No Antoy Kakaukolanen na Maridios a Panagpauley ed Sikatayo
“Pauleyan kayo sirin ed Dios.”—SANTIAGO 4:7, NW.
1. Anto so nibaga ed nengneng na Dios a dadayewen tayo?
AGAYLAN sakey a makapakelkelaw a Dios si Jehova! Agnipareng, agnaparaan, agnikumpara, nikadkaduma ed ontanlan dakel a paraan! Sikato so Sankatagyan, say Sankatalbaan a Soberano a panlalapuan na amin a tuan pakauley. Sikato so nanlapu ed andi-anggaan ya anggad andi-anggaan tan ontanlan magloria ya anggapoy toon makanengneng ed sikato tan ingen manbilay. (Exodo 33:20; Roma 16:26) Sikato so ag-ageteran diad pakayari tan kakabatan, sigpot ya ayadyari ed inkahustisya, tan mogmon personipikasyon na aro. Sikato so Manamalsa tayo, Manangukom tayo, Manangiter-ganggan tayo, tan Ari tayo. Amin a maong a langkap tan amin ya ayadyarin regalo so manlalapud sikato.—Salmo 100:3; Isaias 33:22; Santiago 1:17.
2. Antoran bengatla so lalanoren na maridios a panagpauley?
2 Nisesengeg ed amin na sarayan katuaan, anggapoy suppiat nipaakar ed obligasyon tayon pauleyan ed sikato. Balet anto so lalanoren na saya ed sikatayo? Dakel a bengabengatla. Lapud agtayo personal a nanengneng si Jehova a Dios, say panagpauley ed sikato et lalanoren to so katutulok ed panangiwanwan na abangatan a konsiensia na sakey, pikokoopera ed mangaraldalin ya organisasyon na Dios, panamidbir ed sekular iran pakauley, tan panagrespeto ed prinsipyo na inkaulo ed loob na sirkuloy pamilya.
Pamasiansia na Maabig a Konsiensia
3. Pian napansiansia so maong a konsiensia, nepeg ya ontulok tayo ed antoran nengneng na isesebel?
3 Pian napansiansia so maabig a konsiensia, nepeg a sikatayo so ontulok ed agnipipilit—salanti, ed saray ganggan odino prinsipyon agnayarin ipilit na totoo. Alimbawa, say komasamplon ganggan ed Dekalogo, a niganggan sumpad agum, so agnipilit na saray pakauley na too. Anggaman kuan, mamaneknek iya ed madibinon lapuan na Dekalogo, ta anggapo so ulop na toon managgaway-ley a manggaway ganggan ya agnipilit diad panamegley na saray dusa no asumlang. Diad panamegley na sayan ganggan, inter nen Jehova a Dios ed kada Israelita so responsabilidad a magmaliw a pulis ed inkasikaran dili—no labay to so nawalaan na maabig a konsiensia. (Exodo 20:17) Mipadpara, arum ed saray gawa na laman a manebel ed sakey ed panawir na Panarian na Dios et say “imon” tan “saray sibletan”—kiwakiwas a sumpad saratan a sayan dusa so agnipilit na atooan iran huis. (Galacia 5:19-21) Balet pian napansiansia so maabig a konsiensia, nepeg tayon arawian iraya.
4. Pian napansiansia so maong a konsiensia, diad antoran prinsipyo na Biblia so nepeg a tumboken tayo?
4 On, nepeg a manbilay tayo unong ed saray prinsipyo na Biblia. Saratan a prinsipyo so nasegek ed duaran ganggan ya inletneg nen Jesu-Kristo diad pangebat ed tepet no anto so sankabalgan a ganggan ed Mosaikon kodigo. “Aroen mo so Katawan [Jehova, NW] a Dios mo ed masimoon a pusom, tan dia ed masimoon a kamarerwam, tan dia ed masimoon ya nonot mo. . . . Aroen mo so kaparam a too nonog ed sikan dili.” (Mateo 22:36-40) Diad pangiyilustra no anto so lalanoren na komadua ed sarayan ganggan et say nirekord iran salita nen Jesus diad Mateo 7:12: “Amin a bengabengatla sirin a labay yo a gawaen na totoo ed sikayo, ontan so gawaen yo met ed sikara; ta sikato ya so gangan tan sinalita na saray profetas.”
