Iyaansakit nen Jehova so Ordinaryon Totoo

KASIN kaukolan nin magmaliw itayon ekstraordinaryo odino nikadkaduma pian naimano itayo na Dios? Si Abraham Lincoln, a koma-16 a presidente na Estados Unidos, so inaon ed inkuan to: “Mas kaliktan na Katawan so kabanyakan a totoo. Kanian dakerakel so ginawa ton ontan.” Isipen na karaklan a sikaray ordinaryo labat a totoo ya andian na nikadkaduman abilidad. Say inka-ordinaryo et nayarin mangisusuheri na “inka-pobri, inka-abebbeba.” Mipadpara, say salita a “kabanyakan” so mangipapatnag na “inka-andiay pribilehyo odino espisyal a posisyon,” “walad kategorya na saray ordinaryon estandarte,” odino “onkokomadua” ni ingen. Anton klase na totoo so labay yon napilimogan? Mapasirayew, agresibo, mapaatagey iran totoo? Agta mas kaliktan yon napilimogan iray makaaro, mapaabeba, aliwan mapangta a totoo a matua tan interesado ed arum?

Lapud kasmak la natan ed mundo so panagmelmelag tan panagbalaw, arum so agmanisia a say Dios so interesado ed sikara a mismo. “Nanlapu ak ed pamilyan agnipasal a mangipatnag na panangaro. Nileglemew, niludlurey, tan inelek-elekan ak. Kanian, ugaw ak ni et liknaen ko lan anggapoy kakanaan ko,” so insulat na sakey a managbasa ed sayan magasin. “Anggad natan et naliliknak ni itan a manidismaya’d siak sano nasasagmak ko so kairapan.” Balet, makatunongan so panisia a say Dios so interesado a mismo ed ordinaryon totoo.

Interes na Dios ed Kabanyakan a Totoo

Oniay insulat nen Arin David: “Abalbaleg si Jehova, tan sankabalgan a dayewen; tan say kinabalgan to agni-osaosa.” (Salmo 145:3) Balet, ag-iya mangamper ed maaro tan maabagey a paraan na panangasikaso nen Jehova ed sikatayo. (1 Pedro 5:7) Alimbawa, oniay inkuan na salmista: “Si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.”​—Salmo 34:18.

Saray bengatlan makapasagyat ed sayan mundo, a singa say inkaganggana, inkabantog, odino kayamanan, so ag-ipapasen na Dios ya importante. Ipapanengneng na Ganggan na Dios ed Israel so maabagey ya interes to ed saray mairap-bilay, ulila, balo, tan saray sankaili. Oniay inkuan na Dios ed saray Israelita, a maruksan minaltrato diad Ehipto: “Say sakey a sankaili agmo panggawaan na aliwaliwa, nisay pabpairapen mo . . . Agyo pabpairapen so siopaman a bii a balo odino say ulila ed ama. No pabpairapen mo ra, et ontawag ira kalamor ed siak, dengelen ko so tagleey da.” (Exodo 22:21-24) Niarum ni, imbalikas nen propetan Isaias so talek to ed panangasikaso na Dios ed saray duka: “Sika so apireng na duka, sakey ya apireng na naukolan ed kairapan, sakey a salimbeng ed bagyo, sakey a sirum ed petang, sano say ngapos na saray makapakebbiew a totoo sikato so singa sakey a bagyo ya onsumpa ed bakor.”​—Isaias 25:4.

Diad interon ministeryo nen Jesu-Kristo, ya “eksakton representasyon” na Dios, sikatoy nagmaliw ya ehemplo ed saray babangatan to diad impangipatnag na masimoon ya interes ed ordinaryon totoo. (Hebreos 1:3, NW) Sanen anengneng nen Jesus so dakerakel a totoo a “maermen tan abuybuyak ira, a singa saray karnero ya anggapoy pastol da,” sikara so “inabagey” to.​—Mateo 9:36.

