Baleg so Pamilya nen Jacob

NENGNENG moy litrato. Baleg so pamilya nen Jacob awa? Sikara so 12 ya anak a lalaki nen Jacob. Tan wala met iray bibii. Antam so ngaran da? Amtaen tayo so pigara ed sikara.

Inyanak nen Lea si Ruben, Simeon, Levi, tan Juda. Si Raquel balet et maer-ermen ta anggapoy anak to. Kanian inter to so aripen ton si Bilha ed si Jacob, tan inyanak nen Bilha si Dan tan Neftali. Inter met nen Lea so aripen ton si Zilpa ed si Jacob, tan inyanak nen Zilpa si Gad tan Aser. Nan-anak lamet si Lea na duaran laki, si Isacar tan Zebulon.

Asabi panaon, nan-anak a siansia si Raquel. Nginaranan toy Jose. No ontumbok, dakel ni naamtaan tayo nipaakar ed si Jose ta nagmaliw a kabkabat a too. Saraya so 11 ya anak nen Jacob sanen nanayam ed kindi Laban.

Wala met so pigaran bibiin anak nen Jacob, balet sakey labat ed sikara so abitlay ngaran tod Biblia, si Dina.

Sinmabi panaon, nandesisyon si Jacob ya ombiig lad si Laban tan ompawil ed Canaan. Kanian, tinipon toy baleg a pamilya to pati saray karnero tan baka to, tan nambiahe la ra.

Diad Canaan, nan-anak lamet si Raquel. Pero nairapan ya maong kanian inatey. Balet say ugaw et mabilay. Sikatoy nginaranan nen Jacob na Benjamin.

Labay tayon tandaan so ngaran na 12 ya ananak nen Jacob ta ditan nanlapu so interon nasyon na Israel. Diad tua, say 12 ya tribu na Israel et inngaran ed 10 ya ananak nen Jacob tan duaran anak nen Jose. Nambilay ni na andukey si Isaac kayari inkianak na amin ya apo to tan seguradon malikeliket lapud dakel ira. Balet nengnengen tayo no antoy agawa ed apo ton si Dina.