Say Ngaran a Mangitonton ed Tuan Pananisia

“AGYO papanisiaan si Jesus tan ed mananondon a dala to,” so inkuan na sakey a bii ed sakey ed Tastasi nen Jehova. Onia met so impilit na sakey a laki: “Tatawagen yoy inkasikayo a Tastasi nen Jehova, balet tasi ak nen Jesus.”

Kaslakan lan tuloy so panmorian agpapanisiaan na Tastasi nen Jehova si Jesus odino agda tanton iikdan na importansia. Balet, antoray katuaan?

Tuan papablien a tuloy na Tastasi nen Jehova so ngaran na Dios, a Jehova.a Nanonotan ni nen Itamar, sakey a Tasin taga-Brazil: “Asabi baleg ya impanguman ed bilay ko sanen naamtaan koy ngaran na Dios. Sanen pilpilimerok ya abasa itan, singa ak no aliing ed maitlep ya ugip. Say ngaran a Jehova so anagyat tan amakiwas ed siak; inapektaan ton tuloy so bilay ko.” Anggaman kuan, inyarum to: “Manleppua met so panangarok ed si Jesus.”

On, bidbiren na Tastasi nen Jehova a pian nagamoran so bilay ya andi-anggaan, nepeg a walaan iray pananisia “ed ngaran na Anak na Dios,” si Jesus. (1 Juan 5:13) Balet antoy kabaliksan na balikas a ‘diad ngaran nen Jesus’?

No Antoy Isisimbolo na Ngaran nen Jesus

Naromog ed intiron Kristianon Griegon Kasulatan, odino “Balon Sipan” so “diad ngaran nen Jesus” tan miulibay iran balikas. Diad tua, say salitan “ngaran” a nausar a manutukoy ed betang nen Jesus so pinmatnag a masulok a 80 danay, manga 30 danay ed libro labat na Saray Gawa. Amautismo iray inmunan-siglon Kristiano ed ngaran nen Jesus, nantatambal ed ngaran to, nambabangat ed ngaran to, tinmatawag ed ngaran, to, anagmak na irap nisengeg ed ngaran to, tan angitandoro ed ngaran to.​—Gawa 2:38; 3:16; 5:28; 9:14, 16; 19:17.

Unong ed sakey a diksionaryo na Biblia, say Griegon salita parad “ngaran” so lanang a nauusar ed Biblia “parad amin a katutukoyan na satan a ngaran, pati lay autoridad, awawey, rangko, karlangan, pakayari, inkatalonggaring, tan arum ni, amin a bengatlan nasasaglawi na ngaran.” Sirin, say ngaran nen Jesus so mangisisimbolo ed karlangan tan malaknab ya autoridad a manguley ya inmatalek nen Jehova a Dios ed sikato. Inkuan nen Jesus mismo: “Amin a pakauley niiter ed siak ed tawen tan dia ed dalin.” (Mateo 28:18) Kayarin tinambal di Pedro tan Juan so piley a laki, onia so intepet na saray Judion lider na relihyon: “Anto a pakayari, odino siopan ngaran so nanggawaan yo na saya?” Insan sipapakpel ya imbalikas nen Pedro so pananisia to ed autoridad tan pakayarin inrepresenta na ngaran nen Jesus sanen impaamta ton “dia ed ngaran nen Jesu-Kristo a taga Nazaret, . . . lapud sikato sayan too wadian makmaksil ed arap yo.”​—Gawa 3:1-10; 4:5-10.

Pananisia ed si Jesus Odino ed si Cesar?

Anggaman ontan, say panangipatnag na pananisia ed ngaran nen Jesus et aliwan mainomay. Singa impasakbay la nen Jesus, saray babangatan to so magmaliw a ‘kagula naani na saray amin a nasyon nisengeg ed ngaran to.’ (Mateo 24:9) Akin? Lapud irerepresenta na ngaran nen Jesus so posisyon to bilang tinuro na Dios a Manuley, Ari na arari, a panpasakopan na amin a nasyon, bengatlan agda labay odino mabulos a gawaen.​—Salmo 2:1-7.