Imanoen met no anton klase na totoo so pinili nen Jesus bilang apostoles to​—lalaki a deneskriben “andi-aral tan kabanyakan.” (Gawa 4:13) Kayari impatey nen Jesus, inimbitaan na saray patumbok to so amin a klase na totoo ya ondengel ed Salitay Dios. Insulat nen apostol Pablo a siopaman ya “agmanisia odino andi-aral” so makaloob ed kongregasyon na Kristiano tan magmaliw a mananisia. (1 Corinto 14:24, 25) Imbes a pilien labat iramay pandinayewan unong ed saray estandarte na mundo, pinili na Dios so dakel a simpli tan ordinaryon totoo a manlingkor ed sikato. “Nengneng yo, agagi, so katawagan yo,” so inkuan nen apostol Pablo, “ta anggapo so dakel a makabat unong ed laman, anggapo so dakel a makapanyari, anggapo so dakel a mabli a too, ed saray natawag: Noag ingen pinili Dios so saray bengatla a makulangkulang na mundo ya onkana a pamabaing to ed saray makabat; ta pinili to so saray bengatla a makapuy na mundo, ya onkana a pamabaing to ed saray bengatla a mabiskeg; tan saray bengatla ya andi kana ed mundo, tan saray agpinabli, sikara so pinili Dios, tan saray bengatla ya anggapo, pian paandien da so saray bengatla a wala: Ta pian anggapo so laman a manpangta ed arap na Dios.”​—1 Corinto 1:26-29.

Natan, say Dios so peteg ya interesado met ed sikatayo. Linawa na Dios ya “amin a totoo nilaban ira komon, tan ondago ra ed pakapikabat ed katuaan.” (1 Timoteo 2:4) No say Dios et inad-aro ton maong so katooan ya imbaki to so Anak to pian ompatey nisengeg ed sikatayo, anggapoy rason a liknaen tayo a sikatayoy ag-inaro odino andiay kakanaan. (Juan 3:16) Impanengneng nen Jesu-Kristo ed saray patumbok to so kaimportantian na pantrato ed anggan say sankamelagan ya agagi to ed espiritual a singano si Jesus a mismo so pidedenengan da. Inkuan to: “Bangta sikatoy ginawa yo ed sakey ed sarayan agagik, anggan saraya a kamelagan, sikatoy ginawa yo ed siak.” (Mateo 25:40) Antokaman so panmoria na mundo ed sikatayo, no inaro tayo so katuaan, espisyal itayo ed imaton na Dios.

Ontan so alikna nen Francisco,a sakey ya ulilan ugaw a laki a taga-Brazil, sanen abayuboan to so maapit a relasyon ed Dios. Oniay insalaysay to: “Akatulong ed siak so impakapikabat ed si Jehova tan ed organisasyon to a talonaan so naliliknak ya inka-andiay kompiyansa tan inkamabaing. Naamtaan ko a personal ya interesado si Jehova ed balang sakey ed sikatayo.” Parad si Francisco, si Jehova so nagmaliw a peteg ya Ama.

Interesado ed Saray Kalangweran

Peteg ya interesado si Jehova ed saray kalangweran, aliwa labat a bilang grupo noagta bilang indibidual. Siempre, balanglan kalangweran odino matatken, agtayo labay ya ipasen so inkasikatayo ya atagtagey. Balet, nayarin walaray abilidad tan kalidad tayo a nausar na Dios ed arapen. Amta nen Jehova no anto so nakaukolan tayon paaligwasen tan ipasal pian sigpot tayon nausar so abilidad tayo. Alimbawa, imanoen pa so salaysay ed 1 Samuel kapitulo 16. Lapud singa mas kualipikado parad si propetan Samuel iray arum a prospektibon kandidato parad inkaari ed Israel, impaliwawa nen Jehova iray rason To ed impamili ed sankayugtanan ya ilalak nen Jesse a si David, bilang ari na Israel ed arapen: “Agmo nengnengen so lupa to, no say kaatagey na kabalgan to; ta sikato [kuya nen David] so pinaulyan ko; ta si Jehova onnengneng ya aliwa a singa say too ya onnengneng; ta say too onnengneng ed mapaway a nengneng, balet si Jehova onnengneng ed puso.”​—1 Samuel 16:7.

