Maliket a Bilay—Impanengneng nen Jesus No Panon

SINGA apantongtongan ed inmunan artikulo, maliket so bilay nen Jesus. Kanian no labay tayo met so nawalaay maliket a bilay, kaukolan tayon aligen so ehemplo tan unoren iray bilin to.

Papasesegen itayo nen Jehova ya aligen so impanakar nen Jesus. Say labay ya ibaga na satan et diad interon bilay tayo, aligen tayoy ehemplo tan tumboken iray bangat to. No gawaen tayo itan, niwalad sikatayoy panangabobon na Dios tan magmaliw itayon maliket.

Kaibad saray bangat nen Jesus iray prinsipyod Biblia a makatulong ed sikatayon naalig so impanakar to. Pigarad sarayan prinsipyo et walad kabkabat a Sermon tod Palandey. Pantongtongan tayo so pigarad saraya tan no panon tayon niyaplika irayad bilay tayo.

PRINSIPYO: “Maliket iramay manonot ed espiritual a pankaukolan da.”—Mateo 5:3.

NO PANON A MAKATULONG IYAN PRINSIPYO PIAN MAGMALIW A MALIKET SO BILAY:

Unong ed si Jesus, walay natural ya pankaukolan na totoo ed espiritual. Singa bilang, labay tayon naamtaan so ebat ed onia ran tepet: Akin a wadia tayo? Akin a grabe so paniirap ed sayan mundo? Talaga kasin inaro itayo na Dios? Kasin walay bilay kayari patey? Kaukolan tayon naamtaan so ebat ed sarayan tepet pian nawalaan tayoy maliket a bilay. Amta nen Jesus a saksakey labat so pakaromogay tuan ebat ed sarayan tepet—say Salita na Dios. Oniay imbaga nen Jesus nen nampikasid Ama to: “Say salitam et katuaan.” (Juan 17:17) Talaga kasin niiter na Salitay Dios so espiritual ya pankaukolan tayo pian magmaliw tayon maliket?

TUAN EKSPERIENSYA:

Bilang lead singer na kabkabat a banda, si Esa et magmamaliw lan sikat a rock star. Anggaman ontan, say pakalikna to et singa walay kulang ed bilay to. Oniay imbaga to: “Anggano panliliketan kon kaiba ak ed banda, aanapen ko nin siansiay mas maliket a bilay.” Anggad nen walay akatongtong ton sakey ya Tasi nen Jehova. “Dakel so intepet kod sikato,” so imbaga to. “Saray malinew ya ebat ton base ed Biblia so akainteres ed siak, kanian nampaiyaral ak na Biblia ed sikato.” Atenyeg so puso nen Esa ed saray nanaaralan to tan apakiwas ya usaren toy bilay to parad si Jehova. Inkuan to: “Nensaman et lanang ak a mamoproblema. Natan balet et wala lay direksion na bilay ko.”a

PRINSIPYO: “Maliket iray mapangasi.”—Mateo 5:7.

NO PANON A MAKATULONG IYAN PRINSIPYO PIAN MAGMALIW A MALIKET SO BILAY:

Say panangasi et pangipanengneng na panangabagey ed arum, pagmaliw ya maong tan makonsidera. Impanengneng nen Jesus so panangasi ed saray mankaukolan. Satan so amakiwas ed sikaton tulongay arum ed paniirap da. (Mateo 14:14; 20:30-34) No aligen tayoy inkamapangasi nen Jesus, mas magmaliw a makabaliksan so bilay tayo, ta mas maliket iramay mapangasi. (Gawa 20:35) Nipanengneng tayoy panangasi diad itulong ed saray mankaukolan, diad maabig iran salita tan gawa. Talaga kasin say pagmaliw a mapangasi et mas mamaliket ed bilay tayo?

