Capitulo 12

Resistí Forsanan Spiritual Malbado

1. Con Jesus a reaccioná ora el a confrontá spiritunan malbado?

INMEDIATAMENTE despues di su bautismo, Jesucristo a bai den e desierto di Hudea pa haci oracion i meditá. Ei Satanas e Diabel a trata na pon’é violá Dios su ley. Sin embargo, Jesus a rechasá e tentacion dje Diabel i no a cai den su trampa. Jesus a confrontá otro spiritunan malbado durante su ministerio riba tera. Sin embargo, bes tras bes, el a reprendé i a resistí nan.—Lucas 4:1-13; 8: 26-34; 9:37-43.

2. Cua preguntanan nos lo considerá?

² Relatonan bíblico describiendo e confrontacionnan ei mester convencé nos cu forsanan spiritual malbado ta existí. Nan ta trata na gaña hende. Sin embargo, nos por resistí e spiritunan malbado aki. Pero for di unda e spiritunan malbado aki ta originá? Pakico nan ta trata na gaña hende? I ki métodonan nan ta usa pa logra nan meta? Hañando e contesta pa preguntanan manera esakinan lo yudá bo resistí e forsanan spiritual malbado.

SPIRITUNAN MALBADO—NAN ORIGEN I META

3. Con Satanas e Diabel a yega na existencia?

³ Jehova Dios a traha un multitud di criaturanan spiritual hopi promé cu el a crea hende. (Job 38:4, 7) Manera a ser splicá den Capítulo 6, un dje angelnan aki a desaroyá un deseo pa hende ador’é en bes di adorá Jehova. Siguiendo tras dje meta ei, e angel malbado aki a oponé i a calumniá e Creador, asta sugeriendo na e promé muher cu Dios tabata un gañador. Apropiadamente, anto, e criatura spiritual rebelde aki a yega di ta conocí como Satanas (resistidor) e Diabel (calumniador).—Génesis 3:1-5; Job 1:6.

4. Con cierto angelnan a peca den dia di Noe?

⁴ Mas despues, otro angelnan a uni cu Satanas e Diabel. Den e dianan dje homber hustu Noe, algun di esakinan a bandoná nan sirbishi den cielu i a materialisá na curpa humano pa satisfacé nan pasion pa relacion sexual cu muhernan terenal. Sin duda Satanas a influenciá e angelnan ei pa sigui e curso di desobedencia ei. E consecuencia tabata cu nan a bira tata di yunan mesclá [cu tabata mitar spiritu i mitar hende] yamá Nefilim, kendenan a bira abusadornan violento. Ora Jehova a ocasioná e gran Diluvio, esei a destruí humanidad corupto i e yunan innatural aki dje angelnan desobediente. E angelnan rebelde a scapa destruccion dor di desmaterialisá nan curpanan carnal i bolbe na e region spiritual. Pero Dios a restringuí e demoñonan aki dor di trata nan como personanan expulsá cu lo a biba den scuridad spiritual. (Génesis 6:1-7, 17; Hudas 6) No obstante, Satanas, “e gobernante dje demoñonan,” i su angelnan malbado a continuá cu nan rebelion. (Lucas 11:15) Kico ta nan meta?

5. Satanas i su demoñonan tin cua meta, i kico nan ta usa pa gara hende den trampa?

⁵ E meta malbado di Satanas i e demoñonan ta pa pone hende bai contra Jehova Dios. P’esei, e malbadonan aki a gaña, spanta, i atacá hende atrabes di henter historia humano. (Revelacion 12:9) Ehempelnan di tempu moderno ta confirmá cu atake di demoño ta mas malicioso awor cu nunca. Pa gara hende, e demoñonan hopi bes ta usa spiritismo den tur su formanan. Con e demoñonan ta usa e as aki, i con bo por defendé bo mes?

CON SPIRITUNAN MALBADO TA TRATA NA GAÑA BO

6. Kico ta spiritismo, i cua ta algun forma di dje?

⁶ Kico ta spiritismo? E ta enbolbimentu cu demoñonan, of spiritunan malbado, sea directamente of mediante un medium humano. Spiritismo ta haci pa demoñonan loke as ta haci pa yagdornan: E ta atraé nan víctima. I mescos cu un yagdor ta usa un variedad di as pa lok animalnan den su trampa, asina spiritunan malbado ta animá vários forma di spiritismo pa trece hende bou di nan control. (Compará cu Salmo 119:110.) Algun dje formanan aki ta divinacion [wak destino], magia, buscamentu di señal di futuro, bruheria, mara cu encanto, consultá cu medium spiritista, i comunicá cu e mortonan.

