Manbibilay Unong ed Ganggan ed si Kristo
“Mantatarokan kayo na awit na sinansakey, tan sumpalen yo ya ontan so ganggan nen Kristo.”—GALACIA 6:2.
1. Akin a naibaga a say ganggan ed si Kristo so sakey a makapanyarin puersa natan parad pankaabigan?
DIAD Rwanda, saray Huto tan Tutsi a Tastasti nen Jehova so angirisga na bilay da pian manproprotektaan manlapud etnikon panagpatey ya agano nin linmaknab ed saman a dalin. Saray Tastasi nen Jehova ed Kobe, Hapon, ya inateyay kapamilyaan da lapud makaderal a yegyeg so nalmay ed impakaandi ra. Ingen, sikaray kinmiwas a tampol pian iliktar so arum a biktima. On, saray makapaligsay-puson alimbawa ed interon mundo so mangidedemostra a say ganggan ed si Kristo so onkikiwas ni anggad natan. Satan so mabiskeg a puersa parad kaabigan.
2. Panon ya agnatatalosan na Kakristianoan so kabaliksan na ganggan ed si Kristo, tan panon tayon nasumpal itan a ganggan?
2 Kabansag na satan et say propesiya na Biblia nipaakar ed sarayan maatap a “kaunoran iran agew” so nasusumpal. Dakel so “wala so nengneng da ya inkasanto” balet ‘itapat da so pakayari na sayan inkasanto.’ (2 Timoteo 3:1, 5) Nagkalalo la ed Kakristianoan, say relihyon so mabetbet a pormalidad labat, anggapo’d puso. Kasin lapud mairap a tuloy so panbilay unong ed ganggan ed si Kristo? Andi. Ag-itayo ikdan nen Jesus na ganggan ya agnayarin tumboken. Agtalagan atalosan na Kakristianoan itan a ganggan. Agto tutumboken irayan apuyanan a salita: “Mantatarokan kayo na awit na sinansakey, tan sumpalen yo ya ontan so ganggan nen Kristo.” (Galacia 6:2) ‘Susumpalen tayo so ganggan nen Kristo’ diad panasakbat ed sasakbaten na sakey tan sakey, aliwan diad pangaalig ed saray Fariseo tan ed agmakatunongan a pamapabelat ed awit na agagi tayo.
3. (a) Anto so pigaran ganggan a katekep na ganggan ed si Kristo? (b) Akin a mauges ya ibagan say Kristianon kongregasyon so agnepeg a nawalaan na saray totontonen nilikud ed saray direktan ganggan ed si Kristo?
3 Lalaktipen na ganggan ed si Kristo so amin a ganggan nen Kristo Jesus—balanglan satan so panagpulong tan panagbangat, panamasiansian dalisay tan simpli ed mata, pikakareenan ed kaabay tayo, odino ed panangekal na inkarutak manlapud kongregasyon. (Mateo 5:27-30; 18:15-17; 28:19, 20; Apocalipsis 2:14-16) Diad tua et obligado iray Kristiano a tumboken so amin a ganggan a wala ed Biblia ya imbilin ed papatumbok nen Kristo. Tan aliwan satan labat. Say organisasyon nen Jehova, ontan met ed balang kongregasyon, so kaukolan a mangiletneg na kapilitan a totontonen tan tutumboken ta pian napansiansia so maong ya uksoy. (1 Corinto 14:33, 40) Siempre, agmakapantitipon iray Kristiano no andian ira na totontonen nipaakar ed no kapigan, iner, tan no panon so panggawa ra ed saratan a miting! (Hebreos 10:24, 25) Say pikoopera ed makatunongan iran giya ya inletneg na saramay inikdan na autoridad diad loob na organisasyon so kabiangan met na pananumpal ed ganggan ed si Kristo.—Hebreos 13:17.
