Walaan Itayo na Balon Uusaren ed Pangigapo na Saray Panangiyaral!
1 Sakey a biin taga-Amerika so debotadon Romano Katoliko. Sitotoor ton indepensa iray bangat na simbaan. Sikato ni ingen so nambiahe ed Vatican. Balet, sanen sakey ed Tastasi nen Jehova so tinmoktok ed abung to, inawat to so opresin panangiyaral na Biblia. Akin? Lapud labay ton naaralan so ibabaga na Biblia tan say relihyon to so agmangiyoopresi na panangiyaral na Biblia. Anto so naaralan tayo ed sayan eksperiensya? Ya agtayon balot amta no siopa so nayarin mangawat na libren panagaral na Biblia.—Ecl. 11:6.
2 Kasin masuyat kayon mangibaga ed totoo a mabulos itayon mangiyaral na Biblia ed siopaman ya interesado? Kasin amta na amin ed komunidad yo ya iyoopresi tayo iyan libren serbisyo? Panon tayon naseguro ya amta ra? Diad pangusar ed balon uusaren! Satan so sakey a makapasagyat, anemiran pahina a tract ya apauloan na Labay Moy Makaaral nin Maong Diad Biblia? Ikabisado tayo sirin iyan tract, kada subtitulo.
3 “Akin a Basaen so Biblia?” Makapasagyat a maong iray rason ya ibabaga na tract. Ipapaliwawa na satan a lugan na Biblia so “maaron bilin a manlalapud Dios,” a mangipapanengneng no panon so iyasingger ed sikato diad pikakasi parad tulong tan no panon a nagamoran so regalo ton andi-anggaan a bilay. (1 Tes. 2:13) Say tract so manutukoy ed nanduruman ‘katuaan na Biblia a mangiiter na pakaliwawaan,’ a singa say no anto so nagawa kayari ipatey tayo tan no akin a dakerakel so gulo diad dalin. Satan so manideskribe ed “saray prinsipyon inter na Dios diad Biblia” a sano niyaplika et mangitarok na pisikal iran gunggona tan mangiyalibansa na liket, ilalo, tan arum a kalkaliktan iran kalidad. Say tract so manutukoy ed sakey nin rason ed pambasa na Biblia—saray propesiya nipaakar ed arapen a mangipapanengneng no anto so walad asingger lan arapen.—Apoc. 21: 3, 4.
4 “Tulong Pian Natalosan so Biblia”: Ibabaga na tract: “Amin tayo so mankaukolan na tulong pian natalosan so Salitay Dios.” Insan deneskribe to so metodo tayo ed panangiyaral na Biblia: “Kaslakan a sankaabigan so panaral na Biblia a tuloy-tuloy, ya onggapo ed manuna iran bangat.” Anggaman ipapalinew na satan a “say Biblia so panlapuan na suston impormasyon,” say tract so espesipikon analambit ed brosyur a Kakaukolanen bilang bengatlan ontulong ed estudyante “pian natalosan so Makasulatan iran impormasyon nipaakar ed nanduruman tema.” Say ontumbok a subtitulo so amalesa na manamakiwas a tepet.
5 “Kasin Mabulos Kan Mangigana na Panaon Kada Simba Pian Talosan so Biblia?” Ipapaliwawa na tract a say panagaral na Biblia so nayarin iyuksoy diad panaon tan pasen a kombeniente parad iyaaralan, balanglan diad mismon abung to odino anggan diad panamegley na telepono. Siopa so nayarin mibiang ed tongtongan? Onia so ebat na tract: “Say interon pamilyam. Nayari met a mibiang iray kakaarom a labay mon imbitaan. Odino no lablabayen mo, paiyaralan ka a bukor.” Kaunongan kabayag so panagaral? Ipapaliwawa na satan: “Dakel so mangigagana na sakey oras kada simba pian manaral na Biblia. No nayarian moy mangusar na malaem nin oras odino daiset ya oras kada simba, sikay pasyaren a mismo na saray Tastasi pian ontulong ed sika.” Satan so importantin punto! Mabulos itayon mangiyarunsa unong ed saray sirkumstansya na kada iyaaralan.
6 “Imbitasyon a Manaral”: Sakey a kupon so nitarya a ditan et say apalimaan na tract so nayarin onkerew na brosyur a Kakaukolanen odino pabisita pian ipaliwawa so libren panagaral na Biblia a programa. Say apis na brosyur a Kakaukolanen so makolor a nipanengneng. Agyo ta natebek no akin a sayan tract so mamaseseg ed dakel niran matuan-impanpuso pian mangawat na tulong tayo? Natan, panon tayon sankaabigan a nausar iyan balon uusaren?
