Nibulos Diad Panamegley na Katuaan

DIAD Estados Unidos, masulok a sakey milyon a totoo so nipisok ed saray prisoan. Diad saraya, ngalngali talon libo so senintinsyaan ya ompatey. Ilitratom pa so inkasika ed satan a situasyon. Anto kasi so liknaan mo? Say pannonot ed ontan a nenengnengen so talagan makapakigtot. Ingen, diad pantalos, amin a totoo so walad mipadparan sirkumstansya. Oniay ibabaga na Biblia: “Amin nankasalanan, tan makulang ira ed gloria na Dios.” (Roma 3:23) On, bilang kapolian nen Adan, sikatayo so “akulong” diad panamegley na makasalanan a kipapasen. (Roma 5:12) Nalilikna tayoray epekto na inkipisok tayo ed inagew-agew, a singa met ed si Kristianon apostol Pablo, a nansulat: “Wala so nanengneng ko a sananey a ganggan ed saray kabiangan ko, a mibakal ya onsumpa ed ganggan na isip ko, tan arakep to ak ed ganggan na kasalanan a wala ed saray kabiangan ko.”​—Roma 7:23.

Bilang resulta na makasalanan a kipapasen tayo, balang sakey ed sikatayo so nisilong ed sentinsyan patey, a singa panangibaga, lapud ibabaga na Biblia: “Say bayar na kasalanan say patey.” (Roma 6:23) Suston tuloy so impaneskribi nen salmistan Moises ed situasyon tayo: “Pitomplon taon kami labat​—walomplon taon, no mabiskeg kami; balet amin na saratan so angitarok ed sikami na gulo tan ermen; agmabayag napaso so bilay, tan naandipat kami la.”​—Salmo 90:10, Today’s English Version; ikompara so Santiago 4:14.

Lapud inkaaripen na katooan ed kasalanan tan patey ya inkuan nen Jesus ed saray patumbok to: “Say katuaan sikayo so gawaen to a bulos.” (Juan 8:32) Diad saraman a salita, ya innatnat nen Jesus ed saray patumbok to so ilalo ed bengatlan lalon babaleg nen say kawayangan manlapud uley na Romano​—iyoopresi to ed sikara so kaperdona manlapud kasalanan tan kabulos manlapud patey! Panon a nipagamor itan ed sikara? “No say Anak gawaen to kayon bulos,” so imbaga nen Jesus ed sikara, “sikayo so peteg a bulos naani.” (Juan 8:36) On, diad impangiter to na bilay to, “say Anak,” si Jesus, so kinmana bilang pikakareenan a bagat pian narondon so abalang nen Adan. (1 Juan 4:10) Inlukas na saya so dalan parad amin a matulok a katooan pian nibulos manlapud inkaaripen ed kasalanan tan patey. Say bogbogtong ya Anak na Dios so inatey “pian siopaman a manisia ed sikato agnatawtaw, noag ingen wala so bilay ton andi-anggaan.”​—Juan 3:16.

Kanian say katuaan a makapangibulos ed sikatayo so akasentro ed si Jesu-Kristo. Saraman so magmaliw a mananumbok na bakat to so walaan na ilalo ed kibulos manlapud kasalanan tan patey sano sigpot lan mangontrol so Panarian na Dios ed pakurang na dalin. Anggan natan et naeeksperiensia la na saramay mangaawat ed katuaan na Salitay Dios so puron kawayangan. Diad antoran dalan?

Kawayangan Manlapud Takot ed Inaatey

Minilyon natan a manbibilay so natatakot ed inaatey. Akin? Lapud ibabangat ira na relihyon da a say kamarerwa so onsian ed laman no ompatey tan onla ed ayaman na saray espiritu. Satan no akin a kostumbre ed arum a daldalin parad kakanayon na inateyan so manlamay a manbayag na pigaran agew tan labi. Mabetbet a lalaktipen na saya so maksil a panagkansion tan panagtambol. Sisiaen na saray maneermen a satan so mamaliket ed inatey a too tan mangamper ed espiritu ton ompawil a manaktakot ed saray mabilay. Saray palson bangat na Kakristianoan nipaakar ed inaatey so lalon kinmana diad agpakalingwan ed sayan tradisyon.

Balet, ipaparungtal na Biblia so katuaan nipaakar ed kipapasen na inaatey. Malinlinew ton isasalaysay a say kamarerwam et sika, aliwan sakey a misteryoson kabiangan mo a manbilay ni kayari ipapatey. (Genesis 2:7; Ezequiel 18:4) Niarum ni, agnapapairap iray inatey ed mangapoy-apoy ya impierno, nisay kabiangan ira ed ayaman na saray espiritu a nayarian dan apektaen iray mabilay. “Balet saray inaatey,” kuan na Biblia, “agda amta so bengatla, . . . Ta anggapo so gawa, no kanonotan, no pakaamta, no kakabatan, dia ed Sheol [say lubok], a laen mo.”​—Eclesiastes 9:5, 10.