4. Anto so manamakiwas a puersa ed benegan na puron panagdayew?
4 Anggaman ontan, ag-aabuloyan na tuan Kristianos a magmaliw ya andian na kakanaan a datak na saray ganggan so panagdayew da. Ag-ira manseserbi ed si Jehova lapu labat ta ontan so ibabaga ed sikara na pigaran indibidual odino organisasyon a gawaen. Imbes, say aro so manamakiwas a puersa ed benegan na panagdayew da. Insulat nen Pablo: “Say aro ed si Kristo so mangitutulak ed sikami.” (2 Corinto 5:14, paimano’d-leksab, NW) Inganggan nen Jesus iray patumbok to a manaarowan. (Juan 15:12, 13) Say dilin-managsakripisyon aro so basiyan na say ganggan ed si Kristo, tan satan so mangitutulak odino mamapakiwas ed tuan Kristianos ed inerman, nampara diad pamilya tan diad kongregasyon. Nengnengen tayo pa no panon.
Diad Pamilya
5. (a) Panon a nasumpal na atateng so ganggan ed si Kristo ed ayaman? (b) Anto so nakakaukolan na ananak ed atateng da, tan antoran babeng so kaukolan a natalonaan na atateng pian napenek itan?
5 Insulat nen apostol Pablo: “Asawan lalaki, aroen yo so saray kaasawaan yo, a singa met si Kristo ya inaro to so iglesia, tan insaklang to so inkasikato nisengeg ed sikato [satan, NW].” (Efeso 5:25) Sano aligen na asawan laki si Kristo tan tratoen toy asawa to tekep na aro tan pakatalos, susumpalen to so makanan aspeto na ganggan ed si Kristo. Sakey ni, sipaparungtal ya impanengneng nen Jesus so panamabli to parad saray ugugaw ni, ya inampopo tora, intapew toray lima to ed sikara, tan benendisyonan ira. (Marcos 10:16) Nipapanengneng met na atateng a manusumpal ed ganggan ed si Kristo so panamabli ed ananak da. Tua, walaray atateng a naiirapan a mangalig ed alimbawa nen Jesus nipaakar ed saya. Say arum so ag-onkiling ed pangipatnag na liknaan da. Atateng, agyo aabuloyan iratan a konsiderasyon a mangamper ed pangipanengneng yo na aro ed ananak yo! Agmagenap ya amta yo ya inaro yoray anak yo. Nepeg dan naamtaan met itan. Tan agda naamtaan itan anggad pakapanggawa yo na saray paraan pian nipatnag so aro yo.—Ikompara so Marcos 1:11.
6. (a) Kaukolan ta na ananak iray inaateng a totontonen, tan akin ya ontan so ebat mo? (b) Anton basiyan a rason na saray totontonen ed sankaabungan so kaukolan a natalosan na ananak? (c) Antoran kapeligroan so napaliisan sano say ganggan ed si Kristo so wala ed sankaabungan?
6 Diad parehon bekta, kaukolan na ananak iray ketegan, a kabaliksan ton iletneg na atateng iray totontonen tan no maminsan et mangimpuersa ed sarayan totontonen diad panamegley na disiplina. (Hebreos 12:7, 9, 11) Anggan ontan, nepeg a balitang-por-balitang a tulongan iray anak a nanengneng so manunan rason ed sarayan totontonen: inaro ira na atateng da. Tan nepeg dan naaralan a say aro so sankaabigan a rason na itulok da ed atateng da. (Efeso 6:1; Colosas 3:20; 1 Juan 5:3) Kalat na sakey a makatebek ya ateng a bangatan iray ugugaw ya usaren so “pakayarin mankatunongan” ta pian diad saginonor et makapanggawa ra na dugan desisyon dan dili. (Roma 12:1, NW; ikompara so 1 Corinto 13:11.) Diad biek a dapag, agkaukolan a nawalaan na dakerakel a totontonen odino mapeget a tuloy a disiplina. Oniay inkuan nen Pablo: “Atateng, agyo paningongoten so saray anak yo, pian ag-ira komon naekalan na linawa.” (Colosas 3:21; Efeso 6:4) Sano say ganggan ed si Kristo so wala ed sankaabungan, anggapo so pasen pian say disiplina so nipakat tekep na alablabas a sanok odino ed makapasakit a salita. Say ontan ya ayaman et maligen tan napapabiskeg iray anak, agnabebelatan odino naeekalay ilalo.—Ikompara so Salmo 36:7.
