Tepetepet Manlapud Managbasa

◼ Kasin sinisia na saray inmunan-siglon Kristianos a say anggaan na sayan marelmeng a sistema so onsabi ed kaleganay bilay da?

Saray patumbok nen Jesus nen inmunan siglo so magunaet ed anggaan ya onsabi. A singa anengneng tayo, arum ed sikara so angikuan a say anggaan so mabitar, onsabi lan tampol. Say panmoria so nakaukolan a korihien. Balet peteg ya aliwan mauges ed saray Kristianos, nensaman odino natan, so panisian masimoon a say nipasakbay ya anggaan so nepeg ya ipasen ya asingger la tan manbilay ya inagew-agew ed satan ya inkaliing.

Diad impangebat ed tepet na saray babangatan to nipaakar “ed tanda” na kiwawala to, sikara so pinasakbayan nen Jesus: “Mantultuloy a manbantay, sirin, lapud agyo kabat no anton agew so isabi na Katawan.” (Mateo 24:3, 42) Say ontan ya inkaalisto so nepeg a mangapekta ed saray kiwas da, lapud inyarum nen Jesus: “Imanoen yo so inkasikayo a say kapusoan yo sa agbalot nabelatan ed alablabas a panangan tan alablabas a kakainum tan saray kapagaan ed bilay, tan biglan satan ya agew so onsabi ed sikayo a tamtampol . . . Mansiansian aliing, sirin, naynay a manpikasi pian sikayo komon so ontalona diad pakaliktar ed amin na sarayan bengatla a niganan nagawa, tan makaalagey ed arap na Anak na too.”​—Lucas 21:34-36.

Imanoen a sayan simbawa so inter nen Jesus kayarin tuloy na impangidalatdat to ed saray nagawgawa a manibukel “na tanda.” Sirin saray apostoles so apasakbayan ed katuaan a walaray bengatlan nagawan maawaran sakbay na anggaan. Anggaman kuan, pigaran simba ed saginonor, tinepet da ed apaolin Jesus: “Katawan, kasin ipawil mo so panarian na Israel ed sayan panaon?” Sikato so inmebat: “Agyo kayarian so pangala na pikakabat ed saray panaon odino panpanaon ya impasen na Ama ed dilin nasasakupan to.”​—Gawa 1:6, 7.

Nanengneng tayo ed saya a saray sankaapitan a patumbok nen Jesus so mapaga ed anggaan ya onsabin tampol ya imbaliwala ra so aganggano nin imbaga to ed sikara nipaakar ed saray pisikal ya ebidensyan nagawa legan na kiwawala to sakbay na satan ya anggaan.

Naromog tayo so sananey a pamatnagan na inkamagunaet da diad saray sulat nen apostol Pablo ed saray Kristianon taga Tesalonica. Ngalngalin 50 K.P. et insulat to: “No nipaakar ed saray panaon tan saray panpanaon, agagi, agla nakaukolan ya isulat ed sikayo. Lapud sikayon mismo so mikabat a maong a say agew nen Jehova so onsabin singa sakey a matakew ed labi. Kanian, sirin, ag-itayo naugip a singa gagawaen na arum, noagta sikatayo so mansiansian aliing tan manlikas.” (1 Tesalonica 5:1, 2, 6) Arum ed saraman ya alanaan-na-espiritun Kristianos so angikabaliksan ed saman a say kiwawala nen Jesus (a tekep na agew nen Jehova a paneral ed marelmeng) so onsabi la ed saman, tampol.

Balet aliwan onman. Diad tua, insulat nen Pablo ed sikara diad komaduan sulat: “No nipaakar ed kiwawala na Katawan tayon Jesu-Kristo tan say kitipon tayo ed sikato, kerewen mi ed sikayo ya agtamtampol a natenyeg a manlapud panagkatunongan yo nisay nasagyat ed balanglan diad panamegley na sakey ya apuyanan a balikas odino diad panamegley na insangin balita odino diad panamegley na sakey a sulat a singa nanlapud sikami, diad kipaakaran a say agew nen Jehova so wadia la. Anggapo komon so mangayat ed sikayo ed anggan anton nengneng, lapud satan so ag-onsabi no agni onsabin ununa so apostasya tan say too na kaugsan so nipatnag.”​—2 Tesalonica 2:1-3.

