Hóbennan Sa Puntra . . .

Kico si Mi Mayornan Ta Oponé Mi Matrimonio?

Lakesha i su namorado tin pensá di casa, pero Lakesha su mama no ta gusta e idea. “E aña aki mi ta haci 19 aña,” Lakesha ta bisa, “pero mi mama ta insistí cu mi mester warda te ora mi tin 21 aña.”

SI BO ta planea pa casa, ta masha normal cu bo kier pa bo mayornan ta contentu pa bo. E por ta berdaderamente duru pa bo si nan no ta gusta e partner cu abo a scoge. Kico bo mester haci? Ignorá nan deseonan, i dal bai numa cu bo plannan di casamentu?a

Esaki por ta tentador si bo ta legalmente adulto i por casa sin e consentimentu di bo mayornan. No obstante, Bijbel no ta pone límite na edad pa mustra onor i respet pa bo mayornan. (Proverbionan 1:8) I si bo pasa nan sintimentunan por haltu, lo bo por ta causando daño permanente na bo relacion cu nan. Ademas, tin tambe e posibilidad—kisas asta un probabilidad—cu bo mayornan tin motibunan válido pa oponé bo matrimonio.

Con Yong Ta Muchu Yong?

Por ehempel, bo mayornan ta bisá bo cu bo ta muchu yong pa casa? Wel, Bijbel no ta pone un mínimo n’e edad pa casa. Pero sí e ta recomendá pa promé cu casa, bo mester a “pasa e flor di hubentud”—e añanan despues di pubertad, ora deseonan sexual ta na nan máximo. (1 Corintionan 7:36) Di con? Pasobra e hóbennan ei apénas ta den e etapa inicial di desaroyá madures emocional, dominio propio i cualidadnan spiritual necesario pa manehá bida matrimonial.—Compará cu 1 Corintionan 13:11; Galationan 5:22, 23.

Ora Dale di 20 aña a dicidí di casa, el a keda stom cu su mayornan tabata contra. “Nan a bisa cu mi tabata muchu yong i cu mi tabata falta experencia,” e ta bisa. “Ami a haña cu nos tabata cla i por a siña despues cu nos casa, pero mi mayornan kier tabata sigur cu mi no tabata actuando solamente riba emocion. Nan a haci yen di pregunta. Mi tabata cla pa manehá decisionnan diario, e finansa, e realidad di percurá pa un famia den sentido material, emocional i spiritual? Mi tabata cla pa bira tata? Di berdad mi a siña con pa comunicá? Di berdad mi tabata comprendé e necesidadnan di un esposa? Nan a haña cu mi mester a siña conocé mi mes mihó como adulto, promé cu mi por a cuminsá percurá pa un otro adulto.

Maske nos no kier a warda, nos a posponé nos matrimonio pa duna nos mes tempu pa madurá. Finalmente ora nos a casa, nos a drenta e relacion cu un mihó fundeshi i mas pa ofrecé otro.”

Ora e Problema Ta Diferencia Religioso

Ora Terri a cuminsá sinti amor romántico pa un homber cu no tabatin e mésun fe religioso cu el a scoge, Terri tabata sali cuné na scondí. Despues di anunciá nan plan pa casa, Terri a keda aplastá ora el a descubrí cu su mama tabata contra pa e casa. “Mi no kier mi mama pensa asina di mi,” Terri a lamentá. “Mi kier pa nos sigui mantené e relacion di mama cu yu.”

Pero ken ta esun cu tabata strobando nan relacion? Acaso Terri su mama tabata inhustu of irazonabel? No, simplemente e tabata apoyá e conseho bíblico duná na cristiannan pa casa “solamente den Señor.” (1 Corintionan 7:39) De echo, Bijbel ta manda: “No bira uní bou di yugo desigual cu incrédulonan.” (2 Corintionan 6:14, 15) Di con no?

Pa cuminsá, armonia religioso ta un factor masha importante den un matrimonio felis i exitoso. Expertonan ta bisa cu hopi bes e stres i tension cu ta comun den matrimonionan entre hende di diferente religion ta hiba na divorcio. Pero un motibu mas importante ainda ta e posibilidad di ser presioná pa comprometé bo creencianan religioso—of pa laga nan un banda completamente. Asta si un casá incrédulo no interferí cu bo adoracion, tog lo bo tin cu biba cu e dolor di curason di no por compartí bo conviccionnan di mas profundo cuné. Acaso esaki ta zona manera un fórmula pa dicha matrimonial?

P’esei Terri tabatin cu tuma un decision difícil. “Mi stima Jehova Dios,” Terri a bisa, “pero mi no kier perde mi namorado.” Tur dos no ta bai. Bo no por comprometé Dios su normanan i tog haña su fabor i bendicion.

Pero kisas, bo mayornan ta contra pa bo casa cu un cierto compañero cristian. Ta posibel pa bira uní bou di yugo desigual cu un creyente? Sí, si e persona ei no ta compartí bo metanan spiritual of bo debocion na Dios. Si esei ta e caso of si e rumannan den e congregacion dje persona ei no ta “duna bon informe” di dje, kisas bo mayornan tin bon motibu pa preocupá cu bo kier casa cuné.—Echonan 16:2.

