“Say Simplin Alimbawa na Inkamatua”

Si Danielle, sakey ed Saray Tasi nen Jehova diad South Africa, et walay aromog ton bag ya atilak na sakey a kustomer diad sakey a coffee shop. Walay karga ton kuarta tan credit card. Labay nen Danielle ya ipawil itan kanian inanap toy address odino cellphone number na akanggawa balet say nalmo to labat et ngaran na sakey a laki. Sinali nen Danielle ya kontaken itan a laki panamegley na bangko na credit card to, pero anggapoy nala ton impormasyon. Balet agsinmuko si Danielle, tinawagan to so phone number ya walad resibo na doktor ya walad samay bag. Pinmayag so receptionist ya iter so telephone number nen Danielle ed samay laki.

Abigla imay lakin akanggawa na bag nen walay tinmawag ed sikato manlapud opisina na doktor to ya mangipapaamta ed sikato ya aromog nen Danielle so bag tan labay ton ipawil ed sikato. Nen linma imay laki pian laen so bag to, akabat toy Danielle tan say tatay to. Inusar da itan ya pankanawnawa pian ipaliwawa ed samay laki no akin ya nansagpot iran maong pian naalmo day akanggawa na bag. Impaliwawa da ya bilang Tasi nen Jehova, gagawaen day anggaay nayarian da ya iyaplika iray prinsipyo na Biblia. Atan so rason no akin ya pansasagpotan dan naynay so magmaliw ya matua.​—Hebreo 13:18.

Kalabas na pigaran oras, angipawit na mensahe imay laki ed si Danielle tan ed tatay to, misalsalamat lamet ed impangipawil day bag tan pitaka to. Oniay insulat to: “Talagan apresyaen koy impansagpot yo pian naanap ak. Malikeliket ak ta akabat ta kayo tan say pamilya yo, agta kayon balot nalingwanan lapud inkamaong tan inkamakaaro yo. Bilang pisasalamat ko, labay koy mangiter na donasyon ed sikayo. Amtak ya mansasakripisyo kayo pian nagawaan yoy panseserbi yo ed Dios. Apaneknekan ed ginawa yo ya maomaong kayon totoo, ya singa impanengneng nen Danielle ya alimbawa na inkamatua. Kanian salamat lamet tan komon bendisyonan na Dios so ministeryo yo.”

Kalabas na pigaran bulan, akatongtong lamet na tatay nen Danielle imay laki. Inistorya na laki so agano nin agawa ed sikato ya akalmo na pitaka. Legan ton mansha-shopping, walay anengneng ton pitaka ya naplag ed dalan. Nen aromog to so bii ya akanggawa na pitaka tan impawil to itan ed sikato, impaliwawa to no akin ya ginawa to itan. Lapud diad agano ni et wala met so angipanengneng ed sikato na ontan ya alimbawa na inkamatua. Imbaga to: “Say simplin alimbawa na inkamatua tan kaabigan et aligen met na arum, tan balibali so epekto na satan ed interon komunidad.”