Isaías
15 Esaki ta un mensahe di huisio kontra Móab:
E hendenan di e stat Ar na Móab lo ser destruí den un anochi;
asina lo pone nan keda ketu.
E hendenan di e stat Kir na Móab lo ser destruí den un anochi;
asina lo pone nan keda ketu.
Móab lo grita yora pa motibu di loke a pasa ku Nebo i Medeba.
Tur kabes lo ta limpi feitá; tur barba lo ta kòrtá.
3 Den Móab su kayanan, e hendenan lo tin paña di saku bistí.
Nan tur lo grita yora riba nan daknan* i riba nan plenchinan públiko;
nan lo kai abou na yoramentu.
4 Hèsbòn i Elalé lo sklama;
hende lo tende nan stèm te na Yáhas.
Ta p’esei e sòldánan di Móab lo keda grita.
E pueblo* lo tembla di miedu.
5 Mi kurason lo sklama pa motibu di Móab.
Su fugitivonan lo hui bai te Zoar i Eglat-Selisia.
Na yoramentu, nan lo subi e subida di Luhit.
Riba kaminda pa Horonaim, nan lo grita yora pa motibu di e desaster ku a bini riba nan.
6 E awanan di Nimrim lo seka kompletamente;
e yerbanan bèrdè lo seka;
e yerbanan lo no t’ei mas i lo no sobra nada bèrdè.
7 P’esei, nan lo bai ku loke a sobra di nan provishonnan i di nan rikesa;
8 Lo tin gritu den henter e teritorio di Móab.
E gritunan lo yega Eglaim;
e gritunan lo yega Beer-Elim.
Lo e manda un leon riba e hendenan ku skapa di Móab
i riba esnan ku keda atras den e pais.