7. Diad antoran paraan a makapangiter na alimbawa iray ayaman a Bethel nipaakar ed panangigeter na totontonen ed ayaman?
7 Arum ed binmibisita ed saray ayaman a Bethel ed interon mundo so mangibabagan saratan so maabig ya alimbawa na inkabalansi ed pamaakaran na saray totontonen parad sakey a pamilya. Anggaman tugyop na saray wala-lad-edad, saratan ya institusyon so onkukurang a kapara na kaslakan a pamilya.a Say panangipakurang ed Bethel so komplikado tan mankakaukolan na dakel a totontonen—maseguron mas dakel nen say sakey a kaslakan a pamilya. Anggaman kuan, saray mamatatken a mangidadaulo ed saray ayaman, opisina, tan panangipakurang ed pagawaan ed Bethel et panbabanikelan dan iyaplika so ganggan ed si Kristo. Momoriaen da itan bilang asainmin da aliwa lambengat ed pangorganisa na kimey noagta say pangiyalibansa na kiaaligwas ed espiritual tan “say liket nen Jehova” ed limog na kakimeyan da. (Nehemias 8:10) Kanian, panbabanikelan dan gawaen so bengabengatla diad sakey a positibo tan makapaseseg a dalan tan panggugunaetan dan magmaliw a makatunongan. (Efeso 4:31, 32) Agpankelawan a say pamilyan Bethel so kabkabat ed pagmamaliw dan magayaga!
Diad Kongregasyon
8. (a) Anto so nepeg a naynay tayon magmaliw a kalat ed kongregasyon? (b) Diad silong na antoran sirkumstansya a say pigara so onkekerew odino manasalin manggawa na saray totontonen?
8 Kalat tayo met ed loob na kongregasyon so manpapasesegan diad espiritu na aro. (1 Tesalonica 5:11) Kanian amin a Kristiano so kaukolan a magmaliw a maalwar ya agmangarum ed sasakbaten la na arum diad pangipilit da ed dilin ideya ra nipaakar ed saray pamaakaran a personal. Walaray panaon, say arum so mansusulat ed Watch Tower Society pian onkerew na saray totontonen nipaakar ed pamaakaran no anto so panmoria ra nipaakar ed espisipiko iran pelikula, libro, tan anggan galawgalaw. Balet, ag-autorisado so Sosyedad a manusisa ed saratan a bengatla tan mangipaway na desisyon nipaakar ed saratan. Diad maslak a kaso, sarayan pamaakaran so nepeg a desidien na kada indibidual odino say ulo na pamilya, based panangaro to ed prinsipyos na Biblia. Arum so onkiling a pagmaliwen iray suhestion tan giya na Sosyedad bilang totontonen. Alimbawa, diad Marso 15, 1996, a paway na Say Panag-Bantayan, wala so maabig ya artikulon mamapaseseg ed mamatatken a manggawa na regular a panagpastol ed saray membro na kongregasyon. Kasin say gagala et say pangiletneg na totontonen? Andi. Anggaman saramay makakatumbok ed saray suhestion so nawalaan na dakel a gungguna, say arum a mamatatken so anggapo’d kipapasen a nagawaan itan. Mipadpara, say artikulon “Tepetepet Manlapud Managbasa” diad Abril 1, 1995, a paway na Say Panag-Bantayan so mamapasakbay sumpad pakasuawi ed dignidad na okasyon na bautismo diad inkaalablabas, a singa say magugulon panagparti odino panagselebra. Mapeget ya inyaplika na arum iyan konseho, a ginawa ran totontonen ni ingen, alimbawa, say pangipawit na makapabiskeg a kard ed sayan okasyon et mauges!
