Hobennan Sa Puntra . . .

Kico Mi Por Haci Ora Hende Ta Haci Bofon di Mi?

HOBENNAN cu tin un conducta of manera di bisti distinto for di nan pareunan lo por bira víctima di bofon cruel. Esaki ta e caso di hóbennan cristian, pasobra hopi bes nan conducta ta hopi diferente for di otro hóbennan. Acaso Cristo no a bisa di su berdadero siguidónan: “Si nan a persiguí mi, nan lo persiguí boso tambe”?—Juan 15:20.

Con esaki ta afectá hóbennan Testigo di Jehova? Nan ta haci bofon di algun di nan dor cu nan no ta celebrá cierto dianan di fiesta; otronan ta ser criticá dor cu nan no ta saludá bandera. Vários di nan asta ta ser molestiá dor cu nan no ta usa droga, of pasobra nan ta onrado i ta biba segun normanan moral di Bijbel.

Esaki no ta nada nobo. Sí, apostel Pedro a bisa cristiannan di promé siglo: “Dor cu boso no ta sigui core cu [hende dje nacionnan] . . . , nan ta confundí i ta sigui papia malu di boso.” (1 Pedro 4:4) Otro traduccionnan ta bisa cu nan ta “tenta boso” (Knox) of, cu “nan ta calumia boso.”—E Testament Nobo.

Nan a yega di haci bofon di bo pa motibu di bo conviccionnan religioso? Si ta asina, tuma curashi. Ta hopi ta pasa den esaki! Anto lo bo ta contentu pa sa cu bo por siña kico pa haci cu e situacion fastioso ei ora nan ta tenta bo pa bo fe.

Di Con Nan Ta Haci Bofon

Di con tin hende ta haci cherche di esnan kende nan creencia i conducta ta diferente for di esun di nan mes? Tin biaha bofonadó, mescos cu hende cu ta gusta intimidá otronan, ta insigur di nan mes. Kisas nan ta haci bofon di bo pa nan mes keda bon mirá den bista di nan pareunan. Pero probablemente, ora nan ta nan so, masha poco di nan lo ta interesá, of lo tin e curashi, pa criticá bo abiertamente.

Pero, manera Pedro a skirbi, algun bofonadó ta “confundí.” Sí, kisas bo conducta tin nan ègt tolondrá. Por ehempel, si bo ta un Testigo di Jehova, por ta cu di berdad nan ta haña straño cu bo no ta participá den actividadnan asociá cu cierto dianan di fiesta. Podisé nan a asta haña informacion robes tocante e Testigonan for di esnan cu ta determiná pa ta opositor.

Cua motibu cu por tin, ora bo haña un atake di mofa, lo bo ta di acuerdo cu e proverbio bíblico: “Ta existí esun cu ta papia sin pensa manera e hincánan di un spada.” (Proverbionan 12:18) Pero corda cu esnan cu ta papia asina, casi sigur no ta haci esei dor cu nan no ta gusta abo como persona. Ta mas probabel cu ta net loke e proverbio bíblico ta bisa nan ta haci: “papia sin pensa.”

Tog, ora hende haci bofon di bo, bo por sinti dolor mescos cu ta un spada a hinca bo. Kisas lo bo por sinti gana di comprometé bo fe pa e atake di insulto stop. Kico anto bo por haci ora nan ta haci bofon di bo pa motibu di bo creencianan?

Con pa Presentá un Defensa

Apostel Pedro a amonestá cristiannan: Semper sea “cla pa presentá un defensa dilanti tur hende cu ta exigí di boso un motibu p’e speransa den boso, pero haci esei huntu cu un genio suave i respet profundo.” (1 Pedro 3:15) Pa bo por presentá un defensa asina di bo fe, bo tin cu gana conocimentu exacto i comprendé e motibunan pakico bo ta kere loke bo ta kere.

Pero tambe bo mester siña con pa expresá bo mes cu “respet profundo” of, manera The Bible in Basic English ta bis’é, “sin orguyo.” E echo cu bo conocé Bijbel i su siñansanan no mester pone bo sinti bo superior na otronan. Al contrario, bo mester haci esfuerso pa cultivá e mésun actitud di apostel Pablo, kende a skirbi en cuanto su ministerio: “Mi a haci mi mes esclabo di tur, pa mi por gana e mayor parti di hende.”—1 Corintionan 9:19.

Si bo ta sinti bo muchu tímido pa defendé bo fe, no desesperá. Hopi hóben Testigo a sinti nan asina. Jamal ta conta: “Tempu mi tabata bai scol básico, mi no tabata sa con pa splica otronan di con mi no ta celebrá dianan di fiesta of no ta saludá bandera ni pakico mi ta bai di cas-pa-cas.” Kico a yud’é? “Mi tata a sigui yuda mi te ora finalmente mi por a splica e cosnan aki, anto esaki a haci un diferencia masha grandi.” Si bo ta hañ’é difícil pa splica bo creencianan na otronan, kisas bo por pidi un di bo mayornan of un otro miembro maduro dje congregacion cristian yuda bo capta e conocimentu di Dios bon-bon.—Efesionan 3:17-19.

