Say Baleg ya Espiritual a Templo nen Jehova

“Wala so sakey a sankatagyan a saserdote mi, . . . mankatangbayan ed altar, tan say matua a tabernakulo, ya inyan na Katawan, aliwan say too.”​—HEBREOS 8:1, 2.

1. Anton maaron probisyon so ginawa na Dios parad makasalanan a katooan?

SI JEHOVA A DIOS, lapud baleg a panangaro to ed katooan, so angitarya na bagat a mangekal ed saray kasalanan na mundo. (Juan 1:29; 3:16) Kinaukolan to so pangiyalis ed bilay na panguloan ya Anak to manlapud tawen ed panag-anakan na Judion birhen a manngaran na Maria. Malinlinew ya impaliwawa na anghel nen Jehova ed Maria a say ugaw ya inginew to et “ningaran naani santo, say Anak na Dios.” (Lucas 1:34, 35) Nibaga ed si Jose, ya akisipanan ed si Maria, so mamilagron nengneng na kinginew nen Jesus tan naamtaan ton sayan sakey et “ilaban to naani so baley to ed saray kasalanan da.”​—Mateo 1:20, 21.

2. Anto so ginawa nen Jesus sanen sikatoy mantaon na 30, tan akin?

² Legan na ibabaleg nen Jesus, maseguron atalosan to so pigara ed sarayan katuaan nipaakar ed mamilagron kianak to. Kabat ton say mangatatawen ya Ama to so walaan na manangisalbay-bilay a kimey parad sikato a gawaen to ed dalin. Kanian, bilang binmaleg lan too a mantaon na 30, inasinggeran nen Jesus so propeta na Dios a Juan, pian manpabautismo ed Ilog Jordan.​—Marcos 1:9; Lucas 3:23.

3. (a) Anto so labay ya ibaga nen Jesus ed saray salitan, “Bagat tan patanir [apay, NW] ag mo ginabay”? (b) Anton matalonggaring ya uliran so impanengneng nen Jesus ed amin a malabay a magmaliw a babangatan to?

³ Si Jesus so manpipikasi ed panaon na bautismo to. (Lucas 3:21) Unong ed ebidensya, manlapud sayan panaon a manpatuloy ed bilay to, sinumpal toray salita na Salmo 40:6-8, a singa impanengneng nen apostol Pablo ed saginonor: “Bagat tan patanir [apay, NW] agmo ginabay, ingen sakey a laman so inparaan mo ed siak.” (Hebreos 10:5) Diad ontan et impanengneng nen Jesus ya amta ton ‘agginabay’ na Dios iray bagat ya ayep a mantultuloy a niyapay ed templo na Jerusalem. Imbes, amoria ton say Dios et intarya toy ayadyarin atooan a laman parad sikato, si Jesus, pian iyapay bilang sakey a bagat. Saya so mangekal ed antokaman nin pankaukolan na saray bagat ya ayep. Diad pangipanengneng na impapuson pilalek ton manpasakop ed linawa na Dios, intuloy ya impikasi nen Jesus: “Nia, siak onsabi ak (dia ed lukot na libro walan nisulat so nipaakar ed siak), pian gawaen ko [so linawam], O Dios.” (Hebreos 10:7) Agaylan pandinayewan ya alimbawa na inkakpel tan agsinisiblet a debosyon so inletneg nen Jesus nanlapulad satan ya agew parad amin a magmaliw a babangatan to ed saginonor!​—Marcos 8:34.

4. Panon ya impanengneng na Dios so panangabobon to ed impangiyapay nen Jesus ed inkasikaton dili?

⁴ Kasin impanengneng na Dios so panangabobon to ed pikakasi nen Jesus ed bautismo? Abuloyan pan onebat so sakey ed apilin apostoles nen Jesus: “Et si Jesus, sanen abinyagan la, tinmatdang a tampol a nanlapu ed danum; et nia! alukasan so saray tawen ed sikato, et anengneng to so espiritu na Dios ya onleleksab a singa sakey a malapati, tan oonla ed sikato. Tan nia! Sakey a boses a nanlapu ed katawenan a kuanto: ‘Saya so Ana’ko ya inararok, napaliketak a maong ed sikato.’”​—Mateo 3:16, 17; Lucas 3:21, 22.

