Say Ngaran nen Jehova—No Akin ya Importante Itan ya Maong ed si Jesus

1-2. (a) Antoy ginawa nen Jesus diad samay labi antis na ipatey to? (b) Anto ran tepet so pantongtongan tayo ed sayan artikulo?

HUEBES na labi ed saman, say petsa et Nisan 14, 33 C.E. Kakkayarin sinelebraan nen Jesus so Pangdem na Katawan kaiba iray matoor ya apostol to. Amta to ya pigaran oras labat la et sikatoy traidoren la nen Judas, insan litisen, pairapen, tan pateyen na saray mamubusol ed sikato. Kayari dan nandem, pinaseseg tan binilin to ray apostol to. Tan antis iran inmalis, nampikasi ni Jesus. Importantin maong itan ya pikakasi. Nabasa tayo itan diad Juan kapitulo 17.

² Pantongtongan tayod sayan artikulo so pigara ed saray binitla nen Jesus diad satan ya pikakasi to. Antoy sankanonot to antis ya ompatey? Tan base ed satan ya pikakasi, antoy sankaimportantian ed sikato legan na ministeryo to diad dalin? Pantongtongan tayoy ebat ed saratan ya tepet.

“IMPAKABAT KOD SIKARA SO NGARAN MO”

3. Antoy labay ya ibaga nen Jesus nen imbaga ton, “Impakabat kod sikara so ngaran mo?” (Juan 17:​6, 26)

³ Diad samay pikakasi nen Jesus, oniay imbaga tod si Jehova: “Impakabat kod sikara so ngaran mo.” Diad tua, amidua ton imbaga ya impakabat o impaamta toy ngaran nen Jehova ed saray disipulo to. (Basaen so Juan 17:​6, 26.) Pero, akin et ontay imbaga nen Jesus anta amta la na saray disipulo to so ngaran na Dios? Judio ira kanian amta ra ya say ngaran na Dios et Jehova, ta ngalngali 7,000 beses itan ya nabasa diad Hebreon Kasulatan. Anto sirin so labay ya ibaga nen Jesus nen imbaga ton, “Impakabat kod sikara so ngaran mo?” Say labay ton ibaga et imbangat tod sikara no anton klase na Dios si Jehova. Tinulongan to ray disipulo to pian mas nakabkabat day Jehova—singa bilang, no anto ray ugali to, no antoy gagala to parad dalin tan ed totoo, no anto la ray ginawa to, tan no anto ni ray gawaen to diad arapen. Kabkabat ya maong nen Jesus si Jehova, kanian sarasarag ton ibangat iratan ya amin.

4-5. (a) Posible kasi ya mas magmaliw ya importante ed sika so ngaran na sakey ya too anggano abaybayag mo lan kabat? Mangiter na ilustrasyon. (b) Panon ya akabkabat na saray disipulo nen Jesus si Jehova?

⁴ Imanoen iyan ilustrasyon. Walay elder ed kongregasyon yo ya doktor, tan say ngaran to et David. Abaybayag mo lan kabat iyan brother. Balet sakey agew, adisgrasya ka tan imbatik da kad ospital ya pantratrabahoan to, tan sikato so angiligtas ed bilay mo! Lapud sayan ginawa to, lalom ya naar-aro iyan agi. Tan seguro kada no nabitlay ngaran to, say nanonotan mo et amay kamaongan ya ginawa tod sika. Tua, abaybayag mo lan kabat si David bilang elder. Pero natan, aliwa labat lan elder so pakanengneng mod sikato. Sikato met so doktor ya angiligtas ed bilay mo.

⁵ Ontan ya ontan so situasyon na saray disipulo nen Jesus. Abayag da lan amta ya say ngaran na Dios et Jehova. Pero nen akakkaiba day Jesus, lalo dan apabli itan ya ngaran. Akin ey? On ta inalig nen Jesus so ugali nen Ama to, diad panagsalita to tan diad amin ya gagawaen to. Kanian kada no narerengel na saray disipulo so paraan na panagbangat nen Jesus tan oobserbaan day panagtrato tod arum, lalo dan ‘nakakabat’ si Jehova.—Juan 14:9; 17:3.

