Ipanengneng Mon Importante ed Sika so Ngaran nen Jehova!

1-2. Panon tayon nibaga ya importantin maong ed si Jesus so ngaran nen Jehova?

ANGGAPO lay mas importante ed si Jesus nen say ngaran nen Jehova. Diad amin ya pinalsa nen Jehova, anggapoy makapipara ed ginawa nen Jesus pian napasanto so ngaran nen Ama to. Singa inaral tayod imbeneg ya artikulo, akaparaan ya ompatey si Jesus parad ngaran nen Jehova, tan pian napaneknekan ya duga so paraan na pananguley To. (Mar. 14:36; Heb. 10:​7-9) Tan kayari na Sanlibon Taon ya Uley nen Jesus, mabulbulos ton ipawil so amin ya autoridad ed si Jehova pian onlad Ama to so amin ya gloria. (1 Cor. 15:​26-28) Patunay iratan ya mabmabli ed si Jesus so ngaran nen Jehova tan talagan inar-aro toy Ama to.

² Linma diad dalin si Jesus diad ngaran nen Ama to. (Juan 5:43; 12:13) Impakabat tod saray papatumbok to so ngaran nen Ama to. (Juan 17:​6, 26) Nambangat si Jesus tan nanggawa na saray milagro diad ngaran nen Jehova. (Juan 10:25) Tan nen impikasi tod si Jehova iray disipulo to, imbaga to: “Bantayan mo ra nisengeg ed ngaran mo.” (Juan 17:11) On, talagan importante ed si Jesus so ngaran nen Jehova. Kanian nibaga kasin tuan Kristiano so sakey ya too no agto amta tan agto uusaren so ngaran nen Jehova?

3. Antoy pantongtongan tayod sayan artikulo?

³ Lapud Kristiano tayo, aaligen tayoy alimbawa nen Jesus—mabmabli ed sikatayo so ngaran nen Jehova. (1 Ped. 2:21) Pantongtongan tayo ed sayan artikulo no akin ya saramay mangipupulong na “maong a balita na Panarian” et awi-awit day ngaran nen Jehova. (Mat. 24:14) Pantongtongan tayo met no panon tayon nipanengneng ya importante ed sikatayo so ngaran nen Jehova.

“TOTOON PARAD NGARAN TO”

4. (a) Antoy ingganggan nen Jesus ed saray disipulo to antis ya ompawil ed tawen? (b) Anton tepet so pantongtongan tayo?

⁴ Antis ya ompawil ed tawen si Jesus, oniay imbaga to ed saray disipulo to: “Makaawat kayo na pakayari sano onsabi ed sikayo so masanton espiritu, tan mantasi kayo nipaakar ed siak diad Jerusalem, diad interon Judea tan Samaria, tan diad sankaarawian a pasen na dalin.” (Gawa 1:8) Labay ton ibaga sirin, onsabi panaon ya nipulong so maong a balita diad interon mundo, aliwa labat ya diad Israel. Kanian amin ya totoo et naikday pankanawnawan magmaliw ya disipulo nen Jesus. (Mat. 28:​19, 20) Pero, naimano yo may imbaga nen Jesus ya, “Mantasi kayo nipaakar ed siak”? Labay to kasin ibaga, saramay magmaliw ya balon disipulo et mantasi ra labat nipaakar ed si Jesus, tan agda la nepeg ya kabaten si Jehova? Makatulong imay nabasad Gawa kapitulo 15 pian naamtaan tayoy ebat.

5. Nen nanmiting iray apostol tan mamatatken ed Jerusalem, panon tayon nanengneng ed samay apantongtongan da ya kaukolan ya naamtaan na amin ya totoo so ngaran nen Jehova? (Nengnengen met so litrato.)

⁵ Nen 49 C.E., nanmiting iray apostol tan mamatatken ed Jerusalem, tan nantongtongan da no kasin kaukolan nin manpasegat iray aliwan Judio pian magmaliw iran Kristiano. Diad sampot na miting da, oniay imbaga na agi nen Jesus ed ina ya si Santiago: “Malinlinew ya insalaysay nen [Pedro] no panon ya aawaten la natan na Dios iray aliwan Judio pian manpili ed sikara na totoon parad ngaran to.” Siopay akan-ngaran ed satan? Say ebat et wadman ed sinmublay ya imbaga nen Santiago, ya inala to ed libron Amos. Kuan to: “Saramay akera et masimoon dan anapen si Jehova, pati saray totoo na amin a nasyon, saray totoon tinawag ed ngaran ko, inkuan nen Jehova.” (Gawa 15:​14-18) On, nepeg a kabaten na saray balon disipulo si Jehova tan ‘natawag irad ngaran to.’ Labay ton ibaga, awi-awit day ngaran nen Jehova tan nakabkabat ira lapud satan ya ngaran.