5. Anto so inlitrato na say literal a templon altar?

⁵ Say impangabobon na Dios ed inkipresenta na laman nen Jesus bilang bagat et kabaliksan ton diad espiritual a pantalos et inmapireng so altar a babaleg nen say samay walad templo ed Jerusalem. Say literal ya altar a panbabagatan na ayep so angiyanino ed satan ya espiritual ya altar, a diad pansumpalan et “linawa” odino areglo na Dios ed pangawat ed atooan a bilay nen Jesus bilang sakey a bagat. (Hebreos 10:10) Satan so rason no akin a nisulat nen apostol Pablo ed kaparan Kristianos: “Sikami wala so sakey ya altar mi, tan dia ed saray wala ed sikato anggapoy katunongan da a mangan so saray manlingkor ed tabernakulo.” (Hebreos 13:10) Diad arum a salita, nagugunggunaan iray tuan Kristiano manlapud superyor a mananakbong-kasalanan a bagat, ya impulisay na maslak ed Judion saserdotes.

6. (a) Anto so nigapo ed panaon na inkabautismo nen Jesus? (b) Anto so labay ya ibaga na titulon Mesias, odino Kristo?

⁶ Say inkalanaan nen Jesus na masanton espiritu et kabaliksan ton intarok la natan na Dios so interon areglo na espiritual a templo to, tekep na panlilingkor nen Jesus bilang Atagey a Saserdote. (Gawa 10:38; Hebreos 5:5) Si babangatan a Lucas so apuyanan a mangipaamta ed taon na sayan makatantandan ebento bilang “taon a komalabinlima ya inkaari nen Tiberio Cesar.” (Lucas 3:1-3) Mipetekan itan ed taon 29 K.P.​—eksakton 69 simsimba na taotaon, odino 483 taon, nanlapud impangiter nen Arin Artaxerxes na ganggan ed kipaalagey-lamet na saray bakor na Jerusalem. (Nehemias 2:1, 5-8) Unong ed propesiya, say “Mesias a Pangulo” so onapireng ed satan a nipasakbay a taon. (Daniel 9:25) Dakel a Judio so mapatnag a makaamta ed saya. Irereport nen Lucas a “saray totoo so maniilalo” ed iyapireng na say Mesias, odino Kristo, titulon manlalapud Hebreo tan Griegon salita a parehoy kabaliksan da, “alanaan a sakey.”​—Lucas 3:15, NW.

7. (a) Kapigan a nilanaan na Dios so “Masanto ed Sasantos,” tan antoy labay ya ibaga na saya? (b) Anto ni agawa ed si Jesus diad panaon na inkabautismo to?

⁷ Diad samay inkabautismo nen Jesus, say mangatatawen ya ayaman na Dios so alanaan, odino nibiig, bilang “Masanto ed Sasantos” diad baleg ya areglo na espiritual a templo. (Daniel 9:24) “Say matua a tabernakulo [odino, templo], ya inyan na Katawan, aliwan say too” so nigapo. (Hebreos 8:2) Ontan met, diad panamegley na bautismo to ed danum tan masanton espiritu, say toon Jesu-Kristo so nianak lamet bilang espiritual ya Anak na Dios. (Ikompara so Juan 3:3.) Labay ton ibaga et say Dios diad dugan panaon et ipawil toy Anak to diad mangatatawen a bilay, a ditan manlingkor ed nikawanan a lima na Ama to bilang Ari tan Atagey a Saserdote “unong ed inkasaserdote nen Melquisedec.”​—Hebreos 6:20; Salmo 110:1, 4.

Say Mangatatawen a Sankasantoan

8. Antoran balon manunan nengneng so nagagawa la natan ed trono na Dios ed tawen?

⁸ Diad agew na bautismo nen Jesus, say mangatatawen a trono na Dios so nigapo ed saray balon aspeto. Say impangigana ed ayadyarin atooan a bagat a manakbong ed saray kasalanan na mundo so angidanet ed inkasanto na Dios a miduma ed inkamakasalanan na too. Say panangasi na Dios so nipabitar met natan lapud ta impanengneng toy inkamabulos ton mipulangan, odino mikareenan. Kanian say trono na Dios ed tawen so nagmaliw a singa sankadaleman a dibisyon na say templo, a maminsan ed sakey taon ya onloob ditan so atagey a saserdote tekep na dalan manakbong ed kasalanan diad ilustratibon paraan.

