‘Tutuloken Day Relihyoson Kipapasal Da’

SAKEY a biin taga-Miami, Florida, E.U.A., so angipatulor ed onggendan a sulat ed lokal a peryodiko: “Nen Dis. 10 say pitaka na anak kon laki so akaot diad tindaan. Akapilaktip so lisinsya to ed panagmaneho, Social Security card, tan arum nira, ontan met ed $260.

“Kayari impangireport to’d abalang ed manidyer, sikatoy sinmempet. Diad asasakbay nin labi et sikatoy akaawat na tawag manlapud mansasalitay-Español a bii ya, diad pangipapatalos na operator na [telepono], inkuan na bii a nalmo toy pitaka to.

“Inter na bii so address to. . . . Initer so pitaka to, ya ag-agalaw, pati say $260.

“Diad impakanengneng na bii ed matakew a mangakaot ed pitaka to et sikatoy akaeyag. Naplag na matakew so pitaka tan binmatik. Diad saman a bekta et agla anengneng na bii so anako, kanian insempet to’d abung so pitaka tan tinmawag.

“Say bii tan say pamilya to so Tastasi nen Jehova. Mapatnag a tutuloken day relihyoson kipapasal da.”

Ag-ipapanengneng na Tastasi nen Jehova so inkamatua pian makaawat na dayew manlapud totoo. (Efeso 6:7) Imbes, say masimoon a pilalek da et say pangitarok na dayew ed mangatatawen ya Ama ra, si Jehova. (1 Corinto 10:31) Say aro ra ed Dios tan ed kakaabay so mamapakiwas ed sikaran mangiyabawag ed “maong a balita” nipaakar ed Panarian na Dios. (Mateo 24:14) Diad panamegley na Panarian, isisipan na Dios a pagmaliwen ton masanting a paraiso iyan dalin. Diad ontan et say dalin so aglambengat magmaliw a pasen na pisikal a karakpan noagta ontan met ed kaabigan ed moralidad a ditan et ontalona ed ando lan ando so inkamatua.​—Hebreos 13:18; 2 Pedro 3:13.