Anggan saray lider na relihyon ed agew nen Jesus so agmet malabay a manpasakop ed si Jesus. Inkuan da: “Anggapo so Ari mi noag si Cesar,” diad ontan et impulisay day Anak na Dios. (Juan 19:13-15) Imbes, impaarap day pananisia ra ed ngaran​—say pakayari tan autoridad​—nen Cesar tan say imperyal a gobierno to. Denesidi ra ni ingen a kaukolan ya ompatey si Jesus ta pian napansiansia ray posisyon tan kipapasen da.​—Juan 11:47-53.

Diad inlabas na saray siglo kayari impatey nen Jesus, inalig na dakel ed saramay mankuan a Kristianos so panmoria a miulibay ed saray Judion lider. Sarayan nikuan a Kristianos so angagamil na pananisia ed pakayari tan autoridad na Estado tan akibabali ed saray gotgotan to. Singa bilang, diad koma-11 a siglo, kayarin inorganisa na relihyon iray agnauusar a mibabakal a ginawan militia Christi, odino Kristianon kabalyero, “say responsabilidad a panangidaulo na matunong a bakal so inekal manlapud sekular iran pakayari na Kakristianoan tan, imbes ya ontan et inako na simbaan diad panamegley na ahensia na saray Kristianon kabalyero to.” (The Oxford History of Christianity) Iyaarum na salaysay a walaray deklarasyon na papa ya angitonton ed karaklan na saray managkrusada pian manisia a diad pibiang ed saray krusada et “sikaray akikontrata ed Dios tan apaseguroan a sikaran mismoy walaan na pasen ed Paraiso.”

Nayarin isuppiat na pigara a posibli so panmatoor ed si Jesus tan makapibali met ed saray mapolitikan pakurang, ontan met ed pambabakal na nasyones. Nayarin ipasen dan obligasyon na Kristiano a labanay mauges inermay pakaromogan ed satan tan laktipen na saya so pibakal no kapilitan. Balet kasin onia met so panmoria na inmuunan Kristiano?

“Agnansundalo iray sankasakbayan a Kristiano,” so ibabaga na sakey ya artikulo ed The Christian Century a magasin. Ipapaliwawa to ya anggad dekaday 170-180 K.P., anggapoy ebidensian nansundalo iray Kristiano. Insan iyaarum ni na artikulo: “Kalkalna labat ya impulisay na Kristianos so isusumpa ra ed serbisyo ed militar.”

Antoray nansumpalan? “Anganko et anggapo lay pirmin amabanday ed Inkakristiano nen say impangagamil to’d talindeg ya agmiduma’d saray aliwan Kristiano no nipaakar ed pibabakal,” so inkuan na artikulon The Christian Century. “Pirmi inkaderal na satan a pananisia lapud intandoro na saray Kristiano so pananisia ed mapangasin Manangilaban bangta sisisimoon dan susuportaan met so relihyoso odino nasyonalistiko iran bakal.”

Panangalig ed Inmuunan Kristiano Natan

Kasin posibli parad Kristianos natan so pangalig ed alay abig ya alimbawa na inmuunan Kristiano? Saray Tastasi nen Jehova ed sayan siglo so mangipapanengneng a posibli. Diad panasaglawi ed sikara, onia so inkuan na editor na Holocaust Educational Digest: “Anggapoy Tasi nen Jehova a mibakal. . . . No balang sakey ed mundo a walad posisyon na pakayari et walaan na onian pananisia, agla komon agawa so [Guerra Mundial II].”

