Kasin Nagawaan Tayon Sankaabigan a Bulan ed Kapiganman so Abril 2000?
1 Say labi na Mierkoles, Abril 19, so makatantanda ed serbisyon taon tayo. Diad satan, leleg ya onseselek so agew ed intiron dalin, amin a kongregasyon tan grupo na Tastasi nen Jehova ed sankamundoan so manselebra ed Memoryal na impatey nen Kristo. Antokaman so oras (time zone) ed panaayaman tayo, say pannodnonot ed bagat nen Jesu-Kristo so makabkabaliksan ed taon. Say petsa na Memoryal so pinabitar ed akalaktip a “Teokratikon Kalendaryo Parad Abril 2000,” a naromog ed pahina 6 ed sayan insert.
2 Say intiron bulan na Abril so mangiter ed sikatayo na alay abig a pankanawnawa pian ipatnag so intiron-kamarerwan paraan na panamabli tayo parad agkanepegan a panangasi nen Jehova a nibalikas panamegley na inkibagat na Anak to. Panon ya ontan? Oniay insulat nen apostol Pablo: “Say aro nen Kristo pasooten to kami; ta isipen mi, a no inatey so sakey lapu ed amin, sirin amin da inatey ira nensaman. Tan sikato so inatey lapud amin, pian saray manbilay ag-ira manbilay komon na andukdukey ed sikaran dili, noag dia ed saman so inatey lapu ed sikara tan inmolin binmilay lamet.” (2 Cor. 5:14, 15) On, legan na Abril et nipatnag tayo a sikatayoy manbibilay, ya aliwan unong ed inkasikatayon dili, noagta parad sikato ya inatey parad sikatayo, a gawaen tayo iyan bulan a sankaabigan ed kapiganman bilang miministro na Panarian!
3 Mibiang ed Panag-auxiliary Payunir no Abril: Angiletneg si apostol Pablo na makapasagyat ya alimbawa parad sikatayo sanen inkuanto: “Anggapo so antokaman a pankawanan ko ed bilay ko a singa bengatla a pablien ko, daput nasumpal ko so akar ko, tan say betang ko ya inawat ko ed Katawan a Jesus, pian patuaen ko so ebanghelyo na grasya na dios.” (Gawa 20:24) Walaan itayo na miparan pribilihyo ed sigpot a pantasi nipaakar ed si Jehova a Dios. Lapud satan, labay tayon gawaen a sankaabigan a bulan ed kapiganman so Abril diad pan-auxiliary payunir!
4 Lapud walaay limaran simba, say Abril so alay abig a bulan parad dakel pian manpayunir. Nen Abril 1997, asabi tayo so sankarakelan a pantok na auxiliary payunir, say 22,410 ya akibiang et kabaliksan toy 18 porsiento ed dagup na manangipalapag. Duara tan kapalduan taon so apalabas, say dagup a bilang na manangipalapag a nanreport nen Oktubre 1999 so dinmaak ed ngalngali 6 porsiento. Kabaliksan na saya a walaan itayo na peteg a potensyal a nalagpasan so apalabas a pantok tayo na saray auxiliary payunir. Niarum ni, say kakaukolanen ya oras so abawasan la, a pagmaliwen ton lalon dakel so makapibiang diad kongregasyon ed onian nengneng na serbisyo. Nepeg a sipipikasin konsideraen na balang sakey a bautismadon manangipalapag no kasin sarag toy man-auxiliary payunir ed sayan Abril.
5 Diad pangusar ed “Teokratikon Kalendaryo Parad Abril 2000” diad sayan insert, iplano yoy eskedyul yo ed ontumbok a bulan. Pihoen iray agew a pakapibiang yo ed lawak na kimeyan, tan iyarum so amin ya oras a liknaen yon nayarian yon italaga ed panagpulong legan na bulan. Ilaktip so panaon a nausar yo ed pampulong ed arum, namparan diad pormal tan impormal a paraan. Kasin say dagup so ngalngali la onabot ed kakaukolanen a 50 oras parad auxiliary payunir. No kulang ni so nakaukolan yon oras, kasin makapangiyarunsa kayo ed eskedyul yo ta pian naanamot so panaon ed pan-auxiliary payunir? Kaukolan yo labat so promedyon sakey oras tan 40 minutos ed kada agew pian naabot so 50 ya oras ed sakey bulan.