9. Akin ya importanti a paliisan tayo so pagmaliw ya alabas a mabalaw tan mahusga ed balang sinansakey?
9 Konsideraen pa met, a pian niwala so “ayadyarin katunongan, say katunongan na pankanawnawa” ed limog tayo, nepeg tayon awaten ya aliwan pare-parehoy konsiensia na Kristiano. (Santiago 1:25) Kasin gawaen tayon isyu no saray totoo so walaan na desisyon ya agmet onsusumlang ed Makasulatan a prinsipyos? Andi. Say panggawa ed saya so manresulta ed panapag-apag. (1 Corinto 1:10) Bilang pamasakbay ed sikatayo sumpad panusga ed kapara tayon Kristiano, inkuan nen Pablo: “Dia ed katawan ton dili manalalagey, o napelag. Bangbalet lalo ya onligen naani, ta makapanyari so Katawan a mangiligen ed sikato.” (Roma 14:4) Niririsga tayoy agpamaliket ed Dios no mansalita itayo sumpad sinansakey nipaakar ed pamaakaran a base la’d konsiensia na indibidual.—Santiago 4:10-12.
10. Sioparay pinabtangan a manbantay ed kongregasyon, tan panon tayon nepeg iran suportaan?
10 Tandaan tayo met a saray mamatatken so apabtangan a manbantay ed interon pulok na Dios. (Gawa 20:28) Wadtan ira pian ontulong. Kaukolan ya agtayo masuyat ya onsingger ed sikara parad simbawa, ta sikaray estudyante na Biblia tan sirin et kabisado daray nasisingbat ed literatura na Watch Tower Society. Sano naiimano na mamatatken so konduktan mangipaarap ed pakasumlang ed Makasulatan iran pinsipyo, andi-takot iran mangiter na nakakaukolan a konseho. (Galacia 6:1) Tutumboken na saray membro na kongregasyon so ganggan ed si Kristo diad pikokoopera ed sarayan pinablin pastol, a mangidadaulo ed sikara.—Hebreos 13:7.
Iyaaplika na Mamatatken so Ganggan ed si Kristo
11. Panon ya iyaaplika na mamatatken so ganggan ed si Kristo diad kongregasyon?
11 Magunaet iray mamatatken a manumpal ed ganggan ed si Kristo diad kongregasyon. Idadaulo ra so panangipulong na maong a balita, manbabangat manlapud Biblia ta pian nasabi kapusoan, tan, bilang maaro, maamon papastol, mansasalita ed “apunaw ed puso.” (1 Tesalonica 5:14) Papaliisan daray agmaka-kristianon awawey a naromog ed dakerakel a relihyon na Kakristianoan. Tua, sayan mundo so maples ya unuuges, tan singa si Pablo, nayarin liknaen na mamatatken a naaburido parad pulok da balet sikaray mansiansian balansi legan ya aarapen da iratan a kapagaan.—2 Corinto 11:28.
12. Sano onasingger so sakey a Kristiano ed sakey a matatken pian onkerew na tulong, panon so nayarin ikiwas na matatken?
12 Alimbawa, ompan pirawat na sakey a Kristianon ontupleg ed sakey a matatken nipaakar ed importantin pamaakaran ya agdirektan nasisingbat ed saray reperensya na Kasulatan odino mankakaukolan na panimbang ed nanduruman Kristianon prinsipyo. Ompan sikatoy inopresian na mas atagey a betang ed trabaho a walaan na babaleg a sueldo balet ta babaleg a responsabilidad. Odino ompan say agmananisian ama na sakey a malangwer a Kristiano so onkekerew ed bengabengatlan nayarin mangapekta ed ministeryo to. Papaliisan na matatken so pangiter na personal ya opinyon ed ontan iran situasyon. Imbes, marakep no lukasan to so Biblia tan tulongan so indibidual a mankatunongan unong ed saray matukoy a prinsipyo. Nayarin usaren to so Watch Tower Publications Index, no wala, pian anapen no antoy ibabaga na “matoor tan makabat ya aripen” ed saman a tema ed saray pahina na The Watchtower tan arum niran publikasyon. (Mateo 24:45) Anto no kayari na saya et mandesisyon so sakey a Kristiano a parad say sakey a matatken et ompatnag ya agmakabat? No say desisyon so agdirektan onsusumlang met ed prinsipyos odino ganggan ed Biblia, naromog na sakey a Kristiano a say matatken et kabat to so kanepegan na indibidual a manggawa na ontan a desisyon, diad impakaamtan “balang sakey taroken to naani so awi’ton dili.” Anggaman ontan, kaukolan a tandaan na Kristiano ya “antokaman ya itanem na too satan met so anien to.”—Galacia 6:5, 7.