Kasin makapanmatalek iray kalangweran natan a si Jehova et peteg ya interesado ed sikara? Nonoten pa si Ana, sakey a kalangweran a bii a taga-Brazil. Singa saray arum a tobonbalo, sikato so nagogonigon diad pakakanengneng to ed inkakurakot tan ag-inkahustisya. Insan asabin sikato tan saray agagi ton bibii so intagar na ama ra diad saray miting na Kristiano. Asabi panaon et sikato lay naliliketan ed naaaralan to nipaakar ed Salitay Dios. Ginapoan nen Ana a basaen so Biblia tan saray publikasyon na Kristiano tan manpikasi ed si Jehova a Dios. Kalkalna et abayuboan to so maapit a relasyon ed Dios. Oniay insalaysay to: “Labalabay koy manbisiklita diad pukdol ya asingger ed abung mi pian nengnengen so marakdakep ya iseselek na agew. Manpipikasi ak ed si Jehova tan sikatoy pisasalamatan ko ed kaabigan tan inkamabunlok to, ya ibabalikas ko no panon kabaleg so panangarok ed sikato. Say impakapikabat ko ed si Jehova a Dios tan saray gagala to so amawala ed siak na mareen a nonot tan kaligenan.” Kasin sasalien mo met ya ipanaon so panmorekdek ed maaron panangasikaso nen Jehova?

Tua, nayarin mairap parad sikatayo a panggayagaan so maapit a relasyon ed si Jehova lapud abenegan tayo. Alaen pan alimbawa si Lidia. Sanen intongtong to ed ama to so bengatlan kapapagaan ton maong, sikatoy ag-inimano na ama to a nankuan: “Andi-kakanaan.” Anggaman natatalosan to a labay na ama ton lingwanan to la itan a problema, oniay inkuan nen Lidia: “Say impanaral ko ed Biblia so angipagamor ed siak na amin a kaliktan ko tan dakel ni. Lapud makapasagyat a personalidad nen Jehova et sikatoy nagmaliw a sankaapitan a kaarok. Natan et walaan ak na maaro tan makatalos ya Ama a napangibesngawan ko na liknaan ko tan saray kapapagaan ko. Nayarian ko so mabayag a makapitongtong ed sankaimportantian a Persona ed uniberso, a seguradon talinengen toak.” Saray teksto ed Biblia a singa say Filipos 4:6, 7 so akatulong ed si Lidia a nalikna so maaron panangasikaso nen Jehova. Oniay inkuan na satan a teksto: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.”

Tulong Pian Naasikaso Iray Nakaukolan Mo

Ipapatnag nen Jehova so panagpaga to ed saray lingkor to bilang indibidual tan bilang sankamundoan a kongregasyon. Nipatnag tayo met so panangaro tayo ed mangatatawen ya Ama tayo diad pangigana na panaon a mitongtong ed sikato. Nepeg ya agtayon balot leglemewen so relasyon tayo ed sikato. Lawas ninodnonot nen David so relasyon to ed si Jehova. Oniay inkuan to: “Iparungtal mo ed siak so saray dalan mo, O Jehova; ibangat mo ed siak so saray basbas mo. Itonton mo ak ed katuaan mo, tan ibangat mo ak: ta sika so Dios na kilalaban ko; mantalaran ak ed amin ya agew.”​—Salmo 25:4, 5.

Nayarin balo ed sika so ideyan nawalaan na maapit a relasyon ed Dios. Antokaman iray problemam, lawas kan makapanmatalek a natulongan ka na Sankatagyan unong ed gagala to. (1 Juan 5:14, 15) Kanian, ipasal mon gawaen ya espesipiko iray pikakasim, ya ikonsidera iray kipapasen tan pankaukolan mo.

