Alisto Tayon Tulongan Iramay “Walaan na Dugan Kipapasen na Puso”

1. Anto ray posiblin reaksion na totoo no narengel da so maong a balita? (Gawa 13:​47, 48; 16:​14, 15)

NEN inmunan siglo, dakel so angawat ed katuaan anggano first time da ni labat ya narengel so mensahe ya ipupulong na saray Kristiano. (Basaen so Gawa 13:​47, 48; 16:​14, 15.) Diad panaon tayo, wala met iray ontan ya totoo. Malikeliket ira nen first time dan arengel so maong a balita. Say arum balet, ag-ira interesado diad gapo, pero diad ilalabas na panaon, labay da lanlamang so manaral na Biblia. Antoy gawaen tayo no walay nakatongtong tayod ministeryo ya “walaan na dugan kipapasen na puso”?

2. Akin ya say kimey tayon panaggaway disipulo et nayarin ikompara ed gagawaen na sakey ya hardinero?

² Say kimey tayon panaggaway disipulo et nayarin ikompara ed gagawaen na sakey ya hardinero. No anengneng na hardinero ya walay aluto lan bunga na tanem to, burboren to lan tampol. Pero siempre, tuloytuloy to met ya asikasoen tan salogen iramay arum nin tanem to ya agni alutoy bunga ra. Ontan met diad ministeryo. No walay aromog tayon interesado ed mensahe tayo, tulongan tayon tampol pian magmaliw ya disipulo nen Kristo. Panon to balet iramay agni angipanengneng na interes ed mensahe tayo? Itultuloy ti labat iran pulongan, agla pigan magmaliw met iran interesado ed Biblia. (Juan 4:​35, 36) Makatulong so pakatebek pian nalikas tayo no panon tayon natulongan iray nakakatongtong tayod ministeryo. Pantongtongan tayo ed sayan artikulo no panon tayon natulongan iray interesado anggano diad unonan pitongtong ni labat. Pantongtongan tayo met no antoy gawaen tayo pian tuloytuloy iran onaligwas ed espiritual.

NO WALAY NALMO TAYON INTERESADO

3. Antoy gawaen tayo no walay nalmo tayon interesado diad ministeryo? (1 Corinto 9:26)

³ No walay nalmo tayon interesado diad ministeryo, tulongan tayon tampol pian makagapo lan manakar ed dalan paarap ed bilay. Diad unonan pitongtong ni labat, iyopresi tayo lad sikato so panag-aral na Biblia tan imbitaan tayo lan tampol diad aral tayo.—Basaen so 1 Corinto 9:26.

4. Mangisalaysay na eksperiensya ya say sakey ya interesado et labay to lan tampol so manaral na Biblia.

⁴ Iyopresi so panag-aral na Biblia. Wala ray nakakatongtong tayo ya labay da lan tampol so manaral na Biblia. Singa bilang, diad Canada, legan ya manka-cart witnessing iray agagi diad agew na Huebes, walay kabataan ya bii ya angala na brosyur ya Panliketan so Bilay ya Anggapoy Anggaan! Kinatongtong na samay sister ya manbabantay ed cart imay bii. Imbaga to ya amay inala ton brosyur et uusaren parad libren panag-aral na Biblia. Interesado imay bii kanian nan-alaan ira na contact number. Diad saman met lanlamang ya agew, in-text na samay bii imay sister tan tinepet to no kapigan ira onggapon manaral. Nen imbaga na sister ya diad Sabado so panaral da, say kuan to may bii: “Anto kasi no nabuas la? Anggapoy gawaen ko nabuas.” Kanian nen Biernes, nanaral ira. Insan akiaral ya tampol imay bii nen Simba, tan tuloytuloy lay inyaligwas to.

5. Antoy gawaen tayo pian nanengneng na katongtong tayo so kaimportantian na panaral na Biblia? (Nengnengen met so litrato.)

⁵ Wala ray nakakatongtong tayo ya ondengel met ira pero aliwa ran onman kainteresado ed Biblia ya singa samay bii. Diad ontan iran situasyon, wala ray sarag tayon gawaen pian nanengneng da so kaimportantian na panaral na Biblia. Singa bilang, no katongtong tayod ministeryo so sakey ya too, say pilien tayon topic et amay amta tayon dugaruga ed situasyon to odino ibagay tayoy presentasyon tayo, depende ed no antoy labay ton pantongtongan. Mansiansia tayo met ya positibo tan tuloytuloy tayon ipanengneng so malasakit ed sikato. No ontan so gawaen tayo, ompan agmanbayag et nigapo tayo lan iyaralan na Biblia. Antoy ibaga tayo no iyopresi tayoy panag-aral na Biblia? Makaaral tayod saray tips ya nanlapud nanduruman agagi ya marundunong ya mangigapoy panag-aral na Biblia.

