Sakey a Magmaong a Mundo​—Kugkugip ta Lambengat?

NO SIKA so sakey a patumbok na Mazdaismo unong ed impulong na propeta na Iran a si Zoroaster, sika so akapanalagar ed agew a say dalin so nipawil ed gendat a karakpan to. No sika so akapanayam ed kadaanan a Gresya, angangko ta kinugkugip mo so pakasabim ed makaroyroyon Fortunate Isles odino nanengneng so pakapawil na Binmalitok a Panaon a deniskribe na manag-anlong a si Hesiod nen koma-walon siglo K.K.P. Sakey a Guaraní Indian ed Abalaten ya Amerika so manpipirawat ni angangko ed Dalin ya Andiay Kaugsan. No sika so manbibilay ed panaon tayo, nayarin iilaloan mo a say mundo so onaligwas lapud mapulitikan ideolohya odino lapud resulta na modernon-agew a pakaamta ed ekolohya.

Say Binmalitok a Panaon, say Fortunate Isles, say Dalin ya Andiay Kaugsan​—saraya so kabiangan na dakel a panangingaran diad paneskribe’d satan a mipadparan pankaliktan, say ilalo para’d sakey a magmaong a mundo.

Sayan mundo, say mundo tayo, so peteg ya aliwan napanuliranan a pasen. Ondaraak so maruksan krimen, bakabakal na mankakadalaan ya agnaparaan ed karawalan, pamaandi ed sakey ya interon rasa, agpililikna ed saray kairapan na arum, inkaduka tan eras, kaandiay trabaho tan agpankakasakey, saray problema ed ekolohya, agnatambal a sakit a mamapairap ed minilyon​—say listaan na kaplesan ya irirap so singano agmangangga. Diad panisip ed saray bakal a kaplesan a panlalabanan, onia so inkuan na sakey a peryodistan Italyano: “Say tepet a natural ya itepet na sakey et no kasin say panbubusolan so aliwan sankabiskegan a liknaan ed panaon tayo.” Diad pangunsidera ed situasyon, isipen mo ta a realistiko so pakadampot ed sakey a bengatlan duma, bengatlan magmaong? Odino kasin say ontan a dadampoten et sakey labat a pilalek para’d Utopia, kugip ya agbalot ontua? Kasin sikatayoy manbibilay ed sankaabigan ed amin a posiblin mundo?

Saraya so aliwan balon panpapagaan. Diad loob na nilasus a taon, kinugkugip na totoo so mundon walaan na pantutunosan, inkahustisya, aligwas, tan aro. Diad ilalabas na panaon, arum a pilosopo so detalyadon angibalikas ed saray sisisiaen nipaakar ed uliran iran Estado, magmaong a mundo. Balet, makapaermen, agdan balot nisalaysay no panon dan sitatalonan nipakurang iratan.

Kasin sayan nilasus taon-lan nilista iran kugkugip, saray Utopia, tan gegemtan na too para’d magmaong a sosyedad so mangibabangat ed sikatayo na antokaman?

[Litrato ed pahina 3]

Kasin saya so sankaabigan ed amin a posiblin mundo?