5. Panon tayon napansiansia so maabig a siglaotan ed si Jehova a Dios?
5 Nepeg a gawaen tayo so amta tayon maptek tan onarawi ed panggawa ed amta tayon mauges, balanglan naiimano itan na arum odino andi. Gawaen iya anggano nayarian tayo so makaiwas balangla ed agpanggawa ed nepeg tayon gawaen odino panggawa ed agnepeg a gawaen. Kabaliksan toy pamasiansia na maabig a siglaotan ed mangatatawen ya Ama tayo, ya ipaslep ed kanonotan so pasakbay ya ibabalikas nen apostol Pablo diad Hebreos 4:13: “Tan angapo so bengatlan pinalsa ya ag nipanengneng ed arap to: no ag ingen saray amin a bengatla wala ra a lakseb tan mapatnag ed saray mata a pangitdan tayo na bilang.” Say pantultuloy a panggawa na maptek so ontulong ed sikatayon mibakal sumpad makapalikdo iran taktika na Diablo, pian barangkaan iray desdes na mundo, tan mibakal sumpad atawir a tendensyan kasibletan.—Ipareng so Efeso 6:11.
Panagpauley ed Organisasyon na Dios
6. Antoran paralanan na pitatalosan so inusar nen Jehova ed sakbay-Kristianon panaon?
6 Inikdan itayo nen Jehova a Dios na kanepegan, a sinansakey a mandeside no panon tayon iyaplika iray prinsipyo na Biblia ed kabibilay tayo. Nanlapulad gapo na awaran na too, uusaren na Dios iray totoo bilang paralanan na pitatalosan. Kanian, si Adan so sangiyan na Dios ed si Eva. Say ganggan nipaakar ed isesebel a bunga so inter ed si Adan sakbay a pinalsay Eva kanian maseguron pinakabatan nen Adan si Eva nipaakar ed linawa na Dios ed sikato. (Genesis 2:16-23) Si Noe so propeta na Dios ed pamilya to tan ed saray totoo sakbay na delap. (Genesis 6:13; 2 Pedro 2:5) Si Abraham so sangiyan na Dios ed pamilya to. (Genesis 18:19) Say propeta na Dios tan paralanan na pitatalosan ed nasyon na Israel et si Moises. (Exodo 3:15, 16; 19:3, 7) Kayari to, angga ed si Juan a Managbautismo, dakel iran propeta, saserdote, tan arari so inusar na Dios a mitalosan ed totoo nipaakar ed linawa to.
7, 8. (a) Diad isasabi na Mesias, sioparay nausar bilang sangiyan na Dios? (b) Anto so kakaukolanen na maridios a panagpauley ed saray Tasi nen Jehova natan?
7 Diad isasabi na Mesias, si Jesu-Kristo, sikato so inusar na Dios tan saray maapit a kalimog ton apostoles tan babangatan ya onkana bilang saray sangiyan To. Diad saginonor, saray matoor ya alanaan a patumbok nen Jesu-Kristo so kinmana bilang “matoor tan makabat ya aripen” diad pangipapatalos ed totoo nen Jehova no panon dan iyaplika iray prinsipyo na Biblia diad kabibilay da. Say maridios a panagpauley et kabaliksan toy pamidbir ed instrumenton inuusar nen Jehova a Dios.—Mateo 24:45-47; Efeso 4:11-14.
8 Ipapanengneng na katuaan a natan “say matoor tan makabat ya aripen” so nisisiglaot ed saray Tasi nen Jehova tan irerepresenta na say Mananguley ya Ulop na sarayan Tastasi. Insan satan ya ulop so manuturo na saray manangasikaso ed nanduruman kapasidad—a singa saray mamatatken tan managbaroy iran manangilaman—pian iwanwan so kimey ed lokal. Kakaukolanen na maridios a panagpauley ed kada dedikadon Tasi a pauleyan ed sarayan manangasikaso diad itumbok ed Hebreos 13:17: “Ontolo’kayo ed saray wala a manuley ed sikayo, tan pauleyan kayo ed sikara: ta manbabantay ira lapu ed saray kamarerwa yo, a singa sikara so mangiter naani pipalinewan: pian sikato ya so gawaen da a sigagayaga, tan aliwa a sieermen: ta saya ag makapaabig ed sikayo.”
Panangawat na Disiplina
9. Anto so mabetbet a lalanoren na maridios a panagpauley?
9 Say maridios a panagpauley so mabetbet a pamaakaran na panangawat na disiplina manlapud saramay manlilingkor bilang manangasikaso. No agtayo lawas iikdan so inkasikatayo na nakakaukolan a disiplina, nayarin kaukolan tayoy nasimbawa tan nadisiplina na saramay walaan na eksperiensia tan pakauley a manggawa na ontan, a singa saray mamatatken ed kongregasyon tayo. Say pangawat na ontan a disiplina so kurang na kakabatan.—Uliran 12:15; 19:20.