7. Con plamá spiritismo ta, i pakico e ta florecé asta den asina yamá paisnan cristian?

⁷ E as ta exitoso, pasobra spiritismo ta atraé hende rond mundu. Esnan cu ta biba den pueblonan den selva ta consultá curanderonan, i den ciudad trahadornan di oficina ta consultá astrólogonan. Spiritismo ta florecé asta den e asina yamá paisnan cristian. Investigacionnan ta indicá cu na Merca so, rond di 30 revista cu un circulacion combiná di riba 10.000.000 ehemplar ta dedicá na vários forma di spiritismo. Brasileñonan ta gasta riba 500 miyon dollar na obhetonan spiritístico tur aña. Sin embargo, 80 porciento di esnan cu ta asistí na centronan spiritístico di adoracion den e pais ei ta católiconan bautisá cu tambe ta bai misa. Ya cu algun clero ta practicá spiritismo, hopi hende religioso ta pensa cu practicando esei ta aceptabel pa Dios. Pero e ta?

PAKICO BIJBEL TA CONDENA E PRACTICA DI SPIRITISMO

8. Kico ta e punto di bista bíblico di spiritismo?

⁸ Si bo a ser siñá cu algun forma di spiritismo ta medionan pa haci contacto cu bon spiritu, lo bo keda sorprendí pa haña sa loke Bijbel ta bisa tocante spiritismo. Jehova su pueblo a ser spiertá: “Boso no acudí na e mediumnan spiritista, i no consultá pronosticadornan profesional di suceso, pa boso bira impuru dor di nan.” (Levítico 19:31; 20:6 27) E buki bíblico di Revelacion ta duna e spiertamentu cu “esnan cu ta practicá spiritismo” lo terminá den “e lago cu ta kima cu candela i swavel. Esaki ta nificá e segundo morto [eterno].” (Revelacion 21:8; 22:15) Tur forma di spiritismo ta ser desaprobá dor di Jehova Dios. (Deuteronomio 18:10-12) Pakico esei ta e caso?

9. Pakico nos por concluí cu mensahenan di actualidad for dje mundu di spiritu no ta bini di Jehova?

⁹ Jehova a manda bon spiritunan, of angelnan hustu, pa comunicá cu algun hende promé cu e Bijbel tabata completá. Desde cu e tabata completá, Dios su Palabra a proveé e guia cu hende tin mester pa sirbi Jehova aceptablemente. (2 Timoteo 3:16, 17; Hebreonan 1:1, 2) E no ta pasa por haltu di su Palabra santu dor di duna mensahenan na mediumnan spiritista. Tur mensahenan asina di actualidad for dje mundu di spiritu ta bini for di spiritunan malbado. E practicá di spiritismo por resultá cu bo ta ser molestiá dor di demoño of asta poseí dor di spiritunan malbado. P’esei, Dios amorosamente ta spierta nos pa no enbolbé nos den ningun practicá spiritista. (Deuteronomio 18:14; Galationan 5:19-21) Ademas, si nos sigui practicá spiritismo despues di conocé Jehova su punto di bista en cuanto di dje, nos lo ta tumando parti pa e spiritunan malbado rebelde i lo ta enemigunan di Dios.—1 Samuel 15:23; 1 Crónicanan 10:13, 14; Salmo 5:4.

10. Kico ta divinacion, i pakico nos mester evit’é?

¹⁰ Un forma popular di spiritismo ta divinacion—tratando na haña sa tocante e futuro of lo desconocí cu e yudansa dje spiritunan. Algun forma di divinacion ta astrologia, miramentu den bola di cristal, interpretacion di soñonan, lesamentu di plant’i man, i wakmento di destino cu e uso di cartanan. Hopi ta mira divinacion como un diberticion inofensivo, pero e Bijbel ta mustra cu adivinadornan i spiritunan malbado ta bai man den man. Por ehempel, Echonan 16:16-19 ta mencioná cu “un demoño di divinacion” a capacitá un cierto mucha muher pa practicá “e arte di pronosticacion.” Sin embargo, su abilidad pa profetisá e futuro a bai perdí ora e demoño a ser expulsá. Claramente, divinacion ta un as usá dor di demoño pa lok hende den nan trampa.

11. Con intentonan pa comunicá cu e mortonan ta hiba na un trampa?

¹¹ Si bo ta tristu debí n’e morto di un miembro di famia stimá of un amigu íntimo, fácilmente bo por wordu di lok dor di un otro as. Un medium spiritista kisas lo duná bo informacion special of por papia den un bos cu ta parce di ta esun dje persona morto. Tene cuidou! Intentonan pa comunicá cu e mortonan ta hiba na un trampa. Pakico? Pa motibu cu e mortonan no por papia. Manera sin duda bo ta corda, Dios su Palabra claramente ta bisa cu ora un persona muri e “ta bolbe bek na su suela; den e dia ei su pensamentunan ta perecé.” E mortonan “no ta conciente di nada en absoluto.” (Salmo 146:4; Eclesiástes 9:5, 10) Ademas, realmente ta e demoñonan ta esnan cu manera ta conocí a yega di imitá e bos di defuntu i duna informacion na un medium spiritista tocante esun cu a muri. (1 Samuel 28:3-19) Pues, “cualkier persona cu ta informá cerca e mortonan” ta cai den e trampa di spiritunan malbado i ta actuando contrario cu e boluntad di Jehova Dios.—Deuteronomio 18:11, 12; Isaías 8:19.

