Milan i Turin—Stadnan Dushi pa Bishitá

DJE CORESPONSAL DI SPIERTA! NA ITALIA

UN BISHITA na Italia por ta un dushi experencia. E cuminda, biña, paisahe, historia, cultura, música i idioma, tur ta combiná pa haci e pais aki inolvidabel. E zomer aki kisas ta un bon ocasion pa haci un recorido, foral pa esnan invitá pa asistí na un dje congresonan di Testigonan di Jehova cu lo ser tené einan. Laga nos haci awor un tour breve cu bo den dos stad italiano remarcabel i nan region.

Milan Ta e Berdadero Capital di Italia?

Pa loke ta comercio i industria, hopi bes hende ta considerá Milan e berdadero capital di Italia. Compará cu otro stadnan italiano, e no ta dje bon conocí ei pa monumentonan antiguo i arte. Na Milan, ta parce cu cos moderno ta dominá riba cos antiguo. No obstante, na Milan tin algun arte i arkitectura sobresaliente cu ta duna prueba di su pasado antiguo.

Rond di aña 600 P.E.C., e region a ser poblá dor dje galonan, un antiguo pueblo céltico cu a bini for dje área conocí awe como Francia. Na aña 222 P.E.C, e romanonan a conkistá e stad i a dun’é e nomber latin Mediolano, cu awor ta Milan. Atrabes di siglonan, e península italiano tabata un pais dividí i conkistá, i ta den di dos parti di siglo 19 numa el a alcansá independencia. Pues Milan a ser invadí masha hopi bes mes. Entre esnan cu a ocupá e área aki tabatin e lombardonan, un pueblo cu probablemente a originá di Scandinavia. Ta nan a duna nan nomber na e region Lombardia, di cua Milan ta e capital.

Ban Bishitá e Stad

E historia di Milan, mescos cu di e resto di Italia, ta dominá pa Iglesia Católico. Nada straño anto cu e catedral, of duomo, einan ta e di tres iglesia mas grandi na Europa i un dje iglesianan gótico mas grandi na mundu. E ta un 150 meter largu, cu vários toren i mas di 3.000 estatua i figuranan mahos. Construccion a cuminsá na aña 1385 i a tuma cincu siglo pa complet’é. Awe ora italianonan ta papia di un trabou cu ta durando demasiado tempu p’e bini cla, nan ta bisa cu e trabou ta manera “construccion dje catedral.”

Lectornan di Bijbel lo ta interesá pa mira e nomber di Dios, den e forma “Jahve,” te den haltu riba un bentana gótico dje fachada dje catedral. E pafó dje fachada ta decorá cu vários representacion di episodionan bíblico.

Castello Sforzesco ta un dje edificionan cu a bira símbolo dje stad. El a ser construí den siglo 15 dor di famia Sforza, e gobernantenan di Milan. Awe e ta acomodá vários museo. Un cuarto famoso tin pinturanan riba muraya cu algun hende ta bisa a ser pintá dor di Leonardo da Vinci, e artista i científico renombrá.

Entre da Vinci su pinturanan mas conocí tin un pintura riba muraya den e conbento di siglo 15 Santa Maria delle Grazie, construí den estilo di Renaissance. E pintura ta mustra Jesus na loke comunmente ta ser yamá e Último Cena i ta ser considerá como un dje pinturanan mas famoso di Renaissance. Pinacoteca di Brera, un otro museo, tin un dje coleccionnan italiano mas grandi di pintura di artistanan famoso manera Bellini, Raphael, Tintoretto i Caravaggio.

Studiantenan di Bijbel lo apreciá Pinacoteca Ambrosiana, cu ta un biblioteca i galeria di arte. Ei bo por haña e Fragmento di Muratori, un catalog latin dje Scritura Griego Cristian cu ta data di fin di siglo 2 E.C. E ta yuda confirmá e composicion dje cánon di e “Testament Nobo.”a

E mésun biblioteca ei tin un codex cu yama Ambrosian O 39 sup., cu ta data di fin di siglo 9 E.C., cu tin e nomber divino den forma dje Tetragramaton skirbí cu letter hebreo vierkant, manera ta ser mencioná den e Traduccion di Mundu Nobo dje Santu Scritura—Cu Referencia.b Tambe e biblioteca ta contené otro versionnan antiguo di Bijbel i huntu cu eseinan e Codex Atlántico, un coleccion di mas cu 2.000 pintura i notanan científico cu Leonardo da Vinci a haci.