7 Siopa so Nayarin Opresian Mo na Tract? Say tract so nayarin iter ed mismon totoo odino nitilak diad kaabungan ya agnasabi iray unabung. Nayarin ibunog itan ed kabkaabungan, diad karsada, tan diad teritoryan kawalaan na negosyo. Iyopresi itan ed totoo balanglan awaten da so literatura tayo odino andi. Isigpit itan ed saray magasin odino diad arum iran publikasyon ya ipapalima. Itekep itan sano mansulat kayo. Iyopresin ipawit itan ed saraman so nakatongtong yo ed telepono. Naynay a mangawit na saray kopya pian ibunog sano mansasaliw, sano walad publikon luluganan, tan sano manpupulong ya impormal. Iter itan ed siopaman ya onla’d abung yo. Iyopresi itan ed saray kakanayon yo, kakaabay, katrabahoan, kaeskuelaan, tan arum niran kabkabat yo. Panggunaetan ya ipalima iyan tract ed amin a naabet yo! Insan anto?
8 No Walan Tampol so Onkiwas: Arum ya indibidual so onkiwas a tampol diad pangibaga ran labay da so paiyaralan na Biblia. Sirin, sano manpupulong, seguroen a walan naynay so awit yon duaran kopya na brosyur a Kakaukolanen—sakey so parad iyaaralan tan say mismon kopya yo. No mabulos so too, iyaralan a tampol. Ibukay ed biek na apis, insan ibasa “No Panon ya Usaren Iyan Brosyur.” Insan ipaarap a tampol so leksion 1, tan idemostra so panagaral. Agta magmainomay iyan paraan?
9 No Nonoten ni na Dumerengel Yo so Nipaakar ed Satan: Panggunaetan a sikatoy nakatongtong lamet, ya agla ipapaleen. Diad panggawa yo ed satan, seguroen a walaan kayo na brosyur a Kakaukolanen. Ipanengneng ed sikato iray lugan diad biek na apis. Panpili yo na tema a makapainteres a maong ed sikato. Ibukay ditan, tan igapon singbaten so leksion a pinili to.
10 Pamawil ed Saray Apalimaan na Magasin: No akapangitilak ka na tract tekep na pigaran magasin, nayarin ompawil ka tekep na onian paraan: “Nen imbeneg ya indalaw ko, aliketan ak ya angitilak ed sikayo na sakey a kopya na magasin a Panag-Bantayan. Anganko et naimano yo a say interon tema na magasin et Say Panag-Bantayan Mangipapalapag na Panarian nen Jehova. Natan et labay kon ipaliwawa no anto iyan Panarian tan no antoy kabaliksan na satan ed sikayo tan ed pamilya yo.” Insan ibukay so brosyur a Kakaukolanen ed leksion 6. Igapo ed unonan parapo, basaen tan singbaten anggad wala ni so oras na unabung. Insan manggawa na saray uksoyan pian ompawil ed arum ya agew tan isumpal so leksion.
11 Agpapaandian na Saray Tract: Say manangasikaso na serbisyo tan saray agagin mangaasikaso na saray suplay na literatura so malabay a walan naynay so akasimpen a malaem a suplay na tract ya Aralen so Biblia diad kongregasyon. Mangibulsa odino mangiyan kayo na pigara ed pitaka yo, diad kotse yo, diad pantratrabahoan yo, diad eskuelaan, diad asingger ed puerta na abung yo—inerman a saratan so kakaala. Siempre, mangikarga na pigara ed bag yo a panagpulong pian usaren sano makaabet kayo na napitongtongan yo nipaakar ed Biblia.
12 Komon ta Bendisyonan nen Jehova Iray Sagpot Tayo: Say kalkaliktan a kalat parad amin a Kristiano et say pangibangat na katuaan ed arum ni. (Mat. 28:19, 20) Kasin walay peles ya iyaaralan yo na Biblia? No wala, kasin nilugaran yo na panaon so sakey nin panangiyaral ed sinimban eskedyul yo? No anggapo natan so iyaaralan yo na Biblia, maseguron pirawat yo so nawalaan. Ipikasi ed si Jehova a bendisyonan to ray sagpot yo pian makaromog na sakey a niyaralan yo. Insan pankimeyan a mitunosan ed saratan a pikakasi yo.—1 Juan 5:14, 15.
13 Walaan itayo na balon uusaren parad pangigapo na saray panangiyaral! Ikabisado itan. Ibunog lan ibunog itan. Gawaen so anggaay nayarian yo “a manggawa na maong, a magmaliw a mayaman ed maabig iran gawa, a magmaliw a mapalangkap, akaparaan a manginabang” ed no anto so naaralan yo nipaakar ed Salita na Dios.—1 Tim. 6:18, NW.
[Kahon ed pahina 4]
SARAY PANKANAWNAWAN PANGIBUNOG ED TRACT
◼ Agew-agew iran pitotongtong
◼ Sano awaten na sakey so literatura tayo
◼ Sano anggapoy nasabi ed abung
◼ Sano manggawa itayo na saray panagpawil
◼ Sano walay naabet tayo ed panagpulong diad karsada
◼ Sano manpupulong itayo ed lugar na negosyo ed teritorya
◼ Sano manpupulong ya impormal
◼ Sano mansusulat
◼ Sano walad publikon luluganan
◼ Sano walay onla’d abung tayo
◼ Sano mitotongtong ed saray kakanayon, kakaabay, katrabahoan, kaeskuelaan, tan arum niran kabkabat