Say kakanaan na pamidbir ed saray pankaukolan tayo so nipabitar ed pikakasin inyapay nen Arin Solomon sanen inaguraan so templo: “No wala dia ed dalin so eras, no wala so salot, no wala so kebet no inkaboot, duron no alabas; no saray kabusol da kubkoben da ra ed dalin na saray syudad da; anggan anto a derya odino anto a sakit so wala; anggan anto a pikakasi tan pankerew so gawaen na siopaman a too, no say amin a baley mo ya Israel, ya amtaen na balang too so dili a salot to tan say dili ya ermen to . . . Diad ontan ondengel ka komon manlapu ed tawen . . . tan mamerdona ka, tan itumang mo ed balang too so manepeg ed saray amin a dalan to.” (2 Awaran 6:28-30) On, sika labat a mismo so ‘makaamta ed dili a salot tan ermen mo.’ Agaylan makana sirin a bidbiren mo iray peteg a pankaukolan tan pilalek mo. No ontan so gawaen mo, “iter [nen Jehova] ed sika so saray pirawat na pusom.”​—Salmo 37:4.

Pabiskeg Moy Relasyon Mo ed si Jehova

Maliket si Jehova a mangiyabuloy ed ordinaryon totoo a napanggayagaan da so maapit a relasyon ed sikato. Oniay ipapaseguro ed sikatayo na Salita to: “Siak naani ama yo, tan sikayo naani ana’ko a lalaki tan bibii, kuan na Katawan a makapanyari ya amin.” (2 Corinto 6:18) On, kaliktan nen Jehova tan say Anak to ya ontalona itayo tan nagamoran so andi-anggaan a bilay. Agaylan makapaseseg a naamtaan a tulongan itayo nen Jehova a mangasikaso ed saray responsabilidad tayo ed pamilya, ed trabaho, tan diad Kristianon kongregasyon!

Anggaman kuan et amin tayo so nipapaarap ed mapeligro a panaon. Say maletey a bunigas, saray problema ed pamilya, melag ya anap, odino arum ni so nayarin pansengegay panirap tayo. Nayarin agtayo amtan resolbien so sakey a subok. Saray onloloor a desdes, direkta man odino andi, so manlalapu ed marelmeng a manag-akusa, si Satanas a Diablo, a mibabakal ed espiritual sumpad totoo na Dios. Balet, walay sakey a makatalos tan ontutulong ed sikatayon napansiansia so maabig a relasyon tayo ed si Jehova. Anggapo lay arum noag si Jesu-Kristo a walad nipaatagey a posisyon diad katawenan. Oniay nabasa tayo: “Anggapo so sakey ya atagey a saserdote tayo ya agmakayarin mangasi ed saray kakapuyan tayo; noag say sakey a tinukso ed amin a singa sikatayo, ingen anggapo so kasalanan to. Onsingger itayo sirin a mailalo ed trono na grasya pian makagamor itayo na panangasi, tan makalmo itayo na grasya, pian natulongan to itayo sano panaon a kinepeg to.”​—Hebreos 4:15, 16.

Agaylan makapaseguro so pakaamta ya agtayo kaukolan so magmaliw a bantog odino mayaman pian napanggayagaan so pabor na Dios! Anggan sano makapagonigon so kipapasen mo, aligen so salmista a nampikasi: “Pakaskasi ak tan naukolan ak; say Katawan nononoten to ak ni: sika so tulong ko tan manangiliktar ed siak.” (Salmo 31:9-14; 40:17) Makapanmatalek ka ya inaro nen Jehova so mapaabeba tan ordinaryon totoo. On, ‘nimatalek tayo so amin a kapagaan tayo ed sikato ta sikato asikasoen to tayo.’​—1 Pedro 5:7.

[Paimano ed Leksab]

[Saray litrato ed pahina 29]

Dakel ed saray patumbok nen Jesus so andi-aral tan ordinaryo

[Litrato ed pahina 30]

Manggugunaet iray Kristiano a nawalaan na mabiskeg a pananisia

[Saray litrato ed pahina 31]

Agtayo nakaukolan so magmaliw a bantog pian napanggayagaan so pabor na Dios