6 Natan ta abawasan met la so kakaukolanen ya oras parad saray regular payunir, kasin nononoten yo met so iloob ed sigpot-panaon a ministeryo? Akin et alagaren ni so Setyembre a pangigapo? Say Abril so maabig a bulan ya igapo! No alanganin kayo ed pakaabot na 70-oras a kakaukolanen parad regular payunir, akin et agkayo man-auxiliary payunir no Abril tan iletneg yon kalat so 70 oras? No naimano yon nasarag yo la, lalon mabulos kayo lan man-aplay a mibiang a tamtampol ed rangko na saray regular payunir.—Nengnengen so Organized to Accomplish Our Ministry, pahina 113-14.
7 Sigpot a Mibiang Bilang Manangipalapag na Maong a Balita: Parad amin tayo, namparan manangipalapag tan payunir, say puron panangaro tayo ed Dios tan ed kaparan too so mamakiwas ed sikatayon magmaliw ya intiron-kamarerwa ed panggaway anggaay nayarian tayo ed panaglingkor ed si Jehova unong ed personal iran sirkumstansia tayo. (Luc. 10:27) Ipanengneng tayo sirin a ‘mansasagpot tan mantetepel tayo, lapud maniilalo tayo ed Dios a mabilay a sikato so Manangilaban ed saray amin a totoo, lalo ed saray manisia.’ (1 Tim. 4:10) Satan no akin a kaukolan itayon manilalo ed pakanengneng na 100-porsienton pibibiang no Abril, ya amin so sigpot a mibiang ed kimey nipaakar ed Panarian.
8 Agtayo lilingwanan so bilin nen Jesus: “Dakel a tua so aanien, daiset ira balet so manani. Pikasi yo sirin ed Katawan na aanien, pian mangibaki na saray manani ed aanien to.” Kayarin tampol na impangibaga to ed satan, tinawag nen Jesus so 12 apostol to insan to ra imbakin manpulong. (Mat. 9:37, 38; 10:1, 5, 7) Ngalngali sakey taon so linmabas, kayari inkipasal a maong na 12 nipaakar ed panagpulong, “anuro [si Jesus] na arum a pitomplo, tan imbaki to ra,” ya inikdan tora na parehon bilin: “Say anien peteg a daakan, . . . Pikasi yo sirin ed Katawan na anien, ta mangibaki komikimey ed anien to.” (Luc. 10:1, 2) Inreport na libro na Biblia a Saray Gawa no panon ya inebatan nen Jehova iraman a pikakasi. Nen Pentecostes 33 K.P., dinmakel so bilang na saray babangatan ed manga 120. Insan, asabi so nantutumbokan iran bilang a 3,000 tan 5,000 a babangatan. (Gawa 1:15; 2:41; 4:4) Kayari na satan, “say bilang na saray binangatan so dinmakerakel a tuloy.” (Gawa 6:7) Ontan met, diad kaplesan a panaon et nepeg tayon itultuloy so mikasi ed Katawan parad dakel nin manangipulong na Panarian! Mitunosan ed saray pikakasi tayo, balang sakey a manangipalapag ed kongregasyon so nepeg a mangipiho na saray uksoyan pian mibiang ed ministeryo a kada bulan.