9. (a) Anto so ililitrato na kurtina ed baetan na say Masanto tan say Sankasantoan? (b) Panon a si Jesus et makaloob ed labas na say kurtina ed espiritual a templo na Dios?

⁹ Say kurtinan angibiig ed say Masanto ed say Sankasantoan so angilitrato ed silalaman a laman nen Jesus. (Hebreos 10:19, 20) Satan so samben ya angiyarawi’d si Jesus ed iloob to ed presensia na Ama to legan a wadia ni ed dalin bilang too. (1 Corinto 15:50) Diad panaon na impatey nen Jesus, “say sakbong na templo apilat a nankadua manlapud tagey angga ed leksab.” (Mateo 27:51) Dramatikon impanengneng na saya a say samben a mangaamper ed iloob nen Jesus ed tawen so nakal la. Taloy agew ed saginonor, nanggawa si Jehova a Dios na matalonggaring a milagro. Pinaoli to si Jesus manlapud inaatey, aliwan bilang mortal a too ed laman tan dala, noagta sakey a maglorian espiritun pinalsa a “mansiansia ed andi anggaan.” (Hebreos 7:24) Apataplon agew ed saginonor, tinmokotok si Jesus ed tawen tan linmoob ed peteg a “Masanto ed Sasantos” “pian onpatnag natan ed arap na Dios lapu ed arap tayo.”​—Hebreos 9:24.

10. (a) Anto so agawa kayarin imparungtal nen Jesus so bili na bagat to ed mangatatawen ya Ama to? (b) Anto so kabaliksan na inkalanaan na masanton espiritu ed saray babangatan nen Kristo?

¹⁰ Kasin inawat na Dios so bili na nipaagos a dala nen Jesus bilang panakbong ed saray kasalanan na mundo? On, ontan so ginawa to. Say prueba ed saya so sinmabi ya eksakton 50 agew kayari inkioli nen Jesus, diad agew a piesta na Pentecostes. Say masanton espiritu na Dios so niyibung ed 120 babangatan nen Jesus a saniiban nandaragup ed Jerusalem. (Gawa 2:1, 4, 33) Singa ed Atagey a Saserdote ra, si Jesu-Kristo, sikara la natan so alanaan a manlingkor bilang “masantos ya inkasacerdote a mangisaklang na saray maespiritun bagat” ed silong na baleg ya espiritual a templo na areglo na Dios. (1 Pedro 2:5) Niarum ni, sarayan alanaan so manugyop ed sakey a balon nasyon, say “masantos a nasyon” na Dios na espiritual ya Israel. Nanlapulad satan, amin a propesiya na maong a bengabengatla nipaakar ed Israel, singa say nisipan a “balo a sipan” a nirekord ed Jeremias 31:31, so onaplika ed alanaan a Kristianon kongregasyon, say peteg ya “Israel na Dios.”​—1 Pedro 2:9; Galacia 6:16.

Arum Niran Nengneng na Espiritual a Templo na Dios

11, 12. (a) Anto so inlitrato na makasaserdoten saban diad kaso nen Jesus, tan anto itan diad kaso na alanaan a papatumbok to? (b) Anto so ililitrato na palanggana na danum, tan panon so kiuusar na satan?

¹¹ Anggaman say Sankasantoan so angilitrato ed “tawen a dili,” a ditan et nitrono so Dios, amin niran nengneng na espiritual a templo na Dios so mitukoyan ed bengabengatla’d dalin. (Hebreos 9:24) Diad templo ed Jerusalem, wadtan so akindalem a masaserdoten saban a walaay altar a panagbagatan, tan sakey a baleg a palanggana na danum, ya uusaren na saray saserdote pian linisan so inkasikara sakbay na panggawa ra na sagradon serbisyo. Anto so ililitrato na sarayan bengatla ed areglo na espiritual a templo na Dios?