10. Anto so walan obligasyon na saraman so manidisiplina?
10 Mapatnag, saray mamatatken a mangipapakurang na disiplina so nepeg a magmaliw ya ehemplon mismo na maridios a panagpauley. Panon? Unong ed Galacia 6:1, aliwa lambengat a sikaray nepeg a nawalaan na maabig a paraan na panagsimbawa noagta nepeg a sikaray magmaliw ya uliran: “Agagi, no wala so nasagmakan ed anton pankasalananan, sikayo a naespirituan sikato komon so ipawil yo ed espiritu na tayadno; ya motekteken mo so inkasikan dili, ta ompan lamang natokso ka met.” Diad arum a salita, say konseho na matatken so nepeg a mitunosan ed ehemplo to. Satan so mitukoyan ed simbawan niiter ed 2 Timoteo 2:24, 25 tan Tito 1:9. On, saramay mamabaat odino mangokorihe so nepeg a magmaliw a maalwar a maong ya agbalot magmaliw a mapasang. Nepeg a sikaray lawas magmaliw a mauyamo, mapangasi, tan ingen mapekder ed panamenben na saray prinsipyo ed Salitay Dios. Sikara so nepeg a magmaliw ya agmangidumaduman dumerengel, makaligliwa ed saramay nasasagpotan tan nabebelatan.—Ipareng so Mateo 11:28-30.
Panagpauley ed Atagtagey a Pakauley
11. Anto so kakaukolanen ed Kristianos ed saray relasyon da ed sekular iran akauley?
11 Kakaukolanen na maridios a panagpauley met ed sikatayo so itulok ed sekular iran pakauley. Sisimbawaen itayo na Roma 13:1: “Ontolok komon so balang kamarerwa ed saray atagtagey a pakauley: ta angapo so pakauley ya ag kien na Dios; et say pakauley ya wala ingangan ira na Dios.” Kakaukolanen na sarayan salita ed sikatayo so itulok ed leyes na trapiko tan magmaliw a maseet a manbayar na saray buis tan babayaran, unong ya idadanet nen apostol Pablo diad Roma 13:7.
12. Diad anton pantalos a say panagpauley tayo ed Caesar so relatibo?
12 Anggaman ontan, malinew a saratan a panagpauley ed si Caesar so nepeg a relatibo. Lawas tayon nonoten so prinsipyon imbalikas nen Jesu-Kristo, a nirekord ed Mateo 22:21: “Bayaran yo sirin ed Cesar so kien nen Cesar; tan ed Dios so kien na Dios.” Say paimanod leksab na Roma 13:1 diad Oxford NIV [New International Version] Scofield Study Bible so nankuan: “Agto kabaliksan iya a sikato so ontulok ed saray regulasyon ya imoral odino sumpad Inkakristiano. Diad saratan a kaso obligasyon to so ontulok ed Dios imbes ed totoo (Gawa 5:29; cp. Dan. 3:16-18; 6:10ff).”
Maridios a Panagpauley ed Loob na Sirkulo na Pamilya
13. Anto so kakaukolanen na maridios a panagpauley ed saray membro ed loob na sirkulo na pamilya?
13 Diad loob na sirkulo na pamilya, say asawan laki tan ama so manlilingkor bilang ulo. Kakaukolanen na saya a saray asawan bibii so ontumbok ed konsehon niiter diad Efeso 5:22, 23: “Sikayo ya asawan bibii, paoleyan kayo ed saray kaasawaan yo a dili, a singa met ed Katawan. Ta say asawan laki sikato so olo na asawan bii, a singa si Cristo met sikato so olo na iglesia.”a No nipaakar ed saray anak, agda kaukolan a gawaen iray dilin totontonen da balet otang da so maridios a panagpauley ed namparan ama tan ina ra, unong ya isasalaysay nen Pablo diad Efeso 6:1-3: “Sikayon anak, ontolo’kayo ed saray kaatengan yo dia ed Katawan; ta saya sikato so matonong. Igalang mo so amam tan inam (a sikato so manonan gangan ya wala so sipan to), Ta makapaabig ed sika tan makapanbilay ka na andukey dia ed tapew na dalin.”