Nibubulos la na sarayan katuaan ed Biblia so dakel a totoo manlapud takot ed inaatey. Aglara mangiyaapay na mabli iran bagat pian mikareenan ed inmuunan atateng da, nisay panaburidoan day andi-panangasin kapapairap na saray inad-aro ra lapud kasalanan da. Naaralan dan iyoopresi na Biblia so makapakelaw ya ilalo parad saraman so inaatey, ta ibabaga to’d sikatayo a diad aturon panaon na Dios, nagawa “naani so kioli ed bilay na saray matunong tan agmatunong.” (Gawa 24:15; Juan 5:28, 29) Sirin, saray inatey natan so manpapainawa labat, a singano maitlek a nauugip.​—Ikompara so Juan 11:11-14.

Say katuaan nipaakar ed kipapasen na inaatey tan say ilalo ed kioli so mangibulos ed sikatayo manlapud liknaan ya andiay ilalo a nayarin itatarok na patey. Say ontan ya ilalo so amasungdo ed sakey a sanasawa diad Estados Unidos sanen inatey so apat taon ya anak dan laki ed aksidinti. “Wala so kakulangan ed bilay mi ya agbalot napano ya anggad nanengneng mi so anak min laki lamet diad panamegley na kioli,” so inako na ina to. “Balet amta mi a say ot-ot mi so temporaryo labat, ta isisipan nen Jehova a punasen toray lua tayo lapud ermen.”​—Apocalipsis 21:3, 4.

Kawayangan Manlapud Takot ed Arapen

Anto so nagawa ed arapen? Napoolan kasi so dalin diad sakey a pirmin kaderal ed nuklear? Kasin say kaderal na kaliberliber na dalin et pagmaliwen ton agnapambilayan so planeta tayo? Kasin say inkagba ed moral so mangitonton ed anarkiya tan kawewetwet? Saraya so peteg a katatakotan na dakel natan.

Balet, iyoopresi na Biblia so kawayangan manlapud ontan iran makapasesgan takot. Ipapaseguro to ed sikatayo a “say dalin mansiansia lawas.” (Eclesiastes 1:4) Agpinalsa nen Jehova so planeta tayo pian nengnengen ton deralen labat na iresponsablin totoo. (Isaias 45:18) Imbes, pinalsa nen Jehova so dalin ya onkana bilang paraison ayaman parad nankakasakey ya atooan a pamilya. (Genesis 1:27, 28) Ag-anguman so gagala to. Ibabaga ed sikatayo na Biblia a say Dios et ‘bagbagen to so mamabagbag ed dalin.’ (Apocalipsis 11:18) Kayari na satan, “saray mauyamo tawiren da naani dalin,” kuan na Biblia, “tan manliket ira a dili ed inkadaakan na kareenan.”​—Salmo 37:11.

Satan a sipan so napanmatalkan, ta say Dios so agmantila. Imbaga nen Jehova diad panamegley na propeta ton Isaias: “[Say] salitak ya ompaway ed sangik . . . ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangyakaran ko ed sikato.” (Isaias 55:11; Tito 1:2) Sirin, makapanilalo tayo ed arapen tekep na kompiyansa a nasumpal so sipan na Dios a nirekord ed Biblia diad 2 Pedro 3:13: “Alagden tayo so saray tawen a balo tan dalin a balo, a sikara so pana-ayaman na katunongan.”

Kawayangan Manlapud Takot ed Too

Itatarya ed sikatayo na Biblia iray eksilintin alimbawa na lalaki tan bibii ya angipanengneng na inkaandi-takot ed debosyon da’d Dios. Saraya et di Gideon, Barak, Debora, Daniel, Ester, Jeremias, Abigail, tan Jael​—diad pamitla labat na pigara. Sarayan matoor a lalaki tan bibii so angipatnag ed awawey na salmista a nansulat: “Dia ed Dios so anginan ko na panmatalek ko, agak antakot. Anto so nayarian na too a gawaen ed siak?”​—Salmo 56:11.

Diad inmunan siglo, si apostol Pedro tan Juan so angipatnag na mipadparan inkakpel sanen ginanggan ira na relihyoson autoridad ya ontundan manpulong. ‘No parad sikami,’ so ebat da, ‘agkami ontundan mansalita nipaakar ed saray bengatlan anengneng tan nadngel mi.’ Bilang resulta na malet a talindeg da, si Pedro tan Juan diad saginonor et impisok. Kayari mamilagron inkibulos da, inggapo ra lamet so kimey da tan nantultuloy dan ‘sinalita so salita na Dios a makmakpel.’ Ag-abayag si Pedro tan arum ya apostol so inawit ed Judion Sanhedrin. “Inbilin mi ed sikayo a malet ya agkayo manbangat ed sayan ngaran,” so inkuan na atagey a saserdote ed sikara, “et nia! pinano yo so Jerusalem na bangat yo.” Inmebat si Pedro tan arum ya apostol: “Nakaukolan ya unoren mi so Dios nen saray totoo.”​—Gawa 4:16, 17, 19, 20, 31; 5:18-20, 27-29.

