Kasin Nanonotan Yo?

Kasin nanggayagaan yo so impanbasa ed agano niran paway na Say Panag-Bantayan? No ontan, naromog yon makapainteres a tandaan so onggendan:

▫ Kasin nadampot so relihyoson katuaan?

Inkuan nen Jesu-Kristo: “Nakabatan yo so katuaan, et say katuaan sikayo so gawaen to a bolos.” (Juan 8:32) Aglambengat impaimano nen Jesus a say katuaan et nadampot noagta impanengneng to a say pakaromog ed satan so kaukolan pian abobonan na Dios so panagdayew tayo. Imbaga to ed Samaritana: “Saray tua a manangigalang igalang da so Ama dia ed espiritu tan katuaan.” (Juan 4:23)​—4/15, pahina 5.

▫ Siopa si Robert Estienne, tan panon ton angitilak na marka to?

Si Robert Estienne so sakey a manag-imprintan nambilay ed koma-16 a siglo. Intalaga toy bilay to ed panangipalapag na Masanton Kasulatan tan nambanikel a naamtaan iray salitan orihinal ya inkisulat na Biblia. Say sistema to ed impangapag-apag ed teksto na Biblia ed de-numeron bersikulo so sisteman sankatalbaan ya uusaren natan.​—4/15, pahina 10, 14.

▫ Panon tayon nagunggunaan manlapud inagew-agew a panagbasay Biblia?

Say Kasulatan so naynay a nawawalaan na balon kabaliksan parad sikatayo, tan makapakiwas ed sikatayo iray propesiyan nipaakar ed kaunoran iran agew diad liwawa na nanenengneng, narerengel, tan personal a naeeksperiensia. Legan ya onlalaknab so dilin eksperiensia tayo’d bilay tan natatalonaan iray problema, lalon naaapresya tayoy konseho na Biblia. (Uliran 4:18)​—5/1, pahina 14.

▫ Panon a natandaan iray teksto ed Biblia?

Legan yon babasaey Biblia, markaan iray apilin teksto a labay yon tandaan, odino kopyaen iratan ed saray kard tan ipasen iraya ed magmainomay yon nanengneng ed inagew-agew. Legan a nipapatlep iratan, dalepdepen iratan tan usaren iratan. Agyo sasalien ya ipatlep so dakerakel ed maminpinsan, anganko sakey lambengat odino duara ed kada simba.​—5/1, pahina 16, 17.

▫ Anton impormasyon so lugan na Ebanghelyo nen Lucas a niarum ed intarok na arum niran managsulat na Ebanghelyo?

Bangta say karaklan na inkurit nen Lucas so mipadpara’d salaysay nen Mateo, 59 porsiento so duma. Inkurit nen Lucas so anemiran milagro a nikadkaduma ed libro to, tan masulok a mamiduay inrekord to ed satan a bilang na saray ilustrasyon nen Jesus so agsinaglawi na arum a managsulat na Ebanghelyo.​—5/15, pahina 12.

▫ Antoran matalonggaring a sinag na liwawa so niparungtal nen 1935?

Diad saman a taon et atalosan na totoo nen Jehova a say baleg ya ulop ya asaglawi ed Apocalipsis 7:9, 14 so manutukoy, aliwan ed segundaryon mangatatawen a klase, noagta ed saramay say ilalo ra et mangaraldalin. (Juan 10:16)​—5/15, pahina 20.

▫ Diad antoran praktikal a dalan a naligliwa tayoray maneermen?

Ontalineng. Mangiter na panamaseguro. Akaparaan ya ontulong. Manboluntaryo sano matukoy. Mansulat na sakey a sulat odino mangipawit na makaligliwan kard. Manpikasi a kaiba ira. (Santiago 5:16) Mantultuloy a tulongan ira.​—6/1, pahina 13, 14.

▫ Anto so nitulong na agagin lalaki tan bibii ed espiritual ed saramay manaayam ed relihyoson naapag-apag a pamilya pian makapansungdo?

Maparanay ya itongtong ed sikara so makapaseseg, positibo, tan makaligliwa iran salita. (1 Tesalonica 5:14) Onkakana iyan singa pakarepreskoan ed kanonotan tan laman da. Sano praktikal tan matukoy, ipibali ira ed teokratiko tan sosyal ya aktibidades yo. Ipibali ira ed pikakasi yo. (Roma 1:9; Efeso 1:16)​—w-E 6/1, pahina 29.

▫ Antoray tumang ya onsabi ed pangagamil na anos legan na pankikimey ed lawak a ministeryo?

Say anos so ontutulong ed manangipalapag na Panarian a makapansungdo ed antokaman ya agpananginunang odino isusumpa. Imbes a misangsangan ed masanok iran unabong, saray maanos a ministro so makapangiter na maumilden ebat odino sipapalnan onalis, diad ontan et napansiansia so kareenan tan gayaga. (Mateo 10:12, 13) Niarum ni, saray malakarnero so naingganyo ed mensahe na Panarian.​—6/15, pahina 12.

▫ Akin a say pangamta ed katuaay Biblia so ontanlan makana?

Say pangamta ed katuaan so mangibulos ed sikatayo manlapud katilaan, pakawetwet, tan saray anito. Sano manbibilay itayo unong ed satan, papabiskegen itayo na katuaan a sungdoan iray kairapan tan sasagyaten to itayo tekep na ilalo a mamakayari ed sikatayon makatalindeg ed silong na subok.​—7/1, pahina 8.

▫ Anton manunan responsabilidad so inala na Kristianon kongregasyon manlapud natural ya Israel?

Say pribilihyo na panagtasi ed inkasantos nen Jehova ed leet na nasyones. (Isaias 43:21; 1 Pedro 2:9)​—7/1, pahina 19.

▫ Anto so labay ya ibaga na saray salita nen Pedro a say asawan laki et “igalang [to] so bi-i”? (1 Pedro 3:7)

Say asawan lakin mamapagalang ed asawa to so agmangipapabeba odino agmanleleglemew ed sikato. Imbes, idedemostra to diad pananalita tan kakakiwas to​—diad pribado man odino diad publiko—​a sikatoy papablien to. (Uliran 31:10-31)​—7/15, pahina 19.

▫ Akin a nibaga a maaro so pangekal ed loob na Kristianon kongregasyon na agmagbabawin managgaway-mauges?

Say panagdispelosip so panangibalikas na panangaro ed si Jehova tan saray dalan to. (Salmo 97:10) Ipapanengneng to so panangaro ed saray mangegemtan ed sakey a matunong a kurang lapud mangekal iya ed sakey ed limog a manangitarok na mauges ya impluensya ed sikara; proprotektaan met na saya so kalinisan na kongregasyon. (1 Corinto 5:1-13)​—7/15, pahina 25.

▫ Panon a say “matoor tan makabat ya aripen,” a sinaglawi nen Jesus ed Mateo 24:45-47, so nabidbir natan?

Sikaray nagkalautlan nabidbir diad kimey a gagawaen da ed pangitatarok na nibase’d-Biblia iran palapagan, diad panagbangat tan panagpulong na “evangelio na panarian,” tan diad maapit a panagpasakop da ed Salitay Dios, say Biblia. (Mateo 24:14; 28:19, 20)​—8/1, pahina 16.