Dikon Nos Ta Sufri, Bira Bieu i Muri?

Nos Ta Sufri pa Motibu di Loke e Promé Dos Hendenan Riba Tera A Hasi

“Pa medio di ún hende piká a drenta mundu, i morto pa medio di piká, i asina morto a pasa pa tur hende.”—ROMANONAN 5:12.

Ora Dios a krea Adam ku Eva, e promé dos hendenan riba tera, el a duna nan mente i kurpa perfekto. El a pone nan den un bunita paradeis riba tera ku yama e hòfi di Eden. El a bisa nan ku nan por kome di tur e palunan den e hòfi ku eksepshon di unu. Sinembargo, Adam ku Eva a skohe pa kome fruta di e palu ku Dios a bisa nan pa no kome di dje. Ora nan a hasi esei, nan a peka. (Génesis 2:15-17; 3:1-19) Despues ku nan a desobedesé, Dios a saka e pareha ei for di e hòfi i bida a bira duru pa nan. Ku tempu nan a haña yu i bida tabata duru pa nan yunan tambe. Nan tur a bira bieu i muri. (Génesis 3:23; 5:5) Nos ta bira malu, bira bieu i muri, pasobra nos tur ta bini for di Adam ku Eva.

Spiritu Malbado Tambe Ta Kontribuí na Nos Sufrimentu

“Henter mundu ta den poder di e Malbado.”—1 HUAN 5:19.

“E Malbado” ku e teksto ei ta papia di dje yama Satanas. E tabata un di e angelnan ku a rebeldiá kontra Dios. (Huan 8:44; Revelashon 12:9) Despues, mas angel a sigui Satanas. Nan ta ser yamá demoño. E angelnan malbado ei ta usa nan poder pa gaña hende i pa stroba nan di sirbi nan Kreador. E angelnan malbado ta influensiá hopi hende pa hasi kos malu. (Salmo 106:35-38; 1 Timoteo 4:1) Satanas i e demoñonan tin masha plaser den mira hende sufri.

Tin Ora Nos Ta Kousa Nos Mes Sufrimentu

“Kiko ku un hende sembra, esei lo e kosechá tambe.”—GALATIONAN 6:7.

Hopi bes nos ta sufri pa motibu di e piká ku nos a heredá di Adam ku Eva i pa motibu di e influensia ku Satanas tin riba mundu. Pero tin ora hende ta kousa nan mes sufrimentu. Kon asina? Ora nan hasi kos malu òf tuma mal desishon, hopi bes nan tin ku trata ku e konsekuensianan. Di otro banda, ora hende hasi kos bon, nan lo benefisiá di e bon resultadonan di nan akshonnan. Por ehèmpel, un esposo i tata onesto ku ta traha duru i ta stima su famia lo benefisiá di e bon resultado di su trabou i lo hasi su famia felis. Pero un esposo i tata ku ta floho, ta gusta hunga wega di plaka òf ta bebe di mas por pone su mes i su famia kai den pobresa. Pues, ta sabí di nos banda pa skucha nos Kreador. E ke pa nos haña e benefisionan ku ta bini di tuma bon desishon. Por ehèmpel, nos lo por disfrutá di “pas” abundante.—Salmo 119:165.

Nos Ta Sufri Pasobra Nos Ta Bibando den “e Último Dianan”

“Den e último dianan . . . hende lo stima nan mes, stima plaka; nan lo ta . . . desobediente na mayornan, . . . sin dominio propio, feros, sin amor pa loke ta bon.”—2 TIMOTEO 3:1-5.

Awe, hopi hende ta komportá nan mes presis manera e teksto ei ta bisa. E manera ku nan ta komportá nan mes ta duna nos mas prueba ku nos ta bibando den “e último dianan” di e mundu akí. Beibel ta bisa tambe ku den e último dianan lo tin guera, skarsedat di kuminda, temblor grandi i malesa. (Mateo 24:3, 7, 8; Lukas 21:10, 11) E kosnan akí por kousa hopi sufrimentu i morto.