6-7. (a) Antoy sakey ya rason akin et linmay Jesus diad dalin? (b) Anto balet so manunan rason na inyakar to diad dalin?

⁶ Say kabaliksan na ngaran nen Jesus et “Si Jehova so Kilalaban.” Dugaruga itan ya ngaran to ta inusar nen Jehova si Jesus pian iliktar so amin ya totoo ya mangipanengneng na pananisia. Linma diad dalin si Jesus pian dondonen iray totoo ed saray kasalanan da. (Mat. 20:28) Lapud abayaran la nen Jesus so dondon, sarag itayo lan perdonaen nen Aman Jehova tan wala lay ilalo tayon manbilay na andi-anggaan.—Juan 3:16.

⁷ Pero, anto la may rason akin et kaukolan na totoo so dondon? Nankasalanan so inmunan atateng tayo, si Adan tan Eva. Singa apantongtongan tayod imbeneg ya artikulo, nanrebelde ira ed si Jehova kanian abalang day pankanawnawan manbilay na andi-anggaan. (Gen. 3:​6, 24) Pero, wala ni mas importantin rason no akin ya linmay Jesus diad dalin. No pawilen tayo may agawad hardin na Eden, aderal so ngaran nen Jehova lapud samay akusasyon nen Satanas. (Gen. 3:​4, 5) Kanian kaukolan ya nalinisan o napasanto so ngaran nen Jehova. Atan so manunan rason no akin ya linmay Jesus diad dalin! Si Jesus so representative nen Jehova, kanian balbaleg so papel to pian napasanto so ngaran nen Ama to.

8. Antoy nepeg ya bidbiren tan talosan na amin ya Kristiano?

⁸ Nepeg sirin ya bidbiren na amin ya Kristiano ya say kililiktar da et nanlapu ed Ama nen Jesus, si Jehova. (Juan 17:3) Tan singa si Jesus, nakabkabat met ira ed ngaran nen Jehova. Kaukolan da met ya talosan no akin ya importantin napasanto so ngaran nen Jehova. Ditan akadepende so kililiktar da! (Gawa 2:​21, 22) On, amin ya tuan Kristiano et nepeg dan kabaten si Jehova, aliwa labat ya si Jesus. Atan so rason no akin ya oniay imbaga nen Jesus ed sampot na samay pikakasi to ya nabasad Juan 17: “Impakabat kod sikara so ngaran mo tan ipakabat ko itan, pian nipatnag da met so aro ya impatnag mod siak tan mikasakey ak ed sikara.”—Juan 17:26.

“SIKAYO RAY TASIK”

9. Antoy kaukolan ya gawaen na amin ya tuan papatumbok nen Jesus?

⁹ Base ed saray apantongtongan tayo la, kaukolan ya pasantosen na amin ya tuan papatumbok nen Jesus so ngaran nen Jehova. (Mat. 6:​9, 10) Ipanengneng tayo sirin ed kabibilay tayo ya atan ya ngaran so sankaimportantian ed sikatayo. Pero antoy gawaen tayo pian napasanto tayoy ngaran nen Jehova tan napaneknekan tayon matila si Satanas?

10. Anton simbolikon kaso so nabasad Isaias 42 anggad 44? (Isaias 43:9; 44:​7-9) (Nengnengen met so litrato.)

¹⁰ Nabasa tayod Isaias kapitulo 42 anggad 44 ya walay importantin betang tayo pian napasanto so ngaran nen Jehova. Base ed satan, singa walay nagagawan hearing ed korte tan pantotongtongan no siopan talaga so tuan Dios. Hahamonen nen Jehova iray dirios ya pruebaan dan tua ira. Tan singa met ed kaso diad korte, imbaga to ya iyarap da ray tasi ra ya mantestigo parad sikara, pero anggapoy naiyarap da!—Basaen so Isaias 43:9; 44:​7-9.