Diad say kimey dan panangipulong ed maong a balita na Panarian na Dios, panbubunekan natan na Tastasi nen Jehova ya aligen so seseg na inmunan-siglon Kristianos. Anggan saray tobonbalo ed limog da so mabetbet a mamapaneknek na inkasikaran andi-takot diad pangitongtong da ed arum nipaakar ed pananisia ra. Konsideraen pay pigaran alimbawa.

Si Stacie, sakey a tin-edyer, so sipor lan mabaing. Bilang resulta, say pitongtong ed arum nipaakar ed pananisia to so diad inmuna et sakey ya angat. Anto so ginawa to pian natalonaan toy inkamabaing to? “Inaral koy Biblia tan sinegurok a natatalosan koy ibabagak,” so kuanto. “Agawan mas mainomay, tan walaan ak na lalon kompiyansa ed inkasiak.” Say maabig a reputasyon nen Stacie so nibalita ed lokal a peryodiko. Oniay inkuan na artikulo, ya insulat na maestra to ed paneeskuelaan to: “Say pananisia nen [Stacie] so ompasen a mangiiter ed sikato na biskeg a nalabanan so dakel a desdes a maslak a nasasagmak na saray tin-edyer. . . . Nalilikna ton say panaglingkor ed Dios so nepeg a manunaan ed kanonotan to.”

Si Tommy so akapanaral la nipaakar ed Biblia manlapud atateng to sanen sikato labat ni so limay taon. Anggan ed asasakbay ya edad, sikatoy makpel a tinmalindeg ed tuan panagdayew. Legan a mandrodrowing so kalangweran a kaklase to na saray litrato na piesta opisyal, si Tommy so angidrowing na saray eksena na insipan na Dios a Paraiso. Bilang tin-edyer, naimano nen Tommy a dakel ed saray eskuela so nawewetwet nipaakar ed saray sisiaen na Tastasi nen Jehova. Imbes a sikatoy onsener lapud takot, kinerew to ed sakey ed saray maestro to no sikatoy makapangikonduktay tepet-tan-ebat a diskusyon a kaibay kaklase to pian naebatan so amin a tepet da a sansakey. Satan so inabobonan, tan niiter so maabig a pantasi.

Sanen sikatoy mantaon na 17, naimano nen Markietta so sakey ya eksilintin pankanawnawa a mangitongtong ed arum ed klase to nipaakar ed pananisia to. “Naikdan kami na asainmin a manpaliwawa,” inkuanto. “Pinilik so temak a nanlapud libron Questions Young People Ask​—Answers That Work.a Amili ak na limaran kapitulo a nanlapud libro tan insulat iray titulo ed pisara. Kinerew ko’d klase ya iyuksoy da no antoy liknaen dan sankaimportantian.” Tinmumbok so diskusyon ya akibiangan na klase. “Impanengneng ko ed klase so libro,” sinampotan nen Markietta, “tan pigaran estudyante so kinmerew na kopya. Anggan say maestrak et kuanton labay to met.”

Nibulos Ka Diad Panamegley na Katuaan

Singa naimano tayo la, say katuaan a lugan na Biblia so walaan na manangibulos ya epekto ed amin ya edad a manaaral ed satan tan mangipapapuso ed mensahe to. Nibubulos ira na satan manlapud takot ed inaatey, takot ed arapen, tan takot ed too. Kaunoran, say dondon nen Jesus so mangibulos ed matulok a katooan manlapud kasalanan tan ipapatey. Agaylan gayaga so pambilay a maando ed sakey a paraison dalin, ya aglan balot nipisok diad panamegley na dili tayon makasalanan a kipapasen!​—Salmo 37:29.

Labay mo ta a lalon naaralan so nipaakar ed saray bendisyon ya insipan na Dios? No ontan, antoy nepeg mon gawaen? Inkuan nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Kanian no labay mon naeksperiensia so kawayangan ya insipan nen Jesus ed saray babangatan to, nepeg mon aralen so nipaakar ed si Jehova a Dios tan say Anak to. Kaukolan mon amtaen so linawa na Dios tan insan gawaen itan, ta ibabaga na Biblia: “Say mundo mangangga, tan saray penel to, sabalet so mangonor ed linawa na Dios onsiansia lawas.”​—1 Juan 2:17.

[Paimano ed leksab]

[Litrato ed pahina 7]

Diad silong na Panarian na Dios, nibulos a siansia so katooan manlapud kasalanan tan ipapatey