Hosue

12 Awor ta sigui nòmber di e reinan ku e israelitanan a derotá na parti ost di riu Yordan. E israelitanan a poderá di e teritorionan di e reinan ei, for di vaye* Árnòn te na seru Hèrmòn i henter Áraba, parti ost. 2 Un di e reinan ei tabata Rei Síhòn di e amoreonan, kende tabata biba na Hèsbòn. E tabata goberná Aroer, un stat ku tabata keda na rant di vaye Árnòn. E tabata goberná henter e region for di meimei di vaye Árnòn tambe, inkluso mitar Gálad, te na vaye Yábòk. (Yábòk tabata frontera di teritorio di e amonitanan.) 3 Fuera di e teritorionan ei, Rei Síhòn tabata goberná Áraba, su parti ost, for di Laman di Kinerèt* te Laman di Áraba (Laman Salu)* bai den direkshon di Bèt-Yésimòt yega te zùit, na pia di seru Pisga.

4 Un otro rei ku e israelitanan a derotá i poderá di su teritorionan tabata Rei Òg di Básan. Rei Òg tabata un di e delaster refaítanan. E tabata biba na Ástaròt i na Edrei. 5 E tabata goberná e region ku a inkluí seru Hèrmòn, Salka i henter Básan bai te frontera di e gesuritanan i frontera di e makatitanan. E tabata goberná tambe mitar Gálad, te frontera di teritorio di Rei Síhòn di Hèsbòn.

6 Moises, sirbidó di Yehova, i e israelitanan a derotá e dos reinan ei. Anto Moises, sirbidó di Yehova, a duna e tribu di Ruben, e tribu di Gad i mitar tribu di Mánases e teritorionan di e reinan ei komo propiedat.

7 Hosue i e israelitanan a derotá e reinan na parti wèst di riu Yordan, esta, for di Baal-Gad den vaye Líbanòn bai te seru Hálak, ku tabata keda enfrente di Seír. Despues, Hosue a duna e tribunan di Israel teritorio di e reinan ei komo propiedat, loke e israelitanan tabatin derecho riba dje. 8 E israelitanan a risibí, entre otro, algun área yen di seru, Sefela, Áraba, e barikanan di seru, desierto* i Néguèv. Sí, Hosue a konkistá teritorio di e heteonan, teritorio di e amoreonan, teritorio di e kananeonan, teritorio di e perezitanan, teritorio di e heveonan i teritorio di e yebuseonan. Aki ta sigui un lista di e reinan ku e israelitanan a derotá: