Isaías
16 Boso manda un chubatu di karné pa gobernante di e pais.*
Lag’é sali for di Sela, pasa via desierto,*
i bai na seru di e stat* Siòn.
2 Na e kamindanan pa krusa vaye Árnòn, e habitantenan di Móab
lo ta meskos ku un para ku nan a kore kuné for di su nèshi.
3 “Duna instrukshon, i tuma un desishon.
Skonde e hendenan ku a keda plamá, i no traishoná e hendenan ku ta huyendo.
Duna nan protekshon di dia kla, ku un sombra ku ta skur manera anochi.
4 Móab, laga mi hendenan ku a ser plamá biba serka bo.
Bira un lugá di skonde pa nan debí na e enemigu ku ta destruí.
E opresor lo yega na su fin,
destrukshon lo kaba,
i e hendenan ku ta trapa otro hende lo disparsé for di riba tera.
5 E ora ei, un rei for di e famia di David lo sinta riba trono.
Lo e ta fiel, i su gobernashon lo ta sigur i basá riba amor leal.
Lo e husga na un manera hustu, i lo e hasi loke ta korekto sin tarda.”
6 Nos a tende ku Móab ta masha orguyoso mes.
Nos a tende di su arogansia i su orguyo i ku e ta rabia lihé,
pero su bromamentu lo no hiba na nada.
7 Pues, Móab lo grita yora pa motibu di su kalamidat;
sí, tur hende na Móab lo grita yora.
E hendenan afektá lo yora pa haña bola di rasenchi di Kir-Haresèt,
8 pasobra e kunukunan di Hèsbòn a seka,
i e matanan di wendrùif di Sibma tambe a seka.
E gobernantenan di e nashonnan a trapa nan ramanan kargá ku wendrùif kòrá.*
E ramanan ei a yega te Yázer,
i nan a plama den desierto.
E matanan di wendrùif* a saka rama nobo, i nan a yega te laman.
9 Ta p’esei lo mi yora pa e matanan di wendrùif di Sibma manera mi ta yora pa Yázer.
Hèsbòn i Elalé, lo mi muha boso papa muhá ku mi lágrimanan,
pasobra lo no tin gritu di alegria mas pa motibu di boso frutanan di zomer ni pa motibu di boso kosecha.*
10 Lo no tin alegria ni felisidat mas den hòfi,
i lo no tin kantika ni gritu di alegria den e kunukunan di wendrùif.
Niun hende lo no trapa wendrùif mas den e bakinan pa machiká wendrùif,
pasobra mi a pone fin na e gritunan di alegria.
11 Mi ta masha tristu pa motibu di Móab.
P’esei mi kurason ta tembla manera e kuèrdènan di un arpa,
i mi paden ta lamentá pa Kir-Haresèt.
12 Móab lo no logra nada ni maske kuantu orashon e hasi den su santuario i ni maske kuantu e kansa su kurpa pa adorá na e lugánan sagrado.*
13 Eseinan ta e palabranan ku Yehova a papia anteriormente tokante Móab. 14 I awor Yehova ta bisa: “Denter di eksaktamente tres aña,* Móab* lo ser rebahá i lo hañ’é ku masha desòrdu. Lo sobra masha poko habitante, i nan lo ta insignifikante.”