E Punto di Bista Bíblico

Asetismo Ta e Clave pa Sabiduria?

“ERMITAÑONAN tabata bisti boei di heru, cadena, faha yen di hak skerpi i banchi di garganta cu clabu den nan . . . Otronan tabata lora den sumpiña i bringamosa, tabata pone insectonan pica nan, tabata kima nan mes cu candela i tabata habri nan heridanan pa nan keda cu pus henter ora. Siendo cu tabata comun pa biba riba un cantidad mínimo di cuminda i awa, algun tabata bai mas leu dor di come solamente cuminda dañá of cu den otro sentido tabata askeroso.”—The Saints, di Edith Simon.

Esakinan tabata e aséticonan. Di con nan tabata trata nan mes asina malu? Den e buki For the Sake of the World—The Spirit of Buddhist and Christian Monasticism, e autornan ta splica cu “por lo ménos for dje tempu di Sócrates (siglo cincu P.E.C.), en general hende tabatin e concepto cu un bida limitá na e cosnan esencial so, sin e luhonan sensual i material, tabata un rekisito pa por haña berdadero sabiduria.” Aséticonan tabata kere cu dor di mortificá nan curpa, nan lo a elevá nan sensibilidad spiritual i lo haña berdadero iluminacion.

Ta difícil pa definí asetismo cu exactitud. Pa algun hende, e ta nificá solamente disiplina propio i abnegacion. E cristiannan di promé a considerá e birtudnan ei di hopi balor. (Galationan 5:22, 23; Colosensenan 3:5) Jesucristo mes a recomendá pa hiba un bida simpel, sin e strobansa dje ansiedadnan cu un estilo di bida materialista por trece cuné. (Mateo 6:19-33) Sin embargo, mas biaha asetismo ta ser asociá cu medidanan muchu mas severo i hopi bes mas extremo, manera esnan mencioná ariba. Di berdad e prácticanan asético aki, specialmente esnan mas extremo, ta e clave pa sabiduria?

Basá Riba Suposicion Falsu

Un dje filosofianan cu a yuda lanta asetismo ta e idea cu cosnan material i placernan físico ta malu riba nan mes i p’esei ta stroba hende di haci progreso spiritual. Un otro concepto cu ta habri e caminda pa asetismo ta e creencia ampliamente aceptá cu hende ta componí di un curpa i un alma. Aséticonan ta kere cu e curpa material ta e prizon dje alma i cu e carni ta su enemigu.

Kico Bijbel ta bisa? E Scritura ta mustra cu ora Dios a caba di crea e tera, el a declará cu tur loke el a traha—tur su creacion físico i material—tabata “hopi bon.” (Génesis 1:31) Tabata Dios su propósito pa e homber i e muher den e hofi di Eden disfrutá di cosnan material. E nomber Eden mes ta nificá “Placer” of “Deleite.” (Génesis 2:8, 9) Adam cu Eva tabata perfecto i tabatin un bon relacion cu nan Creador te ora nan a peca. Desde e tempu ei padilanti, imperfeccion a bira un barera entre Dios i hende. Sin embargo, e echo cu hende ta satisfacé deseonan humano legítimo of ta disfrutá—di un manera cu ta na armonia cu Dios su leynan moral—di placernan físico cu Dios mes a hinca den nan, nunca lo por a crea un barera di comunicacion entre Dios i su adoradónan!—Salmo 145:16.

Ademas, Bijbel ta siña masha cla cu hende, creá di stof i trahá di carni, ta un alma. E Scritura no ta apoyá ni e concepto cu e alma ta un of otro entidad inmaterial i inmortal atrapá den e curpa físico, ni e idea cu di un manera of otro e carni ta stroba nos di tin un relacion íntimo cu Dios—Génesis 2:7.

Ta bisto cu e concepto di asetismo ta duna un cuadro trocí dje relacion entre hende i Dios. Apostel Pablo a spierta cu algun hende cu ta yama nan mes cristian lo preferá e filosofianan humano engañoso riba e berdadnan básico di Bijbel. (1 Timoteo 4:1-5) Tocante algun hende cu tabatin e opinion aki, un historiadó religioso ta bisa: “E creencia cu materia tabata malbado . . . i cu hende su alma mester a ser librá for dje gara di materia, a hiba na un asetismo severo cu a prohibí hende di come carni, tene relacion sexual, etcétera, locual solamente un grupo élite di ‘esnan perfecto’ of perfecti por a sigui, kendenan a pasa dor di un rito special di iniciacion pa bira miembro dje grupo.” E manera di pensa aki no tin ningun apoyo di Bijbel i no tabata e creencia dje cristiannan di promé.—Proverbionan 5:15-19; 1 Corintionan 7:4, 5; Hebreonan 13:4.

No Tin Ningun Necesidad pa Ta Asético

Jesus i su disipelnan no tabata asético. Nan a pasa dor di vários prueba i tribulacion, pero nunca no tabata nan cu a causa e tribulacionnan aki na nan mes. Apostel Pablo a spierta e cristiannan pa tene cuidou pa filosofianan humano engañoso no alehá nan for dje berdad dje Palabra di Dios i hiba nan na cometé prácticanan irazonabel i extremo. Pablo a mencioná specíficamente “un trato severo dje curpa.” El a bisa: “E cosnan ei mes, en berdad, tin un aparencia di sabiduria den un forma di adoracion cu nan mes a imponé i un humildad ficticio, un trato severo dje curpa; pero nan no tin ningun balor den combatí e satisfaccion di carni.” (Colosensenan 2:8, 23) Asetismo no ta hiba na un santidad special ni na berdadero iluminacion.

Ta cierto cu e curso di obedencia cristian ta implicá esfuerso vigoroso i disiplina propio. (Lucas 13:24; 1 Corintionan 9:27) Un hende tin cu haci hopi esfuerso pa adkerí conocimentu di Dios. (Proverbionan 2:1-6) Tambe, Bijbel ta spierta nos fuertemente pa no bira sclabisá na “deseo i placer” i pa no ta “stimadó di placer mas bien cu stimadó di Dios.” (Tito 3:3; 2 Timoteo 3:4, 5) Sin embargo, e textonan bíblico aki no ta respaldá e práctica di asetismo. Jesucristo, un homber perfecto, a disfrutá di ocasionnan placentero caminda tabatin comementu, bebementu, música i bailamentu.—Lucas 5:29; Juan 2:1-10.

Berdadero sabiduria ta razonabel, i no ta bai den extremo. (Santiago 3:17) Jehova Dios a crea nos curpa físico cu e capacidad pa disfrutá di hopi placer den bida. E kier pa nos ta felis. Su Palabra ta bisa nos: “Mi a yega di sa cu no tin nada mihó pa nan cu alegrá i haci bon durante bo bida; i tambe pa tur hende come i en berdad bebe i mira e bon pa tur su trabou duru. Esei ta e don di Dios.”—Eclesiástes 3:12, 13.

[Plachi Rekonosementu na página 21]

Saint Jerome in the Cavern/The Complete Woodcuts of Albrecht Dürer/Dover Publications, Inc.