Un sugerencia práctico pa bishitantenan corda ta cu hopi museo i biblioteca ta den edificionan antiguo, espléndido pa nan beyesa, pero cu ta yena fácilmente cu e fluho di turista cu tur dia ta crece mas i mas. Den hopi caso mester boek bishitanan di antemano, i tin museo cu tin un límite di ora pa bishita.

Promé cu nos bai for dje parti bieu dje stad, amantenan di música lo kier mira e pafó di La Scala, un dje casnan di ópera mas famoso na mundu. Asta si un bishitante no por asistí na un ópera, podisé lo e kier bishitá e museo, cu ta exhibí hopi suvenir di músiconan i cantantenan famoso.c

Un tour dje parti moderno di Milan, un dje stadnan mas ricu di Europa, cu su rascashelunan i stadion deportivo lo duna bo un bista general dje stad. Lo bo por apreciá e variedad, beyesa i historia largu di Milan. Bishitantenan cu gusta keiru i haci cómpras lo kier bishitá e inmenso Galleria Vittorio Emanuele II, cu su fabuloso plafon i dak di glas.

Lo bo keda contentu di a bini Milan! Pero awor, laga nos coge rumbo west pa bishitá completamente un otro gran stad di Italia.

Turin—Un Otro Hoya di Italia

Turin, un stad cu un poblacion di mas o ménos un miyon hende, ta ubicá na e parti mas smal di vaye Po, na pia dje parti west di Alpen, ménos cu 100 kilometer for di frontera frances. E ta rondoná pa un impresionante “amfiteater” di cerunan di alpino cu ta extendé te caminda wowo por mira. Casi mitar dje provincia di Turin ta consistí di ceru, mondi i vaye. Un careda di auto di ménos cu un ora ta hiba bo na resortnan den ceru. Den ménos cu dos ora, bo por ta na e playanan di Liguria.

Turin tabata existí promé cu e romanonan a yega. Originalmente e tabata un colonia di un pueblo cu yama taurini, despues el a bira un colonia romano, di cua bo ta haña su restonan den e parti histórico. Tin rasgonan di Edad Medio, pero mayor parti dje arkitectura dje stad ta data di siglo 17 i 18, i e estilo barok ta predominá entre e edificionan cu tin den e cayanan di centro di ciudad.

Turin tin un dje mihó museonan egipcio na mundu. Su coleccion excepcional di obhetonan for dje antiguo civilisacion cu a desaroyá a lo largu di riu Nilo, ta na di dos lugá despues di esun di Cairo.

Cu un bishita di djis un par di ora, bo por admirá e stad su centro histórico i artístico, e Palacio Madama, e Palacio Real i e Mole Antonelliana, cu te cu poco tempu ei tabata un dje edificionan mas haltu na Europa trahá pa metsla, midiendo 170 meter haltu. Siendo un monumento histórico dje stad, nan sa yam’é Turin su ekivalente dje Eiffel Toren di Paris. Tambe tin Parke Valentino, cu su hardinnan botánico, i tambe terenonan di yerba cortá, avenidanan i fonteinnan i un stad fortificá di Edad Medio, un reconstruccion pintoresco i exacto di un pueblito di Piedmonte di siglo 15.

Turin ta un dje centronan di fábrica mas importante di Italia. E ta cas dje compania di auto FIAT (Fabbrica Italiana Automobili Torino). Si bo ta interesá den wabi (autonan di ántes), Museo dell’Automobile, un tres kilometer pafó di stad, tin un coleccion di 150 wabi. Entre nan tin di marca Bugatti, Maserati i Lancia. Ta bisto di con casi mitar dje poblacion actual di Turin di un manera of otro ta gana nan pan di cada dia dje industria di auto.

