Mustra Amor

Kiko Ta e Problema?

Prehuisio no ta kita di un dia pa otro. Meskos ku ta tuma tempu pa kombatí un vírùs, asina tambe ta tuma tempu pa kombatí prehuisio. Kiko bo por hasi pa eliminá prehuisio?

Prinsipio di Beibel

Kolekshon di plachi: 1. Un mener di Asia ta tene porta habrí pa un mener koló skur ku tin kòfi den su man por pasa 2. E mesun mener koló skur ta duna su koleganan kòfi, inkluso e señora hindú ku ta riba un potrèt ku nos a wak kaba.

“Bisti amor, pasobra e ta e laso perfekto di union.”—KOLOSENSENAN 3:14.

Kiko e versíkulo akí ta siña nos? Si bo hasi kos bon pa un otro hende, esei lo uni boso. Mas amor bo mustra pa otro hende, ménos prehuisio lo bo tin, i ménos lugá lo tin den bo kurason pa odio.

Kiko Bo Por Hasi?

Kolekshon di plachi: 1. Un hende muhé grandi koló kla ta haña yudansa for di un señora hindú ku ta karga un saku di kompra p’e i ta yud’é subi trapi. 2. E señora koló kla ta hiba buskuchi pa su bisiña, un mener di Asia, ku nos a mira kaba riba un potrèt.

Pensa riba algun kos spesífiko ku bo por hasi pa mustra amor pa hende di un grupo ku kisas bo no ta gusta dje hopi ei; no mester ta algu grandi. Kisas bo por hasi un òf mas di e kosnan menshoná den e lista aki bou:

Kada kos chikitu ku bo hasi pa mustra amor lo yuda bo vense prehuisio

Mustra bon manera na hende di e grupo ei. Kisas bo por habri porta pa un di nan òf bo por lanta pa nan sinta na bo lugá den konvoi.
Purba di tene un kòmbersashon simpel ku nan, aunke nan no por papia bo idioma bon ainda.
Si akaso nan hasi algu ku bo no ta komprondé, tene pasenshi ku nan.
Ora nan papia tokante nan problemanan, skucha nan bon i purba di komprondé nan problemanan.

Ehèmpel di Bida Real: Nazaré (Guinea-Bissau)

“Un tempu, mi no tabata gusta hende estranhero pasobra mi tabatin prehuisio. Mi tabata bai tras di loke hende ta bisa. Nan tabata bisa ku hopi hende estranhero tabata gaña gobièrnu pa nan haña yudansa, òf nan tabata bira delinkuente. P’esei, tabata difísil pa mi gusta nan. Pero mi no tabata pensa ku mi tin prehuisio, pasobra mayoria di hende tabatin e punto di bista ei di hende estranhero.

Ku tempu mi a ripará ku e motibu pakiko mi no tabata gusta hende estranhero tabata pasobra mi tabatin prehuisio. Pero loke mi a siña for di Beibel a yuda mi pa trata nan mihó. Awor mi no ta evitá nan mas. Mas bien, mi ta kumindá nan i papia ku nan pa mi konosé nan mihó. Awor mi opinion di nan a kambia, i mi ta sinti mi masha kómodo ku nan.”