14. Anto so kakaukolanen na maridios a panagpauley ed saray ulo na pamilya?
14 Siempre, mamainomay parad asawan bibii tan ananak so pangipatnag na ontan a maridios a panagpauley sano saray asawan lalaki tan kaamaan a mismo so mangipanengneng na maridios a panagpauley. Gawaen da iya diad pangagamil da na inkaulo unong ed saray prinsipyo na Biblia, a singa saramay naromog ed Efeso 5:28, 29 tan 6:4 “Ontan met so nepeg na saray asawan lalaki a panangaro ra ed saray kaasawaan dan dili a singa panangaro ra ed laman dan dili. Say mangaro ed asawa ton dili aroen toy dilin laman to: Ta angapo ni toon amosol ed laman ton dili; no ag ingen sikato so taganoen to tan pablien to a singa met ed si Cristo ya pinabli to so iglesia. . . . Sikayo ya atateng, ag yo ilagyat a pasanoken so saray anak yo: no ag ingen bangatan yo’ra ed kadudusa tan panamilin na Katawan [Jehova, NW].”
Saray Tulong Diad Pangipatnag na Maridios a Panagpauley
15. Anton bunga na espiritu so ontulong ed sikatayon mangipatnag na maridios a panagpauley?
15 Anto so ontulong ed sikatayon mangipatnag na maridios a panagpauley ed sarayan nanduruman nengneng? Ununa, wala so agsinisiblet a panangaro—panangaro ed si Jehova a Dios tan parad saramay inpasen to parad sikatayo. Nibaga ed sikatayo diad 1 Juan 5:3: “Ta saya so aro na Dios, a sumpalen tayo so saray gangan to: tan saray gangan to aliwa ran ambelat.” Inter nen Jesus so parehon punto diad Juan 14:15: “No inaro yo ak, sumpal yo so saray gangan ko.” On, say aro—a manunan bunga na espiritu—so ontulong ed sikatayon mangapresya ed amin a gagawaen nen Jehova parad sikatayo tan ontulong sirin ed sikatayo a mangagamil na maridios a panagpauley.—Galacia 5:22.
16. Diad anton paraan a makatulong so maridios a takot diad pangipanengneng na maridios a panagpauley?
16 Komadua, wala so maridios a takot. Say takot ed pamaermen ed si Jehova a Dios so ontulong ed sikatayo lapud “kabaliksan to so pangula ed mauges.” (Uliran 8:13) Agnasuppiat, say takot ed pamaermen ed si Jehova so mangiyarawi ed sikatayo ed pikukumpromiso nisesengeg ed takot ed too. Ontulong met ed sikatayo a tuloken iray instruksion na Dios anggan antoran kairapan so kaukolan a talonaan. Niarum ni, satan so mangiyarawi ed sikatayo diad isuko ed saray tukso odino ikiling ed panggaway mauges. Ipapanengneng na saray Kasulatan a say takot ed si Jehova so nanggawa ed si Abraham a manalin mangisaklang ed inadaron ilalak ton Isaac bilang sakey a bagat, tan say takot ed pamaermen ed si Jehova so matalonan nanggawa ed si Jose a barangkaan so imoral iran getma na asawa nen Potifar.—Genesis 22:12; 39:9.
17. Anto so betang na pananisia ed pangagamil tayo na maridios a panagpauley?
17 Say komatlon tulong et say pananisia ed si Jehova a Dios. Say pananisia so manggawa ed sikatayon ontumbok ed konsehon niiter diad Uliran 3:5, 6: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” Nagkalautlan ontulong ed sikatayo so pananisia sano ompatnag a maniirap tayo odino manliknan wala so panangibiig lapud rasa odino nasyonalidad tayo odino lapud pigaran agpakapanpaknaan ed personalidad. Nayarin liknaen met na arum a sikaray ag-inimano sano ag-ira nirekomendan matatken odino ministeryal ya aripen. No walaan itayo na pananisia, alagden tayo si Jehova a mametek ed saray pamaakaran diad dugan panaon to. Kaleganan to nayarin kaukolan a bayuboan tayoy inkaanos.—Tagleey 3:26.
