Panggunaetan a Sabien so Puso

NIARUM ed panagtasi ed totoo, kaukolan mon panggunaetan a sabien so puso ra. Diad Biblia, say puso so mabetbet a miduma ed no anto so ompatnag ed akinpaway na sakey a too. Irerepresenta na piguratibon puso no anto so akindalem na sakey a too​—no anto so liknaan to, amin a nononoten to, no akin a nononoten to itan, tan no panon so pangimpluensya na saratan a kanonotan ed saray kiwas to. Diad sayan piguratibon puso so kitaneman na bukel na katuaan. (Mat. 13:19) Tan diad puso so nepeg a gapoan na katutulok ed Dios.​—Uli. 3:1; Roma 6:17.

Ta pian say panagbangat mo so ontanek ed puso, iyapasakey ed sarayan gagala: (1) Tebeken no anto so angimpluensya la ed puso na dumerengel mo. (2) Pabiskegen iray makagunggonan kalidad, a singa say aro tan maridios a takot. (3) Pasesegen so dumerengel mo a manganalisa ed akindalem iran motibo to ta pian sikato so sigpot a makapaliket ed si Jehova.

Usaren so Pakatebek. Nanduruma iray rason no akin ya agni inawat na totoo so katuaan. Sano mangiyaaral ka na Biblia, nayarin kaukolan mon ekalen so pikewet ya opinyon tan itarya iray katuaan pian natalonaan iray lingon ideya na iyaaralan, odino nayarin basta kaukolan mon ipresenta so prueba. Tepetan moy inkasika: ‘Kasin sikatoy sikakabat a bilang too et sikatoy walaan na espiritual iran pankaukolan? Kaunongan la so sisisiaen to? Anto so agto sisiaen? Akin ya ontan iray konklusyon to? Kasin kaukolan toy tulong pian natalonaan iray pilalek a nayarin mangaamper ed sikato diad pangawat ed saray responsabilidad a nalalanor diad pikabat ed katuaan?’

Aliwan mainomay a naynay so pangamta no akin a saratan a bengatla so sisisiaen na totoo. “Say simbawa ed puso na too sikato so singa aralem a danum,” kuan na Uliran 20:5, “balet say too na pakatalos [“pakatebek,” NW] sikato so naagwat to.” Say pakatebek et abilidad a mantebek ed no anto so aliwan tanton mapatnag. Kakaukolanen na saya so maapit a panimano tan maasikason awawey.

Aliwan amin a pitatalosan et insangi. Say sakey a topiko so nayarin mamawala na pananguman ed patnag na lupa odino tono na boses na sakey ya iyaaralan. No sakey kan ateng, andi-duaruwan namoriam a say pananguman ed walewaleng na anak mo so nayarin pakapatnagan a sikato so onkikiwas ed sakey a balon impluensya ed bilay. Ag-ibabaliwala irayan sinyales. Saratan so pakalikasan ed no anto so walad puso na too.

Saray pinilin-maong a tepet so ontulong ed sikan napapaway no anto so walad puso na sakey. Nayarin itepet mo: “Panon so liknaan mo nipaakar ed . . . ?” “Anto so angombinse ed sika ya . . . ?” “Panoy ikiwas mo no . . . ?” Balet, manalwar ya agmangitetepet na dakerakel ed saray totoo. Nayarin mataktikan igapom iray tepet mo ed, “Anto kasi nikuan mo no itepet kon . . . ?” Say pangamta ed no anto so walad puso so mankaukolan na pirmin panag-alwar ya agnayarin iganat. Diad maslak a kipapasen kaukolan so panaon diad pamawala na talek sakbay a say sakey a too so mabulos a mangiparungtal ed akindalem iran liknaan to. Siansia ni, nepeg a manalwar ta pian agliknaen na too ya itetepet moray personal a bengatlan anggapoy kanepegan mon amtaen.​—1 Ped. 4:15.

