Hóbennan Sa Puntra . . .

Kico Mi Mester Haci si un Amigu Ta Hañ’é den Problema?

Sherrie, di diescuater aña di edad, ta bisa: “E coriente a hiba mi mihó amigu for dje caminda cristian. Esei ta hací mi tristu. Mi a haci tantu esfuerso pa anim’é!”a

UN PERSONA pegá cu bo a hañ’é den dificultad of a cuminsá hiba un moda di biba cuestionabel? Johnny ta bisa, “Mi tabata hopi pegá cu Chris. E tabata mi mihó amigu. Un dia el a hui for di cas. Esaki a shok mi, i mi a sintí mi obligá di bai busk’é. Mi a core auto henter anochi, buscando p’e.”

E Bijbel ta duna advertencia di cu durante e tempu final, hopi presion lo baha riba hende, hóben i bieu. (2 Timoteo 3:1-5) P’esei, no mester ta un shok pa nos ora de bes en cuando un hóben cristian ta trompecá. Pero, ora esei sosodé cu un hende cu bo ta stima, bo por sinti tur sorto di emocion, alcansando for di tristesa i compasion te na rabia. Bo kier yuda bo amigu. Pero, con bo por haci esei?

‘Mi Por Salb’é’

Bijbel ta bisa: “Ken cu ta haci un pecador bolbe for di eror di su caminda ta salba [e pecador] su alma for di morto i ta tapa un multitud di picá.” (Santiago 5:20) Pero, esaki kier men cu ta bo responsabilidad pa haci esei? No necesariamente. E mayornan di bo amigu ta primeramente responsabel p’e. (Efesionan 6:4) Bijbel ta sigui bisa na Galationan 6:1: “Rumannan, aunke un homber ta dal un paso falsu promé cu e sa, boso cu tin e debido cualidadnan spiritual purba di reahustá un homber asina cu un spiritu di suavedad.” Superintendentenan di congregacion ta specialmente capas pa haci esaki. P’esei, nan ta den un mihó posicion cu bo pa duna yudansa.

Bo mester admití cu como un hóben, bo experencia den bida ta limitá. (Compará cu Hebreonan 5:14.) Pues, reconocé modestamente bo limitacion den situacion asina i evitá di pega barcu. (Proverbionan 11:2) Considerá un hobencita yamá Rebekah. El a purba di yuda un amigu, un miembro di su famia, cu a enbolb’é den droga. Rebekah ta bisa: “Loke a pone presion riba mi tabata cu el a confia den mi i no den su mayornan. Mi a purba di yud’é, pero mi a keda hopi frustrá. Mi a haña alivio ora mi a realisá cu mi no por haci nada . . . mi no por a bira su salbador.” Anto Rebekah a urgié pa busca yudansa di hende grandi capas.

E hóben Matthew tabata den un situacion similar, pero el a reconocé su limitacion desde principio. E ta bisa tocante su amigu den dificultad: “E tabata bini cerca mi cu su problemanan, pero mi tabata bis’é p’e bai bisa su mayornan. Mi tabata sa bon cu mi no por ta responsabel pa su problema.”

Con Bo Por Yuda

Esaki no kier men cu bo no por haci nada pa yuda. Hopi ta dependé dje circunstancia. Kisas bo amigu kier confia den bo. Naturalmente, bo no kier lagu’é na caya, bo kier scuch’é. (Proverbionan 18:24; 21:13) Of, tal bes el a cuminsá sigui un moda di bida cuestionabel. Lo ta apropiado pa bo tuma iniciativa i bis’é cu aunke bo ta interesá den dje, bo no por aprobá di loke e ta haci.

Un otro situacion por enbolbé un amigu cu ta admití cu el a cometé un malecho serio. E por asta purba di hací bo primintí di no bisa ningun hende. Pero Bijbel ta bisa: “Nunca . . . ser participante den picá di otronan; conserbá bo puru.” (1 Timoteo 5:22) Si bo amigu tabata seriamente malu i tabatin mester di yudansa médico, lo bo no insistí di hib’é dokter? Di igual manera, si el a cometé malecho serio, e tin mester di yudansa spiritual. Wardamentu dje asuntu secreto por mat’é spiritualmente—i perhudicá e congregacion. P’esei, bo tin un obligacion di informá e ancianonan dje congregacion.—Compará cu Levítico 5:1.

E hobencita Caroline a tuma un posicion di curashi en cuanto un amiga di dwal cu tabata gaña su mayornan. Caroline ta bisa: “Mi a dun’é dos siman pa bisa e ancianonan. Mi a bis’é cu si e no hacié, lo mi bisa nan. No tabata fácil pa mi haci esaki.” Johnny, mencioná anteriormente, a manifestá forsa di caracter na moda similar. Johnny ta corda tocante su amigu: “A sorprendé mi pa haña cu e tabata biba compañá cu un mucha muher. Tabatin otro mucha hombernan den e cas di mi amigu cu tabata bebe i huma.” Johnny a pidi su amigu pa sali afó i el a recomendá fuertemente pa su amigu busca yudansa di anciano den e congregacion.

