Say Guerra ed Middle East—Antoy Ibabaga na Biblia?

Naaaburido lan maong iray totoo ed interon mundo lapud panlalaban na United States, Israel, tan Iran. Kasin onloor ni itan ya guerra ya anggad apektoen to lay arum nin bansa? Sarag kasin pigilan na saray gobierno so baleg ya gulo tan sarag da kasin gawaen ya mareen so mundo?

Parad saramay kabisado da so impropesiya na Biblia, ompan iisipen da no kasin say guerra ed Middle East so magmaliw ya gapoan na samay guerra ya Armagedon ya abitla ed libron Apocalipsis.

Antoy ibabaga na Biblia?

Sarag kasin patundaen na saray gobierno so guerra ed Middle East?

Oniay ibabaga na Biblia: “Agkayo manmamatalek ed saray prinsipe odino diad anak na too, ya agmakapangiliktar.”—Salmo 146:3.

Agtayo ni amta no kasin anggan panon et napareen na saray gobierno so situasyon ed Middle East. Balet malinew ya ibabaga na Biblia ya anggapoy anggan siopan lider na politika, gobierno na too, odino grupo na totoo ya makapampatunda ed guerra tan makapangiter na tuloytuloy ya kareenan. Say Dios labat so makasarag ya ‘mamatunda ed saray guerra diad interon dalin.’—Salmo 46:9.

• Parad kaaruman ya impormasyon, basaen so magasin ya Panag-bantayan ya say title to et “Manampot Ni Kasi so Guerra?”

Kasin walay propesiyan nasusumpal lapud guerra ed Middle East?

Oniay ibabaga na Biblia: “Makarengel kayo na saray guerra tan balita nipaakar ed saray guerra. . . . Manlalaban iray bansa ontan met ed saray panarian.”—Mateo 24:6, 7.

Say nagagawan panlalaban ed Middle East natan et sakey ed saray pakatandaan ya wala tayo lad “kaunoran iran agew.” (Mateo 24:3; 2 Timoteo 3:1) Ipapanengneng na saray guerran nagagawa natan ya asingsingger lan patundaen na Dios iray guerra tan arum ni ran problema ya mamapairap ed totoo.

• Pian naaruman ni antam, basaen so artikulon “Anto so Tanda na ‘Kaunoran Iran Agew,’ odino ‘Panaon na Anggaan’?”

Kasin diad Middle East onggapo so Armagedon?

Oniay ibabaga na Biblia: “Tinipon da ra ed pasen a tatawagen ed Hebreo ya Armagedon.”—Apocalipsis 16:16.

Say guerra ya Armagedon et aliwan guerra na saray gobierno na totoo ya onggapo ed Middle East. Sakey itan ya guerra ed baetan na amin ya gobierno na too tan say Dios, tan sakopen na satan so interon mundo.

• Pian naaruman ni antam, basaen so artikulon “Anto so Guerra ya Armagedon?”

Antoy makatulong ed sikatayo no naaaburido tayo la?

Oniay ibabaga na Biblia: “Agkayo mapagpaga ed antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat.”—Filipos 4:6.

Labay nen Jehovaa a Dios ya manpikasi tayo ed sikato. Seguradon dengelen to iray pikakasi tayo tan tulongan to tayon nasarag iray pakakaaburidoan tayo lapud iyaansakit to tayo. (1 Pedro 5:7) Say sakey ya gagawaen to et tutulongan to tayon natalosan no akin ya wala irayan guerra, no panon ya napatunda iratan, tan no antoy gawaen to pian naandi so sakit tan paniirap ya aanosan tayo lapud saratan.—Apocalipsis 21:3, 4.

• Pian naaruman ni antam ed no panon itayon tutulongan na Dios, basaen so artikulon “Wala ray Salita ed Biblia ya Makaligliwa ed Sika.”