Antoy Dapat ya Ugali tan Kagagawa na Sakey ya Kristiano?—Antoy Ibabaga na Biblia?

Dakdakel natan so totoo ed interon mundo ya pap-proud ya mangibabagan Kristiano ira, pero makapasakit iray gagawaen da. Singa bilang, say arum ed sikara et makasarili, aliwan honest, odino aliwdiway ugali da. Say arum balet et mirerelasyon nid arum anggano wala lay asawa da. Lapud saratan ya kagagawa ra, napapaisip laingen iray totoo: ‘Antoy dapat ya ugali tan kagagawa na sakey ya Kristiano?’

Say dapat ya ugali tan kagagawa na sakey ya Kristiano

Matmainomay ya ibaga ya “Kristiano ak,” balet aliwan ontan kasimpli. Ibabaga na Biblia ya say sakey ya Kristiano et disipulo nen Jesu-Kristo. (Gawa 11:26) Oniay imbagan mismo nen Jesus: “No mansiansia kayod salitak, tua a sikayo iray disipulok.” (Juan 8:31) Siempre, anggapoy perpekton makagawa ed saray imbaga nen Jesus. Pero gagawaen na sakey ya Kristiano so anggaay nayarian to ya unoren iray bangat nen Jesus tan diad kada agew et nanengneng iratan ed kabibilay to. Imanoen irayan alimbawa.

Maar-aro iray Kristiano

Say imbaga nen Jesus: “Iter kod sikayo so sakey a balon ganggan, a manaaroan kayo; no panon so impangarok ed sikayo, ontan met so panaaroan yo. Diad saya et naamtaan na amin a sikayo iray disipulok—no manaaroan kayo.”—Juan 13:34, 35.

Say ginawa nen Jesus: Maar-aro si Jesus ed amin ya totoo antokaman so kipapasen da ed bilay tan anggan siopaman ira. Pinaabig to ray mansasakit, pinakan to ray narasan, tan inter to ni ingey bilay to parad saray totoo.—Mateo 14:14-21; 20:28.

Say gagawaen na saray Kristiano: Maar-aro iray Kristiano, mabulbulos iran mangiiter, patas so panagtrato da ed amin, tan peperdonaen da iramay akasakit ed sikara. Tutulongan da iray nanairapan tan mansasakripisyo ira parad arum.—1 Juan 3:16.

Honest iray Kristiano

Say imbaga nen Jesus: “Siak so . . . katuaan.”—Juan 14:6.

Say ginawa nen Jesus: Lanang ya honest si Jesus diad amin ya imbaga tan ginawa to. Agton balot inatitan o niloko iray totoo pian labat naala toy labay to. Tan anggano papairapan da la, honest nin siansia.—Mateo 22:16; 26:63-67.

Say gagawaen na saray Kristiano: Agmantitila iray Kristiano. Manbabayar iray buis, ag-ira mantatakew, tan agda sasaolen iray amo ra. (Roma 13:5-7; Efeso 4:28) Agda lolokoen so arum, ag-ira mansasaol no exam, tan agda pepeke-en iray impormasyon ed saray dokumento, singa bilang no mana-aplay iray trabaho.—Hebreo 13:18.

Maomaong iray Kristiano

Say imbaga nen Jesus: “Dago kayod siak, amin yon mansasagpot tan nabebelatan, tan pampainawaen ta kayo. Sakbat yoy pakok tan manaral kayod siak, ta mauyamo tan mapaabeba ak, pian nainawaan kayo. Ta say pakok et maabig, tan anlemew so awit ko.”—Mateo 11:28-30.

Say ginawa nen Jesus: Maomaong si Jesus tan mainomay ya asinggeran. Labalabay ton paasinggeren iray ugugaw ed sikato, pinabiskeg to iray naproproblema, tan marespetoy impantrato to ed saray totoo.—Marcos 10:13-15; Lucas 9:11.

Say gagawaen na saray Kristiano: Maomaong tan marespeto so pitotongtong na saray Kristiano, aliwan ansakit so panagsalita da. (Efeso 4:29, 31, 32) Walay malasakit da tan manggagawa ray paraan pian makatulong.—Galacia 6:10.

Matoor iray Kristiano ed asawa ra

Say imbaga nen Jesus: “Say impankasakey na Dios et agnepeg a pansianen na too.”—Marcos 10:9.

Say ginawa nen Jesus: Anggano agbalot angasawa si Jesus, pinaseseg to ray sanasawa ya manmatoor ed sakey tan sakey. (Mateo 19:9) Imbaga to met no anto ray posiblin maneral ed relasyon na sanasawa pian naiwasan da iratan.—Mateo 5:28.

Say gagawaen na saray Kristiano: Papaliisan na saray Kristiano iray kagagawa ya mangekal na kagalangan na asawa ra. (Hebreo 13:4) Aaroen tan rerespetoen na sanasawa so sakey tan sakey.—Efeso 5:28, 33.