FOR DI ATRAE PA ATACA

12, 13. Ki evidencia tin cu e demoñonan ta persistí den tenta i molestiá hende?

¹² Ora bo bai di acuerdo cu e conseho dje Palabra di Dios en cuanto spiritismo, bo ta rechasá e as dje demoñonan. (Compará cu Salmo 141:9, 10; Romanonan 12:9.) Esaki ta nificá cu e spiritunan malbado lo stop di trata di gará bo? Di ningun manera! Despues di a tenta Jesus tres biaha, Satanas “a retirá for di dje te na un otro tempu cumbiniente.” (Lucas 4:13) Di igual manera, spiritunan obstiná no solamente ta atraé hende sino tambe ta atacá nan.

¹³ Corda nos consideracion anterior dje atake di Satanas riba Dios su sirbidor Job. E Diabel a causa e pérdida di su bestianan doméstico i e morto di mayoria di su sirbidornan. Satanas asta a mata Job su yunan. Siguientemente, el a dal Job mes cu un malesa doloroso. Pero Job a wanta su integridad na Dios i a ser bendicioná grandemente. (Job 1:7-19; 2:7, 8; 42:12) For dje tempu ei, e demoñonan a haci algun hende muda of ciegu i a sigui gosa dje sufrimentu di hende. (Mateo 9:32, 33; 12:22; Marco 5:2-5) Awe, informenan ta mustra cu demoñonan ta molestiá algun hende sexualmente i ta hiba otronan na locura. Nan ta impulsá asta otronan na asesinato i suicidio, locual ta picánan contra Dios. (Deuteronomio 5:17; 1 Juan 3:15) No obstante, miles di hende na un tempu cogé den trampa dje spiritunan malbado aki tabata capas pa libra nan mes for di nan. Con esaki por tabata posibel pa nan? Nan a haci esaki dor di dal pasonan vital.

CON PA RESISTI SPIRITUNAN MALBADO

14. Na armonia cu e ehempel dje cristiannan efesio di promé siglo, con abo por resistí spiritunan malbado?

¹⁴ Cua ta un manera cu bo por resistí e spiritunan malbado i protehá bo mes i bo famia for di nan trampa? E cristiannan di promé siglo den Efeso kende a practicá spiritismo promé cu nan a bira creyente a dal pasonan positivo. Nos ta lesa cu “un bon cantidad di esnan cu a practicá artenan di magia a trece nan bukinan huntu i a kima nan dilanti tur hende.” (Echonan 19:19) Asta si bo no a practicá spiritismo, deshací di cualkier cos cu tin uso spiritístico of cu ta duna indicacion di spiritismo. Esaki ta incluí buki, revista, video, poster, grabacion musical, i obhetonan usá pa e propósito di spiritismo. Esei tambe ta incluí imágennan, amuletonan i otro artículonan cu ta ser bistí pa proteccion, i regalonan ricibí for di practicantenan di spiritismo. (Deuteronomio 7:25, 26; 1 Corintionan 10:21) Pa ilustrá: Un pareha casá na Tailandia pa hopi tempu a ser molestiá pa demoñonan. Despues nan a deshací di obhetonan asociá cu spiritismo. Kico tabata e resultado? Nan a ser librá dje atakenan demoniaco i despues a haci berdadero progreso spiritual.

15. Pa resistí forsanan spiritual malbado, cua ta un otro paso necesario?

¹⁵ Pa por resistí spiritunan malbado, un otro paso necesario ta pa aplicá e conseho di apostel Pablo pa bisti e armadura spiritual completo percurá dor di Dios. (Efesionan 6:11-17) Cristiannan mester fortificá nan defensa contra spiritunan malbado. Kico e paso aki ta incluí? “Riba tur cos,” Pablo a bisa, “tuma e escudo grandi di fe, cu cua lo bo ta capas pa paga tur e flechanan cendí dje malbado.” En berdad, mas fuerte bo fe ta, mas grandi lo ta bo abilidad pa resistí forsanan spiritual malbado.—Mateo 17:14-20.