Tal bes bo amigu por apreciá bo esfuerso of no. Bijbel ta bisa nos cu ora e rumannan dje hóben Josef tabata ocupá den malecho, el “a hiba un informe malu tocante nan pa nan tata.” Esaki siguramente no a haci su rumannan stim’é mas. Realmente, “nan a cuminsá odi’é.”—Génesis 37:2-4.

Tur Cos Ta Sigui Normal?

No obstante, bo por saboteá bo esfuerso pa yuda si bo ta sigui asociá cu bo amigu como si nada no a pasa. Na 1 Corintionan 15:33 apostel Pablo a advertí hende cristian contra asociacion cu malechor. Asociacion íntimo cu hende asina por solamente causa bo naufragio!

E hobencita Mollie a siña esei na moda dificultoso ora su amiga Sally a cuminsá sali cu mucha homber den secreto. Sally no solamente tabata muchu hóben pa casa sino tambe tabata sali cu mucha homber cu no tabata cristian. Mollie a ignorá e situacion i a sigui asociá cu su amiga, Sally. Cu ki resultado? Segun Mollie: “Cu tempu Sally a busca mucha homber di mundu pa mi, i nos a sali huntu.” Afortunadamente, Mollie a haña yudansa di anciano di congregacion promé cu e situacion a bira mas serio.

Lynn tambe a haci algun compromiso peligroso afin di mantené su amistad cu un mucha muher yamá Beth. Lynn ta corda, “Mi a kere cu mi por a scap’é, pero mi no a logra. Nos a bai club huntu. Mi tabata sa cu esei no tabata bon, pero mi no tabata kier a ofend’é. Su problemanan a cuminsá bira un carga pisá pa mi. Mi a keda ketu tocante e asuntu, pensando cu e problema lo disparcé, pero el a bira mas grandi.” Tragedia a dal Lynn un golpi duru. E mucha homber cu tabata sali cu Beth a mat’é.

Pegamentu na bo amigu of amiga por parce leal. Pero, si bo amigu tabata hogando mes den un remolino fuerte, lo bo bula den e awa pa salb’é? Tur loke esei por haci ta cu boso dos lo hoga. E cos razonabel pa haci ta di tira un salbabida p’e. Di igual manera, bo tin cu duna yudansa for di un distancia.—Hudas 22, 23.

Ta necesario pa keda na un distancia si bo amigu ta expulsá for dje congregacion. E mandamentu bíblico ta di “no sigui den compania” di hende asina. (1 Corintionan 5:11) Aunke bo ta interesá den e persona, bo por dun’é e mihó yudansa, no dor di cometé malecho huntu cuné, sino dor di manifestá lealtad na Jehova Dios. (Salmo 18:25) Bo posicion sin haci compromiso por ta net loke ta necesario pa conmov’é pa reconsiderá su accion. Mas importante, bo lealtad lo alegrá e curason di Jehova Dios.—Proverbionan 27:11.

Muchu Peso

Sin embargo, hopi bes bo mihó esfuerso ta faya. Rebekah ta corda tocante su amiga: “Mi a purba di extendé mi i yud’é. Mi asta a skirbié un carta, pero e nunca a contestá.” Caroline a descubrí cu despues di purba pa vários luna pa yuda un amiga cu tabata busca dificultad, el a “cuminsá sintié cansá.”

Ta importante pa reconocé cu “cada un di nos tin cu rindi cuenta di su mes na Dios.” (Romanonan 14:12) I aunke ta apropiado pa yuda un hende hiba su carga, of problema personal, dunando yudansa práctico, bo simplemente no por hiba e “carga” di otro hende—es decir, su mes responsabilidad dilanti Dios. Bijbel ta bisa, “cada un lo hiba su mes carga di responsabilidad.” (Galationan 6:5) Bo no ta responsabel pa e decision cu bo amigu of amiga ta tuma.

No obstante, ta duel bo pa mira un amigu destruí su bida. Un hóben yamá Mike ta bisa ora el a perde un amigu: “Esei a dal mi duru. Mi tabata asina pegá cu Mark i su mayornan. Mi a sufri di basta depresion.”

Ta solamente natural pa un pérdida asina afligí bo. Sin embargo, papia tocante bo sintimentu cu hende cu bo ta confia, por yudá bo. (Proverbionan 12:25) Rebekah ta bisa, “Cu e yudansa di mi mayornan, mi por a recobrá mi.” Tambe, bo por expresá bo sintimentu cu Jehova Dios den oracion. (Salmo 62:8) Caroline ta resumí e asuntu bon, bisando: “Oracion na Jehova i predicando na otronan a yudá mi mashá. Tambe, mi a keda pegá cu otronan den e congregacion, specialmente na ruman muher di mas edad. Finalmente, mi a realisá cu hende ta keda responsabel pa nan mes actuacionnan i cu mi tabatin cu sigui cu mi bida.” Si bo haci tur esei, siguramente bo por yuda bo mes. I posiblemente bo por yuda bo amigu di dwal tambe.

[Nota]

[Plachi na página 17]

Animá bo amigu pa busca yudansa