6. Antoy sarag mon ibaga pian nasagyat so interesado ya ituloy so tongtongan yo?

⁶ Wala ray publisher tan payunir ya angibaga ya diad arum ya lugar, mas marakep no iwasan so pangibagay, “Aral moy Biblia” odino “Bangatan ta ka” no mangiyoopresi na panag-aral na Biblia. Mas marakep kuno no say ibaga et, “Pantongtongan ta labat ya magano so Biblia” tan “Dakel ni naamtaan mo.” Pian nasagyat moy interesado ya ituloy so tongtongan yo, oniay sarag mon ibaga: “Naebatan manaya na Biblia iray tepet tayo anto?” o “Balbaleg manayay nitulong na Biblia ed sikatayo.” Insan mo natan ibaga: “Anggano 10 o 15 minuto labat, dakel lay naaralan mo.” Agmo la kaukolan ya ibagan, “Sinimba ak ya onlad dia” odino “Mi-appointment ak ed sika,” pian agto nalikna ya obligadon manaral na Biblia.

7. Kapigan akombinse so arum ya nalmo da lay katuaan? (1 Corinto 14:​23-25)

⁷ Imbitaan mon miaral. Diad panaon nen apostol Pablo, wala ray akombinse ya nalmo da lay katuaan nen inmatendi ira ed pantitipon na saray Kristiano. (Basaen so 1 Corinto 14:​23-25.) Nagagawa met itan natan. Wala ray interesado ya mas maples so inyaligwas da nen mimiaral la ra. Kapigan tayo sirin imbitaan so sakey ya interesado? Agtayo la kaukolan ya alagaren ya nasabi ni may leksion 10 na libron Panliketan so Bilay ya Anggapoy Anggaan! ya ditan et napaseseg so interesado ya salien toy miaral. Diad unonan pitongtong ni labat, sarag mo lan imbitaan ya miaral so akatongtong mon interesado. Marakep no ibagam ed sikato so tema na publikon paliwawa odino say topic ya aralen ed Panag-bantayan.

8. Anto ray ibaga tayo ed sakey ya interesado no imbitaan tayon miaral? (Isaias 54:13)

⁸ No imbitaan tayon miaral so sakey ya interesado, ipaliwawa tayod sikato ya duma iray aral tayo ed saray pantitipon o misa na arum ya relihyon ya nayarin naatendian to la. Walay sakey ya Bible study ya nen first time toy miaral tan naobserbaan toy Panag-aral na Panag-bantayan, oniay intepet to ed samay mangiyaaral ed sikato: “Atay walad arap, amta toy ngaran yon amin?” Imbaga na sister ya tatandaan tayoy ngaran na saray kakongregasyon tayo, ta pamilya so turing tayod sikara. Mankelaw may study ta diad simbaan da, basta labat ira kuno mimimisa pero agda kakabaten so sakey tan sakey. Apasal met so arum ya puros ritual o seremonya labat so nagagawa ed misa da. Kanian ompan balo ed sikara so gagawaen tayo ed saray aral tayo. (Basaen so Isaias 54:13.) Say gagala na saray aral tayo et pian dayewen tayoy Jehova, paibangat tayod sikato, tan manpapasesegan tayo. (Heb. 2:12; 10:​24, 25) Kanian seseguroen tayo ya mauksoy so aral tayo tan maliwawa so Kingdom Hall pian talagan makaaral tayo. (1 Cor. 14:40) Anggapo met so susuportaan tayon politiko o partido ta agtayo mibabali ed politika, tan agti met pandedebatian iray nanduruman isyu. Pian naikdan na ideya imay interesado ed saray aral tayo, marakep no ipabantay mod sikato so video ya Antoy Gagawaen Diad Kingdom Hall?

9-10. No iimbitaan tayon miaral so sakey ya interesado, antoy ibaga tayo pian napaseguroan ya agtayo piliten ya man-Tasi o mankomento diad aral? (Nengnengen met so litrato.)

