“Masantos Kayo Met Komon ed Ganaganay Panagbilay Yo”

“Unong a say anawag ed sikayo et masantos, masantos kayo met komon ed ganaganay panagbilay, ta nisulat: ‘Masantos kayo komon ta masantos ak.’”​—1 PEDRO 1:15, 16.

1. Akin a pinaseseg nen Pedro iray Kristiano a magmaliw a masanto?

AKIN ya insimbawa nen apostol Pedro so walad tagey? Lapud naimano to so pankaukolan a bantayan na balang Kristiano so kanonotan tan kakikiwas to ta pian saratan so napansiansian mitunosan ed inkasanto nen Jehova. Kanian, inunaan to iratan a salita ed tagey diad impangibagan: “Lapud saya balkesan yo so saray banel na kanonotan yo, mandangka kayo . . . Unong na anak na katooran dia ed agyo pinunong ed saray ugagep yo wari nen wala kayo ni ed katikeyan na kanonotan.”​—1 Pedro 1:13, 14.

2. Akin a saray pilpilalek tayo et agmasanto sakbay a naaralan tayoy katuaan?

² Saray datin pilalek tayo so agmasanto. Akin? Lapud dakel ed sikatayo so anumbok ed minumundon kurso sakbay tayon inawat so Kristianon katuaan. Amta iya nen Pedro sanen mabitabitar ya insulat ton: “Ta masarag la dia ed apalabas a panaon ginawa yo so linawa na saray Gentiles, tan nanakar kayo ed liket na laman, lawan, panaginum na alak, kasibaan, deneng tan saray makapabaing ya ananito.” Siempre, agbinitla nen Pedro iray agmasanton gawa a duma ed modernon panaon tayo, lapud saratan so agni kabat ed saman.​—1 Pedro 4:3, 4.

3, 4. (a) Panon tayon sombraen iray mauges a pilpilalek? (b) Kaukolan ta a magmaliw ya aliwan emosyonal iray Kristiano? Ipaliwawa.

³ Naimanom ta a sarayan pilalek et saramay makapasagyat ed laman, ed saray liknaan, tan ed emosyon? Sano abuloyan tayo irayan manomina, saray kanonotan tan kakikiwas tayo so mainomay a tuloy a magmaliw ya agmasanto. Iyiilustra na saya so pankaukolan ed pakayari na panagkatunongan tayon mangontrol ed saray kiwas tayo. Imbalikas itan nen Pablo ed onian dalan: “Kanian, pikasik ed sikayo, agagi, lapu ed saray pangasi ed saray panangasi Dios, ya ipatang yo so saray laman yo a mabilay a bagat, masantos, makapaliket ed Dios, ta sikato so maespiritu a linkor yo.”​—Roma 12:1, 2.

⁴ Pian niparungtal ed Dios so sakey a masanton bagat, nepeg tayon abuloyan so pakayari na panagkatunongan tayo, aliwan say emosyon so manomina. Alay karakel na niyanor ed imoralidad lapud impangiyabuloy da ed liknaan dan mangontrol ed kondukta ra! Agkabaliksan na satan a pukoken tayo so emosyon tayo; tano andi, panon tayon nipatnag so gayaga tayo ed serbisyo ed si Jehova? Balet, no labay tayon nipatnag so bunga na espiritu nen say saray gawa na laman, sirin nepeg tayon itukoy so kanonotan tayo ed paraan na panag-isip nen Kristo.​—Galacia 5:22, 23; Filipos 2:5.

Masanton Bilay, Masanton Bili

5. Akin a sinononot si Pedro ed pankaukolan parad inkasanto?

⁵ Akin a si Pedro so ontanlan sinononot ed pankaukolan parad Kristianon inkasanto? Lapud kabat ton tuloy a say masanton bili so imbayar pian narondon so matulok a katooan. Insulat to: “Bangta amta yo ya aliwan dia ed panamegley na maidederal a bengatla a singa say pilak tan balitok so impakarondon ed sikayo ed saray kakanaan a panagbilay yo ya abangonan yo ed saray atateng yo. Noag ingen dia ed panamegley na mablin dala, a singa dala na sakey a kordero ya andi dumsis tan tilol, salanti say dala nen Kristo.” (1 Pedro 1:18, 19) On, say Lapuan na inkasanto, si Jehova a Dios, so angibaki ed bogbogtong ya Anak to, say “Santo na Dios,” ed dalin pian bayaran so dondon a mamawala ed totoo na maong a relasyon ed Dios.​—Juan 3:16; 6:69; Exodo 28:36; Mateo 20:28.