11. Base ed Isaias 43:​10-12, antoy imbaga nen Jehova ed saray totoo to?

¹¹ Basaen so Isaias 43:​10-12. Onia balet so imbaga nen Jehova ed saray totoo to: “Sikayo ray tasik, . . . tan siak so Dios.” Insan to ra tinepetan: “Wala ta ni Dios nilikud ed siak?” (Isa. 44:8) Pribilehyo tayon ebatan itan ya tepet. Lapud Tasi nen Jehova itayo, sarag tayoy mantestigo parad sikato. Panon? Pruebaan tayo ed saray ibabaga tan gagawaen tayo ya si Jehova labat so tuan Dios. Ipanengneng tayo ya say ngaran to so sankaimportantian ed bilay tayo. Tan anggano dakdakel so gagawaen nen Satanas pian patundaen to tayon manlingkor, ipanengneng tayod paraan na kabibilay tayo ya inar-aro tayoy Jehova tan matoor tayod Sikato. No ontan so gawaen tayo, baleg so nitulong tayo pian napasanto so ngaran nen Jehova.

12. Panon ya asumpal so propesiya ed Isaias 40:​3, 5?

¹² Impropesiya met nen Isaias ya walay sakey ya too ya “linisan [o “iparaan,” paimanod leksab]” to so “dalanen nen Jehova.” (Isa. 40:3) Panon itan ya asumpal? Asumpal itan nen imparaan nen Juan ya Managbautismo so dalan parad si Jesus. Nen ginawa itan nen Juan, singa to met lanlamang imparaan so “dalanen nen Jehova.” Akin ey? On ta representative nen Jehova si Jesus, tan amin ya imbaga nen Jesus et nanlapud Ama to. (Mat. 3:3; Mar. 1:​2-4; Luc. 3:​3-6) Onia ni katuloyan to ’tan ya propesiya: “Niparungtal naani so gloria nen Jehova.” (Isa. 40:5) Asumpal met itan ya propesiya nen linma diad dalin si Jesus. Akin balet et si Jehova so nigloria anta si Jesus so linma diad dalin? On ta perpekton inalig nen Jesus so Ama to, kanian singa si Jehova lanlamang so linma diad dalin.—Juan 12:45.

13. Panon tayon naalig si Jesus?

¹³ No papasantosen o lilinisan tayo so ngaran nen Jehova, aaligen tayoy Jesu-Kristo. Singa si Jesus, Tasi itayo met nen Jehova, kanian awi-awit tayoy ngaran To tan ibabaga tayod saray totoo iray balibali tan makapakelaw ya gagawaen To. Pero wala ni kaukolan tayon gawaen bilang Tasi nen Jehova. Ibaga tayo met ed saray totoo no antoy importantin betang nen Jesus tan no anto ray ginawa to pian napasanto so ngaran nen Ama to. (Gawa 1:8) Si Jesus so manunan Tasi nen Jehova, tan bilang papatumbok to, aaligen tayoy alimbawa to. (Apo. 1:5) Pero, panon tayo nin nipanengneng ya importante ed sikatayo so ngaran nen Jehova?

PANON TAYO NIN NIPANENGNENG YA IMPORTANTE ED SIKATAYO SO NGARAN NEN JEHOVA?

14. Base ed Salmo 105:​3, antoy nalilikna tayo ed ngaran nen Jehova?

¹⁴ Ipasirayew tayoy ngaran nen Jehova. (Basaen so Salmo 105:3.) Malikeliket si Jehova no ipapasirayew tayoy ngaran to. (Jer. 9:​23, 24; 1 Cor. 1:31; 2 Cor. 10:17) Antoy labay ya ibaga na “ipasirayew” si Jehova? Atan may proud tayo ya sikato so Dios tayo. Baleg ya pribilehyo ya napagalangan tayoy ngaran to tan nalinisan tayoy reputasyon to. Agtayo sirin nababaingan ya ibagad saray katrabaho, kaklase, kakaabay, tan arum ni ya Tasi nen Jehova tayo. Labay nen Satanas ya tundaan tayo lan ibagad arum so ngaran nen Jehova. (Jer. 11:21; Apo. 12:17) Diad tua, labay to tan saray alipores to ya nalingwanan la na saray totoo itan ya ngaran. (Jer. 23:​26, 27) Pero sikatayo ran Tasi, inar-aro tayoy ngaran nen Jehova, tan ‘naynay tayon manliliket lapud ngaran to.’—Sal. 5:11; 89:16.

