Pakaskasi so Ag-onkiwas ya Henerasyon

Talagan papablien nen Jesus si Juan Bautista, balet kasin ontan met so panmoria na totoo ed si Juan? Nipaakar ed “sayan henerasyon” et inkuan nen Jesus: “Singa itan saray ugugaw a manyudyurong diad saray tindaan ya eeyagan da iray kagalaw da, ya ibabaga ra, ‘Tinogtogan mi kayoy plauta, balet agkayo sinmayaw; nanurangal kami, balet agyo tinatabyog iray pagew yo ed ermen.’”​—Mateo 11:16, 17.

Antoy labay ya ibaga nen Jesus? Impaliwawa to: “Si Juan et agmamangan tan ag-oniinum, balet ibabaga na totoo, ‘Sikatoy aselepan na demonyo.’ Say Anak na too et mamangan tan oniinum, balet ibabaga na totoo, ‘Sakey a toon masiba tan mainum na alak, a kaaro na saray managsingil na buis tan saray makasalanan.’” (Mateo 11:18, 19) Simpli labat so impanbilay nen Juan bilang Nazareo, pinaliisan to ni ingey oninum na alak, balet ta ibabaga na sayan henerasyon a sikatoy aselepan na demonyo. (Numeros 6:2, 3; Lucas 1:15) Si Jesus balet et nambilay a singa arum a totoo. Sikatoy angan tan inminum ya kabkaabigan, balet ta inakusaan dan masiba tan mainum. Talagan mairap ya paliketen iray totoo.

Inyaliling nen Jesus so henerasyon ed saray ugugaw diad tindaan ya agsinmayaw nen nantogtog iray arum ya ugugaw, odino agnanermen nen nanurangal iray arum. Inkuan to: “Balet, say karunongan et napaneknekan a matunong ed panamegley na saray nagagawaan na satan.” (Mateo 11:16, 19) On, saray “nagagawaan” nen Juan tan Jesus et paneknek ya aliwan tua iray akusasyon ed sikara.

Kayarin deneskribe nen Jesus a say henerasyon et ag-onkikiwas, sinansakey ton kinondena iray syudad na Corazin, Betsaida, tan Capernaum ya nanggawaan toy milagro. Imbaga nen Jesus ya no ginawa to iratan diad saray syudad na Fenicia ya Tiro tan Sidon, nagbabawi komon iray taga diman. Binitla to met so Capernaum, ya nanayaman ton agano. Pati diman et dakel so agkinmiwas. Oniay imbaga nen Jesus ed satan ya syudad: “Diad Agew na Panangukom et mas anlemew ni so dusa ed dalin na Sodoma nen say sikayo.”​—Mateo 11:24.

Kayari na satan et indayew nen Jesus so Ama to, ya angiyamot ed saray mabmablin espiritual a katuaan ed “saray marunong tan mautek” balet impaamta to ed saray mapaabeba a singa saray ugugaw. (Mateo 11:25) Inyopresi tod sikaray balibalin imbitasyon: “Dago kayod siak, amin yon mansasagpot tan nabebelatan, tan pampainawaen ta kayo. Sakbat yoy pakok tan manaral kayod siak, ta mauyamo tan mapaabeba ak, pian nainawaan kayo. Ta say pakok et maabig, tan anlemew so awit ko.”​—Mateo 11:28-30.

Panon ya nagmaliw a lapuan na inawa si Jesus? Saray lider na relihyon et pinabelatan da ray totoo na makapairap iran tradisyon, singa saray is-istrikton totontonen ed Sabaton. Balet ta pinanpainawa ira nen Jesus diad impangibangat tod sikaray katuaan nipaakar ed Dios ya angibulos ed sikara diad saraman ya tradisyon. Impanengneng to met no panon ya nainawaan iramay totoon pakaskasi lapud panangabuso na saray walad pakauley tan saramay nabebelatan lapud kasalanan. On, impaamta nen Jesus ed sikara no panon ya naperdona iray kasalanan da tan no panon iran makapikareenan ed Dios.

Amin ya mangawat ed anlemew ya pako nen Jesus et sarag dan idedikay sarili dad Dios tan manlingkor ed maabagey tan mapangasin Ama tayod tawen. Agmairap itan lapud saray kakaukolanen na Dios et aliwan makapabelat.​—1 Juan 5:3.