6. (a) Akin ya aliwan mainomay parad sikatayo a gegemtanen so masanton kondukta? (b) Anto so ontulong ed sikatayon napansiansia a masanto so kondukta tayo?

⁶ Anggaman ontan, talagan bidbiren tayon aliwan mainomay so panbilay a masanto leleg a wala tayo ni ed utel na sayan abulok a mundo nen Satanas. Sikatoy mangitatarok na saray pakakalotan parad tuan Kristianos, a manggugunaet a naliktaray sistema na bengabengatla to. (Efeso 6:12; 1 Timoteo 6:9, 10) Saray pakadesdesan ed pantratrabahoan, isusumpa na pamilya, odino panaglurey ed eskuelaan, tan ed desdes ed kaedaran so mankakaukolan na mabiskeg ya espiritualidad a makana parad sakey pian napansiansia so inkasanto. Idadanet na satan so makanan betang na personal a panagaral tayo tan ed regular ya iyaatendi ed Kristianon miting. Sinimbawa nen Pablo si Timoteo: “Tandaan mon maong so uliran na saray maabig a salita a nadngel mo ed siak, dia ed pananisia tan panangaro a wala ed Kristo Jesus.” (2 Timoteo 1:13) Narerengelan tayo iratan a salitan makapabunigas ed Kingdom Hall tan nababasa iratan diad pribadon panagaral ed Biblia. Natulongan da itayon magmaliw a masanto ed kondukta tayo ed inagew-agew a paraan ed dakel a nanduruman sirkumstansia.

Masanton Kondukta ed Pamilya

7. Panon a naapektoan na inkasanto so bilay na pamilya tayo?

⁷ Sanen inaon nen Pedro so Levitico 11:44, inusar to so Griegon salitan haʹgi·os, a kabaliksan toy “biig manlapud kasalanan tan sirin et nitalaga ed Dios, sagrado.” (An Expository Dictionary of New Testament Words, nen W. E. Vine) Panon iyan mangaapekta ed sikatayo diad Kristianon bilay na pamilya tayo? Maseguron kabaliksan na satan a say bilay na pamilya tayo so nibased aro, ta “say Dios sikato so aro.” (1 Juan 4:8) Say dilin-managsakripisyon aro so mamaparlas ed saray relasyon ed baetan na sanaasawa tan ed baetan na atateng tan ananak.​—1 Corinto 13:4-8; Efeso 5:28, 29, 33; 6:4; Colosas 3:18, 21.

8, 9. (a) Anton situasyon so no maminsan et onlesa ed Kristianon ayaman? (b) Anton marakep a simbawa so iiter na Biblia ed sayan pamaakaran?

⁸ Nayarin isipen tayon say pangibalikas na ontan ya aro so automatiko ed sakey a Kristianon pamilya. Ingen, nakaukolan ya aksobien a say aro so aglawas mangimpluensya ed ontan a laknab a singa ed pigaran Kristianon ayaman. Ompatnag a nipapanengneng itan ed Kingdom Hall, balet alay inomay a say inkasanto tayo so nayarin nakesayan ed ayaman. Insan ompan nalingwanan tayo la’d satan a say asawan bii et Kristianon agi tayo odino say asawan laki et siansian parehon agi (tan ompan sakey a ministeryal ya aripen odino sakey a matatken) ya ompatnag a respetado ed Kingdom Hall. Onsyodot tayo no naaburido, tan saray ampetang a sangsangan so onlesa. Say nankaduan estandarte so nayari ni ingen ya onloob ed bilay tayo. Diad ontan et say relasyon so aliwa lan singa-Kriston asawan laki tan asawan bii noagta basta sakey labat a laki tan sakey a biin agmakapantunosan. Alingwanan da lan kaukolan a niwala so inkasanto ed ayaman. Ompan sikara la’d satan so mansalitan singa ed minumundon totoo. Agaylan mainomay la’d satan ya ompaway ed sangi so agmaabobon, ansakit a panagsalita!​—Uliran 12:18; ikompara so Gawa 15:37-39.

⁹ Anggaman ontan, isisimbawa nen Pablo: “Angapo komon so [abulok a] salita [Griego, loʹgos sa·prosʹ, “makatilol a panagsalita,” sirin et agmasanto] a mabanday ya ompaway ed sangi yo, noag say maabig lawas a nipaakar ed pakapansimpit unong na nakaukolan, pian mangiter na gayaga ed saray ondengel.” Tan tutukoyen toy amin a dumerengel ed abung, pati saray ananak.​—Efeso 4:29; Santiago 3:8-10.