⁹ Wala ray interesado ya manaalangan ya miaral ta say amta ra et kombinsien tayo ran man-Tasi. Kanian no imbitaan tayon miaral so sakey ya interesado, ibaga tayod sikato ya anggan saray aliwan Tasi et welcome ed saray aral tayo, tan ipaseguro tayo ya agtayo pipiliten so arum ya magmaliw ya Tasi o mankomento diad saray aral. Ayos labat ingen anggano interon pamilya so onla, anggan saray angkekelag ya ugugaw. Ag-akabiig iray ugugaw ed saray aral tayo. Abay da iray atateng da, kanian nababantayan na saray atateng iray ananak da tan parehoy nanaaralan da. (Deu. 31:12) Agtayo mankokolektay kuarta ed saray aral tayo tan agtayo met mangipapasa na baskit odino envelope parad donasyon. Uunoren tayo may imbaga nen Jesus ya: “Inawat yon anggapoy bayar, iter yon anggapoy bayar.” (Mat. 10:8) Ibagam met ed samay interesado ya agto pampapagaay isulong to, ta say nenengnengen na Dios et say puso tayo, aliwan say itsura tayo.—1 Sam. 16:7.

¹⁰ No akiaral may interesado, ipaliknam ya welcome diad Kingdom Hall. Ikabat mod saray elder tan ed arum nin agagi. No makaaro tayod sikato tan palagay lay loob tod saray agagi, mas baleg so posibilidad ya miaral lamet. Legan na aral, ipanengneng mod sikato iray tatalakayen ya teksto, lalo la no anggapoy Biblia to. Ipanengneng mo met so uusaren tayon publikasyon pian nasubaybayan toy aaralen tayo.

NO NIGAPOM LAY PANAG-ARAL NA BIBLIA

11. Antoy tandaan tayo no akalmo tayoy iyaralan na Biblia?

¹¹ Antoy tandaan tayo no akalmo tayoy iyaralan na Biblia? No wala lay apantongtongan yon eskedyul na panaral yo, seguradom ya napawil mo ed satan ya agew tan oras. Tandaan mo ya wala ni ray arum ya iyuulo tan kimey to. Kanian sabi ka ed samay oras ya nantongtongan yo, anggano bilang ta normal labat diad lugar yo so naatrasado. Mas marakep no antikey labat so unonan panaral yo. Imbaga na arum ya eksperiensyadon publisher ya mas maabig no ag-itan dukeyan, anggano labay ni na iyaaralan mo ya ituloy so leksion. Tan agka salita lan salita. Paulyan mo labat imay iyaaralan mo ya ibaga toy walad nonot tan puso to.—Pro. 10:19.

12. Antoy gagala tayo no mangiyaaral tayoy Biblia?

¹² No iyaralan tayoy Biblia so sakey ya too, tandaan tayo ya say gagala tayo et nakabat toy Jehova tan Jesus, tan naaro to ra. Kanian diad gapo ni labat, atan la so ipurek mod iyaaralan mo. Pian nagawaan mo itan, lanang mon ipaimano ed sikato so ibabaga na Biblia pian nanengneng to ya talagan nanlapud Salita na Dios so aaralen yo, tan ag-itan manlalapud sika. (Gawa 10:​25, 26) Makaaral tayod alimbawa nen apostol Pablo. Kada no manbabangat, lanang ton ipapaimano so nipaakar ed si Jesus, ta si Jesus so imbaki nen Jehova ya ontulong ed sikatayo ran totoo pian nakabat tan naaro tayo so Dios. (1 Cor. 2:​1, 2) Indanet met nen Pablo ya importantin tulongan iray balon disipulo pian niwalad sikara iray kualidad ya inkompara tod balitok, pilak, tan mablin bato. (1 Cor. 3:​11-15) Kaiba ed saratan ya kualidad so pananisia, karunongan, pakatebek, tan takot ed si Jehova. (Sal. 19:​9, 10; Pro. 3:​13-15; 1 Ped. 1:7) Aligen tayoy panagbangat nen Pablo. Tulongan tayo ray iyaaralan tayo pian nawalaan iray mabiskeg ya pananisia tan nakaaro da si Aman Jehova.—2 Cor. 1:24.

13. Akin et importante ya agtayo basta-basta susukoan so iyaaralan tayo tan talosan tayoy liknaan to? (2 Corinto 10:​4, 5) (Nengnengen met so litrato.)

