Linmad Haran si Jacob

ANTAM no siopa irayay katongtong nen Jacob? Kayari pigaran agew na impanbiahe to, akabat to ira diad abay na bobon. Managpastol ira na karnero. Intepet nen Jacob: ‘Taga iner kayo?’

‘Haran,’ so kuan da.

‘Kabat yoy Laban?’ so intepet nen Jacob.

‘On. Ni, nitan lay anak ton Raquel, kaiba to ray karnero nen ama to,’ so ebat da. Nanenengneng mod litrato si Raquel?

Et intulin nen Jacob so bato ya akasara ed bobon pian makainum iray karnero nen uncle ton si Laban. Insan inangoban toy Raquel tan nampakabat. Eksayted si Raquel ya sinmempet tan inistorya to iya ed si tatay ton Laban.

Maliket ya pinatuloy nen Laban si Jacob ed sikara. Tan inabuloyan toy Jacob ya asawaen toy Raquel. Balet kinerew tod si Jacob ya mankimey na pitoy taon parad si Raquel. Lapud inad-aro nen Jacob si Raquel, ginawa to iya. Et nen asabi lay pankasal da, antam no antoy agawa?

Say inter nen Laban et say panguloan ya anak ton si Lea. Sanen inmabuloy si Jacob ya mankimey lamet na pitoy taon, inter la nen Laban si Raquel. Nensaman et aabuloyan ni na Dios iray lalaki ya nawalaan na pigaran asawa. Balet natan, singa ipapanengneng na Biblia, nepeg ya sakey labat so asawa na sakey ya laki.