10. Panon ya onaaplika so simbawa na inkasanto ed ananak?

¹⁰ Ontan met, sayan panangigiya ed inkasanto so mipadparan onaaplika ed ananak diad Kristianon pamilya. Agaylan magmainomay ed sikara ya onsempet manlapud eskuelaan ya awit-awit lay rebelyoso tan agmarespeton panagsalita na minumundon kaedaran da! Sikayoran ananak, so agnasasagyat ed saray awawey ya impanengneng na ag-abangatan ya ugugaw a lalakin anginsulto ed propeta nen Jehova tan walaan na mabanday-impansangi, maayew a tobonbalo natan. (2 Arari 2:23, 24) Say panagsalitam so agnepeg a natilolan na saray mabanday a salita na totoon mangiras a tuloy odino agmakonsidera a mangusar ed desentin panagsalita. Bilang Kristianos, say panagsalita tayo so kaukolan a masanto, marakep, makapaalagey, mapangasi, tan “alaokan na asin.” Satan so kaukolan a mangibiig ed sikatayo bilang duma manlapud arum a totoo.​—Colosas 3:8-10; 4:6.

Inkasanto tan Saray Agmananisian Membro na Pamilya Tayo

11. Akin a say pagmaliw a masanto et agto kabaliksan so pagmaliw a dilin-matunong?

¹¹ Legan a sigugunaet tayon sasalien ya agamilen so inkasanto, agtayo ompatnag a superyor tan dilin-matunong, nagkalalo la sano pidedenengan iray agmananisian membro na pamilya. Say mapangasin Kristianon kondukta tayo so anggan panon et kaukolan ya ontulong ed sikaran makaimanon sikatayo so duma diad paraan a makagungguna, a talagan amta tayo no panon so pangipanengneng na aro tan panangabagey, a singa met ed ginawa na maong a Samaritano ed ilustrasyon nen Jesus.​—Lucas 10:30-37.

12. Panon a nagawa na Kristianon kaasawaan a say katuaan et lalon makapasagyat ed saray kapareha ra?

¹² Indanet nen Pedro so kaimportantian na suston awawey ed agmananisia iran membro na pamilya tayo sanen insulat to ed Kristianon kaasawaan a bibii: “Ontan met, sikayoran asawan bibii, tuloken yo komon so saray dilin kaasawaan yo, pian, saray agmanisia na salita napatulok ira ya andi salita, lapud maong a panagbilay na asawa ra, no umamengen da so masimpit a panagbilay yo, a sikato so sitatakot.” Say sakey a Kristianon bii (odino asawan laki ed satan a pamaakaran) so makapanggawa ed katuaan a lalon makapasagyat ed agmananisian asawa no say kondukta to so masimpit, makonsidera, tan marespeto. Kabaliksan na saya a kaukolan a wala so panangitukoy ed teokratikon eskedyul ta pian say agmananisian asawa so agnipuera odino nibaliwala.a​—1 Pedro 3:1, 2.

13. Panon a makatulong met no maminsan iray mamatatken tan ministeryal ya ariripen ed agmananisian asawan lalaki a mangapresya ed katuaan?

¹³ Saray mamatatken tan ministeryal ya ariripen so makatulong met no maminsan diad pangabat da ed agmananisian asawan laki ed pagmaliw a makaaro. Diad onian paraan et naimano ton saray Tastasi so normal, desentin totoo a walaan na malaknab ya interes, pati ed saray teman nilikud ed Biblia. Diad sakey ya inkagawa et naninteresan na sakey a matatken so hilig na asawan lakin manbangwit. Magenap la itan a mangekal ed babeng tan diad ontan et nigapo so pikakaaro. Satan ya asawan laki so diad kaunoran et nagmaliw a bautismadon agi. Diad sakey nin inkagawa, sakey ya agmananisian asawan laki so asagyat ed manok iran canary. Agsinmuko so mamatatken. Inaral na sakey ed sikara so nipaakar ed satan ta pian diad ontumbok a piabet to ed satan a laki et nilukas toy tongtongan ed paboriton komponi na asawan laki! Agkabaliksan sirin a say pagmaliw a masanto et magmaliw a mapeget odino makisir ed kanonotan to.​—1 Corinto 9:20-23.

Panon Tayon Magmaliw a Masanto ed Kongregasyon?

