sikayo ran makulangkulang a taga Galacia! Siopay angimpluensya ed sikayo na mauges iran bengatla, anta malinlinew lan nipaliwawad sikayo a nipasak si Jesu-Kristo?
it-1 880
Galacia, Sulat ed Saray Taga
Nen imbaga nen Pablo ya “O sikayo ran makulangkulang a taga Galacia,” anggapoy pakapatnagan ya say walad isip to et saray espisipikon totoo ya Galiko labat diad amianen a parte na Galacia. (Gal 3:1) Imbes, bibilinen nen Pablo iray pigaran agagi ed kongregasyon ditan lapud inabuloyan dan naimpluensyaan ira na saray onsusuportad Judaismo ya walad limog da, saray Judio ya sasalien dan paneknekan ya matunong ira panamegley na Mosaikon ganggan nen say ‘inkatunong lapud pananisia’ ya intarya na balon sipanan. (2:15–3:14; 4:9, 10) No nipaakar ed lahi, “saray kongregasyon ed Galacia” (1:2) ya sinulatan nen Pablo et nanlalaok ya Judio tan aliwan Judio. Saray aliwan Judio et asegat ya proselita tan ag-asegat ya Gentil, tan seguradon saray arum et nanlapud lahi ya Celtic. (Gaw 13:14, 43; 16:1; Gal 5:2) Amin ira et tinukoy bilang saray Kristianon taga Galacia lapud ditan ira manaayam. Napatnagan ed interon sulat nen Pablo ya saray sinulatan to et saray walad abalaten a parte na probinsya na Roma ya kabkabat to, aliwan saray walad amianen a parte ya agto kabkabat, a mapatnag ya agton balot abisita.
Panagbasa ed Biblia
(Galacia 2:11-21) Balet sanen linma ed Antioquia si Cefas, sikatoy arap-arapan a binanok ta talagan aliway ginawa to. 12 Ta antis ya onsabi so pigaran lalaki ya imbaki nen Santiago, sikatoy midudungo ed saray totoo na saray nasyon; balet sanen sinmabi la ra, agla akidungo ed sikara tan inarawian to ra, lapud takot to ed saramay kabiangan na saray asegat. 13 Sikatoy inalig met na arum nin Judio ed sayan pankunkunwari, kanian pati si Bernabe et naimpluensyaan da ed pankunkunwari da. 14 Balet sanen anengneng ko ya aliwan unong ed katuaan na maong a balita so gagawaen da, imbagak ed si Cefas diad arap dan amin: “No sika, anta sakey kan Judio, et manbibilay ka a singa saray totoo na saray nasyon tan aliwan singa saray Judio, panon a kokombinsien mo ray totoo na saray nasyon a manbilay iran singa saray Judio?” 15 Sikatayo ran niyanak a Judio, ya aliwan singa saray makasalanan a nanlapud saray nasyon, 16 et bibidbiren tayo a say sakey a too et niyabawag a matunong, aliwan diad panamegley na saray gawa a kakaukolanen na ganggan, noagta dia labat ed panamegley na pananisia ed si Jesu-Kristo. Kanian anisia itayo ed si Kristo Jesus pian niyabawag itayon matunong diad panamegley na pananisia ed Kristo tan aliwan diad panamegley na saray gawa a kakaukolanen na ganggan, ta anggapoy too a niyabawag a matunong diad panamegley na saray gawa a kakaukolanen na ganggan. 17 Natan no naromogan itayo met a makasalanan diad panggugunaet tayon niyabawag a matunong diad panamegley nen Kristo, kasin si Kristo et lingkor na kasalanan? Andin balot! 18 No ipaalagey ko lamet iramay inggebak la nensaman, ipapatnag kon mananumlang ak. 19 Ta diad panamegley na ganggan et inatey ak ed ganggan pian magmaliw ak a mabilay ed Dios. 20 Nipasak ak ed poste a kaiba nen Kristo. Aliwa lan siak so mabilay, noagta si Kristo so mabilay tan nikasakey ed siak. On, bilang too et manbibilay ak natan unong ed pananisia ed Anak na Dios, ya angaro ed siak tan inter toy sarili to parad siak. 21 Agko ipupulisay so agnaparaan a kaabigan na Dios, ta no say inkatunong et nagamoran diad panamegley na ganggan, andi-kakanaan sirin so impatey nen Kristo.