13. Imbes a mangiter na direkta iran ebat ed tepetepet odino mangiter na personal ya opinyon, panon a natulongan na mamatatken so arum a mankatunongan ed saray pamaakaran?
13 Akin ya oniay ikikiwas na eksperiensiadon matatken? Nisesengeg itan ed duaran rason. Unona, imbaga nen Pablo ed sakey a kongregasyon ya agto ‘uleyan so pananisia ra.’ (2 Corinto 1:24) Say matatken, diad itulong ed agi to a mankatunongan ed Kasulatan tan manggawa na desisyon based amta to et aaligen toy awawey nen Pablo. Bidbiren ton walaray limitasyon na autoridad to, no panon a binidbir nen Jesus a walaray limitasyon na autoridad to. (Lucas 12:13, 14; Judas 9) Diad parehon bekta, mabulos a mangiter na makagungguna, anggan direkta, a Makasulatan a simbawa so mamatatken sano nakakaukolan. Komadua, nipapasal to so kapara ton Kristiano. Inkuan nen apostol Pablo: “Say taganon anawet sikato so kien na saray ayadyarin totoo, salanti saraman so lapud panangagamil, saray pakalikna ra apasal ed panangibiig na maong tan mauges.” (Hebreos 5:14) Kanian, pian ontatken, kaukolan tayon usaren so abilidad tayon ontebek, ya aglawas onsasaral ed arum a mangiter ed sikatayo na saray ebat. Diad impangipanengneng ed kaparan Kristiano no panon so pakapankatunongan ed Kasulatan, diad onian paraan et ontutulong so matatken pian sikatoy onaligwas.
14. Panon a nipanengneng na saray matatken a sikaray manmamatalek ed si Jehova?
14 Makapanmatalek tayo a diad panamegley na masanton espiritu nen Jehova a Dios et pakiwasen to so puso na saray tuan managdayew. Diad ontan et naayat na saray matatken a Kristiano so kapusoan na agagi ra, mikakasi ed sikara, a singa met ed ginawa nen apostol Pablo. (2 Corinto 8:8; 10:1; Filemon 8, 9) Amta nen Pablo a manunan say agmatunong, aliwan say matunong, so mankakaukolan na detalyado iran ganggan ta pian onkiwas na susto. (1 Timoteo 1:9) Imbalikas to, aliwan say panuspetsa odino agpanmatalek, noagta say pananisia ed agagi to. Sikatoy nansulat ed sakey a kongregasyon: “Wala so ilalo mi ed Katawan a nipaakar ed sikayo.” (2 Tesalonica 3:4) Maseguron walay baleg ya agawaan na pananisia, panagmatalek, tan kompiyansa nen Pablo pian napakiwas iramay Kristiano. Ontan met so gagala na mamatatken tan managbiahen manangasikaso natan. Agaylan makarepresko irayan matoor a lalaki legan a maaro ran pastolan so pulok na Dios!—Isaias 32:1, 2; 1 Pedro 5:1-3.
Panbilay Unong ed Ganggan ed si Kristo
15. Antoray nitepet tayo ed inkasikatayon dili pian nanengneng no kasin niyaaplika tayo so ganggan ed si Kristo ed relasyon tayo ed agagi tayo?
15 Kaukolan tayon amin ya usisaen so inkasikatayo a naynay no kasin sikatayoy manbibilay unong ed ganggan ed si Kristo tan mangiyaalibansa ed satan. (2 Corinto 13:5) Peteg, amin tayo so nagunggunaan diad pangitepet: ‘Kasin siak so makapaseseg odino mabalaw? Kasin siak so asimbang odino alablabas? Nipapanengneng ko ta so konsiderasyon ed arum odino ipipilit koray kanepegan ko?’ Agsasalien na sakey a Kristiano ya idikta no antoray kundang a nepeg odino agnepeg a gawaen na agi to ed saray pamaakaran ya agmet espisipikon kokobrian ed Biblia.—Roma 12:1; 1 Corinto 4:6.