TUAN EKSPERIENSYA:

Si Maria tan say asawa ton si Carlos et maabig ya ehemplo ed inkamapangasi. Say tatay nen Maria et abalo tan bedridden la. Kanian pinan-ayam da lad abung da tan aasikasoen da ray pankaukolan to. Wala ray labin anggapoy ugip da, iyaakar da ni ingen ed ospital so tatay da no onsigi diabetes to. Inamin dan no maminsan et nakekesawan la ra. Balet ta nalilikna ray liket a singa imbaga nen Jesus, ta amta dan nitatarya day pankaukolan na tatay nen Maria.

PRINSIPYO: “Maliket iray mareen.”—Mateo 5:9.

NO PANON A MAKATULONG IYAN PRINSIPYO PIAN MAGMALIW A MALIKET SO BILAY:

Akin a mas maliket so bilay na saray managpareen? Say sakey a resulta et mas marakep so piuulop tayod arum. Maabig no unoren tayoy bilin na Biblia ya: “No posible, diad anggaan na nayarian yo, mikareenan kayo ed amin a totoo.” (Roma 12:18) Kaibad “amin a totoo” iray kapamilya tan arum ni ya dumay pananisia dad sikatayo. Talaga kasin say pagmaliw ya managpareen ed “amin a totoo” et mas mamaliket ed bilay?

TUAN EKSPERIENSYA:

Konsideraen pay alimbawa na sakey a biin manngaray Nair. Pigay taon to lan aanosan iray problema ya manusubok ed abilidad ton pansiansiaey kareenan, lalo lad mismon pamilya to. Manlapu la nen tinmaynan so asawa to, manga 15 taon lay apalabas, bukbukor to lay nampabaleg ed saray anak to. Sakey ed saray anak ton laki et nagmaliw ya adik tan bayolenti, tan nipepeligroy bilay to tan na anak ton bii. Panisiaan nen Nair ya say naaralan tod Biblia et akatulong ed sikaton magmaliw a mareen anggan diad makapasyodot iran situasyon. Aanosan toy agmiebatan odino mikolkol. Gagawaen toy anggaay nayarian ton magmaliw ya maong tan makatalos. (Efeso 4:31, 32) Sikatoy kombinsido a say pagmaliw ya managpareen so tinmulong pian ondakep so relasyon tod kapamilya to tan ed arum.

NONOTEN SO ARAPEN

No unoren tayo ray makabat a bilin nen Jesus, magmaliw itayon maliket tan kontento ed bilay. Balet, kaukolan tayo met ya naamtaan so nagawad arapen pian nawalaan tayo na maliket a bilay. Panon tayon magmaliw ya maliket no say amta tayo labat et onsabi panaon ya ontatken, mansakit, insan ompatey tayo? Ingen ta ontan so talagan nagagawa natan.

Balet, walay maong a balita! Dakel so ipaparaan nen Jehova ya bendisyon ed amin ya gagawaen day anggaay nayarian dan “manakar a singa ed impanakar nen Jesus.” Impormisa nen Jehova ya magano to lan gawaen ya balo so mundo, a panayaman na saray matoor unong ed kipapasen ya talagan gagala nen Jehova—maksil so laman tan manbilay ya andi-angga. Oniay imbaga tod Biblia: “Nia! Say tolda na Dios et walad katooan, tan sikatoy miayam ed sikara, tan magmaliw iran totoo to. Tan say Dios a mismo et niwala ed sikara. Tan punasen to so amin a lua ed kamataan da, tan anggapo lay ipapatey, tan anggapo met lay panermen tan pannangis tan ot-ot. Saray datin bengatla et linmabas la.”—Apocalipsis 21:3, 4.

Si Maria, say 84 años ya abitlad inmuunan pahina na sayan magasin et maliket ya manatalaran ed pakagawa na saratan. Sika ey, labay mo kasin naaralan a maong so nipaakar ed “peteg a bilay”—say naawat mo no manuley lay Panarian na Dios? (1 Timoteo 6:19) Sarag mon tepetan iray Tasi nen Jehova ed lugar yo odino mansulat ed saray publisher na sayan magasin.b