Pangipatnag na Pisasalamat ed Sankaabigan a Regalo na Dios
1. Akin a misalsalamat itayo ed si Jehova?
1 Diad amin a ‘maong iran regalo’ nen Jehova, say dondon ya intarya na inad-aro ton Anak so sankaabigan. (Sant. 1:17) Lapud saya et nagmaliw a posible so pakaawat tayoy daakan a bendisyon, laktip lay pakaperdona na saray kasalanan tayo. (Efe. 1:7) Kanian, nepeg a lawas itayon misalsalamat. Legan na panaoy Memoryal, mangiiter tayoy nikadkaduman imano ed sayan mabmablin regalo.
2. Panon tayon napaaligwas so apresasyon tayo tan na pamilya tayo ed dondon?
2 Pamaaligwas na Apresasyon: Pian napaaligwas so apresasyon na pamilya yo, agta maabig no repasoen yo iray impormasyon nipaakar ed dondon diad saray Panagdayew na Pamilya yo antis na Memoryal no Marso 30? Basaen yo met bilang pamilya so aka-eskedyul ya inagew-agew a babasaen ed Biblia legan na panaoy Memoryal. Dalepdep yon mismo no panon kayon agunggonaan ed dondon tan no panon a naimpluensyaan na satan so panmoria yo ed si Jehova, ed inkasikayo, ed arum, tan ed arapen. Makagunggona met so pangipasal ed duaran balon kantan usaren ed Memoryal, numero 8 tan 109.—Sal. 77:12.
3. Panon tayon nipatnag so pisasalamat?
3 Pangipatnag na Pisasalamat: Papakiwasen itayo na pisasalamat ed dondon ya inabang ed arum so nipaakar ed si Jehova tan ed panangaro to diad impangibaki to’d Anak to. (Sal. 145:2-7) Legan na Marso, Abril, tan Mayo, walaray pamilyan mangipapatnag na pisasalamat da diad pangiyaarunsa ran man-auxiliary payunir so anggan sakey a membro na pamilya ra. Balet no agyo iya nagawaan, sarag yo kasin ‘anamoten so kada pankanawnawa’ pian napalaknab so ministeryo yo? (Efe. 5:16) Pakiwasen itayo met na pisasalamat pian tulongan so arum ya onatendi ed Memoryal a kaiba tayo. (Apo. 22:17) Ilista yo lay kangaranan na saray papawilen, iyaaralan, kakanayon, katrabaho, tan kakaabay a plano yon imbitaan. Insan sigpot yon suportaan so panangibunog na espisyal ya imbitasyon parad Memoryal.
4. Panon tayon anamoten so panaon na Memoryal?
4 Mangitatarya so panaon na Memoryal na balo iran pankanawnawa pian nipanengneng tayoy apresasyon ed sayan regalo nen Jehova ed katooan. Komon ta anamoten tayo iyan pankanawnawa pian napaaligwas tan nipatnag tayo so pisasalamat ed dondon tan “ed agaylan karakel iran kayamanan na Kristo.”—Efe. 3:8.