“[SAY] NGARAN MO, YA INTER MOD SIAK”

6. Akin et imbaga nen Jesus ya inter nen Jehova ed sikato so ngaran To? (Juan 17:​11, 12)

⁶ Diad samay pikakasi nen Jesus, impikasi to iray disipulo to. Kuan to: “Bantayan mo ra nisengeg ed ngaran mo, ya inter mod siak.” (Basaen so Juan 17:​11, 12.) Labay to kasin ibaga, nayari tayo lan tawagen si Jesus ya Jehova? Andi. Agto labay ya ibagan nagmaliw lan Jehova so ngaran nen Jesus. Akin balet et imbaga nen Jesus ya inter nen Jehova ed sikato so ngaran To? Say manunan rason no akin ya imbaga to itan et lapud sikato so representative tan Spokesman nen Jehova. Linma diad dalin si Jesus tan nanggawa na saray milagro diad ngaran nen Ama to. (Juan 5:43; 10:25) Sakey ni, say kabaliksan na ngaran nen Jesus et “Si Jehova so Kilalaban.” On, kaiba so ngaran nen Jehova ed kabaliksan na ngaran nen Jesus.

7. Akin et walay autoridad nen Jesus ya isalitaan si Jehova? Mangiter na ilustrasyon.

⁷ Pian mas natalosan tayo so papel nen Jesus bilang Spokesman nen Jehova, isipen pa so trabaho na sakey ya ambassador. Say ambassador et representative na presidente, tan walay autoridad to ya isalitaan so presidente. Ontan met si Jesus. Sikato so representative nen Jehova, kanian walay autoridad to ya isalitaan si Jehova.—Mat. 21:9; Luc. 13:35.

8. Antis nin linmad dalin si Jesus, akin et imbaga nen Jehova ya “walad sikato” so ngaran To? (Exodo 23:​20, 21)

⁸ Antis nin linmad dalin si Jesus, sikatoy atawag la ya, “say Salita” ta sikato so ibabaki nen Jehova ya mangipasabi na saray mensahe tan instruksion ed saray anghel tan totoo. (Juan 1:​1-3) Nayarin si Jesus imay anghel ya imbaki nen Jehova ya mangigiya ed saray Israelita nen paarap ira ed Insipan ya Dalin. Ingganggan nen Jehova iray Israelita ya nepeg dan unoren iyan anghel. Tan imbaga to met so rason no akin. Kuan to: “Lapud say ngaran ko et walad sikato.”a (Basaen so Exodo 23:​20, 21.) Akin et imbaga nen Jehova ya “walad” si Jesus so ngaran To? On ta irerepresenta nen Jesus si Jehova. Tan diad ami-amin ya pinalsa, balbaleg so betang nen Jesus pian napasanto so ngaran nen Ama to tan napaneknekan ya amin ya gagawaen nen Jehova et duga.

“AMA, IGLORIAM SO NGARAN MO”

9. Akin et nibaga tayon importantin maong ed si Jesus so ngaran nen Jehova?

⁹ Singa apantongtongan tayo nen niman, antis nin linmad dalin si Jesus et importante lan maong ed sikato so ngaran nen Jehova. Kampegan nen wadiad dalin, nanengneng ed amin ya ginawa to ya sankanonot toy pamasanto ed ngaran nen Ama to. Nen asingger lan nasumpal so ministeryo to, oniay kerew tod si Jehova: “Ama, igloriam so ngaran mo.” Inmebat ya tampol si Jehova manlapud tawen! Oniay makmaksil ya imbaga to: “Inggloriak itan tan igloriak lamet.”—Juan 12:28.

10-11. (a) Panon ya inggloria nen Jesus so ngaran nen Jehova? (Nengnengen met so litrato.) (b) Akin et kaukolan ya napasanto tan nalinisan so reputasyon o ngaran nen Jehova?

¹⁰ Inggloria met nen Jesus so ngaran nen Ama to. Panon to itan ya ginawa? Imbangat tod arum iray balibalin ugali nen Jehova tan saray makapakelkelaw ya gagawaen To. Pero aliwan satan labat so ginawa to. Amta nen Jesus ya kaukolan to met ya pasantosen so ngaran nen Jehova, tan kaukolan ton paneknekan ya amin ya gagawaen nen Ama to et duga. Labay nen Jesus ya natalosan na saray papatumbok to ya importantin maong so pamasanto ed ngaran na Dios. Diad tua, nen imbangat to ran manpikasi, atan so sankaunaan ya binitla to. Kuan to: “Ama mi a walad tawen, napasanto komon so ngaran mo.”—Mat. 6:9.

