E Punto di Bista Bíblico

‘No Ser Parti di Mundu’—Kico Esei Kier Men?

DEN siglo cuater E.C., miles di hende cu a profesá di ta cristian a laga nan posesionnan, famianan i estilo di bida atras pa bai biba den isolacion den e desiertonan di Egipto. Nan a yega di ta conocí como anacoretanan, dje palabra griego a·na·kho·reʹo, cu ta nificá “mi ta retirá.” Un historiadó a describí nan como hende cu a mantené nan mes leu for di nan contemporáneonan. Anacoretanan a kere cu dor di retirá nan mes for dje sociedad humano, nan tabata obedeciendo e rekisito cristian pa “no ta parti di e mundu.”—Juan 15:19.

Ta cierto cu Bijbel ta amonestá cristiannan pa keda “sin mancha di mundu.” (Santiago 1:27) E Scritura ta spierta masha cla: “Adúlteronan, boso no sa cu amistad cu e mundu ta enemistad cu Dios? P’esei, ken cu ta deseá di ta amigu di mundu ta haci su mes enemigu di Dios.” (Santiago 4:4) Pero, esaki ta nificá cu ta ser sperá di cristiannan pa nan bira anacoreta, pa nan retirá for di otronan den un sentido literal? Nan mester keda leu di esnan cu no ta compartí nan creencianan religioso?

Cristiannan No Ta Antisocial

E concepto di no ta parti di mundu ta ser considerá den hopi parti di Bijbel caminda e ta enfatisá e necesidad pa cristiannan separá nan mes for dje masa di sociedad humano cu ta alehá for di Dios. (Compará cu 2 Corintionan 6:14-17; Efesionan 4:18; 2 Pedro 2:20.) P’esei, cristiannan berdadero ta haci sabí di keda leu for di actitudnan, abla i conducta cu no ta na armonia cu Jehova su camindanan recto, tal como e manera ardiente cu mundu ta core tras di rikesa, prominencia i su complacencia excesivo den placer. (1 Juan 2:15-17) Tambe nan ta keda separá for di mundu dor di keda neutral den asuntunan di guera i política.

Jesucristo a bisa cu su disipelnan lo “no ta parti di e mundu.” Pero tambe el a pidi Dios den oracion: “Mi ta pidí bo, pa no saca nan for dje mundu, sino pa vigilá riba nan pa causa di e malbado.” (Juan 17:14-16) Ta masha cla cu Jesus no tabata kier pa su disipelnan bira antisocial, evitando tur contacto cu hende cu no ta cristian. Eigenlijk, si un cristian isolá su mes, lo e no por cumpli cu su comision di predicá i siña “públicamente i di cas pa cas.”—Echonan 20:20; Mateo 5:16; 1 Corintionan 5:9, 10.

E conseho pa keda sin mancha di mundu no ta duna cristiannan motibu pa pensa cu nan ta superior na otronan. Esnan cu ta teme Jehova ta odia “halsamentu propio.” (Proverbionan 8:13) Galationan 6:3 ta bisa cu “si un hende ta kere cu e ta algu, miéntras cu e no ta nada, e ta gaña su mes mente.” Esnan cu ta sinti nan superior ta gaña nan mes, pasobra “tur a peca i no ta alcansá e gloria di Dios.”—Romanonan 3:23.

“No Papia Malu di Ningun Hende”

Den tempu di Jesus tabatin hende cu tabata menospreciá tur esnan cu no tabata pertenecé na nan grupo religioso exclusivo. Entre esakinan tabatin e fariseonan. Nan tabata bon versá den e Ley di Moises i tambe den e detayenan di mas chikitu dje tradicion hudiu. (Mateo 15:1, 2; 23:2) Nan tabata orguyoso di por a sigui hopi ritual religioso cu tur precision. E fariseonan a comportá nan mes como si fuera nan tabata superior na otronan, djis pa motibu di nan logronan intelectual i posicion religioso. Nan a expresá nan actitud deboto i di menosprecio dor di bisa: “E multitud aki cu no conocé e Ley ta hende maldicioná.”—Juan 7:49.

E fariseonan tabatin asta un término di menosprecio pa esnan cu no tabata fariseo. Originalmente a usa e término hebreo ʽam ha·ʼaʹrets den un sentido positivo pa referí na miembronan comun di sociedad. Pero cu tempu e lidernan religioso arogante di Huda a cambia e nificacion di ʽam ha·ʼaʹrets den unu di desprecio. Otro gruponan, incluyendo hende cu ta profesá di ta cristian, a usa términonan manera “pagano” cu menosprecio pa referí na hende cu tin otro creencia religioso cu nan.

Con, anto, e cristiannan di promé siglo a mira esnan cu no a aceptá cristianismo? Jesus su disipelnan a ser amonestá pa trata incrédulonan “cu suavedad” i “respet profundo.” (2 Timoteo 2:25; 1 Pedro 3:15) Apostel Pablo a pone un bon ehempel den esaki. E tabata acercabel, no arogante. En bes di halsa su mes riba otronan, e tabata humilde i edificante. (1 Corintionan 9:22, 23) Den su carta inspirá na Tito, Pablo ta duna e spiertamentu “pa no papia malu di ningun hende, pa no busca guera, pa ta razonabel, desplegando tur suavedad pa cu tur hende.”—Tito 3:2.

Tin biaha Bijbel sa usa e término “incrédulo” pa referí na hende cu no ta cristian. Sin embargo, no tin ningun evidencia cu a usa e palabra “incrédulo” como un nomber oficial of di insulto. Ta sigur cu e no tabata usá pa rebahá of denigrá hende cu no tabata cristian, ya cu esaki lo ta contrario cu principionan bíblico. (Proverbionan 24:9) Awe Testigonan di Jehova ta evitá di ta rudo i arogante cu incrédulonan. Nan ta haña cu ta mal manera pa duna famia i bisiñanan cu no ta Testigo nombernan di menosprecio. Nan ta sigui e conseho bíblico, cu ta bisa: “Un esclabo di Señor . . . mester ta amabel pa cu tur.”—2 Timoteo 2:24.

“Obra Loke Ta Bon pa cu Tur”

Ta vital pa reconocé e peligernan di tin amistad íntimo cu e mundu, specialmente cu esnan cu ta mustra un falta di respet grosero pa normanan divino. (Compará cu 1 Corintionan 15:33.) Sin embargo, ora Bijbel ta consehá pa “obra loke ta bon pa cu tur,” e palabra “tur” ta incluí esnan cu no ta compartí creencianan cristian. (Galationan 6:10) Tin evidencia cu bou di algun circunstancia e cristiannan di promé siglo a come huntu cu incrédulonan. (1 Corintionan 10:27) P’esei, awe cristiannan ta trata incrédulonan den un manera balansá, i ta considerá nan como nan próhimo.—Mateo 22:39.

Lo ta robes pa asumí cu un persona ta indecente of inmoral djis pasobra e no ta conocí cu e berdadnan di Bijbel. Circunstancia i hende ta varia. P’esei, cada cristian mester dicidí te na ki grado lo e regulá su contacto cu incrédulonan. Sin embargo, lo ta innecesario i antibíblico pa un cristian isolá su mes físicamente manera e anacoretanan a haci of sintié superior manera e fariseonan a haci.