¹² Diad kaso nen Jesu-Kristo, say akindalem a makasaserdoten saban so angilitrato ed andi-kasalanan a kipapasen to bilang ayadyarin toon Anak na Dios. Napagamoran iray alanaan a patumbok nen Kristo na inkatunong diad panamegley na pangagamil da na pananisia ed bagat nen Jesus. Kanian, makatunongan labat ira a pidenengan na Dios a singano sikaray andi-kasalanan. (Roma 5:1; 8:1, 33) Kanian, sayan saban so mangililitrato met ed impagamor a matunong a kipapasen na too a panggagayaan na indibidual iran membro na say masanton inkasaserdote ed arap na Dios. Ontan met, saray alanaan a Kristiano so agni ayadyari tan nisilong ni ed pankasalanan. Say palanggana na danum so mangililitrato ed Salita na Dios, ya uusaren na Atagey a Saserdote a linisan so masanton inkasaserdoten siaaligwas. Diad panpasakop ed sayan proseso na panaglinis, nagagamoran da so walaay dignidad ya indengan a mamapagalang ed Dios tan manguguyor ed saray taga paway ed puron panagdayew to.​—Efeso 5:25, 26; ikompara so Malaquias 3:1-3.

Say Masanto

13, 14. (a) Anto so ililitrato na say Masanto ed templo diad kaso nen Jesus tan ed alanaan a papatumbok to? (b) Anto so ililitrato na saray binmalitok a patoonan na lamparaan?

¹³ Say inmunan dibisyon na say templo so mangilitrato’d kipapasen a superyor nen say samay saban. Diad kaso na ayadyarin toon Jesu-Kristo, satan so mangililitrato ed kianak to lamet bilang espiritual ya Anak na Dios a niganan ompawil ed mangatatawen a bilay. Kayari inkiyabawag da a matunong diad basiyan na pananisia ra ed nipaagus a dala nen Kristo, sarayan alanaan a patumbok so makaeksperiensia met ed sayan nikaduman kikurang na espiritu na Dios. (Roma 8:14-17) Diad panamegley na “danum [salanti, say bautismo] tan ed espiritu” sikaray “nianak lamet” bilang espiritual ya ananak na Dios. Bilang ontan, walaan ira na ilalon napaoli ed mangatatawen a bilay bilang espiritun ananak na Dios, daput no sikaray mansiansian matoor anggad patey.​—Juan 3:5, 7; Apocalipsis 2:10.

¹⁴ Saray saserdoten nanlingkor ed loob na say Masanto ed mangaraldalin a templo so agnanengneng na saray managdayew a walad paway na templo. Ontan met, naeksperiensia na alanaan a Kristianos so espiritual a kipapasen ya ag-apinabangan odino sigpot ya ag-atalosan na maslak ed saramay managdayew na Dios, a say ilalo ra et panbilay a maando ed paraison dalin. Saray binmalitok a patoonan na lamparaan na say tabernakulo so mangililitrato’d aliwawaan a kipapasen na alanaan a Kristianos. Say kipakurang na masanton espiritu na Dios, singa ed larak ed saray lamparaan so mangisindag ed liwawa na Biblia. Bilang resulta na pakakagamor na pakatalos na Kristianos et agda isisiblet itan. Imbes tutuloken da si Jesus, ya angikuan: “Sikayo so silew na mundo. . . . Pasindagen yo komon so silew yo ed arap na saray totoo, pian nanengneng da so saray maong a gawa yo, et galgalangen da so Ama yo a wala ed tawen.”​—Mateo 5:14, 16.