¹¹ Akin et kaukolan ya napasanto so ngaran nen Jehova tan nalinisan so reputasyon to? On ta no pawilen tayo may agawad hardin na Eden, dineralan nen Satanas ya Diablo si Aman Jehova. Pinapaway ton matila si Jehova tan walay isisiblet To ed si Adan tan Eva. (Gen. 3:​1-5) Papapawayen sirin nen Satanas ya aliway paraan na pananguley nen Jehova. Lapud sarayan palson akusasyon nen Satanas, aderal laingen so reputasyon o ngaran nen Jehova. Insan nen panaon nen Job, insublay nen Satanas ya akusaan iray totoo. Imbaga to ya manlilingkor labat iray totoo ed si Jehova ta walay nanaala da ed sikato. Imbaga to ni ingen ya no ondalan irad subok o mairap ya situasyon, matmainomay dan benegay Jehova ta agdan talaga inaro. (Job 1:​9-11; 2:4) Kaukolan ya palabasen so panaon pian napaneknekan no siopay matila—si Jehova o si Satanas.

“ITER KO SO BILAY KO”

12. Antoy mabulbulos ya ginawa nen Jesus lapud panangaro tod ngaran nen Jehova?

¹² Inar-aro nen Jesus si Jehova, kanian akaparaan ya gawaen so amin pian napasanto tan nalinisan so ngaran nen Ama to. Akaparaan ingen ya ompatey parad ngaran nen Ama to.b Kuan to: “Iter ko so bilay ko.” (Juan 10:​17, 18) Say inmunan perpekton totoo ya si Adan tan Eva et nanrebelde ed si Jehova tan kinmampi irad si Satanas. Duma balet si Jesus. Mabulbulos ya linma diad dalin ta labay ton paneknekan ya inar-aro toy Jehova. Kanian diad interon bilay to diad dalin, inunor toy amin ya ipapagawa nen Ama to. (Heb. 4:15; 5:​7-10) Inanosan toy amin ya irap tan nansiansian matoor anggad impatey to diad panamairapan ya poste. (Heb. 12:2) Ginawa to iya ta inar-aro toy Jehova tan say ngaran nen Ama to.

13. Akin et si Jesus so talagan makapanpatunay ya matila si Satanas? (Nengnengen met so litrato.)

¹³ Diad interon bilay nen Jesus, pinaneknekan to ya si Satanas so matila, aliwan si Jehova. (Juan 8:44) Anggapo lay arum ya mas makapikabat ed si Jehova nen say si Jesus. Kanian no walay anggan daiset ya katuaan ed saramay akusasyon nen Satanas ed si Jehova, si Jesus so makaamta. Pero amta to ya katilaan iratan ya amin, kanian aga ompayag ya agto naidepensay ngaran o reputasyon nen Ama to! Anggano nen manpapanabos lay Jesus tan singa pinaulyanan la nen Jehova, mas labay to ni ompatey tan mansiansian matoor nen say traidoren toy Ama to.—Mat. 27:46.c

“SINUMPAL KOY KIMEY YA IMPAGAWAM ED SIAK”

14. Panon ya benendisyonan nen Jehova so impanmatoor nen Jesus?

¹⁴ Diad samay pikakasi nen Jesus ed samay labi antis na impatey to, onia ni imbaga tod si Jehova: “Sinumpal koy kimey ya impagawam ed siak.” Baleg so tiwala nen Jesus ya bendisyonan nen Jehova so impanmatoor to. (Juan 17:​4, 5) Tan aga alingolingo! Kayari labat na pigaran agew manlapud impatey to, sikatoy pinaoli nen Jehova. (Gawa 2:​23, 24) Kapawil tod tawen, inikdan nen Jehova na mas atagey ya posisyon. (Fil. 2:​8, 9) Tan sinmabi panaon, ginmapon nanuley si Jesus bilang Ari ed Panarian na Dios. Antoy gawaen to ’tan ya Panarian? Say ebat et amay komaduan binitla nen Jesus nen imbangat to ray disipulo to ya manpikasi. Oniay imbaga tod si Jehova: “Onsabi la komon so Panarian mo. Nagawa komon so linawam, a singa ed tawen, ontan met diad dalin.”—Mat. 6:10.