16. Con bo por fortalecé bo fe?

¹⁶ Con bo por fortificá bo fe? Dor di sigui studia e Bijbel i aplicá su conseho den bo bida. E forsa di un persona su fe ta dependé di un gran parti riba e firmesa di su base—e conocimentu di Dios. Bo no ta di acuerdo cu e conocimentu exacto cu bo a gana i a considerá seriamente segun cu bo a studia e Bijbel a edificá bo fe? (Romanonan 10:10, 17) P’esei, sin duda, segun cu bo ta sigui e studio aki i haci’é bo custumber pa asistí na e reunionnan di Testigonan di Jehova, bo fe lo ser fortificá asta mas. (Romanonan 1:11, 12; Colosensenan 2:6, 7) Lo e ta un proteccion poderoso contra atakenan di demoño.—1 Juan 5:5.

17. Cua otro pasonan mas por ta necesario pa resistí forsanan spiritual malbado?

¹⁷ Cua otro pasonan mas un persona cu ta determiná pa resistí e forsanan spiritual malbado lo por tuma? Cristiannan di Efeso tabatin mester di proteccion pasobra nan tabata biba den un stad cu tabata pestá cu demonismo. P’esei, Pablo a bisa nan: “Ocupá boso cu oracion na tur ocasion den spiritu.” (Efesionan 6:18) Siendo cu nos ta biba den un mundu pestá cu demoño, hacimentu di oracion intensamente pa Dios su proteccion ta esencial pa resistí spiritunan malbado. (Mateo 6:13) Den esaki e yudansa spiritual i oracion di ancianonan nombrá den e congregacion cristian ta útil.—Santiago 5:13-15.

MANTENE BO LUCHA CONTRA SPIRITUNAN MALBADO

18, 19. Kico por ser hací si e demoñonan ta molestiá un persona atrobe?

¹⁸ Sin embargo, asta despues di a dal e pasonan básico aki, algun persona a ser molestiá dor di spiritunan malbado. Por ehempel, un homber na Côte d’Ivoire a studia e Bijbel cu Testigonan di Jehova i a destruí tur su amuletonan. Despues di esei, el a haci excelente progreso, a dedicá su bida na Jehova, i a ser bautisá. Pero un siman despues di su bautismo, e demoñonan a cuminsá molesti’é atrobe, i stemnan a bis’é pa bandoná su fe recien hañá. Si esaki pasa cu bo, esei lo nificá cu bo a perde e proteccion di Jehova? No necesariamente.

¹⁹ Aunke e homber perfecto Jesucristo tabatin proteccion divino, el a tende e bos dje criatura spiritual malbado Satanas e Diabel. Jesus a mustra kico pa haci den tal caso. El a bisa e Diabel: “Bai djaki, Satanas!” (Mateo 4:3-10) Di igual manera, bo mester nenga di scucha e bosnan dje mundu di spiritu. Resistí spiritunan malbado dor di inbocá Jehova pa yudansa. Sí, haci oracion na bos haltu usando Dios su nomber. Proverbionan 18:10 ta bisa: “E nomber di Jehova ta un toren fuerte. Den dje e hustu ta core drenta i ta ser duná proteccion.” E homber cristian na Côte d’Ivoire a haci esaki, i e spiritunan malbado a stop di molesti’é.—Salmo 124:8; 145:18.

20. En resúmen, kico bo por haci pa resistí e spiritunan malbado?

²⁰ Jehova a permití e spiritunan malbado pa keda existí, pero e ta mustra su poder, particularmente na fabor di su pueblo, i su nomber ta ser declará na tur parti dje tera. (Exodo 9:16) Si bo keda pegá cu Dios, bo no mester tin miedu di spiritunan malbado. (Númeronan 23:21, 23; Santiago 4:7, 8; 2 Pedro 2:9) Nan poder ta limitá. Nan a ser castigá den e dia di Noe, a ser sacá for di cielu den tempu reciente, i awor ta sperando e huicio final. (Hudas 6; Revelacion 12:9; 20:1-3, 7-10, 14) En realidad, nan tin un teror pa nan binidero destruccion. (Santiago 2:19) Pues sea cu spiritunan malbado ta trata na atraé bo cu un of otro sorto di as of ta atacá bo den cualkier manera, bo por resistí nan. (2 Corintionan 2:11) Evitá tur forma di spiritismo, aplicá e conseho dje Palabra di Dios, i busca Jehova su aprobacion. Haci esaki sin tarda, pasobra bo bida ta dependé di si bo ta resistí e forsanan spiritual malbado!

TEST BO CONOCIMENTU

Con spiritunan malbado ta trata na gaña hende?

Pakico e Bijbel ta condená spiritismo?

Con un persona por libra su mes for di forsanan spiritual malbado?

Pakico bo mester keda resistí spiritunan malbado?

[Plachi na página 110]

Con bo ta mira spiritismo den su vários formanan?