Panggayagaan so “Peteg a Bilay”

IMPAGAMOR la nen Jehova a Dios ed too so pakatebek ed inkamagnayon. (Eclesiastes 3:11) Makasengeg ed saya, liknaen na totoo ya anggapoy nayarian da diad arap na ipapatey balet, mangiliing met itan ed sikara na naynay a pampilalek a manbilay.

Say Masanton Biblia, say impuyan a Salitay Dios, so mangiiter ed sikatayo na baleg ya ilalo. (2 Timoteo 3:16) Si Jehova, a manunaan a pakabidbiran na aro, so agla komon angitekep ed too na abilidad a makarandan ed ideyan nipaakar ed inkamagnayon no kondenaen to lamlamang iran manbilay ed loob lambengat na pigaran taon. Say pamalsa ed sikatayo pian manirap lapu ed kipapasen tayo et sumlang ed personalidad na Dios. Ag-itayo apalsan singa saray “monanakap ya andiay pankatunongan, ayayep ya apalsa ra lambengat a deralen ya erel-erelen.”​—2 Pedro 2:12.

Diad impamalsa to ed si Adan tan Eva tekep na nisipor a pakatalos ed inkamagnayon, walay ginawa nen Jehova a Dios a ‘maong a tuloy’; ginawa to iran walaan na posibilidad a manbilay ya ando lan ando. (Genesis 1:31) Balet makapaermen ta agsustoy impangusar na inmunan sanasawa ed bulos a panagdesisyon da, a tinmunganga ira ed malinew ya impanebel na Manamalsa tan abalang day inkayadyari ra. Bilang resulta, inatey ira, ya impasa ra so ag-inkayadyari tan ipapatey ed saray kapolian da.​—Genesis 2:17; 3:1-24; Roma 5:12.

Anggapoy itatarya na Biblia a nikadkaduman klase na misteryo nipaakar ed gagala na bilay tan no antoy kabaliksan na ipapatey. Ibabagay Biblia a diad ipapatey et “anggapo so gawa, no kanonotan, no pakaamta, no kakabatan” tan saray inaatey et “agda amta so bengatla.” (Eclesiastes 9:5, 10) Diad arum a panangibaga, saray inatey et inatey la. Say doktrinan ag-ipapatey na kamarerwa so aliwan bangat na Biblia, kanian anggapo so pirmin misteryo a kaukolan a solbaren nipaakar ed kipapasen na inaatey.​—Genesis 3:19; Salmo 146:4; Eclesiastes 3:19, 20; Ezequiel 18:4.a

Say Dios so walaan na gagala; pinalsa to so dalin “ya aliwa a kibalatar.” Pinorma to itan ‘pian panayaman’ na ayadyarin totoo diad paraison kipapasen, tan ag-inuman na Dios so gagala to. (Isaias 45:18; Malaquias 3:6) Pian nasumpal itan, imbaki toy Anak to diad dalin. Diad impanmatoor to anggad patey, intarya nen Jesu-Kristo so paraan pian narondon so katooan manlapud kasalanan tan patey. Diad tua, inkuan nen Jesus: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.”​—Juan 3:16.

Nensaman, insipan la na Dios a sikatoy mamalsa na “saray balo a tawen tan balo a dalin.” (Isaias 65:17; 2 Pedro 3:13) Lalanoren na satan so pamili to ed limitadon grupo na matoor a Kristianos a para ed bilay diad tawen. Kaiba si Jesu-Kristo, tugyopen da so sakey a pinagkasentron gobierno. Tutukoyen iya na Biblia bilang say “panaria’y tawen,” odino “panarian na Dios,” a mangipakurang ed “saray wala ed tapew na dalin.” (Mateo 4:17; 12:28; Efeso 1:10; Apocalipsis 5:9, 10; 14:1, 3) Kayarin naderal so amin ya ag-inkamaridios ed globo tayo tan nalinisan itan, pawalaen na Dios so matunong a balon sosyedad na totoo, odino “balo a dalin.” Mangilaktip iya ed totoo a salimbengan na Dios ed paganigani lan kadederal na sayan marelmeng a sistema na bengabengatla. (Mateo 24:3, 7-14, 21; Apocalipsis 7:9, 13, 14) Nakaiba da iramay ombilay diad panamegley na insipan a kikioli.​—Juan 5:28, 29; Gawa 24:15.

