Aids—Ki Speransa Tin pa Futuro?

FUERA dje falta di remedi pa cura of prevení infeccion cu HIV, tin otro factornan mas cu ta stroba e control dje malesa. Un di e factornan aki ta cu hopi hende ta dispuesto pa core rísico di ser contagiá, dor cu nan no kier cambia nan estilo di bida. Na Merca, por ehempel, e cantidad di infeccion nobo a keda mescos, apesar cu e cantidad di hende cu a haña AIDS ‘full-blown’ a bira ménos. E motibu, segun Associated Press, ta cu “hopi hende no ta haci caso di spiertamentu en cuanto prevencion.”

E nacionnan den desaroyo, unda tin, segun informe, rond di 93 porciento di esnan infectá cu HIV, tin problemanan adicional pa enfrentá e malesa. Hopi di e paisnan aki ta muchu pober pa percurá sikiera cuido básico di salú. Asta si e remedinan nobo ta disponibel den e paisnan aki—loke mayoria biaha no ta e caso—e gastunan pa un aña di tratamentu lo ta mas cu loke hopi dje hendenan ta gana den henter nan bida!

Sin embargo, ban suponé cu nan desaroyá un remedi nobo i barata cu lo ègt cura e malesa. Un remedi asina lo alcansá tur hende cu tin mester di dje? Probablemente no. Tur aña, segun e Fondo di Nacionnan Uní pa Mucha (UNICEF), rond di cuater miyon mucha ta muri di cincu malesa cu por ser prevení cu vacunanan barata existente.

Kico di hende infectá cu ta biba den paisnan unda e remedinan pa tratamentu no ta obtenibel? Ruth Mota, dje Programanan Internacional di Salú na Santa Cruz, California, a yuda organisá programanan di prevencion i cuido contra HIV den decenas di pais den desaroyo. E ta bisa: “Ami por bisa di experencia cu un disposicion mental positivo ta mes importante cu tin remedi disponibel. Mi conocé hende cu a biba cu HIV pa 10 te 15 aña, i cu nunca a tuma remedi. Remedi ta bon, pero cura ta muchu mas cu djis manda kímico den bo curpa. E tin di haci cu disposicion mental, apoyo social, spiritualidad i nutricion.”

Lo Tin un Solucion

Ta existí un motibu pa kere cu un dia lo caba cu AIDS? Sí. Nos por haña e mihó speransa den e palabranan cu hopi hende ta yama e Oracion di Nos Tata. Den e oracion ei, registrá den e buki bíblico di Mateo, nos ta roga pa Dios su boluntad sosodé na tera mescos cu na shelu. (Mateo 6:9, 10) No ta Dios su boluntad pa malesa plaga hende pa semper. Dios lo contestá e oracion ei, i asina trece un fin, no na AIDS so, sino tambe na tur otro malesa cu ta plaga humanidad. E ora ei, “ningun residente lo bisa: ‘Mi ta malu.’ ”—Isaías 33:24.

Miéntras tantu, e mihó estrategia ta prevencion. Pa hopi malesa, tin dos opcion: Bo por sea prevení nan of kisas cura nan. Cu HIV nos no tin e opcion ei. Nos por previnié, pero actualmente no tin cura p’e. Pakico pone bo bida na peliger? Cu AIDS sigur e dicho ta aplicá: ‘Mihó prevení cu lamentá.’

[Komentario na página 9]

“Cura ta muchu mas cu djis manda kímico den bo curpa. E tin di haci cu disposicion mental, apoyo social, spiritualidad i nutricion.” —Ruth Mota

[Kuadro/Plachi na página 9]

“E Congregacion Tabata Maraviyoso”

Apostel Pablo a urgi compañeronan cristian: “Laga nos obra loke ta bon pa cu tur, pero specialmente pa cu esnan relacioná cu nos den e fe.” (Galationan 6:10) E mama di Karen, mencioná den e promé artículo, ta relatá con e congregacion local di Testigonan di Jehova a reaccioná ora nan a haña sa cu Karen i Bill tabata malu debí na HIV. E ta conta: “E congregacion tabata maraviyoso. Ora Bill a haña pulmonia, Karen mes tabata malu i tabata purba soru pa Bill i p’e muchanan. E rumannan a haci nan cas limpi, a drecha nan auto i a laba nan paña. Nan a yuda cu asuntunan legal i cu mudamentu pa un otro cas. Nan a haci compra i a cushiná pa nan. Tabatin un berdadero abundancia di apoyo emocional, spiritual i material.”

[Plachi na página 8]

Fieldad den matrimonio lo por prevení infeccion cu HIV