Saray Gulo ed Politika—Kasumpalan na Propesiya ed Biblia!

Nandurumay opinyon na totoo natan no nipaakar ed politika. Onkontra ira no wala ray batas ya agpabor ed sikara tan ag-ira natatakot ya ibagay opinyon da. Singa bilang, kaslakan ed saray managgaway batas tan arum nin opisyal na gobierno et mankokontraan tan ag-ira manpatalo ed sakey tan sakey. Lapud satan, maguloy politika kanian agnagawaan na sakey ya gobierno so labay ton gawaen.

Importantin imanoen tayo so nagagawan gulo ed politika diad Amerika tan Britanya (ya tatawagen met ya United Kingdom). Akin ey? On ta akapropesiya la ed Biblia ya nagawa iyan gulo diad sarayan duaran bansa tan diad satan ya panaon et onsalet so gobierno na Dios pian solusyonan iray problema ed mundo.

Saray gulo ed politika diad “kaunoran iran agew”

Diad Biblia, walay propesiyan makapabegas na bago! Nabasa itan ed libro na Daniel. Diad sayan propesiya impaamta na Dios “no antoy nagawa ed kaunoran iran agew.” Say tutukoyen nen Daniel ya pakasumpal na sayan propesiya et diad arapen ni. Diad satan et walay nagawan importantin pananguman tan nagagawa la itan ed panaon tayo.—Daniel 2:28.

Sayan propesiya ed Biblia et impaamta na Dios ed Ari na Babilonia panamegley na sakey ya kugip. Diad satan ya kugip, anengneng na Ari so balbaleg ya imahen odino estatua ya gawad nanduruman klase na metal. Insan impaliwawa nen propeta Daniel so kabaliksan na kada metal manlapud ulo ya anggad sali. Irerepresenta na satan ya imahen iray gobierno ed mundo ya mantutumbokan a magmaliw ya makapanyari odino world power pero onkapuy lanlamang ira.a Insan onkena so sakey ya bato ed satan ya imahen tan sigpot itan ya naderal. Irerepresenta na bato so Panarian odino gobierno na Dios.—Daniel 2:36-45.

Base ed satan ya propesiya, salatan na Panarian na Dios so amin ya gobierno na totoo. Satan met lanlamang ya Panarian imay tutukoyen nen Jesus nen imbangat to ray disipulo ton ipikasi dan: “Onsabi la komon so Panarian mo.”—Mateo 6:10.

Balet dinan ya parte na sayan propesiya na Biblia so mangipapasakbay ya magmaliw ya magulogulo so kipapasen na politika? Imanoen ya say sali na imahen et gawad ‘balatyang ed arum a parte tan pitek so arum a parte.’ (Daniel 2:33) Dumay inkagawa na sali na imahen no ikompara ed arum ya parte na satan ya gawad puron metal. Labay ton ibaga, walay sakey ya world power ya baleg so pidumaan to ed amin ya world power. Akin ey? Impaliwawa na Biblia diad libro na Daniel no akin.

Base ed satan ya propesiya, magmaliw ya magulogulo so kipapasen na politika ed samay world power ya irerepresenta na sali na imahen. Ontan so nagawa ta pakapuyen na saray sakop na sayan world power so panuuley to.

No panon ya nasusumpal natan so propesiya nen Daniel

Irerepresenta na sali na imahen so sankamakapanyarian ya world power natan, say alyansa na Amerika tan Britanya. Panon tayon makaseguro ya talagan sikara so tutukoyen na satan base ed saray nagagawa ed mundo natan?

Say sali na sayan imahen et gawad “balatyang so arum a parte tan pitek so arum a parte” kanian aliwa itan ya matibay. (Daniel 2:42) No imanoen tayo natan, kinmapuy so uley na Amerika tan Britanya lapud anggapoy pankakasakey na saray sakop da tan manproprotesta ira pian ilaban iray karapatan da. Tan kaslakan, anggan saray opisyal na gobierno ya imboto na totoo et agmakapampapaknaan ed nanduruman isyu. Kanian lapud naapag-apag iray totoon uuleyan da, aglaingen nagawaan na sayan duaran bansa no antoy plano dan gawaen.

Nengnengen tayoy labay ya ibaga na arum ed saray detalye na propesiya nen Daniel tan no panon iratan ya nasusumpal natan:

Propesiya: “Say panarian et naapag, balet anggan panon et anawet itan lapud samay balatyang.”—Daniel 2:41.

Labay ton ibaga: Anggaman wala ray agpankakasakey na mismon gobierno na Amerika tan Britanya lapud nanduruman isyu ed politika, pareho ira ya napansiasiansia dan mabiskeg so puersa da ed militar. Lapud satan et wala ray sarag dan gawaen ya apektaen toy interon mundo, kanian mabiskeg ira ya singa balatyang.

Kasumpalan

No nengnengen so listaan na saray bansan dakdakel so agastos da ed militar nen 2023, mas baleg ni so impaniban agastos na United States tan United Kingdom no ikompara ed impaniiban agastos na 12 bansa ya walad listaan.—Stockholm International Peace Research Institute.