“Say Peteg a Bilay” Naani

Bilang panamekder ed makapalikliket a deskripsion na bilay ed arapen a Paraison dalin, oniay inkuan na Dios: “Nia, siak gawaen ko a balo so saray amin a bengatla.” (Apocalipsis 21:5) Imposiblin nagnap a narandan na kanonotan na too so makapakelkelaw iran gawaen na Dios parad katooan. Gawaen na Dios so sakey a sankamundoan a paraiso, a niulibay ed Eden. (Lucas 23:43) Singa diad Eden, say karakpan tan inkaabig na kolor, tanol, tan taway so daakan. Naandi lay inkaduka tan kakisiran na tagano, lapud oniay inkuan na Biblia nipaakar ed satan a panaon: “Saray una a bengatla sikara so linmabas la.” (Apocalipsis 21:4; Salmo 72:16) Anggapo lan balot so mangibagay, “Mabeblay ak,” lapud andi-anggaan lan naandi so sakisakit. (Isaias 33:24) On, amin a pansesengegan na sakit so naandipat la, pati say abayag lan kabusol na katooan, say ipapatey. (1 Corinto 15:26) Diad sakey a makapakelaw a pasingawey nipaakar ed “balo a dalin,” say balon sosyedad na totoo a walad silong na uley nen Kristo, nadngel nen apostol Juan so sakey a bosis ya angikuan: “Punasen [na Dios] so amin a lua ed kamataan da; tan andi gapo la naani onnangis o dageyem, o ot-ot.” Anto ni so makapangitarok na babaleg a ligliwa tan gayaga nen say kasumpalan na sayan sipan na Dios?

Diad panedeskribe ed arapen a bilay, nagkalautlan idadanet na Biblia iray kipapasen a mamenek ed moral tan espiritual iran pirawat na too. Amin a maptek iran kalat ya agni arapat na katooan anggad natan so sigpot lan nadampot ed satan. (Mateo 6:10) Sakey ed saraya et say pilalek parad inkahustisya, a siansia nin ag-agawa lapud say too so mabetbet a pairapen na saray maruksan managlames a manodomina ed saray anggapoy pakayari. (Eclesiastes 8:9) Onia so mapropetikon insulat na salmista nipaakar ed saray kipapasen diad silong na uley nen Kristo: “Diad saray agew to et onsalindak so kaptekan, tan say kareenan so daakan.”​—Salmo 72:7, The New Jerusalem Bible.

Say inkaparpareho so sananey nin pirawat a pansasakripisyoan na dakel. Diad “balo a panamalsa,” paandien na Dios so panangidumaduma. (Mateo 19:28) Panggayagaan na amin so nampaparan kagalangan. Aliwa iyan klase na inkaparparehon impaakseb na pigaran maruksan pananguley na gobierno. Diad pidumaan, saray pansesengegan na panangidumaduma so sigpot lan naekal, pati say agum tan kinon a mangitotonton ed totoo a mandomina ed arum odino manipon na dakel a kaykayarian. Impropesiya nen Isaias: “Sikara ipaalagey da naani so saray abung, tan manayam ira naani; et mantanem ira naani na saray ubas, tan mangan ira naani ed saray bunga ra. Sikara ag-ira naani mangipaalagey, et sananey so manayam; ag-ira naani mantanem et sananey naani mangan.”​—Isaias 65:21, 22.

Agayla so paniirap lay too makasengeg ed panagpaagus na dala a nagagawa ed indibidual tan ed lapag a pambabakal! Nantultuloy iya nanlapula’d impamatey ed si Abel ya angga ni’d saray bakal natan. Alay bayag lan iilaloan tan tatalaranan na totoo, a singano agla nagawa, so kiletneg na kareenan! Diad nipawil a Paraiso, amin a totoo so magmaliw a mareen tan mauyamo; “manliket ira a dili ed inkadaakan na kareenan.”​—Salmo 37:11.

Ibabaga na Isaias 11:9: “Say dalin napano naani na pikakabat ed Jehova, singa saray danum sakbongan na dayat.” Lapud atawir ya ag-inkayadyari, pati ed arum nin sengegan et agtayo nayarian natan a sigpot a talosan so laknab na saratan a salita. Nipaakar ed no panon itayon pankasakeyen na naspot a pikakabat na Dios tan no panon itan a manresulta ed sigpot a gayaga, aralen tayo ni. Balet lapud ipapaamta ed sikatayo na Kasulatan a si Jehova so Dios a makapakelaw ed pakayari, kakabatan, inkahustisya, tan aro, makapanseguro itayon dengelen to so amin a pikakasin ibesngaw na saray manaayam ed “balo a dalin.”

“Say Peteg a Bilay” so Segurado​—Anamoten Itan!

Parad dakel, say magnayon a bilay ed magmaong a mundo so kugkugip odino pantasia labat. Balet, parad saramay talagan walaay pananisia ed sipan na Biblia, segurado iyan ilalo. Singa itan pataga na bilay da. (Hebreos 6:19) No panon a say pataga et pugeran toy bapor tan amperen to ompian agniyanor, say ilalo nipaakar ed maandon bilay et pabiskegen tan panmataleken toy totoo tan ontulong ed sikaran mangarap ed pirmi iran kairapan ed bilay tan anggan say panalona ni ingen ed saratan.