15. Anto so ililitrato na tinapay ed say lamisaan na impatnag-a-tinapay?

¹⁵ Pian mansiansia ed sayan aliwawaan a kipapasen, nepeg a saray alanaan a Kristiano so regular a natagano ed no anto so ililitrato na say tinapay ed lamisaan na impatnag-a-tinapay. Say manunan lapuan na espiritual a tagano ra et say Salita na Dios, a panbabanikelan dan basaen tan dalepdepen ya inagew-agew. Insipan met nen Jesus a taryaan tora na “tagano ed panaon a kinepegto” diad panamegley na “matoor tan makabat ya aripen” to. (Mateo 24:45) Sayan “aripen” so interon ulop na alanaan a Kristianos ed dalin ed antokaman a partikular a panaon. Uusaren nen Kristo iyan alanaan ya ulop pian ipalapag so impormasyon ed kasumpalan na saray propesiya na Biblia tan pian mangiter na nipanpanaon a direksyon ed kiyaplika na saray prinsipyo na Biblia ed modernon inagew-agew a bilay. Kanian, siaapresyan natatagano so alanaan a Kristianos ed saratan ya amin ya espiritual a probisyon. Balet say kasustento na espiritual a bilay da so mandedependi ed mas nen say pangipaslep ed kanonotan tan kapusoan da na pikakabat ed Dios. Inkuan nen Jesus: “Say kanen ko sikato so panggawak na linawa na saman so angibaki ed siak, tan manumpal na kimey to.” (Juan 4:34) Ontan met, napepenek so alanaan a Kristianos diad inagew-agew a panggagawa ra ed niparungtal a linawa na Dios.

16. Anto so ililitrato na say serbisyo diad altar na insenso?

¹⁶ Diad kabuasan tan diad labi, inyapay na saserdote so insenso ed Dios ed altar na insenso ed say Masanto. Kabansag na satan et saray aliwan-makasaserdoten managdayew so manpikasi ed Dios legan ya akaalagey ed paway na saray saban na templo to. (Lucas 1:8-10) “Say incienso,” ipapaliwawa na Biblia, “sikara so pikakasi na saray sasantos.” (Apocalipsis 5:8) “Pasabien mo so pikakasik ed arap mo a singa insenso,” insulat na salmistan David. (Salmo 141:2) Saray alanaan met a Kristiano so mamapabli ed pribilihyo ran onasingger ed si Jehova diad pikakasi ed panamegley nen Jesu-Kristo. Saray masimoon a pikakasin manlalapud puso so singa ambalingit-samyong ya insenso. Idadayew met na saray alanaan a Kristiano so Dios ed arum niran dalan, diad panguusar na bibil da pian ibangat so arum. Say panagsungdo ra ed ir-irap tan integridad da ed silong na subok so nagkalalo lan makapaliket ed Dios.​—1 Pedro 2:20, 21.

17. Anto so apilaktip ed kasumpalan na mapropetikon litraton intarok na inmunan iloloob na atagey a saserdote ed say Sankasantoan ed Agew na Pananakbong?

¹⁷ Diad Agew na Pananakbong, say atagey a saserdote na Israel so kaukolan ya onloob ed say Sankasantoan tan mamool na insenso ed binmalitok a kargaan na maapuy iran ngalab. Saya so kaukolan a gawaen sakbay ya itarok toy dala na iyaapay ed kasalanan. Diad kasumpalan na sayan mapropetikon litrato, pinansiansia na toon Jesus so absoluton integridad to ed si Jehova a Dios sakbay ya inyapay toy bilay to bilang say magnayon a bagat parad kasalanan tayo. Sirin nidemostra ton say ayadyarin too et napansiansia toy integridad to ed Dios antokaman so desdes ya itarok nen Satanas ed sikato. (Uliran 27:11) Sanen niiyan ed subok, inusar nen Jesus so pikakasi tekep na “mabiskeg iran akis tan saray lua, tan sikatoy apaboran a dinengel ed say maridios a takot to.” (Hebreos 5:7) Diad onian dalan et nigloria to si Jehova bilang say matunong tan makanepegan a Soberano na uniberso. Tinumangan na Dios si Jesus diad impamaoli ed sikato manlapud inaatey ed imortal a mangatatawen a bilay. Diad sayan nipaatagey a posisyon, ya ipapaimano nen Jesus so onkomaduan rason ed isasabi to’d dalin, salanti, say pipawilan na saray managkasalanan a totoo ed Dios.​—Hebreos 4:14-16.