Say paraan na ikiwas mo ed nadngel mo so mankaukolan met na pakatebek. Nonoten a say gagalam et talosan so totoo ta pian diad ontan et nadeterminam no anton nibase-ed-Biblian impormasyon so nayarin mamakiwas ed sikara. Tampol ya amperen so pilalek ya iwalwal so lingon punto-de-bista ra. Imbes, aliston manebek ed saray liknaan ya ag-imparungtal na saray salita. Diad ontan et naamtaan mo no panon so iyebat mo; tan say iyaaralan mo so nayarin masimoon a manisip ed ibabagam lapud nalikna ton natatalosan mo.​—Uli. 16:23.

Diad sakey a laknab, nayarian mon pakiwasen so sinansakey anggan sano manpapaliwawa ka ed baleg a grupo. No maabig so inenengneng mo ed saray dumerengel, alerto ed saray ipatnag na lupa, tan mangitepet na makatenyeg-nonot iran retorikon tepet, nayarin naalam so ideya no antoy liknaan na saray dumerengel mo ed walan ibabagam. No kabisadom iray dumerengel mo, ipanengneng so konsiderasyon ed saray sirkumstansya ra. Konsideraen so inkalapagan ya awawey na kongregasyon sano mikakatunongan ka ed sikara manlapud Salita na Dios.​—Gal. 6:18.

Sagyaten Iray Makagunggonan Liknaan. No atalosan mo la no anto so sisisiaen na sakey a too, no anto so agto sisiaen, tan no akin, nasarag mo lay mamayubo ed satan. Kayari na inkioli to, sinabi nen Jesus so kapusoan na babangatan to diad ‘impangilukas to ed Kasulatan’ ed sikara nipaakar ed saray agano nin agawgawa. (Luc. 24:32) Nepeg mo met a pambanikelan so pangisiglaot ed no anto so naeksperiensya la na too, no antoy pipirawaten to, tan no anto so nenengnengen to ed Salita na Dios. Natenyeg so puso na iyaaralan diad makagunggonan paraan sano malinlinew a bidbiren to: “Saya so KATUAAN!”

Sano idanet mo so kaabigan, aro, agkanepegan a panangasi, tan say inkaptek na daladalan nen Jehova, tutulongan moray ibabangat mo a mamaelet na panangaro ra ed Dios. No mangigana ka na panaon pian ipanengneng ed saray dumerengel mo iray maabig a kalidad a nanenengneng na Dios ed sikara bilang indibidual, sikaray iikdan mo na rason ed panisia a posibli so personal a relasyon ed sikato. Nagawaan iya diad panmorekdek ed saray teksto a singa say Salmo 139:1-3, Lucas 21:1-4, tan Juan 6:44 tan diad panulong mo ed saray dumerengel mo a makatebek ed kinaaralem na maaron siglaotan nen Jehova ed saray matoor a lingkor to. (Roma 8:38, 39) Ipaliwawa ya aglabat iimanoen nen Jehova iray lingo tayo noagta nenengnengen to so interon kurang na bilay tayo, say seseg tayo ed puron panagdayew, say aro tayo ed ngaran to. (2 Awa. 19:2, 3; Heb. 6:10) Natandaan to so anggan sankamelagan a detalye na inkagawa tayo, tan diad makapakelkelaw a paraan, ipawil to ed bilay so ‘amin na saramay wala ed pakanodnonotan a lubok.’ (Juan 5:28, 29; Luc. 12:6, 7) Lapud saray totoo so agawa ed indengan tan kaulibay na Dios, say paningbat ed saray kalidad to so mabetbet a mamakiwas ed akindalem ya inkatoo.​—Gen. 1:27.

Natenyeg met so puso sano naaralan na sakey a too a moriaen so arum a totoo a singa panmoria nen Jehova ed sikara. Makatunongan a no say Dios tayo so mangipanengneng na inkatamoy ed sikatayo bilang indibidual, sirin ipanengneng to met so ontan a konsiderasyon ed arum, anggan anto so kabibilay da, binalegan dan nasyon, odino rasa ra. (Gawa 10:34, 35) Bektan narapat na sakey a too so ontan a pakatalos, niwala so putel a Makasulatan a basiyan pian ekalen to so panaggula tan panaglabi ed puso to. Saya so ontulong ed sikaton makapikareenan ed arum legan ya aaralen ton gawaen so linawa na Dios.

