Tips ed Pam-personal Study

I-memorize tan Ipapusom Iray “Espiritual a Kansion”

“No nadi-depress ak, naliknak ya papabiskegen ak nen Aman Jehova no dengelen ko ray kansion ed JW Broadcasting^®.”​—Lorraine, U.S.A.

Parte na panagdayew tayo so pangansion na saray “espiritual a kansion.” (Col. 3:16) Napaseseg ka na sarayan kansion no a-memorize mo iratan, anggano anggapoy awit mon songbook o gadyet. Salim sirin irayan tips pian na-memorize mo iray kansion tayo.

• Basam tan talosan mon maong so lyrics. Mas maganom ya natandaan so impormasyon no natatalosan moy labay ton ibaga. Walad jw.org so lyrics na saray kansion tayo, kaiba la ray original song tan kansion parad ugugaw. Pian nanengneng mo itan, onlad Librarya, insan diad Musika.

• Isulat mo so lyrics. No ontay gawaen mo, mas natandaan mo tan ontatak ed isip mo.​—Deu. 17:18.

• Ipraktis mo. Salim ya ulit-uliten ya kansionen o basaen ya maksil so lyrics.

• Subok moy memoryam. Salim ya i-recite o kansionen ya agka onnenengneng ed lyrics, insan mo i-check no duga.