14. (a) Anto so sakey ed saray metodo nen Satanas pian napakapuy so kongregasyon? (b) Panon tayon naresistian so kalot nen Satanas?

¹⁴ Si Satanas a Diablo so managpauges, ta say Griegon ngaran parad Diablo et di·aʹbo·los, a kabaliksan toy “managakusa” odino “managpauges.” Say panagpauges so sakey ed saray abilidad to, tan sasalien ton usaren itan ed loob na kongregasyon. Say paborito ton metodo to et say panagtalabutob. Kasin aabuloyan tayoy inkasikatayo ed saray napalikdo to ed sayan agmasanton kondukta? Panon a satan so nagawa? Diad pangigapo ed panagtalabutob, diad pangulit ed satan, odino diad italineng ed satan. Oniay ibabaga na makabat ya uliran: “Say marumsis a too mangitayak na kolkol, et say matalabutob pansianen to so saray manuna a kakaaro.” (Uliran 16:28) Anto so sombra ed panagtalabutob tan panagpauges? Seguradoen tayon say panagsalita tayo so lawas makapabiskeg tan nibased aro. No say imanoen tayo et saray birtud imbes ed saray abaloan a kaugsan na agagi tayo, say tongtongan tayo so lawas marakep tan espiritual. Tandaan magmainomay so panbalaw. Tan say toon mangitatalabutob ed sika nipaakar ed arum so mangitalabutob met ed sika ed arum!​—1 Timoteo 5:13; Tito 2:3.

15. Antoran singa-Kriston kualidad so ontulong pian napansiansia so amin ed kongregasyon a masanto?

¹⁵ Ta pian napansiansian masanto so kongregasyon, amin tayo so kaukolan a nawalaan na kanonotan nen Kristo, tan amta tayo a say manunan kualidad to et say aro. Kanian, sinimbawa nen Pablo iray taga Colosas a magmaliw a maabagey a singa met ed Kristo: “Mampales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kauyamoan, kadeenan, kasungdoan . . . , manpeperdonaan so balang sakey . . . Tan lalo la ed saraya ya amin a bengatla, ikawes yo so aro, a sikato so singer yo ed inkayadyari.” Insan inyarum to: “Tan manari komon so deen nen Kristo ed kapusoan yo.” Maseguro tekep na sayan manamerdonan awawey et napansiansia tayo so pankakasakey tan say inkasanto ed kongregasyon.​—Colosas 3:12-15.

Kasin Nipapanengneng so Inkasanto Tayo ed Kakaabay Tayo?

16. Akin a say masanton panagdayew tayo so kaukolan a maliket a panagdayew?

¹⁶ Komusta iray kakaabay tayo? Panon tayoran momoriaen? Kasin ipapatnag tayo so gayaga na katuaan, odino ipapanengneng a makapabelat itan? No sikatayo so masanto a singa met ed si Jehova et masanto, sirin nipatnag itan ed panagsalita tan ed kondukta tayo. Malinew a say masanton panagdayew tayo so maliket a panagdayew. Akin ya ontan? Lapud si Jehova a Dios tayo so sakey a maliket a Dios, a labay ton saray managdayew to et magmaliw a magayaga. Kanian, oniay nibaga na salmista so nipaakar ed totoo nen Jehova ed kadaanan a panaon: “Mainawa so totoo a say Dios da et si Jehova!” Kasin niyaaninag tayo itan a liket? Kasin nipapatnag met na ananak tayo itan ya inkakontento ed limog na totoo nen Jehova ed Kingdom Hall tan ed saray asamblea?​—Salmo 89:15, 16; 144:15b.

17. Anto so nagawaan tayo diad praktikal a dalan pian nipanengneng so balansin inkasanto?

¹⁷ Nipanengneng tayo met so asimbang a masanton panagdayew tayo diad awawey a pikokoopera tan kaabigan ed kakaabay. No maminsan et kapilitan parad kaabay a mantutulongan, nayari palagin diad panlinis ed komunidad odino, singa ed arum a bansa et tulongan so pangapiger ed saray kalsada tan highway. Nipaakar ed saya, say inkasanto tayo so nipatnag ed no panon tayon aasikasoen iray tanamanan, solar, odino arum a kayarian tayo. No taynan tayoray basura tayo ed kaliberliber odino walaan na agmalinis odino atakatak a solar, anganko anggan daan lan aderal a luluganan a sankanengneng na saray ondadalan, kasin nibaga tayo a tratratoen tayoray kaabay tayo tekep na respeto?​—Apocalipsis 11:18.