15. Antoy labay ya ibaga na ‘ontawag ed ngaran nen Jehova’?

¹⁵ Itultuloy tayoy ontawag ed ngaran nen Jehova. (Joel 2:32; Roma 10:​13, 14) Kasin basta amta tayoy ngaran nen Jehova tan uusaren tayo itan et duga la? Andi. Aliwan satan labat so labay ya ibaga na ‘itawag ed ngaran nen Jehova.’ Nibagan ontatawag tayod ngaran nen Jehova no sikatoy kaaro tayo, no kabkabat tayo ray ugali to, tan no mantitiwala tayo ed sikato. Tan no walay problema tayo tan walay kaukolan tayon desisyonan, sikato so unonan batikan tayo tan kerewan tayoy tulong. (Sal. 20:7; 99:6; 116:4; 145:18) Ibaga tayo met ed arum so ngaran to tan saray ugali to. Pasesegen tayo ran magbabawi tan manguman pian naala day pabor nen Jehova tan niliktar met ira.—Isa. 12:4; Gawa 2:​21, 38.

16. Panon mon napaneknekan ya matila si Satanas?

¹⁶ Akaparaan tayon manirap parad ngaran nen Jehova. (Sant. 5:​10, 11) No mansiansia tayon matoor ed si Jehova anggano nasusubok tayo, napaneknekan tayon matila si Satanas. Diad panaon nen Job, walay akusasyon nen Satanas ed amin ya lingkor nen Jehova. Kuan to: “Say too et iter toy amin a walad sikato parad bilay to.” (Job 2:4) Singa ibabaga nen Satanas ya manlingkor tayo labat ed si Jehova no balibali situasyon tayo. Pero no naproproblema tayo la, matmainomay tayo kunon taynanan si Jehova. Pinaneknekan nen Job ya aliwan tua itan. Sika ey? Labay mo met ya paneknekan ya matila si Satanas? Agmon balot sirin bebenegan si Jehova anggan anto ni tay subok ya itupak nen Satanas ed sika. Mantiwala ka ya “bantayan” ka nen Jehova nisengeg ed ngaran to.—Juan 17:11.

17. Base ed 1 Pedro 2:​12, panon tayon nirayew so ngaran nen Jehova?

¹⁷ Gawaen tayoy anggaay nayarian tayo pian nirayew so ngaran nen Jehova. (Pro. 30:9; Jer. 7:​8-11) Awi-awit tayo so ngaran nen Jehova, tan kabkabat na totoo ya Tasi to tayo. Kanian antokaman so gawaen tayo, nayarin nirayew o nabalaw so ngaran to. (Basaen so 1 Pedro 2:12.) Siempre, agtayo labay ya nabalaw so ngaran nen Jehova. Seguroen tayo sirin ya nirayew so ngaran to diad panagsalita tan ugali tayo. No ontan so gawaen tayo, nigloria tayo so ngaran nen Jehova anggano agtayo perpekto.

18. Panon tayo nin nipanengneng ya importante ed sikatayo so ngaran nen Jehova? (Nengnengen met so paimanod leksab.)

¹⁸ Mas sankanonot tayoy ngaran nen Jehova nen say sarili tayon reputasyon. (Sal. 138:2) Akin et importante iya? On ta no inar-aro tayoy Jehova tan gagawaen tayoy panlabayan to, nayarin walay nibaga na arum ya totoo tan ompan deralan da tayo.a Pero marakep no aligen tayoy alimbawa nen Jesus. Anggano kriminal so pakanengneng na arum ed sikato, akaparaan nin siansia ya ompatey parad ngaran nen Jehova. “Imbaliwala to so kababaingan,” labay ton ibaga, aga mapagpaga ed ibaga na arum ya too. (Heb. 12:​2-4) Say mas sankanonot to et say panggawa na linawa nen Ama to.—Mat. 26:39.

19. Antoy naliliknam ed ngaran nen Jehova, tan akin?

¹⁹ Proud tayo ed ngaran nen Jehova, tan baleg ya kagalangan ya natawag tayon Tasi to! Kanian anggano balawen itayo na arum, ayos labat ta mas importante ed sikatayo so ngaran nen Jehova nen say sarili tayon reputasyon. Agka sirin ontutunda ya irayew so ngaran nen Jehova anggan anto ni tay gawaen nen Satanas ed sika. No ontan so gawaen mo, aaligen moy Jesu-Kristo—ipapanengneng mo ya say ngaran nen Jehova so sankaimportantian ed bilay mo!