Agkabaliksan na saya a sikara so pasapasa nipaakar ed kiwawala nen Jesus tan say anggaan na sayan sistema. Diad kada ilabas na taon, say pasakbay nen Jesus so lalon makatenyeg: “Mantultuloy a manbantay, sirin, lapud agyo kabat no anton agew so isabi na Katawan.”

Sirin, ngalngalin limaran taon kayari na impansulat to ed Komaduan Tesalonica, insulat nen Pablo: “Sikato la so oras na iliing yo a manlapud ugip, lapud say kilalaban tayo natan so asisingger nen say nen panaon sanen sikatayo so nagmaliw a mananisia. Say labi so aralem la; say agew asingger la. Lakseben tayo sirin iray gawa a kayarian na kabilungetan tan isulong tayo so ayura na liwawa.” (Roma 13:11, 12) Kayari na limara nin taon, sinimbawa nen Pablo iray Hebreon Kristianos: “Nakaukolan yo so panagsungdo, ta pian, kayari na impanggawa yo ed linawa na Dios, awaten yo so kasumpalan na sipan. Lapud ‘wala ni daiset,’ tan ‘saman so onsabi so onsabi tan agmanabala.’” (Hebreos 10:36, 37) Sirin, diad sampot a bersikulo na Apocalipsis, insulat nen apostol Juan: “Siopaman a mantasi ed sarayan bengatla kuanto, ‘On; Siak so onsabin tampol.’ Amen! Gala, Katawan a Jesus.”​—Apocalipsis 22:20.

Agnasuppiat, say sakey a Kristiano ed saman so aliwan agmakatunongan a manliknan say anggaan so onsabi ed panaon to. Tan no diad panamegley na aksidente odino natural a kurang, sikato so ompatey sakbay na anggaan, sikato so akapambilay ed makanan liknaan na inkamaganat ya insagyat nen Jesus tan saray apuyanan a Kasulatan.

Amin na saya so nagkalalon onaplika ed sikatayo, diad sayan unor ya oras a pambibilayan tayo. Diad panegek ed saray salita nen Pablo, agtayo niburi a ‘natan et say kilalaban tayo so asisingger nen say diad panaon sanen saray inmunan Kristianos so nagmaliw a mananisia tan anggan sanen sikatayo so nagmaliw a mananisia. Say labi so aralem la; say agew so peteg ya asingger la.’

Ayarian tayon anengneng ed awaran a ginmapo nen Guerra Mundial I so pisikal ya ebidensyan ompapalandey, ebidensyan mamaneknek a sikatayo so wala ed konklusyon na sistema na bengabengatla. Imbes a sikatayo so okupado diad pamparles no kapigan so kagawa na anggaan, sikatayo komon so okupado ed panangipulong ed maong a balita, a nayarin mangiliktar ed bilay tayo tan say bilay na dakel nin arum.​—1 Timoteo 4:16.

Walaan itayo na dakel a rason ed panilalo a sayan panagpulong so nasumpal ed panaon tayo. Kasin kabaliksan na satan so diad sakbay na iloob na sakey a balon bulan, sakey a balon taon, sakey a balon dekada, sakey a balon siglo? Anggapo so mikabat a too, lapud inkuan nen Jesus ya ‘anggan saray angheles ed tawen’ so agmikabat ed satan. (Mateo 24:36) Nagkalalo ni, agtayo nakaukolan ya amtaen, legan ya itultuloy tayon gawaen so igaganggan na Katawan ed sikatayo a pangiyapasakeyan tayon gawaen. Say sankaimportantian et say linawa na Dios tan say kagawa na kimey tan say pakawalaan tayo na sankagnapan a pibibiang ed satan. Sirin “komon ta sikatayo so ontalona diad pakaliktar ed amin na sarayan bengatlan niganan nagawa, tan akaalagey ed arap na Anak na too.”​—Lucas 21:36.