Ontan met so nibaga ed mas agano nin impanlalaban ed rehyon, a singa samay agawa ed Mamaamianen ya Ireland. Pigaran taon lay apalabas, sakey ed Tastasi nen Jehova so mankakabkaabungan diad lugar na Protestanti diad syudad na Belfast. Kayarin naamtaan na sakey ya onabung a say Tasi et dati manayan Katoliko, intepet to: “Sanen Katoliko ka ni, kasin sinuportaan moy IRA [Irish Republican Army]?” Amoria na Tasi a say too et nayarin manabusado lapud sikatoy inkulong sanen narelay paltog a mamapaarap lan mamatey ed sakey a Katoliko tan kabulobulos to ni labat. Kanian inmebat so Tasi: “Aliwa ak lan Katoliko natan. Sakey ak la’d Tastasi nen Jehova. Bilang tuan Kristiano, agkon balot mamatey na siopaman parad dinanman a gobierno odino siopaman a too.” Lapud satan sikatoy pinasamanoan na onabung tan inkuanto: “Mauges ya amin so nengneng na pampapateyan. Maong so gagawaen yon totoo. Itultuloy yo itan.”

No Antoy Kabaliksan na Pananisia ed Ngaran nen Jesus

Anggaman ontan, say pangagamil na pananisia ed ngaran nen Jesus et kabaliksan toy nagkalalo nen say basta ipaliis ed bakal. Kabaliksan toy katutulok ed amin a ganggan nen Kristo. Likud ni, inkuan nen Jesus: “Sikayo so kakaarok, no gawaen yo so saray bengatla ya ingganggan ko ed sikayo,” tan sakey ed saray ganggan to et ‘manaaroan’ itayo. (Juan 15:14, 17) Panggunaetan na aro so panggaway maong ed arum. Ekalen ton amin so panangidumaduma ed rasa, relihyon, tan lapud kipapasey panagbilay. Impanengneng nen Jesus no panon.

Saray Judio ed agew nen Jesus so pirmin mamubusol ed saray Samaritano. Diad pisunian, akitongtong si Jesus ed sakey a Samaritana, tan bilang resulta, sikato tan arum ni so awalaay pananisia ed ngaran to. (Juan 4:39) Inkuan met nen Jesus a saray babangatan to so magmaliw a tastasi to “ed Jerusalem, tan ed amin a Judea tan Samaria, tan angga ed kasampotan na dalin.” (Gawa 1:8) Say manangiter-bilay a mensahe to so agnigeter ed saray Judio labat. Kanian, abilin si Pedro ya ombisita ed Romanon senturion a si Cornelio. Anggaman sebel ed Judio a bisitaen so sakey ya agda karasa, impanengneng na Dios ed si Pedro “ya anggapo so tawagen [to] a siopa a too na karaklan tan aliwa a malinis.”​—Gawa 10:28.

Bilang panangalig ed si Jesus, mabulos ya ontutulong iray Tastasi nen Jehova ed amin a totoo​—antokaman so rasa, relihyon, odino kipapasey panagbilay da​—a mangamta ed kilalaban ya onsabi diad panamegley na ngaran nen Jesus. Say pananisia ed ngaran nen Jesus so mamakiwas ed sikaran ‘[mapublikon mangiyabawag] a si Jesus et Katawan.’ (Roman 10:8, 9) Pasesegen mikan awaten so tulong da ta pian naaralan mo met so mangagamil na pananisia ed ngaran nen Jesus.

Talagan say ngaran nen Jesus so managyat komon na liknaan na kagalangan, respeto, tan katutulok. Onia so inkuan nen apostol Pablo: “Dia ed ngaran a Jesus so talimukoran na amin a pueg, na saray wala ed tawen, tan wala ed dalin tan wala ed dalem na dalin. Tan pian ganagana a dila nepeg da a patuaen a si Jesu-Kristo sikato so Katawan, a kidayewan na Dios Ama.” (Filipos 2:10, 11) Anggaman say karaklan a manaayam ed dalin et agmabulos a manpasakop ed uley nen Jesus, ipapanengneng na Biblia ya asingger lay panaon a nepeg a manpasakop so amin a totoo tano andi et naderal ira. (2 Tesalonica 1:6-9) Sirin, natan la so panaon a mangagamil na pananisia ed ngaran nen Jesus diad panumpal ed amin a ganggan to.

[Paimano ed leksab]

[Litrato ed pahina 6]

Diad ngaran nen Jesus, minilyon lay amatey tan pinapatey

[Litrato ed pahina 7]

Ag-angidumaduma ed rasa si Jesus. Ontan ka ta met?