Sera Amistat Nobo

Kiko Ta e Problema?

Si nos ta evitá trato ku sierto grupo di hende ku nos no ta gusta, esei lo por hiba na mas prehuisio. I si nos tin amistat solamente ku hende ku ta meskos ku nos, nos lo tin e tendensia di pensa ku nos manera di pensa, sinti i aktua so ta bon.

Prinsipio di Beibel

“Habri boso kurason hanchu.”—2 KORINTIONAN 6:13.

Kiko e versíkulo akí ta siña nos? Nos “kurason” por referí na nos emoshonnan i sintimentunan. Si nos ta gusta solamente hende ku ta meskos ku nos, nos ta serando e porta di nos kurason pa amistat nobo. Pues, pa nos evitá e problema ei, nos mester ta dispuesto pa sera amistat ku tur tipo di hende, asta ku hende ku ta diferente for di nos.

Dikon Ta Importante pa Sera Amistat Nobo?

Ora nos siña konosé otro hende bon, nos ta komprondé dikon nan ta hasi kos na un sierto manera. I ora nos haña amor pa nan, nos ta lubidá ku nan ta diferente. Nos ta haña mas apresio pa nan, i nan alegria ta bira nos alegria i nan tristesa ta bira nos tristesa.

Ban wak e ehèmpel di Nazaré. Un tempu, e no tabata gusta sierto grupo di imigrante. Nazaré ta splika kiko a yud’é kambia su punto di bista: “Mi a pasa tempu ku nan i traha ku nan. Mi a konosé hende ku ta kompletamente diferente for di loke otro hende a konta mi. Ora bo bira amigu di hende di otro kultura, bo ta siña pa no husga nan. Mas bien, bo ta siña stima nan i balorá nan.”

Kiko Bo Por Hasi?

Hasi esfuerso pa papia ku hende di un otro pais, rasa i kultura òf idioma. Bo por hasi lo siguiente:

Puntra nan pa konta bo algu di nan mes.
Invitá nan pa kome huntu ku bo.
Skucha bon ora nan ta konta bo algu di nan bida pa bo haña sa kiko ta importante pa nan.

Si bo purba di komprondé loke nan a pasa aden, esei por mehorá bo opinion di e grupo di hende ei.

Ehèmpel di Bida Real: Kandasamy i Sookammah (Canada)

“Nos a lanta na Suráfrika durante tempu di apartheid. Kada rasa mester a biba den komunidat separá. Esei a lanta sintimentu di prehuisio entre e diferente gruponan rasial. Nos no tabata di e grupo koló kla, i nos no tabata gusta hende koló kla pasobra algun di nan a trata nos komo si fuera nos ta inferior. E tempu ei, nos no tabata pensa ku nos tin prehuisio; nos tabata sinti ku nos tabata víktima di prehuisio.

Pa kambia nos aktitut, nos a tuma inisiativa pa habri nos kurason pa amigu di diferente antesedente. Ora nos a kuminsá sera amistat ku hende koló kla, nos a ripará ku nan no tabata dje diferente ei for di nos. Nos tur ta enfrentá e mesun tipo di problemanan i situashonnan.

Nos a asta laga un pareha kasá koló kla keda serka nos pa un tempu basta largu. Nos a siña konosé nan bon. I no a dura mashá ku nos a bira bon amigu. Komo resultado, nos opinion di hende koló kla a mehorá.”