Kico di Diferencianan Racial of Cultural?

E mayornan di Lynn tabatin obhecion pa un motibu diferente: E kier a casa cu un homber di otro rasa. Kico Bijbel ta siña tocante esaki? E ta bisa nos cu “Dios no ta parcial” i cu “el a traha for di un solo hende tur nacion di hende.” (Echonan 10:34, 35; 17:26) Hende tin un orígen comun i ta igual den bista di Dios.

Tog, maske tur pareha casá ta sufri “tribulacion den nan carni,” parehanan di diferente rasa lo por haña nan cu extra dificultad. (1 Corintionan 7:28) Pakico? Pasobra hopi hende den e mundu yen di odio aki no ta aceptá Dios su punto di bista tocante rasa. Matrimonionan entre parehanan di diferente rasa a bira mas i mas comun den paisnan occidental, pero ainda tin áreanan caminda parehanan mixto ta contra cu prehuicio fuerte. P’esei, bo mayornan lo por teme cu bo no ta prepará pa trata cu e presion ei.

“Mi mayornan a pensa cu lo e bira hopi difícil pa nos,” Lynn ta admití. Sabiamente, Lynn a mustra respet pa nan sintimentunan i no a core casa. Segun cu Lynn su mayornan a observá su madures i a conocé mihó e homber cu e tabata stima, poco-poco nan confiansa cu lo e por manehá e presionnan dje matrimonio aki a cuminsá crece. Lynn ta bisa: “Una bes cu nan a sinti cu di berdad nos lo por ta felis huntu, nan tambe tabata contentu pa nos.”

Pero, tin biaha, e asuntu no ta rasa, sino cultura. Bo mayornan por ta preocupá cu, cu tempu, lo bo hañ’é difícil pa disfrutá di biba cu un hende cu tin un estilo di bida, expectativanan i gustu di cuminda, música i entretenimentu asina diferente for di esnan di bo. Sea cual sea e caso, casa cu un hende di otro rasa of cultura por presentá desafionan grandi. Di berdad bo ta cla pa enfrentá nan?

Ora e Oposicion di Mayor Ta Parce Irazonabel

Pero kico bo mester haci si ta parce cu bo mayornan ta totalmente irazonabel den oponé bo? Un señora hóben cu yama Faith ta bisa di su mama: “Mami a divorciá vários biaha. E ta bisa cu nunca bo ta siña conocé e persona cu ken bo ta casa sino te ora cu ta muchu lat. E ta convencí cu lo mi no ta felis casá.” Hopi bes, mayornan cu nan mes tabatin un matrimonio infelis, no por mira e matrimonio di nan yu obhetivamente. Den algun caso, mayornan tin motibunan cuestionabel pa ta contra e matrimonio di nan yu, manera un deseo di mantené control riba e bida di nan yu.

Si bo mayornan no kier razoná, kico bo por haci? Entre Testigonan di Jehova, bo por acudí na ancianonan di congregacion pa yuda den resolvé problemanan di famia. Sin tuma parti pa ningun hende, nan por yuda miembronan di famia papia tocante asuntunan den un manera calmu, pacífico i cu ta duna resultado.—Santiago 3:18.

Busca Pas

Naturalmente, hopi otro factor por pone cu bo mayornan ta contra pa bo casa, manera cuestionnan financiero of e personalidad dje prospectivo casá. I den e era di AIDS i otro malesanan transmití sexualmente, bo mayornan lo por tin bon motibu pa ta preocupá tocante bo salú si bo pretendiente a hiba un bida promiscuo promé cu el a bira cristian.b

Tanten cu bo ta biba cerca bo mayornan, bo ta obligá di reconocé nan autoridad riba bo. (Colosensenan 3:20) Pero asta si bo ta riba bo mes i tin suficiente edad pa tuma bo mes decisionnan, no sea lihé pa pone e preocupacionnan di mayornan un banda. Sea dispuesto pa scucha. (Proverbionan 23:22) Evaluá cuidadosamente e posibel consecuencianan di casa.—Compará cu Lucas 14:28.

Despues di a haci esei, kisas por bien ta cu bo ta dicidí cu bo kier casa tog. Claro, lo bo tin cu carga responsabilidad completo pa e decision ei. (Galationan 6:5) Si bo a haci tur esfuerso pa tuma na cuenta e punto di bista di bo mayornan, kisas nan lo ser impulsá pa apoyá bo decision, maske no cu masha gana. Pero si nan sigui papia di nan obhecionnan, purba pa no bira amargá of rabia. Corda: Bo mayornan stimá bo i ta interesá den bo futuro felicidad. Keda purba pa haci pas cu nan. Segun cu bo haci di bo matrimonio un éxito, kisas nan actitud lo suavisá.

Na otro un banda, si bo considerá seriamente tur loke bo mayornan tin di bisa i ta examiná francamente bo mes i e persona cu bo ta ansioso pa casa cuné, no keda sorprendí si bo yega n’e conclusion sorprendente di cu kisas bo mayornan tin rason tog.

[Notanan]

[Plachi na página 21]

Bo mayornan kisas ta haña cu bo ta muchu yong pa casa