9 Ipangasin nengnengen lamet so akalaktip a “Teokratikon Kalendaryo Parad Abril 2000.” Lapud say pilimeron duaran agew ed bulan et Sabado tan Simba, kasin makapanplano kayon mibiang a manpulong ed satan a sampot simba, pian makagapo lan masakbay ed bulan? Kasin makapitulongan kayo ed kada “Panagmagasin” legan na bulan a kaiba so grupo yo ed Panagaral na Libro ed Kongregasyon? Kasin makapangusar kayo na sakey oras odino malaglaem ni ed kada Simba diad ministeryo? Kasin niyuksoy yoy pibiang ed say panagpulong ed labi? Tan agyo lilingwanan ya anamoten so amin a pankanawnawan niwala ed sikayo a manpulong ya impormal ed trabaho, diad eskuelaan, odino diad panggagawa yo ed agew-agew iran kimey yo. Markaan iray agew a makapangusar kayo na oras ed ministeryo, tan usaren so kalendaryo a pangisulatan na saray oras a nausar yo ed impanpulong ed satan a bulan.
10 Say Abril so pankanawnawan panaon parad amin a kualipikado tan naabobonan na mamatatken ya onggapon manlingkor bilang agbautismadon manangipalapag. No walay iyaaralan yo na Biblia, kasin magenap lay inyaligwas to pian ipanon ed manangasikason manangimaton no kasin sikato lay nayarin magmaliw a manangipalapag na maong a balita? No walay agbautismadon ananak yo, kasin intongtong yo la’d mamatatken so aligwas da ed espiritual? Agta saya so maabig a panaon parad sikaran onggapon manpulong?—Nengnengen so Our Ministry, pahina 97-100.
11 Diad gunaet tayon gawaen a sankaabigan a bulan ed kapiganman so Abril 2000, amin tayo so kaukolan a mibiang ed ministeryo insan iter tayoy report tayo ed lawak na kimeyan diad sampot na bulan. (Ikompara Marcos 6:30.) Saray balon agbautismadon manangipalapag a mibiang ed lawak na kimeyan diad pilimeron pankanawnawa so nepeg a napaseseg a mangireport a tampol ed oras da ed lawak na kimeyan. Diad panggawa ed betang tayo, maabig so nagawaan tayo parad report ed Abril tan parad maksil ya eyag na panangidayew a niyapay ed si Jehova panamegley na saray sagpot tayo ed panagpulong.
12 Mangitagar Kayo na Arum ed Memoryal: Agta naliliketan itayo ed pakanengneng na balon pantok na onatendi diad Memoryal na impatey nen Kristo no taon 2000? On! Kabaliksan na satan a dakel a totoo so mantitipon pian ipatnag day panamabli ra ed sankaabigan a balikas na aro ya intarya nen Jehova a Dios tan si Jesu-Kristo parad sikatayo! (Juan 3:16; 15:13) Iyareglo so antokaman a kaukolan ta pian anggapoy makaamper ed sikayo tan say pamilya yo diad iyatendi ed Memoryal.
13 Natan met la so panaon pian igapoy panimbita’d arum ed Memoryal. Ilista so amin a labay yon imbitaan ya onatendi. Ipibali so siopaman ya inyaralan la na Biblia ed apalabas, saramay iyaaralan natan, tan amin na saray papawilen yo. Iyarum ed listaan yo iray kaiba yo ed trabaho, diad eskuelaan, tan saray kakaabay yo, ontan met ed siopaman a nakakalimog yo ed negosyo. Agmet lilingwanan ya ipibali iray kabkabat tan kakanayon yo. Kayarin atugyop so listaan, igapo lay masimoon tan personal a pangimbita ed balang sakey. Ipalinew no kapigan tan iner so kagawaan na Memoryal. Diad panasingger na Abril 19, panonotan iramay walad listaan yo, balanglan personal odino diad pantelepono. Imbitaan iran miulop ed sikayo ya onatendi ed Memoryal.