16. Panon tayon natulongan iramay negatibo so panmoria ra ed inkasikaran dili, diad ontan et susumpalen so sakey ya importantin kabiangan na ganggan ed si Kristo?
16 Diad sarayan maatap a panaon, importanti parad sikatayon anapen iray paraan pian makapanpapasesegan. (Hebreos 10:24, 25; ikompara so Mateo 7:1-5.) Sano onnenengneng tayo ed agagi tayo, agta mas importanti ed sikatayo so maong a kualidad da nen say saray kakapuyan da? Parad si Jehova, balang sakey so mabmabli. Makapaermen, ta aliwan ontan so liknaan na amin, anggan ed inkasikaran dili. Dakel so onnenengneng labat ed dilin kakabusan tan ag-inkayadyari ra. Pian napaseseg iratan—tan arum ni—sarag tayo ta a katongtongen so sakey odino duaran totoo ed kada miting, ya ipapaamta ed sikara no akin a papablien tayo so presensia ra tan say baleg a tulong a gagawaen da parad say kongregasyon? Agaylan gayaga a napalemew so sasakbaten da ed onian dalan tan diad ontan et nasumpal so ganggan ed si Kristo.—Galacia 6:2.
Onkikiwas so Ganggan ed si Kristo!
17. Diad anton nanduruman paraan a nanenengneng yo ya onkikiwas so ganggan ed si Kristo diad kongregasyon yo?
17 Say ganggan ed si Kristo so onkikiwas ed loob na Kristianon kongregasyon. Naiimano tayo itan ya inagew-agew—sano sigugunaet ya inanabang na kaparan Tastasi so maong a balita, sano manliligliwaan tan manpapasesegan ira, sano mipupuligesgesan ira a manlingkor ed si Jehova anggaman walaray mairap a tuloy a problema ra, sano panggugunaetan na atateng a pabalegen iray anak da ya aroen si Jehova tekep na magayagan puso, sano saray manangasikaso so maaro tan masimoon a mangibabangat na Salita na Dios, a sasagyaten so pulok a nawalaan na masimoon a seseg a lingkoran si Jehova a magnayon. (Mateo 28:19, 20; 1 Tesalonica 5:11, 14) Sano sikatayo bilang indibidual so mangiyaplika ed ganggan ed si Kristo ed dilin bilay tayo, talagan manggayaga so puso nen Jehova! (Uliran 23:15) Labay ton maandon manbilay ya amin iramay mangaaro ed naspot a ganggan to. Diad onsabin Paraiso, nanengneng tayo so panaon sano say katooan so ayadyari, panaon ya anggapo laray mananumlang na ganggan, tan panaon sano amin ya inklinasyon na kapusoan tayo so nakontrol la. Agaylan maglorian tumang ed panbilay unong ed ganggan ed si Kristo!
[Paimano ed leksab]
a Saratan ya ayaman so aliwan singa saray monasteryo na Kakristianoan. Anggaporay “abbot,” odino “saray ama,” diad satan a pantalos. (Mateo 23:9) Papagalangan iray responsablin agagin lalaki, balet say serbisyo ra so niwawanwan na parehon prinsipyos a manguuley ed amin a mamatatken.
Anto so Padesir Yo?
◻ Akin ya agnatatalosan na Kakristianoan so kabaliksan na ganggan ed si Kristo?
◻ Panon tayon niyaplika ed pamilya so ganggan ed si Kristo?
◻ Pian niyaplika ed kongregasyon so ganggan ed si Kristo, anto so nepeg tayon paliisan, tan anto so nepeg tayon gawaen?
◻ Panon a natumbok na mamatatken so ganggan ed si Kristo ed pidedeneng da ed kongregasyon?
[Litrato ed pahina 23]
Say anak yo so walaan na sankabalgan a pankaukolan parad aro
[Litrato ed pahina 24]
Agaylan makarepresko iray pinablin mamatatken tayo!