Un hóben Testigo di 16 aña a bisa cu un programa di studio personal di Bijbel a yud’é haña e curashi pa defendé su mes na scol. “Promé cu esei, ora mi compañeronan di klas tabata tenta mi pasobra mi tabata un Testigo, mi no tabata sa kico pa bisa,” e ta admití. “Awor cu mi ta un evangelisadó di tempu completo, mi ta studia Bijbel hopi mas, i mi por duna un contesta. Loke ta yuda mi papia cu mi compañeronan di scol tocante mi creencianan ta cu mi ta keda al dia cu e edicionnan mas recien di E Toren di Vigilancia i Spierta!”

Naturalmente, cada situacion ta otro. P’esei, diferente circunstancia ta rekerí maneranan diferente pa trata cu nan. Sin embargo, ora bo sinti bo provocá dor di un remarke fastioso, nunca no ta bon pa “paga malu cu malu.” (Romanonan 12:17-21) Si bo insultá bek, no ta importá con pret e por parce, ta tira so bo ta tira mas palu den candela, loke lo por intensificá e tentamentu mas ainda. P’esei, algun hóben a preferá di ignorá e insulto numa.

Den algun caso, ora un remarke ta djis un chansa di bon gustu, lo ta asta prudente pa hari en bes di sinti bo ofendí. (Eclesiástes 7:9) Ora e bofonadó mira cu su palabranan tin masha poco of ningun efecto mes riba bo, kisas e ta asta stop di molestiá bo.—Compará cu Proverbionan 24:29; 1 Pedro 2:23.

Ki Ora pa Contestá

Pero tin biaha bo por duna un splicacion breve i cu tacto di bo creencianan. Un hóbencita di 13 aña a purba esaki i e tabatin hopi bon resultado. “Mi tabata na caminda pa bai mi klas,” el a conta, “anto vários alumno a cuminsá haci cherche di Testigonan di Jehova. Mi a sinti gana di contestá nan, pero nan a djis cana bai i a sigui hari mi, cu excepcion di un.” E alumno Testigo a splica: “Un mucha muher cu yama Jaimee a acercá mi i a bisa mi cu e tin e buki Bo por biba pa semper den Paradijs riba tera.a El a bisa cu el a lesa un bon pida for di dje i cu e ta interesá pa haña mas informacion tocante nos creencianan. Mi a cuminsá studia Bijbel cu Jaimee.” E hóben Testigo a sintié animá dor dje experencia aki, i a cuminsá papia cu otro hóbennan. El a bisa: “Tin cuater alumno di mi scol cu a mustra interes i cu mi sa bishitá regularmente. Mi tin sigur cu pronto nan lo cuminsá studia.”

Algun aña pasá un studiante den e pais africano di Liberia tabatin un experencia similar. Durante un les di sociologia, el a splica respetuosamente cu como un Testigo di Jehova, e ta kere den creacion, no den evolucion. Na promé instante hopi di su compañeronan di klas a critik’é mashá. Pero e maestro a lagu’é splica nan su creencianan. Despues di esei e maestro a aceptá e buki La vida... ¿cómo se presentó aquí? ¿Por evolución, o por creación?b

Despues di a lesa e buki, e maestro a bisa e alumnonan: “Esaki ta un buki incomparabel. E ta un dje mihó bukinan científico tocante creacion cu mi a yega di lesa.” Anto e maestro a splica cu pa e siguiente dos semesternan, e tabatin pensá di usa e buki Creación banda dje buki dje vak ei, i a bisa e alumnonan pa acudí na e Testigo pa haña nan ehemplar. El a laga decenas di buki, i hopi alumno a cambia nan punto di bista tocante Testigonan di Jehova!

Un Fe Poné na Prueba Ta un Fe Fuerte

Ta cierto cu tin biaha lo bo por sinti cu bo no por contra e gran cantidad di hende cu no ta compartí, of no ta apreciá, bo posicion basá riba Bijbel. (Compará cu Salmo 3:1, 2.) P’esei, ta sabí pa busca e compañerismo di esnan cu sí tin e mésun conviccion i creencianan cu bo. (Proverbionan 27:17) Pero kico si no tin ningun hóben cu tin e mésun fe cu bo na bo scol of den bo bario?

Den tal caso, corda cu bo mihó Amigu ta Jehova Dios, i cu e por apoyá bo. Pa miles di aña e tabata e blanco principal dje bofonnan di Satanas e Diabel. P’esei, nos por tin sigur cu bo ta alegrá Jehova su curason ora bo ta para firme pa bo fe. Si bo haci esei, bo ta dun’é oportunidad pa ‘contestá Satanas, esun cu ta desafi’é cu desprecio.’—Proverbionan 27:11.

Bo tin cu verwagt cu de bes en cuando bo fe lo ser poné na prueba. (2 Timoteo 3:12) Pero, apostel Pedro ta sigurá nos cu e calidad probá di nos fe ta “di hopi mas balor cu oro cu ta perecé apesar di ser probá pa candela.” (1 Pedro 1:7) P’esei, ora hende haci bofon di bo pa motibu di bo fe, mira esei como un oportunidad pa fortalecé bo fe i pa demostrá bo awante. Apostel Pablo a skirbi cu awante ta hiba na “un condicion aprobá.” (Romanonan 5:3-5) Sí, e deseo pa haña Jehova su fabor ta un motibu poderoso pa bo wanta ora nan haci bofon di bo pa motibu di bo fe!

[Notas]

[Plachi na página 17]

Abo por defendé bo fe?