14 Diad pitunosan ed apalabas a direksion na Sosyedad, nagkalalo lan mansagpot iray ulop na mamatatken pian pasesegen so amin ya inaktibon manangipalapag diad teritorya ya onatendi ed Memoryal. (Mat. 18:12-14) Maong no repasoen na mamatatken so sulat na Sosyedad ya apetsaan na Pebrero 2, 1999. Ilista na sekretaryo na kongregasyon so amin ya inaktibon manangipalapag, tan pabtangan na manangasikaso na serbisyo iray mamatatken pian dalawen tan imbitaan iratan ed Memoryal. Anganko no makaawat ira na tampol a makapaseseg a panagpastol, sarayan inaktibo so natulongan pian magmaliw ya aktibo lamet ed lawak na ministeryo, anggan ed saya lan Abril. Makapabiskeg itan parad sikara a naimbitaan pian miulop ed sakey ya eksperiensiadon manangipalapag ed lawak na kimeyan.
15 Ipaseseg so Maabig a Suporta Parad Abril! Mankaukolan na maabig a pantutulongan ed biang na amin a mamatatken, ministeryal a lingkor, tan ulo na pamilya pian nagawan sankaabigan a bulan tayo ed kapiganman so Abril 2000. Kaukolan a magunaet iray mamatatken diad pangorganisan maong ed amin a bengatla ontan met ed panangidaulo. (Heb. 13:7) Kaukolan a nagawa iray praktikal ya uksoyan ed saray miting parad lawak na serbisyo ed saray ordinaryon agew tan sampot simba. Nayarin niyuksoy so kaaruman a miting parad serbisyo diad mansirunget tan masasakbay a labin pankimey. Say kompleton eskedyul ed amin ya implano parad Abril so nepeg a nipaskil ed information board. Kaukolan a walay napabtangan a mangasikaso ed kada inyeskedyul a miting parad serbisyo. Kaukolan a niparaan so magenap a teritorya parad balang grupo.
16 Legan na Abril et iyopresi iray magasin a Panag-Bantayan tan Awake! Diad gunaet a pakapangigapoy panangiyaral na Biblia, iyopresi so brosyur a Kakaukolanen parad amin a mangipanengneng na interes. Kanian, kaukolan a nitarya so magenap a suplay na saray magasin tan brosyur.
17 Diad sampot na bulan, amin a konduktor tan saray assistant da so mamaseseg ed balang sakey ed grupo ra ya iter a tampol so report da ed serbisyo diad pansampot na bulan. Nayarin nagawaan iya no Simba, Abril 30. Insan, sano nilista la na sekretaryo iray report, no naimano ton walaray manangipalapag ya agni angiter ed report da, mapangasi to ran panonotan ya iter da itan sakbay na Mayo 6, sano nepeg to lan ipawit so report na kongregasyon ed Sosyedad. Nayarin sikatoy patulongan ed saray manangikondukta na panagaral na libro ed pangolekta ed report na balang manangipalapag.
18 Say panaoy Memoryal so sankaimportantian a panaon parad totoo na Dios. Kaukolan a satan so okupadon panaon parad amin tayo diad panaglingkor ed si Jehova. Magmaliw ya ontan no amin tayo so sigpot a mibiang no nayadyari bilang manangipalapag na maong a balita, no nagawaan na saramay makapanpalista bilang auxiliary payunir, tan no makuli tayon itagar so arum ed Memoryal na impatey nen Kristo. Masimoon tayon ipikasi so mayaman a panamendision nen Jehova leleg a panggunaetan tayon gawaen a sankaabigan a bulan ed kapiganman so Abril 2000, ya amin na saratan et kidayewan tan kigloriaan na Dios!—Heb. 13:15.
[Kahon ed pahina 3]
Sankarakelan a Pantok Tayo:
22,410 Auxiliary Payunir
(Abril 1997)
[Kahon ed pahina 4]
Sankarakelan a Pantok Tayo:
133,297 Dagup na Manangipalapag
(Nobyembre 1999)
[Kahon ed pahina 5]
Sankarakelan a Pantok Tayo:
407,094 Inmatendi ed Memoryal
(1999)