¹³ Makaaral tayo met ed si Jesus. Agtayo basta-basta susukoan iray iyaaralan tayo tan talosan tayoy liknaan da. Iwasan mo ray tepet ya nabaingan laingen so iyaaralan mo. No walay punto ya agto masyadon natatalosan, mas maabig no ituloy yo labat so leksion insan yo la pawilen iman ya punto. Agmo pipiliten ya awaten toy sakey ya bangat na Biblia. Mas maabig no ikdan moy panaon pian napannonotan to ni itan. (Juan 16:12; Col. 2:​6, 7) Saray palson bangat et inkompara na Biblia ed tori o panagsalimbengan ya “malmalet ya akaletneg.” (Basaen so 2 Corinto 10:​4, 5; nengnengen so study note ya “pabagsakin ang mga bagay na matibay ang pagkakatatag” diad nwtsty-TG.) No panon ya mairap ya gebaen so sakey ya tori o panagsalimbengan, mairap met ya nakombinse so sakey ya too ya aliwan tua so papanisiaan to, lalo la no abaybayag to lan papanisiaan itan. Pero antoy sarag mon gawaen pian mas mainomay ya awaten na iyaaralan mo iray katuaan ed Biblia? Marakep no tulongan mo ni ya ituring ton panagsalimbengan si Jehova. Labay ton ibaga, tulongan mo ya naaralan toy manmatalek ed si Jehova. Ta no wala lay tiwala tod si Jehova, mas mainomay to lan taynanan iray abangonan ton bangat.—Sal. 91:​9, paimanod leksab.

NO WALAY INTERESADO YA MIARAL

14. No wala ray interesado ya onatendi ed aral tayo, panoy pantrato tayod sikara?

¹⁴ Labay nen Jehova ya patas so pantrato tayo ed saray interesado, antokaman so kultura o lahi da, mayaman man ira o mairap. (Sant. 2:​1-4, 9) No walay interesado ya onatendi ed aral tayo, panon tayon nipanengneng ed sikato so panangaro?

15-16. Panon tayon nipalikna ed saray interesado ya welcome ira ed aral tayo?

¹⁵ Wala ray onaatendi ed Kingdom Hall tayo ta labay dan naamtaan no antoy nagagawa ditan. Say arum balet, ompan walay kanayon o kaaro da ya walad arum ya lugar ya angibagan salien day miaral. Kanian no walay nanengneng mon balon lupa diad Kingdom Hall, agka manaalangan ya asinggeran. Ipaliknam ed sikato ya welcome diad aral tayo, pero aliwa met ya amay sobsobra pian aga nabigla. Maabig met no payurongen mod abay mo. Legan na aral, ipanengneng mod sikato iray tatalakayen ya teksto, pati say publikasyon ya aaralen tayo pian nasubaybayan to. Odino iyalaan mo laingen na sarili ton kopya na Biblia tan samay publikasyon. Magmaliw tayo met ya manonot ed liknaan na saray interesado. Nen inmatendi ed Kingdom Hall so sakey ya laki, imbaga tod samay brother ya nan-welcome ed sikato ya nababaingan kunod sulong to ta aka-casual labat. Pero imbaga to may brother ya anggano aka-pormal tayo diad aral, totoo tayo met labat ya singa sikato. Inmaligwas ed espiritual imay laki tan abautismoan. Agto kuno nalingwanan imay imbaga na brother! Nia ni so tandaan tayo: Ipanengneng tayoy personal ya interes ed saray akiaral ya interesado, pero iwasan tayoy mantepet na masyadon personal.—1 Ped. 4:15.

¹⁶ Magmaliw tayon marespeto ed saray ibabaga tayo no katongtong tayo ray interesado, no mankokomento tayo, no walay parte tayo, tan nagkalalo la no sikatayo so mangiter na publikon paliwawa. Manalwar tayo ta ompan walay nibaga tayon makapainsulto odino singa tayo la dederalan iray aliwan Tasi tan arum ya relihyon. (Tito 2:8; 3:2) Singa bilang, agtayo babalawen so pananisia na arum ya relihyon. (2 Cor. 6:3) Nipanengneng met na saray espiker na publikon paliwawa ya sankanonot da ray interesado ya inmatendi no ipaliwawa da iray salita o punto ya agnatatalosan na saray aliwan Tasi.

17. Antoy gawaen tayo no walay aromog tayon “walaan na dugan kipapasen na puso,” tan akin et gawaen tayo itan?

¹⁷ Antiktikey la so nakekeran panaon, kanian samboten tayon anapen iramay “walaan na dugan kipapasen na puso parad bilay ya andi-anggaan.” (Gawa 13:48) No makalmo tayoy interesado, agtayo manaalangan ya iyopresi so panag-aral na Biblia, tan imbitaan tayon tampol ya miaral. On, gawaen tayo itan pian makagapo la ran tampol ya manakar ed “dalan ya ompugta ed bilay.”—Mat. 7:14.