FPG/The Image Bank via Getty Images
MANTULTULOY A MANBANTAY!
Ipapasakbay na Saray Politiko so Armagedon—Antoy Ibabaga na Biblia?
Nen Lunes, Oktubre 10, 2022, binomba na Russia iray syudad ed Ukraine pian ombawi ta aderal so importantin taytay ya mangikokonekta ed Crimea tan Russia lapud samay baleg ya insabog ya agawa duay agew antis na satan. Agawa iratan ag-abayag kayarin impasakbay na saray politiko ya ompan asingger lan nagaway Armagedon.
“Agtayo naiisip tay Armagedon manlapu lad samay Cuban Missile Crisis [nen si John F. Kennedy so presidente na U.S.] . . . Imposible tay pangusar na nuclear weapon ya agmanresulta ed Armagedon.”—Joe Biden, Presidente na United States, Oktubre 6, 2022.
“On, Armagedon la ’ya, napepeligro so interon planeta.”—Volodymyr Zelensky, Presidente na Ukraine, nen tinepetan nipaakar ed saray posiblin resulta na pangusar na saray nuclear weapon, BBC News, Oktubre 8, 2022.
Kasin manresulta ed Armagedon so pangusar na saray nuclear weapon? Antoy ibabaga na Biblia?
Kasin saray nuclear weapon so mangigapo na Armagedon?
Andi. Say salitan “Armagedon” et aminsan labat ya abitlad Biblia, nabasa itan diad Apocalipsis 16:16. Aliwa iyan guerra na saray nasyon kontrad arum ya nasyon, noagta guerra iya na Dios kontrad “saray arari na interon dalin.” (Apocalipsis 16:14) Usaren na Dios so guerra ya Armagedon pian sampotan so panuuley na totoo.—Daniel 2:44.
Pian naaruman ni antam no antoy nagawad dalin no Armagedon, basaen so artikulon Anto so Guerra ya Armagedon?
Kasin naderal iyan dalin tan saray manaayam dia lapud nuclear war?
Andi. Nayarin diad arapen et mangusar na nuclear weapon iray totoon manuuley, balet ag-ompayag so Dios ya naderal so dalin. Oniay ibabaga na Biblia:
“Say dalin et mansiansia ya anggad angga.”—Eclesiastes 1:4.
“Saray matunong et tawiren day dalin, tan manbilay ira ditan diad andi-anggaan.”—Salmo 37:29.
Balet, ipapanengneng na propesiya na Biblia tan saray kaplesan ya nagagawa ya asingger lan walay nagawan baleg ya pananguman ed mundo. (Mateo 24:3-7; 2 Timoteo 3:1-5) Amtaen no antoy ibabaga na Biblia ya nagawad arapen diad tulong na libren interactive ya paraan na panag-aral na Biblia ya iyoopresi mi.