Say Babaleg a Gloria ed Espiritual a Templo na Dios

18. Panon ya angitarok si Jehova na matalonggaring a gloria ed espiritual a templo to?

¹⁸ “Say kaunoran a gayaga na saya ya abung babaleg naani nen say inmuna,” impasakbay nen Jehova. (Aggeo 2:9) Diad impamaoli ed si Jesus bilang imortal ya Ari tan Atagey a Saserdote, matalonggaring ya ingloria nen Jehova so espiritual a templo to. Si Jesus so wala natan ed posisyon a mangitarok na “andi anggaan a kilalaban ed saray amin ya ontulok ed sikato.” (Hebreos 5:9) Say inmunan angipanengneng na ontan a katutulok et say 120 babangatan ya angawat na masanton espiritu nen Pentecostes 33 K.P. Impasakbay na libron Apocalipsis a sarayan espiritual ya ananak nen Israel so manbilang ed kaunoran a 144,000. (Apocalipsis 7:4) Kapatey da, dakel ed sikara so naugip diad kaslakan a lubok na katooan, a manatalaran ed panaon na kiwawala nen Jesus ed maarin pakayari. Say mapropetikon kronolohiyan lugan na Daniel 4:10-17, 20-27 so mangituturo ed 1914 bilang say panaon ya igapo nen Jesus a manguley ed leet na kakabusol to. (Salmo 110:2) Diad loob na saray dekada sakbay na 1914, pirmin tinalaranan na alanaan a Kristianos itan a taon. Say inmunan guerra mundial tan pati ed saray paniirap na katooan so mamrueban si Jesus so peteg a nitrono lan Ari nen 1914. (Mateo 24:3, 7, 8) Kayarin tuloy na satan, diad isabi panaon na ‘panangukom ya onggapo ed say abung na Dios,’ sumpalen nen Jesus so sipan to ed saray alanaan a babangatan to a naugip ed ipapatey: “Onlaak dia lamet, tan awaten ta kayo ed inkasiak.”​—1 Pedro 4:17; Juan 14:3.

19. Panon a say nakdaan na 144,000 so makaloob ed mangatatawen a Sankasantoan?

¹⁹ Agni pinal ya atatakan tan atugyop ed mangatatawen ya ayaman so amin ed 144,000 a membro na masanton inkasaserdote. Wala ni nakdaan ed sikara a manbibilay ed dalin diad espiritual a kipapasen ya inlitrato na say Masanto, a biig manlapud say masanton presensia na Dios diad panamegley na say “kurtina,” odino samben, na silalaman a laman da. Diad ipatey na saraya lapud katooran, sikaray napaolin tamtampol bilang imortal ya espiritun pinalsa pian miulop ed saramay kabiangan na 144,000 a wala la’d tawen.​—1 Corinto 15:51-53.

20. Anton importantin kimey so gagawaen na saray nakekeraan ni ed say masanton inkasaserdote ed sayan panaon, tan ed antoran resulta?

²⁰ Tekep na ontanlan dakel a saserdoten manlilingkor a kaiba na say baleg ya Atagey a Saserdote ed tawen, say espiritual a templo na Dios so nagkalalon nigloria. Kaleganan to, saray nakekeraan ed say masanton inkasaserdote so manusumpal ed mablin kimey ed dalin. Diad panamegley na panagpulong da, say Dios et ‘panmayegmegen to so saray amin a nacion,’ tekep na saray balikas na panangukom to, a singa inpasakbay ed Aggeo 2:7. Ontan met, minilyon ed saray managdayew a nadedeskribe bilang “saray mabli a bengatla na saray amin a nasyon” so ondaragsa ed mangaraldalin iran saban na templo nen Jehova. Panon a saraya so mitukoy ed areglo na Dios ed panagdayew, tan anton arapen a gloria so nailaloan tayo parad baleg ya espiritual a templo to? Sarayan tepet so nausisa ed ontumbok ya artikulo.

Repason Tepetepet

◻ Anton matalonggaring ya uliran so impanengneng nen Jesus nen 29 K.P.?

◻ Anton areglo so nipakurang nen 29 K.P.?

◻ Anto so ililitrato na say Masanto tan say Sankasantoan?

◻ Panon a niglogloria so baleg ya espiritual a templo?

[Litrato ed pahina 17]

Sanen alanaan si Jesus na masanton espiritu nen 29 K.P., ginmapon kinmurang so baleg ya espiritual a templo na Dios