Say maridios a takot so sananey nin liknaan a kaukolan mon tulongan so arum a mamayubo ed satan. (Sal. 111:10; Apoc. 14:6, 7) Say ontan ya aralem a panangigalang, odino takot ed Dios, so mamakiwas ed sakey a too pian dampoten so nayarin imposible ed dilin biskeg to. Diad pangisingbat ed makapakelkelaw a kimkimey nen Jehova tan say nikadkaduman maaron-panangasi to, natulongan mo so arum a mamayubo na mabunigas a takot ed pakapaermen ed sikato.​—Sal. 66:5; Jer. 32:40.

Seguroen a natalosan na saray dumerengel mo ya importante ed si Jehova iray kondukta ra. Sikato so walaan na liknaan, tan diad ikiwas tayo ed panangiwanwan to, sikato so balanglan napaermen odino napaliket tayo. (Sal. 78:40-42) Ipanengneng ed totoo no akin a say personal a kondukta ra so makanakana diad pangebat ed angat nen Satanas ed Dios.​—Uli. 27:11.

Tulongan iray dumerengel mon makatebek a makagunggona ed sikara so pangapet ed saray kakaukolanen na Dios. (Isa. 48:17) Sakey a paraan na pakagawa ed saya et diad panamegley na pangipabitar ed saray pansumpalan ed pisikal tan emosyonal no ipulisay so kakabatan na Dios, anggano kasikmat labat a pangipulisay ed kakabatan To. Ipaliwawa no panon a say kasalanan so mangiyarawi ed sikatayo manlapud Dios, a mangikibot ed arum na pankanawnawan mangamta na katuaan ed sikatayo, tan nibabaliwala tayo la so kanepegan da. (1 Tes. 4:6) Tulongan iray dumerengel mo a pablien daray bendisyon a panggagayagaan da la bilang resulta na panusumpal da ed saray ganggan na Dios. Pabiskeg moy apresasyon da a say panakar ed matunong a dalan nen Jehova so mangipaliis ed sikatayo ed dakel a makapuy a pansumpalan. Bektan nawalaan so sakey a too na pananisia ed kakabatan na saray dalan na Dios, sikato so naamper ed kada kurang a sumlang ed saratan. (Sal. 119:104) Moriaen to so katutulok, ya aliwan makapabelat, noagta paraan na panangibalikas na maaron debosyon ed si Jehova bilang sakey a persona.

Pananulong ed Arum a Manggawa na Panangusisa. Ta pian mantultuloy ya ombulaslas ed espiritual, kaukolan na totoo a magmaliw a malikas ed walad puso ra. Ipaliwawa no panon a makatulong so Biblia ed panggawa ed saya.

Tulongan iray dumerengel mon makamoria a say Biblia so aliwa labat lan sakey a rekord na saray ganggan, simsimbawa, maawaran iran agawa, tan propesiya. Ipaparungtal met na satan so kaisipan na Dios. Diad Santiago 1:22-25, nipareng so Salita na Dios ed sakey ya espiho. Diad ikiwas tayo ed ibabaga to tan diad paraan na pananumpal nen Jehova ed gagala to, say mensahe na Biblia so mangipapanengneng ed no anto so kipapasen na puso tayo. Sirin ipaparungtal to no panon so inenengneng na Dios ed sikatayo, a sikato “so manangusisa ed saray puso.” (Uli. 17:3, NW) Paseseg moray dumerengel mo a lawas dan nonoten iya. Sagyat mo ran manmorekdek ed saray impairekord na Dios ed Biblia a para ed sikatayo tan ed no antoran pananguman so nayarin kaukolan dan gawaen ed bilay da pian lalon makapaliket ira ed sikato. Tulongan iran manmoria ed panagbasa ed Biblia bilang paraan na panangusisa nen Jehova ed “saray nonot tan saray getma na puso” ta pian makapikoopera ira ed Dios diad panggawa ed antokaman a nakaukolan a pananguman.​—Heb. 4:12; Roma 15:4.

