Manparaan la Diad Panaral na Propesiya nen Isaias!
1 “Saray matoor a managdayew so makapanmatalek ya ag-abuloyan nen Jehova . . . so mundo nen Satanas a mansiansia ni na sanagew nen say kakaukolanen na inkahustisya.” Agaylan makapaseseg a balikas! Iner so angaonan ed satan? Diad Isaiah’s Prophecy—Light for All Mankind I. Kasin say propesiya nen Isaias so mangiter ed sikatayo na rason pian nawalaan na ontan a makapaseseg a konklusyon? On! Diad satan a libro na Biblia et mapuersa tan malinew a nidanet so tema na kilalaban. (Isa. 25:9) Satan no akin a magmaliw a makapaseseg a maong ed sikatayo so panaral ed sayan kabiangan na Salitay Dios diad Panagaral na Kongregasyon ed Libro. Kasin presente itayo kada simba pian panggayagaan itan? Akin a kaukolan a presente itayo?
2 Diad Isaias 30:20 unong ed New World Translation, si Jehova so atawag bilang “Engranden Instruktor.” Balang Kristiano so nepeg ya ontalineng a maong legan a bibilinen itayo nen Jehova diad panamegley na Salita to tan ed nibase’d Biblia iran publikasyon ya itatarya na “matoor tan makabat ya aripen.” (Mat. 24:45; Isa. 48:17, 18) Saya so peteg a tua ed libron Isaiah’s Prophecy I. Panon kan minabang a maong diad panaral ed satan?
3 Manparaan a Mibiang: Mangigana na malaem a panaon kada simba pian manparaan parad panagaral na libro. Basaen so niyeskedyul a materyal kada parapo. Molimolien so kada niimprinta iran tepet. Gulisan iray ebat. Saray inaon a bersikulo manlapud Isaias et niimprinta a mabakat. Basaen iratan a maong. Nipaakar ed saray tekston nisitas, nengnengen iratan pian natalosan no panon a misiglaotan iratan ed materyal. Dalepdepen so nanaaral mo. Insan inabang iray resulta na panagparaan mo ed kagrupom ed panagaral na libro.
4 Say mangikokondukta na panagaral na libro so nepeg ya ontulong ed amin ya onaatendi a manusisa ed Biblia tan manebek ed praktikal a kablian na materyal ya aaralen. No natawag kan mankomento ya unona, gawaen itan a simpli, tan direkta. No wala lay inmunan nankomento, nayarian mon palaknaben so punto a sisingbaten. Nayarin nipanengneng mo no panon a say manunan teksto so manusuporta ed tema. Panggunaetan so pankomento ed dili iran salitam, tan panggayagaan so pibiang ed diskusyon.
5 Manggunaet itayon usisaen a mankakasakey so mablin mensahe ed libro na Isaias. Satan so mamaseseg ed sikatayo a manbilay kada agew diad magayagan panatalaran ed panangilaban nen Jehova!—Isa. 30:18.