Kiko Nos Mester Hasi pa Nos Ta Felis?
Nos tur—sea ku nos ta soltero òf kasá, yòn òf di edat—ke ta kontentu i satisfecho ku loke nos tin. Nos Kreador tambe ke pa nos sinti asina. P’esei, el a duna nos bon konseho.
Nos Mester Traha Duru
“Lag’é traha duru, hasiendo trabou onrado ku su mannan, pa e por tin algu di kompartí ku esun ku ta den nesesidat.”—EFESIONAN 4:28.
Nos Kreador ke pa nos tin un punto di bista positivo di trabou. Dikon? Un persona ku ta traha duru ta kontentu pasobra e por perkurá pa su mes i pa su famia. E lo por asta yuda un persona den nesesidat. Ademas, su doño di trabou lo ta kontentu kuné. Pues, un bon trahadó tin mas chèns di keda ku su trabou. Beibel ta bisa ku tur e benefisionan ku nos ta haña pasobra nos ta traha duru ta un “regalo di Dios.”—Eklesiástes 3:13.
Nos Mester Ta Onesto
“Nos tin e konfiansa ku nos tin un konsenshi limpi, i nos ke komportá nos mes na un manera onesto den tur kos.”—HEBREONAN 13:18.
Si nos ta onesto, nos lo sinti nos bon, nos lo tin pas mental i nos lo drumi mihó anochi. Ademas, otro hende lo konfia nos i respetá nos. Hende desonesto no ta disfrutá di ningun di e kosnan ei. De echo, nan konsenshi por molestiá nan i kisas nan ta biba konstantemente ku miedu pasobra hende lo por haña sa kiko nan ta hasi.
Nos Mester Tin un Punto di Bista Balansá di Plaka
“Laga boso manera di biba ta liber di amor pa plaka, i keda kontentu ku loke boso tin.”—HEBREONAN 13:5.
Nos mester di plaka pa kumpra kuminda i pa nos por tin otro kos nesesario. Sinembargo, “amor pa plaka” ta masha peligroso. Un hende ku ta stima plaka por usa mayoria di su tempu i energia pa kore tras di plaka. Ora un hende ta kore tras di plaka, su relashon ku su kasá por sufri, kisas e no tin sufisiente tempu pa pasa ku su yunan i e por asta bira malu. (1 Timoteo 6:9, 10) Ademas, un persona ku ta stima plaka por hañ’é fásil den tentashon pa ta desonesto. Un hòmber sabí a bisa: “Un hende fiel lo ta yen di bendishon, ma esun ku ta purá pa bira riku lo no keda sin kastigu.”—Proverbionan 28:20.
Nos Tin Ku Skohe e Mihó Edukashon
“Retené sabiduria sano i diskreshon.”—PROVERBIONAN 3:21.
Un bon edukashon por yuda nos bira un adulto i mayor responsabel. Pero djis sigui enseñansa superior pa haña bon edukashon lo no garantisá ku semper nos lo tin loke nos mester ni ku nos lo ta felis. Si nos ke tin éksito den tur loke nos ta hasi, nos mester di e edukashon ku Dios ta duna nos. Beibel ta bisa lo siguiente di un persona ku ta skucha loke Dios ta bisa: “Tur loke ku e hasi ta prosperá.”—Salmo 1:1-3.