Inkasanto ed Pantratrabahoan tan Eskuelaan

18. (a) Anto so kipapaarapan natan na Kristianos? (b) Panon tayon magmaliw a duma manlapud mundo?

¹⁸ Oniay insulat nen apostol Pablo ed saray Kristiano ed agmasanton syudad na Corinto: “Insulat ko ed sikayo ed sulat ko ya agko miulop komon ed saray managlawan; agto kabaliksan ya amin na saray managlawan ed sayan mundo odino ed saray maagum tan managpatobo, odino ed saray manangigalang ed talintao. Tano ontan sirin nakaukolan yo so ompaway naani ed mundo.” (1 Corinto 5:9, 10) Ontan so kipapasen na Kristianos, a kaukolan a midipongdipong ya inagew-agew ed imoral odino ag-aprinsipyoan a totoo. Baleg iyan subok ed integridad, nagkalalo la ed saramay walaay kultoran say seksual a panagpasyodot, inkabulok, tan ag-inkamatua so nipapaseseg odino aabuloyan. Balanglan diad pantratrabahoan odino eskuelaan et agtayo nayarian ya iyabeba iray estandarte tayo pian ipatnag a “normal” tayo ed saramay walad liber tayo. Imbes, say maabig balet ta duman Kristianon kondukta tayo so kaukolan a napatnagan na saray makatebek a totoo, ed saramay mangaksobin mankaukolan na espiritualidad tan manaanap ed bengatlan magmaong.​—Mateo 5:3; 1 Pedro 3:16, 17.

19. (a) Antoran subok so niwala ed ananak ed eskuelaan? (b) Anto so nagawaan na atateng pian nasuportaan so ananak da tan ed masanton kondukta ra?

¹⁹ Ontan met, wadtan iray dakel a subok a kidudungetan na ananak tayo ed eskuelaan. Kasin sikayon atateng et bibisitaen yo so paneeskuelaan na ananak yo? Amta yo ta no antoy nanengneng ditan? Walaan kayo ta na marakep a relasyon ed saray managbangat? Akin ya importanti irayan tepet? Lapud diad dakel a syudades ed mundo et saray eskuelaan so nagmaliw a katakelan na karawalan, druga, tan sekso. Panon a napansiansia na ananak yo so integridad da tan kondukta ran masanto no agda naala so sigpot a mililiknan pananuporta na atateng da? Dugaruga so isisimbawa nen Pablo ed atateng: “Atateng, agyo paningongoten so saray anak yo, pian ag-ira komon naekalan na linawa.” (Colosas 3:21) Say sakey a paraan a napasyodot so ananak et say agpakatalos ed inagew-agew a problema tan subsubok a kipapaarapan da. Say preparasyon parad saray pakatuksoan ed eskuelaan so onggagapo ed espiritual a kipapasen ed sakey a Kristianon ayaman.​—Deuteronomio 6:6-9; Uliran 22:6.

20. Akin a makana parad sikatayon amin so inkasanto?

²⁰ Diad konklusyon, akin a say inkasanto so makana parad sikatayon amin? Lapud satan so onkakana bilang proteksyon sumpad saray panaglusob na mundo tan kaisipan nen Satanas. Bendisyon itan natan tan diad arapen. Ontutulong itan ed pakagarantiya ed bilay a magmaliw a peteg a bilay diad balon mundo na inkatunong. Ontutulong itan ed sikatayon magmaliw a balansi, naasinggeran, makatalos a Kristianos​—aliwan agmaabuloy iran panatiko. Diad simplin panangibaga et magmaliw itayon singa si Kristo.​—1 Timoteo 6:19.

[Paimano ed leksab]

Kasin Natandaan Yo?

◻ Akin a naimano nen Pedro so pankaukolan na simbawa ed Kristianos nipaakar ed inkasanto?

◻ Akin ya aliwan mainomay so panbilay a masanto?

◻ Anto so nagawaan tayon amin pian napaaligwas so inkasanto diad loob na pamilya?

◻ Pian mansiansian masanto so kongregasyon, anton agmasanton kondukta so kaukolan tayon paliisan?

◻ Panon itayon mansiansian masanto ed pantratrabahoan tan ed eskuelaan?

[Saray litrato ed pahina 16, 17]

Bilang Tastasi nen Jehova, kaukolan a magayaga itayo diad panlingkor ed Dios tan ed arum niran aktibidades