Nayarin labay na arum ya iyaaralan na Biblia so onkiwas unong ed nanaaralan da; ingen mapaga ra nipaakar ed isipen na arum a totoo. Ompan sikara so mipupuligesgesan ed mabiskeg iran kaliktan na laman. Odino ompan ikakatunongan day pananap na arum a paraan na panserbi ed Dios legan ya aagamilen da ni iray gawagawa na mundo. Ipalinew so kaatapan na ontan ya agpakapandesisyon. (1 Ara. 18:21) Pasesegen iran manpikasi ed Dios ya usisaen tan gogolan to so kapusoan da.​—Sal. 26:2; 139:23, 24.

Ipanengneng ed sikara a natatalosan nen Jehova so pipupuligesgesan da tan ipapaliwawa na Biblia no anto so nagagawa. (Roma 7:22, 23) Tulongan iran mangagamil na panag-alwar ta pian saray kiling na ag-ayadyarin puso so agnaabuloyan a mandomina.​—Uli. 3:5, 6; 28:26; Jer. 17:9, 10.

Pasesegen so balang sakey a manganalisa ed saray motibo to diad panggagawa ed saray bengatla. Bangatan a tepetan to so inkasikato: ‘Akin a saya so labay kon gawaen? Kasin ipanengneng na satan ed si Jehova a tuan papablien ko so amin a ginawa to la ed siak?’ Kimeyan so pamabiskeg ed kombiksyon a say naabobonan a relasyon ed si Jehova so sankablian a bengatlan nakayarian na siopaman.

Tulongan iray dumerengel mon makatebek ed kakanaan na panlingkor ed si Jehova ed “interon puso” ra. (Luc. 10:27) Kabaliksan na saya ya amin a liknaan, kalkaliktan, tan motibo ra so nepeg a mitukoyan ed saray dalan nen Jehova. Sirin bangatan iray dumerengel mon manganalisa ed aliwa labat la no anto so gawaen da noagta no panon met so liknaan da nipaakar ed saray kakaukolanen na Dios tan no anto so motibo ra diad panlilingkor ed sikato. (Sal. 37:4) Legan a natetebek na saray iyaaralan mo iray pamaakaran a mankaukolan na pamaaligwas, pasesegen iran mangipikasi ed si Jehova: ‘Iyapasakey mo so pusok ya ontakot ed ngaran mo.’​—Sal. 86:11.

No nabayuboan na iyaaralan so personal a relasyon ed si Jehova, tuloken to so Dios bilang resulta na pananisia tan aliwan basta lapud panangipaseseg mo. Diad satan, ed dilin bulos-linawa to ya, “itultuloy ton seguroen no anto so makapaliket ed Katawan.” (Efe. 5:10, NW; Fil. 2:12) Say ontan ya impapuson katutulok so mamaliket ed si Jehova.​—Uli. 23:15.

Nonoten a si Jehova so manguusisa ed saray puso tan sasagyaten toray totoo a nawalaan na siglaotan ed sikato. (Uli. 21:2; Juan 6:44) Pikokoopera so betang tayo. (1 Cor. 3:9) Satan so ‘singano say Dios so manpirawat panamegley tayo.’ (2 Cor. 5:20; Gawa 16:14) Agpipiliten nen Jehova so siopaman ya awaten so katuaan, balet legan ya uusaren tayo so Kasulatan, nayarin tenyegen to iray dumerengel tayo a makamoria a say narerengel da so ebat ed saray tepet da​—odino saray pikakasi ra. Lawas nonoten iyan katuaan kapiganman a nawalaan ka na pankanawnawan mangibangat ed arum, tan mapetepet a kerewen ed si Jehova so panangiwanwan tan tulong to.​—1 Awa. 29:18, 19; Efe. 1:16-18.