Testigonan di Jehova na Turin i Milan

Pa siglonan largu e vayenan alrededor di Turin tabatin un concentracion haltu di waldense, e desendientenan dje predicadónan ambulante di Reformacion protestant. No ta un sorpresa anto cu durante un biahe pa Europa na aña 1891, Charles Taze Russell, kende tabata hiba delantera den e Studiantenan di Bijbel (manera Testigonan di Jehova tabata conocí e tempu ei), a tuma contacto cu un pastor local waldense, Daniele Rivoir. Russell a haci areglo cuné pa laga traducí vários publicacion pa yuda studia Bijbel na italiano. Aña 1903 tabatin formacion dje promé grupo di Studiantenan di Bijbel den e área aki. Ora Russell a regresá Italia na 1912, tabatin un 40 persona asina ta tene reunionnan cristian regular den un edificio na Pinerolo, cerca di Turin. I na Pinerolo, nan a tene e promé asamblea italiano na 1925.

Pues, e promé rastronan real di Studiantenan di Bijbel na Turin ta data for di añanan ’20 di siglo 20. Na 1946 a manda e promé misioneronan di Testigonan di Jehova Italia. Nan a yuda pone e trabou dje Testigonan riba un pia mas sólido. Na fin di añanan ’40 i principio di añanan ’50, nan a forma e promé congregacionnan den Turin. Awor tin un 13.000 Testigo di Jehova den e stad i su provincia. Pero kico di Milan?

Pa un tiki mas cu un aña, e oficina di sucursal cu a representá Testigonan di Jehova na Italia tabata na Milan. El a muda pa Roma na 1948. E promé asamblea despues di guera a ser tené den un teater na Milan na 1947. Un 700 hende for di tur parti dje pais tabata presente. Na 1963 a tene e Asamblea Internacional “Bon Nobo Eterno” na Milan su Vigorelli Velodrome, e tempu ei kisas e pista di baiskel mas famoso na Europa.

E predicacion di Testigonan di Jehova tabatin hopi éxito na Milan. Actualmente, tin 57 congregacion den e stad, cu mas di 4.000 evangelisadó activo, i tambe un Salon di Asamblea den un ex-teater.

Bishitá Milan i Turin por ta realmente recompensador. Cualkier dia cu bo bai einan, lo bo ricibí probablemente un caluroso bon biní i disfrutá di un experencia precioso.

[Nota]

[Kuadro na página 27]

E Mantel di Turin Ta Auténtico?

Kisas e rasgo mas famoso di Turin ta e mantel of ‘Sábana Santa’ cu segun algun hende ta e paña cu nan a lora e curpa di Cristo aden. Un buki di guia turístico ta splica: “E relikia sagrado mas famoso—i mas dudoso—di nan tur ta wardá den e duomo [catedral] di Turin.” E ta ser exhibí permanentemente den un dje capiyanan dje duomo, di lok herméticamente den un kashi di glas a prueba di bala, i yená cu ‘edelgas.’ E buki ta sigui bisa: “Sin embargo, na 1988 a pone fin na e mito dje mantel: un test di carbon pa determiná e fecha, a mustra cu e ta data no mas leu cu siglo 12.”d

[Nota]

[Plachi na página 24]

(Pa e teksto den su formato kompleto, wak e publikashon)

MILAN

TURIN

[Rekonosementu]

Mountain High Maps® Copyright © 1997 Digital Wisdom, Inc.

[Plachi na página 24]

Catedral di Milan

[Plachi na página 24]

Parce cu cos moderno ta predominá riba cos antiguo na Milan

[Plachi na página 25]

Na Milan, La Scala (ariba) i e Galleria Vittorio Emanuele II (man drechi)

[Plachi na página 25]

“Último Cena” di Leonardo da Vinci

[Rekonosementu]

Scala/Art Resource, NY

[Plachi na página 26]

Brug cu ta hisa na entrada di Turin su stad fortificá, trahá na estilo di Edad Medio

[Plachi na página 26]

Mole Antonelliana na Turin; su toren ta 170 meter haltu

[Plachi na página 26]

Riu Po ta pasa dor di Turin