15. Anto ni gawaen nen Jesus?

¹⁵ Asingsingger lan miguerra si Jesus ed saray kakabusol na Dios tan deralen toy amin ya mauges diad Armagedon. (Apo. 16:​14, 16; 19:​11-16) Kayari to ’tan, ibantak toy Satanas diad “kaaralman.” Legan ya wadtan si Satanas, anggapon balot so nagawaan to pian naimpluensyaan iray totoo. (Apo. 20:​1-3) Insan manuley si Jesus diad loob na Sanlibon Taon. Ipawil toy deen diad dalin tan tulongan to ray totoo pian magmaliw iran perpekto. Bilayen to iray inaatey tan gawaen ton paraiso so interon dalin. On, diad satan ya panaon, nagawa la so gagala nen Jehova!—Apo. 21:​1-4.

16. Anto lay situasyon tayo kayari na Sanlibon Taon ya Uley nen Jesus?

¹⁶ Anto la kasi situasyon tayo kayari na Sanlibon Taon ya Uley nen Jesus? Diad satan ya panaon, anggapo lay kasalanan tan ag-inkaperpekto. Agtayo la kaukolan so onkerew na panamerdona base ed dondon bagat nen Jesus. Direkta tayo lan makaasingger ed si Jehova. Kanian agtayo la kaukolan so manamegley o say serbisyo na Atagey a Saserdote (si Jesu-Kristo) tan saray katulongan ya saserdote (say 144,000). Ontan met, say ‘unor a kabusol, say patey, et naandi la.’ Apaoli met la iray inaatey. Sa wakas, perpekto la so amin ya totoo diad dalin!—1 Cor. 15:​25, 26.

17-18. (a) Anto ni nagawa kayari na Sanlibon Taon? (b) Antoy gawaen nen Jesus no asumpal lay uley to? (1 Corinto 15:​24, 28) (Nengnengen met so litrato.)

¹⁷ Anto ni nagawa kayari na Sanlibon Taon ya Uley nen Jesus? Espisyal itan ya panaon ta diad satan et natuldukan la so isyu nipaakar ed ngaran nen Jehova. Akin et ontay nibaga tayo? No pawilen tayo may agawad hardin na Eden, pinapaway nen Satanas ya matila si Jehova tan agto kuno inaro iray totoo. Pero manlapu lad saman, dakdakel lan lingkor nen Jehova so nampatunay ya say paraan na pananguley to so sankaabigan. Kanian kayari na Sanlibon Taon, talagan nalinisan la so ngaran nen Jehova tan anggapo lay nepeg ton patunayan! Aglan balot nakuestion ya talagan maar-aron Ama si Jehova.

¹⁸ On, kayari na Sanlibon Taon ya Uley nen Jesus, amta la na amin ya si Satanas so matila. Natan ya asumpal lay uley nen Jesus, anto lay gawaen to ey? Kasin aligen toy Satanas tan manrebelde met ed si Jehova? Andi! (Basaen so 1 Corinto 15:​24, 28.) Ipawil la nen Jesus so Panarian ed Ama to. On, arawin dalin si Jesus ed si Satanas! Mabulos ya manpasakop si Jesus ed uley nen Jehova. Gawaen to iratan ya amin ta inar-aro toy Ama to.

19. Panon kaimportante ed si Jesus so ngaran nen Jehova?

¹⁹ Kayari na sayan impanaral tayo, agtayo la pankelawan no akin ya inter nen Jehova so ngaran to ed si Jesus. Aga alingolingoy Aman Jehova ed impanpili tod si Jesus bilang representative to! On, importantin maong ed si Jesus so ngaran nen Jehova. Parad si Jesus, anggapo lay mas importante nen say ngaran nen Ama to. Akaparaan ya ompatey parad satan ya ngaran. Tan mabulos to met ya ipawil so Panarian ed si Jehova kayari na Sanlibon Taon ya Uley to. Panon tayon naalig si Jesus? Atan so pantongtongan tayo diad ontumbok ya artikulo.