18. Anto so komapat a tulong ed pangipanengneng tayo na maridios a panagpauley?
18 Say komapat a tulong et say inkamapaabeba. Anggapoy kairapan na mapaabeban too ed pangipatnag na maridios a panagpauley lapud ‘dia ed kaabebaan na kalakal balang sinansakey ibilang to so arum a magmaong nen say sikato’n dili.’ Say mapaabeban too so mabulos ya ipasen to so inkasikato a “kamelagan.” (Filipos 2:2-4; Lucas 9:48) Balet say makinon a too so agmalabay a pauleyan tan onsyodot ed satan. Nibaga a say ontan a too et mas kaliktan ton deralen na dayew nen say patulongan pian niarawi ed karisgoan diad panamegley na balaw.
19. Anton maabig ya ehemplo na inkamapaabeba so intarok na datin presidente na Watch Tower Society?
19 Sakey a maabig ya ehemplo na inkamapaabeba tan maridios a panagpauley so intarok ya aminsan nen Joseph Rutherford, say komaduan presidente na Watch Tower Bible and Tract Society. Sanen sinebelan nen Hitler so kimey na Tastasi nen Jehova ed Alemanya, saray agagi diman so nansulat ed sikato ya onkekerew no anto so nepeg a gawaen da nisesengeg ed panagsebel ed saray pantitipon tan panagpulong a kimey da. Sinaglawi to iya ed pamilya na Bethel tan prangkan binidbir to ya agto amta no antoy ibaga to ed saray agagin Aleman, nagkalautla nisesengeg ed alablabas iran dusa a nalalanor. Inkuanto a no wala so siopaman a makaamta no anto so ibaga ed saray agagin Aleman, satan so maliket ton dengelen. Agaylan mapaabeban espiritu!b
Saray Gungguna ed Panangipatnag na Maridios a Panagpauley
20. Antoran bendisyon so pansumpalan diad pangipatnag tayo na maridios a panagpauley?
20 Nayarin itepet, Antoray gungguna na panangipatnag na maridios a panagpauley? Peteg a dakel. Napaliisan tayoray kapagaan tan pakadismaya a naeeksperiensia na saramay onkikiwas ya independente. Pangagayagaan tayo so maong a siglaotan ed si Jehova a Dios. Walaan itayo na sankaabigan a pililimog ed saray Kristianon agagi tayo. Niarum ni, diad panligliwa tayo ed inkasikatayo, naarawian tayo so nambabangil a gonigon ed sekular iran pakauley. Pangayagaan tayo met so maliket a bilay na pamilya bilang asawan lalaki tan asawan bibii, bilang atateng tan ananak. Nagkalalo ni, diad pamasiansia na maridios a panagpauley, onkikiwas tayon mitunosan ed konsehon niiter diad Uliran 27:11: “Ana’ko, onkabat ka, tan paliketen mo so pusok, pian naebatan ko so mamalaw ed siak.”
[Saray paimano ed leksab]
a Sakey a ministron payunir so nandinayew ed panagrespeto tan maaron pananuporta na asawa ton bii ed sakey a walad kasulowan a payunir. Ninonot na walad kasulowan a payunir a tinongtong met komon na kaaro to so nipaakar ed arum a kalidad na asawa ton bii. Balet pigaran taon ed saginonor, sanen say walad kasulowan a payunir so angasawa met, amoria to no panon kaimportante so maaron pananuporta na asawan bii diad liket na panamaley.
b Kayari na dakel a pikakasi tan panagaral na Salita na Dios, malinew ya anengneng nen Joseph Rutherford so ebat a kaukolan ton iter ed saray agagi ed Alemanya. Agto responsabilidad ya ibaga ed sikara no anto so nepeg odino agnepeg a gawaen da. Walaan ira na Salita na Dios a malinew a mangibaga ed sikara no anto so nepeg a gawaen da no nipaakar ed pantitipon tan pantasi. Kanian saray agagin Aleman so masekreto balet nantultuloy a tinmulok ed saray ganggan nen Jehova a mantitipon tan mantasi nipaakar ed ngaran tan Panarian to.
Repason Tepetepet
◻ Antoran totoo so inusar na Dios bilang paralanan ed pitatalosan, tan anto so otang na saray ariripen to?
◻ Diad antoran nanduruman siglaotan a niyaplika so maridios a panagpauley?
◻ Antoran kalidad so ontulong ed sikatayon mangipanengneng na maridios a panagpauley?
◻ Say maridios a panagpauley so mansumpal ed antoran bendisyon?
[Litrato ed pahina 16]
Inusar na Dios so organisasyon na templo na Jerusalem pian ipatalos so linawa to ed saray totoo to
[Saray litrato ed pahina 18]
Saray pasen a nipanengneng tayo so maridios a panagpauley