“Say pantutulongan na United Kingdom tan United States pian idepensa iray bansa ra so sankabiskegan lan ulopan na anggan anton duaran bansa ya manguusar na high tech iran paraan. Saniba kamin mankikimey, susuportaan mi sakey tan sakey, tan saniba kamin milaban.”—Strategic Command, U.K. Ministry of Defence, Abril 2024.

Propesiya: “Lapud saray gamet na sali et balatyang so arum a parte tan pitek so arum a parte, say panarian et mabiskeg ed arum a parte tan lupok ed arum a parte.”—Daniel 2:42.

Labay ton ibaga: Anggano mabisbiskeg so militar na Amerika tan Britanya, agda nin siansia nagawaan so amin ya labay da lapud demokratiko so gobierno da. No ag-onabobon so karaklan ya totoo, nairapan irayan gobierno ya ipaakseb iray plano ra.

Kasumpalan

“Ibabaga na arum ya eksperto ed politika ya lapud naapag-apag so gobierno na Amerika, naiirapan laingen itan ya gawaen iray ibabaga to ed interon mundo ya sarag to kunon gawaen—singa bilang, no nipaakar ed seguridad tan negosyo.”—“The Wall Street Journal.”

“Mas magulogulo la natan so politika ed Britanya no ikompara nensaman kanian dumay napampopokusan na saray empleyado na gobierno imbes ya manggawa ra komon na saray pananguman ya makatulong ed saray walad sakop da.”—Institute for Government.

Propesiya: “Onlaok iratan [say gobierno] ed karaklan a totoo, balet ag-iratan manpeketan.”—Daniel 2:43, paimanod leksab.

Labay ton ibaga: Anggan panon et nayarin wala met so kontrol na karaklan ya totoo ed no antoy nagawa ed gobierno da. Balet aglanlamang ira naliliketan ed resulta, tan anggan saray opisyal ya apili ra.

Kasumpalan

“Natan, negatibon maong so pakanengneng na saray totoo na Amerika ed politika tan ed saray manuuley ya opisyal.”—Pew Research Center.

“Mas abebbeba la natan so tiwala na saray totoo na Britanya ed gobierno ra tan ed saray politiko nen say diad apalabas ya 50 ya taon.”—“National Centre for Social Research.”

No panon ya nasumpal so propesiya diad arapen

Base ed propesiya nen Daniel, say alyansa na Amerika tan Britanya so manuley bilang world power no onsalat la so gobierno na Dios ed amin ya gobierno na too.—Daniel 2:44.

Diad sakey ya propesiya nipaakar ed satan lanlamang ya panaon ya akarekord ed libron Apocalipsis, ipapasakbay na Biblia ya “saray arari na interon dalin” et natipon ya onkontra ed si Jehovab a Dios parad guerra na Armagedon, atan may “guerra a nagawa ed baleg ya agew na Dios a Makapanyarin-amin.” (Apocalipsis 16:14, 16; 19:19-21) Diad satan ya guerra, deralen nen Jehova so amin ya gobierno na too kanian naandi la so antokaman ya kabiangan na saray world power ya irerepresenta na imahen ed propesiya nen Daniel.

Pian naaruman ni antam, nengnengen so artikulon “Anto so Guerra ya Armagedon?”

Natulongan ka na propesiya nen Daniel nipaakar ed gulo ed politika

Susto so ipapasakbay na Biblia nipaakar ed saray gulo ed politika diad Amerika tan Britanya, tan no antam so nipaakar ed satan, nauman so pakanengneng mo ed saray nagagawa ed panaon tayo.

• Natalosan mo no akin ya labay nen Jesus ya mansiansian neutral iray papatumbok to no nipaakar ed politika na sayan mundo. (Juan 17:16) Tan lapud si Jesus so pinili na Dios ya manuley ed Panarian To, mas natalosan mo met no akin ya imbaga to iya: “Say Panarian ko et agkabiangan na sayan mundo.”—Juan 18:36.

• Ombiskeg so tiwalam ya asingger lan onaksion so Panarian na Dios tan nagawa lay amin ya bendisyon ya insipan na Dios ya iter to ed saray totoo.—Apocalipsis 21:3, 4.

• Makasegurado ka ed no antoy nagawa ed arapen. Agka la naaburidon maong ya ompan naderal so dalin lapud panlalaban na saray nanduruman bansa.—Salmo 37:11, 29.

Ipapanengneng na propesiya nen Daniel ya say alyansa na Amerika tan Britanya ya irerepresenta na sali na imahen so sankasampotan lan world power ya manuley ed saray totoo. Say onsublay et say perpekton gobierno ya manuley manlapud tawen—say Panarian na Dios!

Pian naaruman ni antam ed no antoy gawaen na Panarian na Dios parad totoo, bantayan so video ya Anto so Panarian na Dios?