Makaseguro itayo a sumpalen na Dios iray sipan to. Intarya to ni ingen so garantiya diad impangibalikas to na sakey a samba, sakey ya agla nauman ya impisipanan. Insulat nen Pablo: “Sanen labay na Dios ya ipanengneng, ed lalo a daakan ed saray manawir ed sipan so agkauman na getma to, insale’to so samba to: pian lapud saray duaran bengatla ya agnauman, a sikara so agnayarin pantilaan na Dios wala so sakey a mabiskeg a ligliwa mi, sikami . . . inagamil mi so ilalo a niyan ed arap mi.” (Hebreos 6:17, 18) Say “duaran bengatla ya agnauman” ya agbalot babawien na Dios et say sipan to tan say samba to, a diad satan so pangipapapegan tayo na saray iilaloan tayo.

Say pananisia ed sipasipan na Dios so mangiter na baleg a ligliwa tan espiritual a biskeg. Si Josue, a lider na totoo na Israel, so walaan na ontan a pananisia. Sanen imbalikas nen Josue so panamatanir to ed saray Israelita, sikato so masiken la tan amta ton sikatoy magano lan ompatey. Ingen, impatnag toy biskeg tan agnabuyak a katooran, a resultay nagnap a panagmatalek to ed saray sipan na Dios. Kayari na impangibaga ton sikatoy onla “ed dalan na amin a dalin,” say basbas ya arapen na amin a katooan diad ipapatey, inkuan nen Josue: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo, anggapo so sakey a bengatla a linmiwat ed sikara.” On, amitlon inulit nen Josue a susumpalen a naynay na Dios so amin a sipasipan to.​—Josue 23:14.

Nawalaan ka met na ontan a pananisia ed sipan na Dios nipaakar ed sakey a balon mundon magano lan niletneg. Diad maseet a panaaral na Biblia, natalosan mo no siopa si Jehova tan no akin a sikato so makanepegan na nagnap a panagmatalek mo. (Apocalipsis 4:11) Si Abraham, Sara, Isaac, Jacob, tan arum nin matoor nensaman so walaan na agnabuyak a pananisia, a base ed aralem a pikakabat da ed tuan Dios, si Jehova. Nansiansia iran mabiskeg ed ilalo, anggaman ed katuaan “ya agda ni inawat so saray sipan” sanen mabilay nira. Siansia, “sikara so imbano ra nanlapu ed arawi, tan impatua’ra.”​—Hebreos 11:13.

Diad pakakatalos ed saray propesiya na Biblia, natebek tayo natan so panasingger lay “bakal na baleg ya agew na Dios, a Makapanyarin-amin,” a legan na satan et nalinisan so dalin manlapud amin a karelmengan. (Apocalipsis 16:14, 16) Singa saray matoor a totoo nensaman, nepeg a mansiansia itayon manmatalek a manalagar ed saray nagawa ed arapen, a pinakiwas na pananisia ontan met ed aro ed Dios tan ed “peteg a bilay.” Say kinaasingger lay balon mundo so mangitarya na mabiskeg a panagyat ed saramay mangaagamil na pananisia ed si Jehova tan mangaaro ed sikato. Nepeg a bayuboan so ontan a pananisia tan aro ta pian nagamoran so pabor tan pananalimbeng na Dios legan na baleg ya agew to, ya asingsingger la.​—Sofonias 2:3; 2 Tesalonica 1:3; Hebreos 10:37-39.

Kanian, papablien mo kasi so bilay? Tan kasin mas pipilaleken mo so “peteg a bilay”​—bilay bilang naabobonan a lingkor na Dios, a walaay ilalo ed sakey a maliket ya arapen, on, tekep na magnayon a bilay ed arapen? No ontan so aanapen mo, talinengen so panamilin nen apostol Pablo, ya insulat to a nepeg tayon ‘ag-igaton so ilalo tayo ed saray kayamanan a panduaruwaan, noag dia ed Dios.’ Intuloy nen Pablo: ‘Magmaliw a mayaman komon ed saray maabig a gawa,’ a mamapagalang ed Dios, ta pian ‘nabembenan so peteg a bilay.’​—1 Timoteo 6:17-19.

No paiyaralan ka na Biblia ed saray Tastasi nen Jehova, nagamoran mo so pikakabat a say kabaliksan to et “andi-anggaan a bilay.” (Juan 17:3) Simamaaro, inrekord na Biblia iyan singa-aman pangiimbita to ed amin: “Ana’ko, agmo lingwanan so tunong ko; say pusom ingen unoren to komon so saray ganggan ko. Ta say karukey na saray agew, tan saray taon na bilay, tan kareenan, niarum ira ed sika.”​—Uliran 3:1, 2.

[Saray paimano ed leksab]